Ani Esa akɛ Mibi Aya Skul?

EJI onyɛɛɛ okane wiemɔi ni yɔɔ baafa nɛɛ kulɛ, te osusuɔ akɛ obaanu he oha tɛŋŋ? Ni kɛ́ onyɛɛɛ owie wiemɔ titri ni awieɔ yɛ omaŋ lɛŋ lɛ hu? Ŋɔɔ lɛ akɛ onyɛɛɛ otsɔɔ he ni omaŋ lɛ yɔɔ yɛ je lɛ shikpɔŋ he mfoniri ni atɛŋ lɛ nɔ? Gbekɛbii babaoo daraa yɛ shihilɛ ni tamɔ nakai nɔŋŋ mli. Ni obi lɛ hu?

Ani esa akɛ obi aya skul? Yɛ maji pii amli lɛ, anyɛɔ gbekɛbii anɔ koni amɛya shishijee skul kɛ nɔtsamɔ skul, ni bei pii lɛ, amɛyaa lɛ yaka ni aheee nɔ ko. Convention on the Rights of the Child (Kpee Kɛha Hegbɛi ni Gbekɛ Yɔɔ) lɛ buɔ skulyaa akɛ shishijee hegbɛ ko. Ni nakai nɔŋŋ ji Universal Declaration of Human Rights (Jeŋ Muu Fɛɛ Adesai Ahegbɛi Jajemɔ) hu. Shi, yɛ shikpɔji komɛi anɔ lɛ, ekolɛ, skul nyɛŋ afee nɔ ni ayaa lɛ yaka, ni ebaanyɛ efee nɔ ni kɛ shika he naagbai bafɔɔ fɔlɔi anɔ. Nyɛhaa wɔsusua sane nɛɛ he yɛ be mli ni wɔhaa Kristofoi fɔlɔi ni taoɔ ni amɛbii ale nikanemɔ kɛ niŋmaa lɛ hiɔ wɔjwɛŋmɔ mli, kɛji amɛaafee nakai kɛtsɔ skulyaa nɔ loo kɛtsɔ gbɛ kroko nɔ lɛ.

Biblia Mli Nɔkwɛmɔnii ni Kɔɔ Nikanemɔ kɛ Niŋmaa He

Nyɔŋmɔ tsuji babaoo ni atsĩ amɛ tã yɛ Biblia lɛ mli lɛ nyɛɔ amɛkaneɔ nii ni amɛŋmaa nii. Yesu bɔfoi ni ji Petro kɛ Yohane ji Yudafoi wolɛi, shi amɛŋma Biblia woji lɛ yɛ Hela wiemɔ mli, nɔ ni jeee Galileabii awiemɔ lɛ. * Eyɛ faŋŋ akɛ, amɛfɔlɔi kwɛ koni amɛbii lɛ aná shishijee skul tsɔsemɔ. Tookwɛlɔ David, okwaafonyo Amos, kɛ Yesu nyɛ bi Yuda, ni ekolɛ eji kapintɛfonyo lɛ fata Biblia ŋmalalɔi krokomɛi ni yɔɔ nakai shihilɛ lɛ nɔŋŋ mli lɛ ahe.

Gbɔmɔ ni ji Hiob lɛ nyɛɔ ekaneɔ nii ni eŋmaa nii, ni Biblia wolo ni egbɛi kã nɔ lɛ tsɔɔ akɛ eyɛ jeŋ nilee he shishinumɔ ko. Ekolɛ, eyɛ nyɛmɔ ni akɛŋmaa lalafoo wiemɔi hu, ejaakɛ ewiemɔi ni atsɛ yisɛɛ yɛ Hiob wolo lɛ mli lɛ tamɔ lalafoo wiemɔ. Ni wɔle akɛ mra be mli Kristofoi lɛ le nikanemɔ kɛ niŋmaa ejaakɛ ana Ŋmalɛ naa saji bibii ni baanyɛ afee nɔ ni amɛŋmala lɛ ekomɛi yɛ nibii ni akɛ sũ fee ni ekumɔ lɛ ahe.

Wolokasemɔ He Miihia Kristofoi

Esa akɛ Kristofoi fɛɛ aya amɛhiɛ yɛ Biblia he nilee mli kɛji akɛ amɛaasa Nyɔŋmɔ hiɛ. (Filipibii 1:9-11; 1 Tesalonikabii 4:1) Ŋmalɛi lɛ kɛ Biblia kasemɔ woji ni wɔkɛaatsu nii jogbaŋŋ lɛ baanyɛ aha mumɔŋ shweremɔ aya hiɛ. Akɛni Nyɔŋmɔ kɛ e-Wiemɔ ni aŋma lɛ eha wɔ hewɔ lɛ, ekpaa ejálɔi agbɛ akɛ amɛbaafee mɛi ni le nikanemɔ kɛ niŋmaa bɔ ni amɛaanyɛ. Kɛ́ wɔkane Biblia lɛ kɛ shishinumɔ lɛ, ehaa efeɔ mlɛo kɛhaa wɔ akɛ wɔkɛ emli ŋaawoo lɛ baatsu nii. Eji anɔkwale akɛ, esa akɛ wɔkane efãi komɛi shii abɔ bɔni afee ni wɔnu otii lɛ ashishi ni wɔnyɛ wɔjwɛŋ amɛnɔ.—Lala 119:104; 143:5; Abɛi 4:7.

Daa afi lɛ, Yehowa webii anine shɛɔ woji ni aŋmala ni ato he gbɛjianɔ yɛ “tsulɔ anɔkwafo kɛ nilelɔ” lɛ kudɔmɔ shishi lɛ baafai ohai abɔ nɔ. (Mateo 24:45-47) Nakai woji lɛ wieɔ weku shihilɛ, kusumii, jamɔ, jeŋ nilee, kɛ saji krokomɛi ahe. Nɔ ni he hiaa fe fɛɛ lɛ, Ŋmalɛ naa ŋaawoo  ni kɔɔ mumɔŋ nibii ahe yɛ mli. Kɛ́ obii lɛ leee nikanemɔ lɛ, saji ni he hiaa babaoo baaŋmɛɛ amɛ.

Adesai ahe yinɔsane ni wɔkaseɔ lɛ he miihia ejaakɛ eyeɔ ebuaa wɔ ni wɔnuɔ nɔ hewɔ ni Nyɔŋmɔ Maŋtsɛyeli lɛ he hiaa wɔ lɛ shishi. Shikpɔŋ he saji ahe shishijee nilee lɛ hu hi. Biblia lɛ wieɔ hei babaoo he, tamɔ Israel, Mizraim, kɛ Hela. Ani obi lɛ nyɛɔ etsɔɔ he ni amɛyɔɔ yɛ shikpɔŋ he mfoniri lɛ nɔ? Ani ebaanyɛ ena he ni lɛ diɛŋtsɛ emaŋ lɛ yɔɔ? Kɛ́ mɔ ko nyɛɛɛ ale bɔ ni akɛ shikpɔŋ he mfoniri tsuɔ nii haa lɛ, ebaanyɛ eba nyɛmɔ ni mɔ lɛ yɔɔ ni ekɛaatsu eshiɛmɔ nitsumɔ lɛ he nii yɛ he ni akɛha lɛ lɛ shi.—2 Timoteo 4:5.

Hegbɛi ni Yɔɔ Asafo lɛ Mli

Kristofoi onukpai kɛ asafoŋ sɔɔlɔi yɛ gbɛnaa nii pii ni biɔ nikanemɔ. Ákɛ nɔkwɛmɔnɔ lɛ, nifeemɔi komɛi yɛ ni esa akɛ asaa he yɛ mli kɛha asafoŋ kpeei. Esa akɛ ahiɛ woji ni akɛhaa kɛ oniatsumɔi lɛ ahe akɔntaabuu. Kɛ́ mɔ ko náaa shishijee skul tsɔsemɔ lɛ, ebaawa waa kɛha mɔ lɛ akɛ eeetsu gbɛnaa nii nɛɛ he nii jogbaŋŋ.

Nitsulɔi ni kɛ amɛhe eha sɔmɔɔ yɛ Betel shiai amli yɛ je lɛŋ fɛɛ. Bɔni afee ni mɛi ni kɛ amɛhe eha nɛɛ anyɛ amɛkɛ mɛi ashara jogbaŋŋ ni amɛtsu amɛsɔ̃i ahe nii, tamɔ woji ashishitsɔɔmɔ kɛ tsɔji asaamɔ lɛ, esa akɛ amɛnyɛ amɛkane wiemɔ titri ni awieɔ yɛ maŋ ni amɛyɔɔ mli lɛ mli ni amɛŋma. Kɛ́ obii lɛ baaná hegbɛi ni tamɔ enɛɛmɛi amli ŋɔɔmɔ lɛ, no lɛ shishijee wolokasemɔ he miihia. Mɛni ji yiŋtoi krokomɛi ahewɔ ni esa akɛ oha obi aya skul lɛ?

Ohia kɛ Apasa Hemɔkɛyeli

Yɛ shihilɛi komɛi amli lɛ, gbɔmɛi ni yeɔ ohia lɛ baanyɛ afee mɛi ni nyɛɛɛ nɔ ko afee. Shi kɛlɛ, yɛ shihilɛi krokomɛi amli hu lɛ, wolokasemɔ bɔ ni sa baanyɛ aye abua wɔ kɛ wɔbii lɛ koni wɔtsi wɔhe kɛjɛ piŋmɔi ni he ehiaaa ahe. Mɛi fioo ni leee nikanemɔ kɛ niŋmaa lɛ nyɛɔ amɛbɔɔ amɛhe mɔdɛŋ. Bei komɛi lɛ, gbekɛbii kɛ onukpai po gboiɔ ejaakɛ shika fioo ni baa amɛdɛŋ lɛ haaa amɛnyɛ amɛtao tsofafeemɔ mli yelikɛbuamɔ. Bei pii lɛ, niyenii kpakpa ni anáaa aye kɛ shia kpakpa ni anáaa awɔ mli lɛ ji shihilɛ ni mɛi babaoo ni tee skul fioo loo amɛyaaa skul lɛ yɔɔ mli. Yɛ shihilɛi nɛɛ agbɛfaŋ lɛ, wolokasemɔ loo kɛ hoo lɛ nyɛmɔ ni akɛkaneɔ nii ni akɛŋmaa nii ni aaaná lɛ baanyɛ aye abua.

Nikanemɔ kɛ niŋmaa hu nyɛɔ ebaa apasa hemɔkɛyeli ni aaasumɔ akɛ aná lɛ shi. Eji anɔkwale akɛ, apasa hemɔkɛyelii egbɛ eshwa waa yɛ mɛi ni le woloŋ kɛ mɛi ni leee woloŋ lɛ fɛɛ ateŋ. Shi mɛi krokomɛi baanyɛ alaka mɛi ni leee woloŋ lɛ, ni amɛkɛ amɛ baaye yɛ gbɛ ni ejaaa nɔ, akɛni amɛnyɛɛɛ amɛkane woji ni kpáa nakai apasai lɛ ahe mama lɛ hewɔ. No hewɔ lɛ, amɛhiɛɔ apasa hemɔkɛyelii amli babaoo ni amɛheɔ amɛyeɔ akɛ mumɔi atsɛmɔ tsalɔ ko baanyɛ atsá mɔ yɛ naakpɛɛ gbɛ nɔ.—5 Mose 18:10-12; Kpojiemɔ 21:8.

Wolokasemɔ Jeee Nɔ ni Yɔɔ Kɛha Nitsumɔ Pɛ

Mɛi babaoo susuɔ akɛ yiŋtoo titri ni yɔɔ wolokasemɔ sɛɛ ji ni amɛná shika. Ni kɛlɛ, mɛi komɛi ni le woloŋ lɛ tsuuu nii loo amɛnáaa shika bɔ ni sa ni baatsu shishijee hiamɔ nii lɛ ahe nii. No hewɔ lɛ, ekolɛ fɔlɔi komɛi baasusu akɛ gbekɛ ni aaaha eya skul lɛ he bɛ sɛɛnamɔ. Shi skulyaa feɔ babaoo fe nɔ ni eeeye ebua mɔ ko ni ená  shika pɛ; eyeɔ ebuaa gbekɛbii kɛha shihilɛ mli nibii fɛɛ. (Jajelɔ 7:12) Kɛ́ mɔ ko nyɛɔ ewieɔ wiemɔ titri ni awieɔ yɛ maŋ ni eyɔɔ mli lɛ mli, ni ekaneɔ nii, ni eŋmaa lɛ, no lɛ ekɛ tsofafeelɔi, nɔyeli hegbɛi, loo shikatoohe he nitsulɔi asharamɔ baafee nɔ ni waaa, kɛ nɔ ni efɔɔ feemɔ daa, fe nɔ ni eeeshe gbeyei.

Yɛ hei komɛi lɛ, akɛ gbekɛbii ni leee woloŋ lɛ yawoɔ mɔ ko shishi kɛha nitsumɔ kasemɔ yɛ ŋtayaatswaa, wuoyaa, nikpɛɛ, loo nitsumɔi krokomɛi amli. Nitsumɔ ko kasemɔ lɛ ji nifeemɔ kpakpa, shi kɛ́ nɛkɛ gbekɛbii nɛɛ eyaaa skul lɛ, no lɛ ekolɛ amɛkaseŋ nikanemɔ kɛ niŋmaa ojogbaŋŋ. Ŋwanejee ko bɛ he akɛ kɛ́ amɛnine shɛ shishijee wolokasemɔ nɔ ni no sɛɛ lɛ amɛkase nitsumɔ ko lɛ, no lɛ amɛbaanyɛ amɛtsi amɛhe kɛjɛ nifeemɔi ni ejaaa ni aaafee amɛ lɛ he, ni amɛbaaná miishɛɛ babaoo yɛ shihilɛ mli.

Yesu ni ji Nazarenyo lɛ ji kapintɛfonyo ni eka shi faŋŋ akɛ ekase nitsumɔ lɛ yɛ etsɛ, ni ji Yosef ni ŋɔ lɛ efee ebi lɛ ŋɔɔ. (Mateo 13:55; Marko 6:3) Yesu le nikanemɔ kɛ niŋmaa hu, ejaakɛ beni eye afii 12 po lɛ, no ji be mli ni enyɛ́ ekɛ hii ni le woloŋ lɛ ná sanegbaa ni shishinumɔ yɔɔ mli yɛ sɔlemɔwe lɛ. (Luka 2:46, 47) Yɛ Yesu shihilɛ mli lɛ, nitsumɔ ko kasemɔ etsĩii wolokasemɔi krokomɛi anaa.

Ani Esa akɛ Aha Biyei Hu Akase Wolo?

Bei komɛi lɛ, fɔlɔi woɔ amɛbihii askul shi amɛshiɔ amɛbiyei lɛ. Ekolɛ, fɔlɔi komɛi susuɔ  akɛ biyei ni aaawo amɛ skul lɛ fiteɔ shika babaoo ni amɛheɔ amɛyeɔ akɛ gbekɛbii yei ahe baanyɛ aba sɛɛnamɔ babaoo kɛha amɛnyɛmɛi kɛji amɛhi shia gbi muu lɛ fɛɛ. Shi nikanemɔ kɛ niŋmaa ni biyoo ko leee lɛ baatsĩ enaa. United Nations Children’s Fund (UNICEF) wolo ko kɛɛ akɛ: “Niiamlipɛimɔ shii abɔ etsɔɔ akɛ gbekɛbii yei ni ahaa amɛ kaseɔ nikanemɔ kɛ niŋmaa lɛ ji gbɛ ni hi fe fɛɛ ni akɛtsĩɔ ohia naa.” (Poverty and Children: Lessons of the 90s for Least Developed Countries) Ayeɔ abuaa gbekɛbii yei ni le woloŋ lɛ kɛha shihilɛ, ni amɛfeɔ yiŋkpɛi ni nilee yɔɔ mli, ni ehaa weku muu lɛ fɛɛ náa he sɛɛ.

Nikasemɔ ko ni afee ni kɔɔ gbekɛbii agbele he yɛ Benin, West Africa lɛ tsɔɔ akɛ, ákɛ kuu lɛ, nyɛmɛi ni leee nikanemɔ kɛ niŋmaa lɛ abii ni shɛɛɛ afii enumɔ lɛ 1,000 mlijaa 167 gboiɔ, yɛ be mli ni yei ni ena nɔtsamɔ skul tsɔsemɔ lɛ anɔ̃ lɛ ji emlijaa 38. UNICEF mu sane naa akɛ: “No hewɔ lɛ, wolokasemɔ falɛ yɛ Benin lɛ ji nɔ ni tsɔɔ gbekɛbii agbele falɛ, taakɛ eji yɛ je lɛŋ fɛɛ lɛ.” No hewɔ lɛ, obiyei ni amɛaakase wolo lɛ he baanyɛ aba sɛɛnamɔ yɛ gbɛ̀i srɔtoi pii anɔ.

Ani Nikasemɔ kɛ Niŋmaa Skul Pɛ Fa?

Yɛ hei ni enɛ he hiaa yɛ lɛ, Yehowa Odasefoi feɔ nikanemɔ kɛ niŋmaa he skul kɛha asafoŋ bii ni nyɛɛɛ akane nii lɛ. * Nɛkɛ nifeemɔ ni he yɔɔ sɛɛnamɔ nɛɛ yeɔ ebuaa mɛi koni amɛkase nikanemɔ, bei pii lɛ, yɛ amɛ diɛŋtsɛ amɛwiemɔi  amli. Ani abaanyɛ akɛ enɛ aye skulyaa najiaŋ? Ani esa akɛ akpa gbɛ akɛ asafo lɛ baatsɔɔ obii lɛ wolokasemɔ, kɛji skul po yɛ?

Eyɛ mli akɛ nikanemɔ kɛ niŋmaa skul ji gbɛjianɔtoo ni mlihilɛ yɔɔ mli ni Yehowa Odasefoi asafoi lɛ to moŋ, shi afee kɛ yiŋtoo akɛ koni akɛye abua onukpai ni beni amɛji gbekɛbii lɛ amɛyaaa skul lɛ. Ekolɛ, amɛfɔlɔi enaaa hiamɔ ni yɔɔ nikanemɔ kɛ niŋmaa mli, loo no mli lɛ skul bɛ. Abaanyɛ aye abua nakai gbɔmɛi lɛ kɛ́ amɛtee nikanemɔ kɛ niŋmaa skul ni asafoi lɛ feɔ lɛ eko. Shi skul nɛɛ yeee skul ni ayaa lɛ najiaŋ, ni atooo he gbɛjianɔ koni ekɛ shishijee skul wolokasemɔ aha. Atsɔɔɔ saji tamɔ jeŋ nilee, akɔntaabuu, kɛ yinɔsane yɛ nɛkɛ nikanemɔ kɛ niŋmaa skul srɔtoi nɛɛ amli. Shi kɛlɛ, abaatsu he nii yɛ daa gbi skulyaa nibii ni akaseɔ lɛ amli.

Yɛ Afrika lɛ, bei pii lɛ afeɔ nikanemɔ kɛ niŋmaa skul lɛ yɛ maŋ nɔ wiemɔi amli, ni bei komɛi lɛ, yɛ wiemɔ titri ni awieɔ yɛ maŋ lɛ mli lɛ mli. Bei pii lɛ, afeɔ skul diɛŋtsɛ lɛ yɛ maŋ lɛ mli wiemɔ titri ni awieɔ lɛ mli. Enɛ he baa sɛɛnamɔ babaoo kɛhaa gbekɛbii lɛ ejaakɛ ayɛ woji babaoo kɛ nikanemɔ woji srɔtoi yɛ maŋ lɛ mli wiemɔ titri ni awieɔ lɛ mli. Yɛ be mli ni abaanyɛ akɛ asafoŋ nikanemɔ kɛ niŋmaa skul lɛ afata gbekɛ ko skulyaa he lɛ, no nyɛŋ aye skul diɛŋtsɛ lɛ najiaŋ. Belɛ, kɛ́ eeehi lɛ, ani esaaa akɛ ahaa gbekɛbii yaa skul?

Fɔlɔi Agbɛnaa Nii

Esa akɛ hii ni nyiɛɔ hiɛ kɛtsuɔ asafo lɛ mumɔŋ hiamɔ nii ahe nii lɛ afee Kristofoi ni feɔ nɔkwɛmɔnɔ kpakpa. Esa akɛ amɛkwɛ amɛshiabii lɛ kɛ amɛbii lɛ “anɔ jogbaŋŋ.” (1 Timoteo 3:4, 12) Nɔ ni baafata nii “anɔ” ni wɔɔkwɛ “jogbaŋŋ” lɛ he ji nɔ fɛɛ nɔ ni wɔbaabɔ mɔdɛŋ wɔfee koni wɔkɛye wɔbua wɔbii lɛ koni amɛtsi amɛhe kɛjɛ shihilɛ ni baaha amɛfee mɛi ni nyɛɛɛ nɔ ko amɛfee lɛ he.

Nyɔŋmɔ kɛ gbɛnaa nii ni tsii efɔ Kristofoi fɔlɔi anɔ. Esa akɛ amɛtsɔse amɛbii lɛ yɛ e-Wiemɔ lɛ naa ni amɛye amɛbua amɛ ni amɛfee mɛi ni ‘sumɔɔ nilee.’ (Abɛi 12:1; 22:6; Efesobii 6:4) Bɔfo Paulo ŋma akɛ: “Shi kɛ́ mɔ ko kwɛɛɛ lɛ diɛŋtsɛ emɛi, titri lɛ lɛ diɛŋtsɛ eshiabii lɛ, ekpa yɛ hemɔkɛyeli lɛ sɛɛ, ni efaŋ mɔ ni heee yeee fe lɛ.” (1 Timoteo 5:8) Esa akɛ wɔha wɔbii lɛ aná wolokasemɔ kpakpa hu.

Bei komɛi lɛ, skul gbɛjianɔtoo lɛ nyɛɛɛ atsu wolokasemɔ hiamɔ nii ahe nii yɛ mɛi babaoo ni fa, shika ni anyɛɛɛ atsu jogbaŋŋ, loo ekolɛ tsɔɔlɔi ni bɛ miishɛɛ, ni awooo amɛ nyɔmɔ jogbaŋŋ lɛ hewɔ. No hewɔ lɛ, ehe miihia ni fɔlɔi aná nibii ni amɛbii lɛ kaseɔ yɛ skul lɛ he miishɛɛ waa. Nilee yɛ mli akɛ ooole tsɔɔlɔi lɛ, titri lɛ yɛ gbɛ gbelemɔ fɛɛ gbɛ gbelemɔ mli, ni otsɔ hiɛ obi amɛŋaawoo yɛ bɔ ni gbekɛbii lɛ baafee koni amɛtsɔmɔ nikaselɔi kpakpai lɛ he. Kɛkɛ lɛ, tsɔɔlɔi lɛ baaná miishɛɛ ni ebaatsirɛ amɛ koni amɛbɔ mɔdɛŋ waa ni amɛtsu gbekɛbii lɛ awolokasemɔ he hiamɔ nii lɛ he nii.

Wolokasemɔ ji gbekɛ ko dalɛ fã ko ni he hiaa waa. Abɛi 10:14 kɛɔ akɛ: “Nilelɔi tĩaa nilee.” Enɛ ji anɔkwale yɛ Biblia mli nilee he titri. Esa akɛ Yehowa webii—gbekɛbii kɛ onukpai fɛɛ—afee mɛi ni yɔɔ nilee bɔ ni sa bɔni afee ni amɛye amɛbua mɛi krokomɛi yɛ mumɔŋ ni ‘amɛkɛ amɛhe adamɔ Nyɔŋmɔ hiɛ akɛ mɛi komɛi ni sa, ni jaa anɔkwale wiemɔ lɛ mli pɛpɛɛpɛ.’ (2 Timoteo 2:15; 1 Timoteo 4:15) No hewɔ lɛ, ani esa akɛ obii lɛ aya skul? Ŋwanejee ko bɛ he akɛ obaamu sane naa akɛ, esa akɛ amɛya, eyɛ mli moŋ akɛ babaoo baadamɔ nɔ ni anyɛɔ atsuɔ he nii yɛ maŋ nɔ he ni oyɔɔ lɛ nɔ. Shi esa akɛ Kristofoi fɔlɔi aha sanebimɔ ni he hiaa waa nɛɛ hetoo, nɔ ni biɔ akɛ, ‘Ani esa akɛ mibii lɛ akase wolo?’ Ekɔɔɔ he eko he ni oyɔɔ lɛ, ani okpɛlɛɛɛ nɔ akɛ esa akɛ hetoo lɛ afee hɛɛ kɛ hewalɛ diɛŋtsɛ?

[Shishigbɛ niŋmai]

[Akrabatsa/Mfoniri ni yɔɔ baafa 12, 13]

KƐJI ANYƐƐƐ AYA SKUL

Yɛ shihilɛi komɛi amli lɛ, anyɛɛɛ aya skul. Ákɛ nɔkwɛmɔnɔ lɛ, wolo tɛtrɛɛ ni ji Refugees bɔ amaniɛ akɛ yɛ gbekɛbii 5 fɛɛ mli lɛ, mɔ 1 pɛ nyɛɔ eyaa skul yɛ abobalɔi nsrai amli. Yɛ shihilɛi komɛi amli lɛ, tsɔɔlɔi atuatsemɔi haa aŋaa skul ni yɔɔ jɛmɛ lɛ naa be kakadaŋŋ. Ekolɛ, skul lɛ yɛ shɔŋŋ loo ebɛ kpokpaa pɔtɛɛ ko mli. Yiwaa ni akɛbaa Kristofoi anɔ lɛ hu haa anyɛɔ ashwieɔ gbekɛbii lɛ kɛjɛɔ skul.

Te ooofee tɛŋŋ oye obua obii lɛ yɛ shihilɛi ni tamɔ enɛ mli? Mɛni ekolɛ obaafee kɛji oyɛ bii pii ni nyɛyɛ he ko ni shika ni afiteɔ kɛyaa skul lɛ haaa onyɛ owo mɔ fɛɛ mɔ gbɛ kɛya skul lɛ? Ojogbaŋŋ, ani oyɛ shika bɔ ni obaanyɛ owo obi kome loo mɛi enyɔ gbɛ kɛya skul, ni okɛ amɛ wooo mumɔŋ oshara mli? Kɛ́ obaanyɛ lɛ, no lɛ amɛbaanyɛ amɛtsɔɔ obii krokomɛi lɛ nibii ni amɛkaseɔ yɛ skul lɛ.

Maji komɛi yɛ nɔ ni atsɛɔ lɛ shia mli nikasemɔ. * Yɛ nɛkɛ gbɛjianɔtoo nɛɛ mli lɛ, fɔlɔi lɛ ateŋ mɔ kome fiteɔ ŋmɛlɛtswai fioo ni ekɛtsɔɔ gbekɛ lɛ nii daa gbi. Yɛ blematsɛmɛi lɛ abeaŋ lɛ, fɔlɔi nyɛɔ amɛtsɔɔ amɛ diɛŋtsɛ amɛbii anii yɛ omanyeyeli mli. Ekolɛ, yɛ fɔlɔi atsɔsemɔ kpakpa hewɔ lɛ, Yakob binuu Yosef nyɛ ekwɛ mɛi krokomɛi anɔ beni eji oblanyo.

Ekolɛ, ebaawa akɛ nine aaanyɛ ashɛ nitsɔɔmɔ he gbɛjianɔtoo nɔ yɛ hei tamɔ abobalɔi nsrai amli, shi fɔlɔi baanyɛ amɛkɛ woji ni Yehowa Odasefoi fee lɛ atsu nii akɛ nɔ ni amɛbaadamɔ nɔ ni amɛkɛtsɔɔ nii. Ákɛ nɔkwɛmɔnɔ lɛ, Mi-Wolo ni Gbaa Biblia Mli Saji baanyɛ aye abua yɛ gbekɛbii anitsɔɔmɔ mli. Saneyitsei ni wieɔ saji babaoo he lɛ yɛ Awake! woji tɛtrɛbii lɛ amli. Abaanyɛ akɛ Life—How Did It Get Here? By Evolution or by Creation? wolo lɛ atsu nii ni akɛtsɔɔ jeŋ nilee. Je lɛ he shikpɔŋ he mfoniri bibioo yɛ Yearbook of Jehovah’s Witnesses wolo lɛ mli, ni ewieɔ shihilɛ kɛ shiɛmɔ nitsumɔi yɛ shikpɔji srɔtoi ahe.

Kɛ́ ato nitsɔɔmɔ lɛ he gbɛjianɔ jogbaŋŋ ni atsakeɔ mli bɔni afee ni enyɛ etsu gbekɛ niiashishinumɔ falɛ lɛ he nii lɛ, no lɛ sɛɛnamɔi babaoo baajɛ mli kɛba. Kɛ́ amɛtee nɔ amɛkane nii ni amɛkase nii lɛ, ewaŋ kɛhaŋ amɛ akɛ amɛaatsake amɛhe amɛwo skul diɛŋtsɛ mli kɛji amɛnyɛ amɛtee eko yɛ wɔsɛɛ be ko mli. Kɛtsɔ hegbɛ ni oooŋɔ kɛ mɔdɛŋbɔɔ nɔ lɛ, obaanyɛ oye obua obii lɛ koni amɛkase wolo jogbaŋŋ, ni kwɛ nyɔmɔwoo babaoo ni enɛ kɛbaaha!

[Shishigbɛ niŋmaa]

[Mfoniri]

Mɛni obaanyɛ ofee kɛji oyɛ he ni obii lɛ nyɛɛɛ aya skul lɛ?