Amɛsɔmɔɔ Kristofoi Anyɛmifeemɔ Kuu lɛ yɛ Maji Srɔtoi Anɔ

ANI onu ni aatsɛ wiemɔ ni ji “majimaji ateŋ sɔɔlɔi” kɛ “nyɛmimɛi ni kɛ amɛhe eha kɛha majimaji ateŋ nitsumɔ” pɛŋ? Yehowa Odasefoi ni yɔɔ kui nɛɛ amli lɛ kɛ amɛbe kɛ nitsumɔ mli hesaa ni amɛyɔɔ lɛ yeɔ ebuaa kɛji aamamɔ tsũi ni abaajɛ jɛmɛ akala Maŋtsɛyeli lɛ he Biblia kasemɔ woji ní akɛmaje lɛ. Nyɛmimɛi ni tamɔ nɛkɛ ni kɛ amɛhe eha lɛ yeɔ ebuaa hu kɛmamɔɔ Kpee Asai kɛ Maŋtsɛyeli Asai, ní ji hei ni ajɛɔ akɛ Biblia mli tsɔsemɔ haa lɛ. Amrɔ nɛɛ lɛ, nyɛmimɛi ni kɛ amɛhe eha nɛɛ miiye kɛmiibua kɛmiimamɔ tsũi yɛ maji srɔtoi 34 mli, titri lɛ yɛ maji ni bɛ nɔ ko tsɔ lɛ amli. Mɛɛ kaai kɛ miishɛɛ pɔtɛɛi komɛi sɔɔlɔi ni tamɔ nɛkɛ lɛ náa beni amɛsɔmɔɔ Kristofoi anyɛmifeemɔ kuu lɛ yɛ maji srɔtoi anɔ lɛ? Te amɛnuɔ ‘sɔɔmɔ krɔŋŋ’ ni amɛkɛhaa lɛ he amɛhaa tɛŋŋ? (Kpojiemɔ 7:9, 15) Bɔni afee ni wɔna bɔ ni amɛnuɔ he amɛhaa lɛ, ha wɔkɛ nyɛmimɛi ni kɛ amɛhe eha ní sɔmɔ yɛ Mexico lɛ ateŋ mɛi komɛi agba sane wɔkwɛ.

Nyɛmimɛi ni jɛ maŋsɛɛ ni kɛ amɛhe eha lɛ yashɛ Mexico klɛŋklɛŋ kwraa yɛ May 1992 mli. No sɛɛ etsɛɛɛ lɛ, amɛnyiɛ hiɛ ni akɛlɛɛ nitsumɔhe nine lɛ, ní kwɛɔ Yehowa Odasefoi ni yɔɔ Mexico lɛ anitsumɔ nɔ lɛ mli. Nɔ ni fata tsumaa mligbelemɔ lɛ he ji tsũi heei 14 ni amamɔ, ní wɔɔhei kɛha nyɛmimɛi ni kɛ amɛhe eha ni sɔmɔɔ yɛ nitsumɔhe nine lɛ, woji akalamɔhe, kɛ ɔfis tsũi fata he.

Bɔni afee ni aye abua nɛkɛ tsumaa nitsumɔ nɛɛ lɛ, nyɛmimɛi ni fa fe 730 ni kɛ amɛhe eha ni jɛ Canada, Great Britain, United States, kɛ maji krokomɛi anɔ lɛ kɛ nyɛmimɛi ohai abɔ ni jɛ Mexico hei srɔtoi ni kɛ amɛhe eha lɛ fee ekome kɛtsu nii. Kɛfata he lɛ, Odasefoi ni fa fe 28,000 ní yɔɔ asafoi aaafee 1,600 mli, ní kɛ nitsumɔhe nine lɛ jɛkɛɛɛ lɛ kɛ otsii anaagbee ye ebua yɛ tsumaa nitsumɔ lɛ mli. Mɛi lɛ fɛɛ jɛ amɛsuɔmɔ mli amɛsɔmɔ ni amɛheee nyɔmɔwoo ko yɛ nɔ ni amɛtsu lɛ he. Amɛbu lɛ akɛ eji hegbɛ ni amɛná akɛ amɛsɔmɔ Yehowa yɛ nɛkɛ gbɛ nɔ. Yɛ tsumaa nitsumɔ be lɛ mli fɛɛ lɛ, amɛha wiemɔi ni jɛ mumɔŋ ni anaa yɛ Lala 127:1 lɛ hi amɛjwɛŋmɔ mli akɛ: “Kɛ jeee Yehowa maa tsũ lɛ, no lɛ yakatswaa mɛi ni maa lɛ gboɔ he deŋme” lɛ.

Kaai ni Amɛkɛkpeɔ

Mɛɛ kaai nɛkɛ nyɛmimɛi ni kɛ amɛhe eha kɛha majimaji ateŋ nitsumɔ lɛ kɛkpeɔ yɛ be mli ni amɛsɔmɔɔ yɛ maŋsɛɛ shikpɔji anɔ lɛ?  Naa nibii ni amɛyɔse lɛ ateŋ ekomɛi. Curtis kɛ Sally, ni amɛji gbalashihilɛ mli hefatalɔi ni amɛjɛ United States lɛ eye amɛbua yɛ tsumaa nitsumɔi amli yɛ Germany, India, Mexico, Paraguay, Romania, Russia, Senegal, kɛ Zambia. Curtis kɛɛ akɛ: “Klɛŋklɛŋ kaa lɛ ji ní wɔɔshi wɔbiyoo ni sɔmɔɔ akɛ daa gbɛgbalɔ [be-fɛɛ sɔɔlɔ] lɛ, kɛ asafo mli ni wɔyɔɔ yɛ Minnesota lɛ. Mi kɛ miŋa ehi nakai asafo lɛ mli afii 24, ni wɔnuɔ he akɛ wɔyɛ miishɛɛ waa yɛ jɛmɛ.”

Sally kɛɛ akɛ: “Shihilɛi ni aleee ni aaahi mli lɛ ji kaa, ekolɛ emli baawa waa po kɛha yoo fe bɔ ni eeeji yɛ nuu gbɛfaŋ, shi mikase akɛ manyɛ matsake mihe yɛ shihilɛ lɛ naa. Mikase bɔ ni akɛ kooloi bibii ni filikiɔ hiɔ shi ahaa po, amɛyi fa waa!” Ekɛɛ kɛfata he akɛ: “Yɛ maŋ ko nɔ lɛ, wɔ, ni ji nyɛmimɛi nyɔŋma ni wɔkɛ wɔhe eha lɛ hi shia ko ni kpatashi bɛ mli, he ni hiɛ hejuuhei enyɔ pɛ lɛ mli. Jɛmɛ mikase bɔ ni ehe hiaa ni ato tsui shi waa yɛ.”

Wiemɔ hee kasemɔ hu ji kaa kroko ni biɔ mɔdɛŋbɔɔ kɛ heshibaa. Sharon, ní kɛ ewu esɔmɔ yɛ maji srɔtoi anɔ yɛ tsumaa nitsumɔi amli lɛ kɛɛ akɛ: “Ebafeɔ kaa kɛji onuuu wiemɔ ni awieɔ yɛ he ni osɔmɔɔ yɛ lɛ. Shishijee lɛ, ewa akɛ ooobɛŋkɛ omumɔŋ nyɛmimɛi hii kɛ yei lɛ be mli ni onyɛɛɛ ojie ohenumɔi akpo otsɔɔ amɛ jogbaŋŋ lɛ. Ehaa mɔ nijiaŋ jeɔ wui. Shi nyɛmimɛi ni wɔkɛkpe yɛ maji anɔ ni aha wɔ nitsumɔi yɛ lɛ yɛ wɔhe tsui waa, ni amɛsusuɔ wɔhilɛ-kɛhamɔ he diɛŋtsɛ. Etsɛɛɛ nɔŋŋ ni wɔkɛ amɛ bɔi sanegbaa fiofio.”

He ni Akɛaawo Sɔɔmɔ Nitsumɔ lɛ Mli lɛ Biɔ Ekãa

Be mli ni nyɛmimɛi ni ejɛ he-kɛ-afɔleshaa mli amɛkɛ amɛhe eha lɛ yeɔ buaa ni amɛhaa tsumaa nitsumɔ lɛ yaa hiɛ waa lɛ, nɔ ni he hiaa waa ni amɛyɔse ji akɛ, amɛji Nyɔŋmɔ Maŋtsɛyeli lɛ jajelɔi. No hewɔ lɛ, amɛkɛ amɛhe woɔ shiɛmɔ nitsumɔ ni asafo ni amɛkɛbɔɔ lɛ toɔ he gbɛjianɔ lɛ mli kɛmɔɔ shi. Åke kɛ Ing-Mari, ni ji gbalashihilɛ mli hefatalɔi ní kɛ amɛhe wo tsumaa nitsumɔi amli yɛ Guadeloupe, Malawi, Mexico, kɛ Nigeria lɛ, kpɛlɛ nɔ akɛ wiemɔ kroko ni akɛaatsu  nii yɛ shiɛmɔ nitsumɔ lɛ mli yɛ maŋsɛɛ lɛ biɔ ekãa.

Ing-Mari kɛɛ akɛ: “Kɛjɛ shishijee lɛ, wɔkɛ wɔhe wooo mli tsɔ akɛni wɔfataa Odasefoi ni amɛji maŋbii lɛ ahe kɛyaa be fɛɛ be lɛ hewɔ, ni yɛ hiɛgbele hewɔ lɛ, wɔhaa amɛ moŋ amɛfɔɔ wiemɔ. Shi kɛlɛ, gbi ko leebi lɛ, wɔkpɛ wɔyiŋ akɛ wɔ diɛŋtsɛ wɔbaaya shiɛmɔ. Wɔkɛ wɔhe wo shiɛmɔ nitsumɔ lɛ mli yɛ be mli ni wɔnaji miikpokpo ni wɔtsui miitswa kpalakpala. Wɔkɛ oblayoo ko kpe ni ebo shiɛmɔ wiemɔ ni mikase lɛ toi. Mikane ŋmalɛ kome ni miha lɛ wolo. Kɛkɛ ni yoo lɛ kɛɛ akɛ: ‘Ofainɛ ni oha misanebimɔ nɛɛ hetoo. Miyɛ wekunyo ko ni Yehowa Odasefoi kɛ lɛ kaseɔ Biblia lɛ. Te mafee tɛŋŋ ni mi hu makase eko?’ Mileee nɔ ni makɛɛ. Kɛkɛ ni miná ekãa ni mikɛ lɛ to gbɛjianɔ kɛha Biblia lɛ kasemɔ.”

Ing-Mari kɛɛ kɛfata he akɛ: “Bo lɛ feemɔ miishɛɛ ni miná kɛ hiɛsɔɔ ni miyɔɔ kɛha Yehowa yɛ jɔɔmɔ ni ejɔɔ wɔ mɔdɛŋbɔɔ kɛ shwelɛ ni wɔyɔɔ akɛ wɔkɛ mɛi baagba anɔkwale lɛ he sane lɛ he mfoniri okwɛ.” Nɛkɛ yoo nɛɛ ná hiɛyaa ni abaptisi lɛ akɛ Odasefonyo yɛ kpokpaa wulu nɔ kpee ko ni afee yɛ Mexico City lɛ shishi. Åke kɛ Ing-Mari mua saji ni kɔɔ amɛshiɛmɔ nitsumɔ lɛ he lɛ naa yɛ nɛkɛ gbɛ nɔ akɛ: “Wɔbuɔ nitsumɔ ni aha wɔ yɛ tsumaa nitsumɔhei srɔtoi amli lɛ akɛ nɔ ko ni jara wa, shi nɔ ko nɔ ko bɛ ni fe miishɛɛ kɛ tsui ni nyɔɔ mɔ mli ni tsɔɔ yelikɛbuamɔ ni akɛaaha mɔ ni kpɛlɛɔ anɔkwale lɛ nɔ lɛ mli.”

He-kɛ-Afɔleshaa Mumɔ

Eji anɔkwale akɛ, nyɛmimɛi ni kɛ amɛhe eha ni shiɔ amɛweku kɛ nanemɛi lɛ kɛ nibii shãa afɔle bɔni afee ni amɛsɔmɔ amɛnyɛmimɛi yɛ maŋsɛɛ shikpɔji anɔ, shi amɛ hu amɛmiishɛɛ lɛ tekeɔ nɔ. Mɛni ji nomɛi?

Howard, ní ekɛ eŋa Pamela esɔmɔ yɛ Angola, Colombia, Ecuador, El Salvador, Guyana, Mexico, kɛ Puerto Rico lɛ tsɔɔ mli akɛ: “Eji hegbɛ krɛdɛɛ ákɛ akɛ nyɛmimɛi hii kɛ yei ni jɛ maji srɔtoi anɔ lɛ aaakpe koni aná suɔmɔ ni yɔɔ wɔ majimaji ateŋ nyɛmifeemɔ lɛ mli lɛ mli gbɛfaŋnɔ. Wɔfɔɔ wɔ nyɛmifeemɔ lɛ he sane kanemɔ, shi kɛji oshi omaŋ ni okɛ mɛi krokomɛi ni jɛ kusumii kɛ shihilɛi srɔtoi amli lɛ yasɔmɔ lɛ, onáa hiɛsɔɔ waa kɛhaa bɔ ni wɔ nyɛmifeemɔ lɛ jara wa waa ha lɛ.”

Gary, ní eye ebua yɛ tsumaa nitsumɔi amli yɛ Colombia, Costa Rica, Ecuador, Mexico, kɛ Zambia lɛ hu nuɔ he akɛ gbɛjianɔtoo nɛɛ eye ebua lɛ waa diɛŋtsɛ. Ekɛɛ akɛ: “Tsɔsemɔ ni minine shɛ nɔ afii abɔ ni eho kɛtsɔ nyɛmimɛi ni edara yɛ mumɔŋ ni miisɔmɔ yɛ nitsumɔhe niji ní mikɛ amɛ bɔ yɛ maji ni aha mi nitsumɔ yɛ mli lɛ anɔ lɛ eye ebua mi ni esaa mi kɛha kaai ni mikɛkpeɔ yɛ nitsumɔi ni aha mi lɛ amli lɛ. Ewoɔ mɔ hemɔkɛyeli hewalɛ ejaakɛ ehaa anáa hegbɛ kɛnaa ekomefeemɔ ni yɔɔ Yehowa jeŋ muu fɛɛ gbɛjianɔtoo lɛ mli lɛ—ekomefeemɔ ko ni tekeɔ srɔtofeemɔi ni yɔɔ wiemɔi, hewolonɔ su, loo hiŋmɛigbelemɔ mli lɛ.”

Yɛ fɛɛ mli lɛ, ágbe tsumaa nitsumɔ ni yaa nɔ yɛ Mexico lɛ naa, ni afi nɛɛ lɛ, ájɔɔ nitsumɔhe nine lɛ tsũi ni alɛɛ mli lɛ nɔ. Akɛni suɔmɔ ni ayɔɔ kɛha Nyɔŋmɔ ji nɔ ni kanya majimaji ateŋ sɔɔlɔi lɛ kɛ mɛi ni kɛ amɛhe ha kɛha majimaji ateŋ nitsumɔ lɛ hewɔ lɛ, amɛye amɛbua waa ni amɛha anɔkwa jamɔ etee hiɛ yɛ Mexico kɛ hei krokomɛi hu. Yehowa Odasefoi ni yɔɔ jeŋ muu lɛ fɛɛ lɛ hiɛ sɔɔ suɔmɔ mli ni amɛjɛɔ kɛ he-kɛ-afɔleshaa mumɔ ni amɛkɛsɔmɔɔ amɛ Kristofoi nyɛmimɛi ni yɔɔ maji srɔtoi anɔ lɛ waa diɛŋtsɛ.

[Mfoniri ni yɔɔ baafa 25]

Ecuador

[Mfoniri ni yɔɔ baafa 25]

Colombia

[Mfoniri ni yɔɔ baafa 25]

Angola

[Mfoniri ni yɔɔ baafa 26]

Áje nitsumɔ shishi yɛ tsũ hee ní ama yɛ Mexico nitsumɔhe nine lɛ mli

[Mfoniri ni yɔɔ baafa 26]

Abɔɔ ni yɔɔ nitsumɔhe nine lɛ

[Mfoniri ni yɔɔ baafa 26]

Shishigbɛ: Nitsumɔhe ni Kwɛɔ Tsumaa Nɔ lɛ mli bii komɛi ni damɔ tsũi heei lɛ eko hiɛ

[Mfoniri ni yɔɔ baafa 27]

Nyɛmimɛi ni maa tsũ lɛ náa miishɛɛ akɛ amɛkɛ asafoi ni yɔɔ jɛmɛ lɛ baaya shiɛmɔ