Ani Obiɔ akɛ, “Nɛgbɛ Yehowa Yɔɔ?”
Ani Obiɔ akɛ, “Nɛgbɛ Yehowa Yɔɔ?”
“Amɛtse amɛhe yɛ mihe kɛtee shɔŋŋ . . . Ni amɛkɛɛɛ akɛ:
Nɛgbɛ Yehowa yɔɔ?”—YEREMIA 2:5, 6.
1. Mɛni ji nɔ ni ekolɛ eyɔɔ mɛi ajwɛŋmɔ mli kɛji amɛbi akɛ, “Nɛgbɛ Nyɔŋmɔ yɔɔ?”
“NƐGBƐ Nyɔŋmɔ yɔɔ?” Mɛi babaoo ebi nakai sane lɛ. Amɛteŋ mɛi komɛi miitao kɛkɛ ni amɛnu shishijee anɔkwale ni kɔɔ Bɔlɔ lɛ he lɛ shishi, ni ji akɛ, nɛgbɛ ji he ni eyɔɔ? Mɛi krokomɛi ebi sane lɛ yɛ be mli ni oshara ko esa mɛi babaoo ahe lɛ sɛɛ loo beni amɛyɔɔ naagba kpele shishi ni amɛnyɛɛɛ amɛnu nɔ hewɔ ni Nyɔŋmɔ kɛ ehe wooo sane lɛ mli lɛ shishi lɛ. Kɛlɛ, mɛi krokomɛi hu biii he sane kwraa ejaakɛ amɛkpooɔ susumɔ diɛŋtsɛ akɛ Nyɔŋmɔ yɛ shihilɛ mli lɛ.—Lala 10:4.
2. Namɛi yeɔ omanye yɛ Nyɔŋmɔ sɛɛgbɛ ni amɛtaoɔ lɛ mli?
2 Eji anɔkwale akɛ mɛi babaoo yɛ ni yɔseɔ odaseyelii babaoo ni tsɔɔ akɛ Nyɔŋmɔ ko yɛ lɛ. (Lala 19:2; 104:24) Mɛnɛɛmɛi ateŋ mɛi komɛi nuɔ he akɛ jamɔ henɔ ko ni amɛyɔɔ kɛkɛ lɛ fa kɛha amɛ. Shi suɔmɔ ni mli kwɔ ni ayɔɔ kɛha anɔkwale lɛ etsirɛ mɛi akpekpei abɔ krokomɛi, yɛ shikpɔji fɛɛ anɔ koni amɛtao anɔkwa Nyɔŋmɔ lɛ sɛɛgbɛ. Amɛ mɔdɛŋbɔɔ lɛ efeko yaka ejaakɛ “ekɛ wɔteŋ mɔ fɛɛ mɔ teŋ jɛkɛɛɛ.”—Bɔfoi lɛ Asaji 17:26-28.
3. (a) Nɛgbɛ ji Nyɔŋmɔ shihilɛhe? (b) Mɛni ji nɔ ni Ŋmalɛ naa sanebimɔ ni ji “Nɛgbɛ Yehowa yɔɔ?” lɛ tsɔɔ.
3 Kɛji akɛ mɔ ko na Yehowa lɛɛlɛŋ lɛ, eyɔseɔ akɛ “Nyɔŋmɔ lɛ Mumɔŋ,” ni adesai nyɛŋ amɛkɛ amɛhiŋmɛii ana lɛ. (Yohane 4:24) Yesu wie yɛ anɔkwa Nyɔŋmɔ lɛ he akɛ “Mitsɛ ni yɔɔ ŋwɛi.” Mɛni no tsɔɔ? Ákɛ, yɛ mumɔŋ shishinumɔ naa lɛ shihilɛhe ni wɔŋwɛi Tsɛ lɛ yɔɔ lɛ ji he ko ni nɔ kwɔ gojoo, tamɔ bɔ ni ŋwɛi ni wɔnaa nɛɛ nɔ kwɔ fe shikpɔŋ lɛ. (Mateo 12:50; Yesaia 63:15) Eyɛ mli akɛ wɔnyɛŋ wɔkɛ wɔhiŋmɛii nɛɛ ana Nyɔŋmɔ moŋ, shi kɛlɛ, ehaa wɔnyɛɔ wɔleɔ lɛ ni wɔkaseɔ babaoo yɛ eyiŋtoi ahe. (2 Mose 33:20; 34:6, 7) Ehaa saji ni anɔkwafoi ni taoɔ akɛ amɛle shishinumɔ ni yɔɔ wala he lɛ biɔ lɛ ahetoo. Yɛ nɔ ni kɔɔ saji ni saa wɔshihilɛi ahe lɛ he lɛ, ekɛ shishitoo nɔ ni wɔbaanyɛ wɔkɛ wɔhe afɔ̃ nɔ lɛ haa wɔ bɔni afee ni wɔnyɛ wɔna eshidaamɔ yɛ he, ni ji, bɔ ni ekwɛɔ saji ni tamɔ nakai lɛ ehaa kɛ kɛji akɛ wɔsuɔmɔnaa nii lɛ kɛ eyiŋtoi lɛ kpaa gbee. Eesumɔ ni wɔtao saji ni kɔɔ enɛɛmɛi ahe lɛ amli koni wɔbɔ mɔdɛŋ waa akɛ wɔɔtao amɛhetooi lɛ. Yehowa tsɔ gbalɔ Yeremia nɔ ekã blema Israelbii lɛ ahiɛ ejaakɛ amɛfeee enɛ. Amɛle Nyɔŋmɔ gbɛi lɛ, shi amɛbiii akɛ, “Nɛgbɛ Yehowa yɔɔ?” (Yeremia 2:6) Yehowa yiŋtoo lɛ jeee nɔ titri ko kɛha amɛ. Amɛtaooo egbɛtsɔɔmɔ. Kɛji eebi ni ofee yiŋkpɛi wuji kɛ bibii lɛ, ani obiɔ akɛ, “Nɛgbɛ Yehowa yɔɔ?”
Mɛi ni Tao Gbɛtsɔɔmɔ Kɛjɛ Nyɔŋmɔ Ŋɔɔ
4. Te wɔɔfee tɛŋŋ wɔná David nɔkwɛmɔnɔ lɛ he sɛɛ yɛ nii ni abiɔ Yehowa lɛ mli?
4 Beni David, Ishai bi lɛ kã he eji oblanyo fioo lolo lɛ, ená hemɔkɛyeli ni mli wa yɛ Yehowa mli. Ele Yehowa akɛ “Nyɔŋmɔ hiɛkãlɔ lɛ.” Ákɛ mɔ aŋkro lɛ, David ná Yehowa dɛŋ hebuu. Akɛni hemɔkɛyeli kɛ suɔmɔ ni David yɔɔ kɛha “Yehowa gbɛi lɛ” kanya lɛ hewɔ lɛ, egbe Filistinyo oblaŋ Goliat ní ewula ehe kɛ tawuu nibii babaoo lɛ. (1 Samuel 17:26, 34-51) Shi kɛlɛ, kunim ni David ye lɛ haaa ekɛ ehe afɔ̃ lɛ diɛŋtsɛ ehe nɔ. Esusuuu nii ahe akɛ agbɛnɛ lɛ, Yehowa baaha eye omanye yɛ nɔ fɛɛ nɔ ni ebaafee lɛ mli. David tee nɔ ebi Yehowa nii shii abɔ yɛ afii ni nyiɛ sɛɛ lɛ amli, kɛ eebi ni efee yiŋkpɛi. (1 Samuel 23:2; 30:8; 2 Samuel 2:1; 5:19) Etee nɔ esɔle akɛ: “Yehowa, tsɔɔmɔ mi ogbɛ̀i lɛ, ha male otempɔŋi lɛ! Ha manyiɛ onɔkwale lɛ mli, ni otsɔɔ mi nii; ejaakɛ bo ji miyiwalaheremɔ Nyɔŋmɔ lɛ, bo gbɛ mikwɛɔ daa nɛɛ.” (Lala 25:4, 5) Mɛɛ nɔkwɛmɔnɔ fɛfɛo eji kɛha wɔ nɛkɛ akɛ wɔɔnyiɛ sɛɛ!
5, 6. Yehoshafat tao Yehowa sɛɛgbɛ yɛ bei srɔtoi amli yɛ eshihilɛ mli yɛ mɛɛ gbɛ nɔ?
5 Yɛ Maŋtsɛ Yehoshafat, ni ji maŋtsɛ ni ji enumɔ yɛ odehei awekukpaa lɛ mli lɛ ni jɛ David mli lɛ beaŋ lɛ, maji etɛ ni efee ekome mli asraafoi ba koni amɛkɛ Yuda abawuu ta. Beni Yehoshafat kɛ nɛkɛ maŋ sane ni esa akɛ atsu he nii amrɔ nɔŋŋ lɛ kpe lɛ, “ekɔ efɔ̃ enɔ akɛ eeetao Yehowa sɛɛgbɛ.” (2 Kronika 20:1-3) Enɛ jeee klɛŋklɛŋ nɔ̃ ní Yehoshafat etao Yehowa sɛɛgbɛ. Maŋtsɛ lɛ ekpoo Baal jamɔ ni Israel kooyigbɛ maŋtsɛyeli lɛ mli hemɔkɛyeli kwalɔi lɛ kɛ amɛhe woɔ mli lɛ, ni éhala akɛ ebaanyiɛ Yehowa gbɛ̀i lɛ anɔ. (2 Kronika 17:3, 4) No hewɔ lɛ amrɔ nɛɛ ni Yehoshafat kɛ shihilɛi ni mli wawai ekpe lɛ, te ‘etao Yehowa sɛɛgbɛ’ eha tɛŋŋ?
6 Yehoshafat tsɔɔ yɛ sɔlemɔ ko ni edamɔ maŋ lɛ najiaŋ esɔle yɛ Yerusalem yɛ nɛkɛ jaramɔ be nɛɛ mli lɛ mli akɛ, ekai Yehowa hewalɛ kpeteŋkpele lɛ. Esusu Yehowa yiŋtoo lɛ he jogbaŋŋ diɛŋtsɛ taakɛ ejeɔ kpo yɛ maji krokomɛi ní Eshwie amɛ lɛ, kɛ shikpɔji komɛi ni ekɛha Israel akɛ gboshinii lɛ mli lɛ. Maŋtsɛ lɛ kpɛlɛ bɔ ni Yehowa yelikɛbuamɔ he hiaa lɛ lɛ nɔ. (2 Kronika 20:6-12) Ani Yehowa ha ana lɛ yɛ nakai nifeemɔ be lɛ mli? Hɛɛ, eha ana lɛ. Yehowa kɛ gbɛtsɔɔmɔ pɔtɛɛ ko ha kɛtsɔ Yahaziel, mɔ ni ji Levinyo lɛ nɔ, ni enɔ jetsɛremɔ lɛ Eha Ewebii lɛ ye kunim. (2 Kronika 20:14-28) Te ooofee tɛŋŋ oná nɔmimaa akɛ Yehowa baaha bo hu ona lɛ kɛji otee eŋɔɔ kɛha gbɛtsɔɔmɔ?
7. Namɛi asɔlemɔi Nyɔŋmɔ boɔ toi?
7 Yehowa jeee mɛi ahiɛaŋkwɛlɔ. Efɔ̃ɔ gbɔmɛi ni yɔɔ jeŋmaji fɛɛ amli lɛ anine koni amɛtao esɛɛgbɛ yɛ sɔlemɔ mli. (Lala 65:3; Bɔfoi lɛ Asaji 10:34, 35) Ele nɔ ni yɔɔ gbɔmɛi fɛɛ ni biɔ lɛ nii lɛ atsui mli. Emaa nɔ mi ehaa wɔ akɛ eboɔ jalɔi asɔlemɔi atoi. (Abɛi 15:29) Ehaa mɛi komɛi ni be ko ni eho lɛ amɛbɛ ehe miishɛɛ ko kwraa shi amrɔ nɛɛ amɛkɛ heshibaa taoɔ egbɛtsɔɔmɔ sɛɛgbɛ lɛ naa lɛ. (Yesaia 65:1) Eboɔ mɛi ni yeee emlai lɛ anɔ shi amrɔ nɛɛ amɛkɛ heshibaa miitsake lɛ po asɔlemɔi atoi. (Lala 32:5, 6; Bɔfoi lɛ Asaji 3:19) Shi kɛlɛ, kɛ́ mɔ ko baaa etsui shi ehaaa Nyɔŋmɔ lɛ, nakai mɔ lɛ sɔlemɔi feɔ yaka. (Marko 7:6, 7) Susumɔ nɔkwɛmɔnii komɛi ahe okwɛ.
Amɛbi shi Amɛnine Shɛɛɛ Nɔ
8. Mɛni ha Yehowa ekpɛlɛɛɛ Maŋtsɛ Saul sɔlemɔi lɛ anɔ lɛ?
8 Beni gbalɔ Samuel kɛɛ Maŋtsɛ Saul akɛ Nyɔŋmɔ ekpoo lɛ yɛ etoigbele lɛ hewɔ lɛ sɛɛ lɛ, Saul koto shi ni eja Yehowa. (1 Samuel 15:30, 31) Shi eji kponɔgbɛ nifeemɔ ko kɛkɛ. Saul shwelɛ jeee ni ebo Nyɔŋmɔ toi, shi moŋ koni awo ehiɛ nyam yɛ gbɔmɛi lɛ ahiɛ. Sɛɛ mli beni Filistibii lɛ wuɔ ta amɛshiɔ Israel lɛ, Saul bi Yehowa nii yɛ hiɛaŋhiɛaŋ kɛkɛ. Shi kɛlɛ, beni ahaaa lɛ hetoo lɛ, eyabi okɔmfo ko nii, tsɛbelɛ ele akɛ Yehowa buɔ enɛ feemɔ fɔ́. (5 Mose 18:10-12; 1 Samuel 28:6, 7) Beni 1 Kronika 10:14 lɛ muɔ sane lɛ naa lɛ, ewie yɛ Saul he akɛ: “Ebiii Yehowa daaŋ gbee.” Mɛni hewɔ? Ejaakɛ Saul sɔlemɔi lɛ damɔɔɔ hemɔkɛyeli nɔ. No hewɔ lɛ, etamɔ nɔ ni esɔleko kwraa.
9. Mɛni ejaaa yɛ Zedekia nibimɔ kɛha Yehowa gbɛtsɔɔmɔ lɛ he?
9 Nakai nɔŋŋ beni Yuda maŋtsɛyeli lɛ bɛŋkɛɔ enaagbee lɛ, asɔle babaoo ni abibii Yehowa gbalɔi lɛ anii. Shi kɛlɛ, gbɔmɛi lɛ kɛɔ akɛ amɛyɛ bulɛ kɛha Yehowa, shi yɛ nakai beaŋ nɔŋŋ lɛ amɛjáa amagai. (Zefania 1:4-6) Yɛ hiɛaŋhiɛaŋ gbɛ nɔ ni amɛbi Nyɔŋmɔ nii lɛ fɛɛ sɛɛ lɛ, amɛkɛ anɔkwayeli baaa amɛhe shi amɛhaaa esuɔmɔnaa nii. Maŋtsɛ Zedekia kpa Yeremia fai koni ebi Yehowa nii eha lɛ. Yehowa etsɔ hiɛ etsɔɔ maŋtsɛ lɛ nɔ ni esa akɛ efee. Shi akɛni maŋtsɛ lɛ bɛ hemɔkɛyeli ni eŋmɛɛ ehe eha gbɔmɛi agbeyeishemɔ hewɔ lɛ, ebooo Yehowa gbee toi, ni Yehowa haaa maŋtsɛ lɛ hetoo ko ni baaŋɔɔ enaa.—Yeremia 21:1-12; 38:14-19.
10. Mɛni ejaaa yɛ bɔ ni Yohanan bi Yehowa gbɛtsɔɔmɔ eha lɛ he, ni mɛni wɔkaseɔ kɛjɛɔ etɔmɔ lɛ mli?
10 Beni akpata Yerusalem hiɛ ni Babilon asraafoi lɛ kɛ Yudafoi nomii lɛ eshi kɛtee sɛɛ lɛ, Yohanan to gbɛjianɔ koni ekɛ Yudafoi akuu fioo ni eshwɛ yɛ Yuda lɛ aya Mizraim. Amɛkpɛ amɛyiŋ, shi dani amɛbaashi kɛya lɛ amɛbi Yeremia koni edamɔ amɛnajiaŋ esɔle kɛbi gbɛtsɔɔmɔ kɛjɛ Yehowa dɛŋ. Kɛlɛ, beni amɛnine shɛɛɛ hetoo ni amɛkpaa gbɛ lɛ nɔ lɛ, amɛtee nɔ amɛtsu nɔ ni amɛkpɛ amɛyiŋ yɛ he lɛ he nii. (Yeremia 41:16–43:7) Ani oona nikasemɔi ni baanyɛ aye abua bo yɛ saji nɛɛ amli bɔni afee ni kɛ́ ootao Yehowa hiɛ gbɛ lɛ, eha ona lɛ?
‘Nyɛyaa Nɔ Nyɛkaa Nyɛkwɛa’
11. Mɛni hewɔ esa akɛ wɔkɛ Efesobii 5:10 lɛ atsu nii lɛ?
11 Anɔkwa jamɔ biɔ babaoo fe numiimɔ ni wɔkɛaafee wɔhenɔjɔɔmɔ lɛ he okadi, asafoŋ kpeei ni wɔɔya, kɛ wɔhe ni wɔkɛaawo maŋshiɛmɔ nitsumɔ lɛ mli. Ekɔɔ wɔshihilɛ gbɛ fɛɛ he. Daa gbi lɛ, wɔkɛ nɔnyɛɛi—ni ekomɛi yɛ nigii, ni ekomɛi hu yɔɔ faŋŋ—ni baanyɛ ajie wɔ kɛjɛ gbɛ ni kɛ Nyɔŋmɔ jamɔ hetuu-kɛhamɔ kpaa gbee lɛ nɔ lɛ kpeɔ. Te wɔɔfee tɛŋŋ wɔtsu enɛɛmɛi ahe nii? Beni bɔfo Paulo ŋmaa wolo eyaha Kristofoi anɔkwafoi ni yɔɔ Efeso lɛ, ewo amɛ hewalɛ akɛ: “Nɔ fɛɛ nɔ lɛ nyɛkaa nyɛkwɛa akɛ esa Nuŋtsɔ lɛ hiɛ lo.” (Efesobii 5:10) Afee sɛɛnamɔ ni yɔɔ nakai feemɔ mli lɛ he nɔkwɛmɔnɔ yɛ saji babaoo ni aŋma yɛ Ŋmalɛi lɛ amli lɛ mli.
12. Mɛni hewɔ Yehowa mli fu beni David ha awó kpaŋmɔ adeka lɛ kɛtee Yerusalem lɛ?
12 Beni akɛ kpaŋmɔ adeka lɛ eku sɛɛ kɛba Israel ni aha ehi Kiriat-Yearim afii babaoo lɛ, Maŋtsɛ David shwe akɛ eyawo kɛba Yerusalem. Ekɛ maŋ lɛ mli asafoiatsɛmɛi lɛ tee ajina ni ekɛɛ akɛ ‘kɛji esa amɛhiɛ ni Yehowa kpɛlɛɔ nɔ lɛ’ no lɛ abaayawo Adeka lɛ. Shi ekpoo akɛ eeetao mli jogbaŋŋ koni ele Yehowa suɔmɔnaa nii yɛ sane lɛ he. Eji efee nakai kulɛ, akɛ Adeka lɛ emaŋ shwiili nɔ. Kulɛ Kohat Levibii lɛ baatere yɛ amɛkɔji anɔ, taakɛ Nyɔŋmɔ etsɔɔ faŋŋ lɛ. Eyɛ mli akɛ David fɔɔ Yehowa nibimɔ moŋ, shi efeee nakai yɛ gbɛ ni ja nɔ yɛ be nɛɛ mli. Nɔ ni jɛ mli ba lɛ ehiii kwraa. David kpɛlɛ nɔ yɛ sɛɛ mli akɛ: “Yehowa, wɔ-Nyɔŋmɔ lɛ, gbá wo wɔ, ejaakɛ wɔtaooo lɛ gbɛjianɔ.”—1 Kronika 13:1-3; 15:11-13; 4 Mose 4:4-6, 15; 7:1-9.
13. Mɛɛ kaimɔ wiemɔ akɛfata lala ni alá beni ajie Kpaŋmɔ Adeka lɛ kɛtee yɛ omanyeyeli mli lɛ he?
13 Yɛ naagbee mli beni Levibii lɛ tere Adeka lɛ kɛjɛ Obed-Edom shĩa lɛ kɛtee Yerusalem lɛ, alá lala ko ni David fo lɛ. Kaimɔ wiemɔi ni jɛ tsuiiaŋ ni fata he ji akɛ: “Nyɛtaoa Yehowa kɛ ehewalɛ lɛ sɛɛgbɛ, nyɛtaoa ehiɛgbɛ daa. Nyɛkaia enaakpɛɛ nitsumɔi ní etsu lɛ, enaakpɛɛ nii lɛ kɛ mlai ní jɛ edaaŋ lɛ.”—1 Kronika 16:11, 12.
14. Mɛɛ gbɛ nɔ wɔbaanyɛ wɔná Salomo nɔkwɛmɔnɔ kpakpa lɛ kɛ etɔmɔi yɛ ewala shihilɛ naagbee beaŋ lɛ he sɛɛ yɛ?
14 Dani David baagbo lɛ, ewo ebinuu Salomo ŋaa akɛ: “Kɛji ootao [Yehowa] lɛ, eeehã ona lɛ.” (1 Kronika 28:9) Beni Salomo baŋɔ maŋtsɛyeli lɛ, etee Gibeon, he ni kpeebuu lɛ yɔɔ lɛ, ni eyasha afɔle eha Yehowa. Yehowa kɛɛ Salomo yɛ jɛmɛ akɛ: “Bi nɔ ni otaoɔ ní mahao!” Yɛ Salomo nibimɔ lɛ hetoohamɔ naa lɛ, Yehowa jɛ mlihilɛ mli eha lɛ nilee kɛ sɛɛyoomɔ koni ekɛkojo Israel, ni no sɛɛ lɛ Yehowa kɛ jwetrii kɛ anunyam hu fata he. (2 Kronika 1:3-12) Salomo kɛ tsũ lɛ kɛ emli nibii ahe gbɛjianɔtoo ni Yehowa kɛha David lɛ tsu nii ni ekɛma sɔlemɔtsu ko ni yɔɔ fɛo waa. Shi yɛ nɔ ni kɔɔ Salomo diɛŋtsɛ gbalashihilɛ mli saji ahe lɛ, etaooo Yehowa sɛɛgbɛ. Salomo kɛ yei ni amɛjeee Yehowa jálɔi bote gbalashihilɛ mli. Amɛdɔ etsui kɛjɛ Yehowa he, yɛ enaagbee afii lɛ amli. (1 Maŋtsɛmɛi 11:1-10) Ekɔɔɔ he eko bɔ ni ekolɛ wɔhé gbɛi wɔha, bɔ ni wɔle nii wɔha, loo bɔ ni wɔle ŋaa wɔha lɛ, ehe miihia ni ‘nɔ fɛɛ nɔ lɛ wɔka wɔkwɛ akɛ esa Nuŋtsɔ lɛ hiɛ lo’!
15. Mɛni hewɔ Asa nyɛ esɔle kɛ nɔmimaa akɛ Yehowa baajie Yuda beni Zera Kushnyo lɛ batutua Yuda lɛ?
15 Atee nɔ ama hiamɔ kɛha enɛ lɛ nɔ mi kɛtsɔ amaniɛbɔɔ ni kɔɔ Asa ni ji Salomo nanakaŋsowa lɛ maŋtsɛyeli lɛ he lɛ nɔ. Afii 11 sɛɛ beni Asa batsɔ maŋtsɛ lɛ, Zera Kushnyo lɛ nyiɛ asraafoi akpeiakpe hiɛ kɛte shi amɛshi Yuda. Ani Yehowa baajie Yuda? Yehowa etsɔ hiɛ nɔ ni fe afii 500 ejaje nɔ ni ewebii lɛ baanyɛ amɛkpa gbɛ kɛji amɛbo lɛ toi ni amɛye ekitai lɛ anɔ kɛ nɔ ni amɛbaanyɛ amɛkpa gbɛ kɛji amɛfeee nakai. (5 Mose 28:1, 7, 15, 25) Yɛ Asa nɔyeli lɛ shishijee mli lɛ, ejie afɔleshaa latɛi kɛ akulashiŋi ni akɛtsuɔ nii yɛ apasa jamɔ mli lɛ kɛjɛ Yuda. Ewo gbɔmɛi lɛ hewalɛ “ni amɛtao Yehowa sɛɛgbɛ.” Asa emɛɛɛ kɛyashi ekɛ amanehulu aaakpe dani efee nakai. Yɛ hemɔkɛyeli ni Asa yɔɔ yɛ Yehowa mli hewɔ lɛ, enyɛ esɔle eha lɛ koni efĩ amɛsɛɛ. Mɛni jɛ mli ba? Aha Yuda ye kunim ko ni sa kadimɔ waa.—2 Kronika 14:1-11.
16, 17. (a) Mɛɛ kaimɔ Yehowa kɛha Asa, eyɛ mli akɛ eye kunim moŋ nɛ? (b) Beni Asa efeee nii yɛ nilee mli lɛ, mɛɛ yelikɛbuamɔ akɛha lɛ, shi te efee enii yɛ he eha tɛŋŋ? (d) Mɛɛ gbɛ nɔ wɔbaanyɛ wɔná Asa subaŋ lɛ he susumɔ he sɛɛ yɛ?
16 Kɛlɛ, beni Asa ku esɛɛ yɛ kunimyeli mli lɛ, Yehowa tsu Azaria koni ekɛ maŋtsɛ lɛ ayakpe koni ekɛɛ lɛ akɛ: “Nyɛboa mi toi, Asa kɛ Yuda kɛ Benyamin fɛɛ! Yehowa kɛ nyɛ yɛ gbii abɔ ní nyɛkɛ lɛ yɔɔ lɛ; ni kɛji nyɛtao esɛɛgbɛ lɛ, eeeha nyɛna lɛ, shi kɛ́ nyɛkwa lɛ lɛ, lɛ hu eeekwa nyɛ!” (2 Kronika 15:2) Yɛ ekãa hee ni Asa ena lɛ hewɔ lɛ, eha anɔkwa jamɔ tee hiɛ. Shi yɛ afii 24 sɛɛ, beni Asa kɛ ta kpe ekoŋŋ lɛ, etaooo Yehowa sɛɛgbɛ. Etaooo ŋaawoo kɛjɛɛɛ Nyɔŋmɔ Wiemɔ lɛ mli, ni ekaiii nɔ ni Yehowa fee beni Kushbii ata lɛ batutua Yuda lɛ. Ejɛ kwashiafeemɔ mli ekɛ Aram yafee kpaŋmɔ.—2 Kronika 16:1-6.
17 Enɛ hewɔ lɛ, Yehowa hã Hanani ni ji ninalɔ lɛ kã Asa hiɛ. Yɛ nakai beaŋ beni atsɔɔ Yehowa susumɔ yɛ sane lɛ he lɛ mli po lɛ, kulɛ Asa baanyɛ aná he sɛɛ lolo. Yɛ no najiaŋ lɛ, emli fũ Hanani ni ewo lɛ tsuŋ. (2 Kronika 16:7-10) Mɛɛ mɔbɔ sane enɛ ji nɛkɛ! Ni wɔ hu? Ani wɔtaoɔ Nyɔŋmɔ sɛɛgbɛ shi yɛ nakai beaŋ nɔŋŋ lɛ wɔkpooɔ akɛ wɔɔkpɛlɛ ŋaawoo nɔ? Kɛji onukpa ko ni yɔɔ wɔhe miishɛɛ ni esusuɔ wɔhe lɛ kɛ Biblia lɛ tsu nii ekɛwo wɔ ŋaa akɛni wɔkɛ je lɛ miitɔ̃tɔ̃ wɔnaji lɛ hewɔ lɛ, ani wɔjieɔ hiɛsɔɔ kpo wɔtsɔɔ suɔmɔ yelikɛbuamɔ ni akɛhaa wɔ koni wɔle ‘nɔ ni sa Nuŋtsɔ lɛ hiɛ’ lɛ?
Ohiɛ Akakpa Nɔ akɛ Obaabi
18. Mɛɛ gbɛ nɔ wɔbaanyɛ wɔná Elihu wiemɔi ni ekɛha Hiob lɛ he sɛɛ yɛ?
18 Kɛji mɔ ni efee gbɛi kpakpa yɛ Yehowa sɔɔmɔ mli lɛ po yaje nɔnyɛɛ shishi lɛ, ekolɛ ebaatɔ̃. Beni hela ni yɔɔ nyaŋemɔ mɔ Hiob, ni elaaje ebii kɛ eheloonaa nibii, ní enanemɛi folɔ enaa yɛ gbɛ ni ejaaa nɔ lɛ, egbala ejwɛŋmɔ fɛɛ kɛba lɛ diɛŋtsɛ enɔ. Elihu kai lɛ akɛ: “Mɔ ko ekɛɛɛ akɛ: Nɛgbɛ Nyɔŋmɔ, mifeelɔ lɛ . . . yɔɔ?” (Hiob 35:10) Ehe bahia ni Hiob aha ejwɛŋmɔ aba Yehowa nɔ koni esusu bɔ ni Esusuɔ sane lɛ he ehaa lɛ he. Hiob kɛ heshibaa kpɛlɛ nakai kaimɔ wiemɔ lɛ nɔ, ni enɔkwɛmɔnɔ lɛ baanyɛ aye abua wɔ koni wɔfee nakai nɔŋŋ.
19. Mɛni ji nɔ ni Israelbii lɛ kpoo akɛ amɛaafee daa?
19 Israelbii lɛ le amaniɛbɔɔ ni kɔɔ bɔ ni Nyɔŋmɔ kɛ amɛmaŋ lɛ ye eha lɛ he. Shi daa kɛji amɛmiitsu shihilɛi pɔtɛɛi komɛi ahe nii yɛ amɛshihilɛi amli lɛ, amɛkaiii bɔ ni Nyɔŋmɔ kɛ amɛ ye eha lɛ. (Yeremia 2:5, 6, 8) Yɛ nɔ najiaŋ ni amɛaabi akɛ, “Nɛgbɛ Yehowa yɔɔ?” kɛji ehe bahia ni amɛfee yiŋkpɛɛ yɛ shihilɛ mli lɛ, amɛtiuɔ amɛ diɛŋtsɛ amɛmiishɛɛnamɔ sɛɛ moŋ.—Yesaia 5:11, 12.
Yaa Nɔ ni Obi akɛ, “Nyɛgbɛ Yehowa Yɔɔ?”
20, 21. (a) Namɛi ejie Elisha mumɔ ni akɛtaoɔ Yehowa gbɛtsɔɔmɔ sɛɛgbɛ lɛ kpo ŋmɛnɛ? (b) Mɛɛ gbɛ nɔ wɔbaanyɛ wɔkase ní wɔná amɛhemɔkɛyeli lɛ he nɔkwɛmɔnɔ lɛ he sɛɛ yɛ?
20 Beni Elia maŋ sɔɔmɔ nitsumɔ lɛ ba naagbee lɛ, esɔɔlɔ Elisha kɔ atade ni je Elia he egbee shi lɛ, ni etee Yordan faa lɛ naa, ekɛtswa nu lɛ mli ni ebi akɛ: “Nyɛgbɛ Yehowa, Elia Nyɔŋmɔ lɛ, yɔɔ?” (2 Maŋtsɛmɛi 2:14) Yehowa ha hetoo kɛtsɔ tsɔɔmɔ ni etsɔɔ akɛ amrɔ nɛɛ emumɔ lɛ yɛ Elisha nɔ lɛ nɔ. Mɛni wɔbaanyɛ wɔkase kɛjɛ enɛ mli?
21 Nɔ ko ni tamɔ nakai nɔŋŋ ba mli yɛ ŋmɛnɛŋmɛnɛ beaŋ. Kristofoi komɛi ni afɔ amɛ mu ní nyiɛ shiɛmɔ nitsumɔ lɛ hiɛ lɛ gboi. Mɛi ni akɛ nɔkwɛmɔ nitsumɔ ewo amɛdɛŋ lɛ pɛi Ŋmalɛi lɛ amli ni amɛsɔle kɛha Yehowa gbɛtsɔɔmɔ. Amɛbiɔ daa akɛ, “Nyɛgbɛ Yehowa yɔɔ?” Nɔ ni ejɛ mli eba ji akɛ, Yehowa etee nɔ enyiɛ ewebii lɛ ahiɛ ni eha amɛnitsumɔ lɛ eshwere. Ani wɔkaseɔ amɛhemɔkɛyeli lɛ? (Hebribii 13:7) Kɛji nakai eji lɛ, wɔbaakpɛtɛ Yehowa gbɛjianɔtoo lɛ he gbagbalii, wɔbaabo egbɛtsɔɔmɔ toi, koni wɔná gbɛfaŋnɔ ni mɔɔ shi jogbaŋŋ yɛ nitsumɔ ni etsuɔ yɛ Yesu Kristo gbɛtsɔɔmɔ shishi lɛ mli.—Zakaria 8:23.
Te Obaaha Hetoo Oha Tɛŋŋ?
• Mɛɛ yiŋtoo esa akɛ wɔkɛbi akɛ, “Nɛgbɛ Yehowa yɔɔ?”
• Yɛ mɛɛ gbɛ nɔ wɔ mɛi ni wɔyɔɔ ŋmɛnɛ lɛ baanyɛ aná hetoo kɛha sanebimɔ ni ji, “Nɛgbɛ Yehowa yɔɔ?”
• Mɛni hewɔ ahaaa sɔlemɔi komɛi kɛha ŋwɛi gbɛtsɔɔmɔ lɛ ahetoo lɛ?
• Mɛɛ Biblia mli nɔkwɛmɔnii feɔ bɔ ni ehe hiaa ni ‘nɔ fɛɛ nɔ lɛ wɔka wɔkwɛ akɛ esa Nuŋtsɔ lɛ hiɛ lo’ lɛ he mfoniri?
[Nikasemɔ lɛ he Sanebimɔi]
[Mfoniri ni yɔɔ baafa 9]
Mɛɛ gbɛ nɔ Maŋtsɛ Yehoshafat tao Yehowa sɛɛgbɛ yɛ?
[Mfoniri ni yɔɔ baafa 10]
Mɛni hewɔ ni Saul yabi nii yɛ okɔmfo ko ŋɔɔ lɛ?
[Mfonirii ni yɔɔ baafa 12]
Sɔlemɔ, kasemɔ nii, ní ojwɛŋ nii anɔ koni no aha ona ‘he ni Yehowa yɔɔ’