“Mina Nɔ Fɛɛ Nɔ ni He Hiaa Mi Lɛ”

TAAKƐ World Health Organization (Jeŋ Hewalɛnamɔ Gbɛjianɔtoo) lɛ amaniɛbɔɔ ko tsɔɔ lɛ, abuɔ akɔntaa akɛ amrɔ nɛɛ nɔnyɛɛ miigba gbɔmɛi ni fa fe akpekpei 120 naa yɛ jeŋ fɛɛ. Daa afi lɛ, gbɔmɛi akpekpe kome gbeɔ amɛhe, ni mɛi akpekpei 10 kɛmiishɛ akpekpei 20 kaa akɛ amɛbaafo amɛwala sɛɛ. Mɛɛ yelikɛbuamɔ yɔɔ kɛha mɛi ni naa amanehulu yɛ nɔnyɛɛ mli lɛ? Tsofafeemɔ baanyɛ aba piŋmɔ lɛ shi, ni henumɔŋ sɛɛfimɔ he hiaa waa. Kɛfata he lɛ, mɛi ni kɛ shihilɛ nɛɛ kpeɔ lɛ ateŋ mɛi komɛi ená yelikɛbuamɔ lolo kɛjɛ Biblia kasemɔ woji kpakpai ni Yehowa Odasefoi kalaa lɛ amli, taakɛ wolo ni nyiɛ sɛɛ, ni aŋma kɛjɛ France lɛ tsɔɔ lɛ.

“Etsɛko tsɔ nɛ, ni minu he akɛ ehe ehiaaa ni makã he mahi wala mli. Misɔle miha Nyɔŋmɔ akɛ eha ni magbo. Etamɔ nɔ ni migbo yɛ mimli gbɛ. Misɔle waa miha Yehowa kɛha gbɛtsɔɔmɔ. Mikpɛ miyiŋ hu akɛ makane 2002 Yearbook of Jehovah’s Witnesses lɛ, ni migbe ekanemɔ naa yɛ gbii etɛ mli. Kɛ́ makɛɛ lɛ, ewo mi hewalɛ waa ni ewo mihemɔkɛyeli lɛ mli hewalɛ.

“Mitao saji amli kɛjɛ Buu-Mɔɔ kɛ Awake! woji tɛtrɛbii lɛ amli, ni kwɛ bɔ ni minaa kpɛ mihe ha! Mikɛ nɔ ni fe afii 15 ekane woji tɛtrɛbii nɛɛ daa, shi minaaa bɔ ni emli saji lɛ ji nɔ ni woɔ mɔ hewalɛ ni ekanyaa mɔ ehaa. Amɛmli eyi obɔ kɛ suɔmɔ—su ko ni afɔɔɔ namɔ yɛ nɛkɛ gbii nɛɛ amli. Mina nɔ fɛɛ nɔ ni he hiaa mi lɛ.”

Biblia lɛ kɛɔ akɛ: “Yehowa bɛŋkɛɔ mɛi ni tsuii ekumɔ lɛ, ni ehereɔ mɛi ni mumɔ tswiaa shi kɛ dɔlɛ lɛ.” (Lala 34:19) Ŋwanejee ko bɛ he akɛ, mɛi fɛɛ ni “tsuii ekumɔ” loo “mumɔ tswiaa shi kɛ dɔlɛ lɛ” baanyɛ aná hewalɛwoo kɛ hiɛnɔkamɔ kɛha wɔsɛɛ be kɛjɛ Biblia lɛ mli. Yehowa Odasefoi jaa Biblia kasemɔ woji koni amɛkɛye amɛbua mɛi ni ehia amɛ lɛ, koni miishɛjemɔ ni jɛ Nyɔŋmɔ mumɔ lɛ mli lɛ he aba sɛɛnamɔ kɛha amɛ.