Sanebimɔi ni Jɛ Kanelɔi Adɛŋ

Mɛni hewɔ April 1, afi 2002 Buu-Mɔɔ lɛ kɛɛ yɛ baafa 11, kuku 7 lɛ akɛ Yudafoi heyelilɔi heei anu mli baptisimɔ yɛ Pentekoste afi 33 Ŋ.B. lɛ ji “amɛ diɛŋtsɛ amɛhe nɔ ni amɛjɔɔ amɛha Nyɔŋmɔ kɛtsɔ Kristo nɔ” lɛ he okadi, yɛ be mli ni susumɔ ni yɔɔ tsutsu lɛ ji akɛ aŋkroaŋkro henɔjɔɔmɔ ni tamɔ nakai he ehiaaa yɛ Yudafoi ni abaptisi amɛ kɛjɛ afi 33 Ŋ.B. kɛbashi afi 36 Ŋ.B. lɛ agbɛfaŋ lɛ?

Yɛ afi 1513 D.Ŋ.B. lɛ, Yehowa Nyɔŋmɔ ha Israelbii lɛ hegbɛ koni amɛtsɔ maŋ krɔŋkrɔŋ amɛha lɛ kɛji akɛ ‘amɛaabo egbee toi ni amɛaaye ekpaŋmɔ lɛ nɔ lɛ.’ Amɛha hetoo akɛ: “Nibii fɛɛ ni Yehowa ewie lɛ wɔɔfee.”—2 Mose 19:3-8; 24:1-8.

Kɛtsɔ kpɛlɛmɔ ni Israelbii lɛ kpɛlɛ akɛ amɛaaye Mose Mla kpaŋmɔ lɛ nɔ lɛ nɔ lɛ, amɛjɔɔ amɛhe nɔ amɛha Nyɔŋmɔ. Afɔ́ Yudafoi yinɔbii ni ba yɛ sɛɛ mli lɛ awo nɛkɛ maŋ ni ejɔɔ ehe nɔ nɛɛ mli. Shi kɛlɛ, Yudafoi ni batsɔmɔ Yesu Kristo sɛɛnyiɛlɔi kɛjɛ Pentekoste afi 33 Ŋ.B. kɛbaa lɛ abaptisimɔ lɛ tsɔɔ babaoo fe amɛhe ni amɛkɛaatsɔɔ Nyɔŋmɔ akɛ maŋ ko ni ejɔɔ ehe nɔ lɛ mli bii kɛkɛ. No bafee amɛhenɔjɔɔmɔ kɛha Yehowa Nyɔŋmɔ yɛ wekukpaa hee ni ebakã amɛ kɛ lɛ teŋ lɛ mli kɛtsɔ Yesu Kristo nɔ lɛ he okadi. Yɛ mɛɛ gbɛ nɔ?

Beni afɔse mumɔ krɔŋkrɔŋ lɛ ashwie kaselɔi aaafee 120 ni ebua amɛhe naa yɛ ŋwɛitsu ko nɔ lɛ nɔ yɛ Yerusalem yɛ Pentekoste afi 33 Ŋ.B. lɛ sɛɛ lɛ, bɔfo Petro te shi damɔ shi ni ebɔi shiɛmɔ kɛ Yudafoi babaoo kɛ mɛi ni etsake amɛtsɔmɔ Yudafoi ni amɛbabua amɛhe naa koni amɛkwɛ nɔ ni yaa nɔ lɛ hamɔ. Beni eye odase jogbaŋŋ sɛɛ lɛ, ekɛɛ Yudafoi ni amɛhenilee eha amɛhao lɛ akɛ: “Nyɛtsakea nyɛtsuii amli ni nyɛteŋ mɔ fɛɛ mɔ aha abaptisi lɛ awo Yesu Kristo gbɛi amli, koni aŋɔ nyɛhe eshai lɛ afa nyɛ.” Kɛha hewalɛwoo ni Petro tee nɔ ekɛha lɛ nɔheremɔ lɛ, ‘abaptisi mɛi ni hé ewiemɔ lɛ ni amɛkpɛlɛ yɛ tsuijurɔnaa lɛ, ni nakai gbi lɛ nɔ nɔŋŋ lɛ aŋɔ susumai aaafee akpei etɛ afata amɛhe.’—Bɔfoi lɛ Asaji 2:1-41.

Ani Yudafoi ni abaptisi amɛ yɛ Petro hewalɛwoo lɛ sɛɛ lɛ jeee maŋ ni ejɔɔ ehe nɔ momo lɛ mli bii? Ani henɔjɔɔmɔ mli wekukpaa bɛ amɛkɛ Nyɔŋmɔ teŋ? Dabi. Bɔfo Paulo ŋma akɛ ‘Nyɔŋmɔ ejie Mla lɛ yɛ teŋ kɛtee, ni ekala ekpɛtɛ sɛŋmɔtso lɛ he.’ (Kolosebii 2:14) Kɛtsɔ Kristo gbele lɛ nɔ yɛ afi 33 Ŋ.B. lɛ, Yehowa Nyɔŋmɔ jie Mla kpaŋmɔ lɛ kɛtee—nɔdaamɔnɔ titri ni haa Israelbii lɛ kɛ  Lɛ boteɔ henɔjɔɔmɔ mli wekukpaa mli lɛ. Agbɛnɛ, Nyɔŋmɔ diɛŋtsɛ kpoo maŋ ni kpoo Nyɔŋmɔ Bi lɛ. Israel nyɛɛɛ akɛɛ akɛ eji maŋ ni ejɔɔ ehe nɔ eha Nyɔŋmɔ, yɛ ‘bɔ ni eji yɛ heloo gbɛfaŋ’ lɛ he dɔŋŋ.—1 Korintobii 10:18; Mateo 21:43.

Agu Mla kpaŋmɔ lɛ yɛ afi 33 Ŋ.B., shi Nyɔŋmɔ duromɔ krɛdɛɛ kɛ ejwɛŋmɔ ni egbalaa kɛbaa Yudafoi lɛ anɔ lɛ baaa naagbee yɛ nakai be lɛ mli. * Nakai be lɛ tee nɔ aahu kɛbashi afi 36 Ŋ.B., beni Petro shiɛ eha Italianyo Nyɔŋmɔ gbeyeishelɔ Kornelio kɛ eshiabii kɛ Jeŋmajiaŋbii krokomɛi hu lɛ. (Bɔfoi lɛ Asaji 10:1-48) Mɛni ji nɔdaamɔnɔ kɛha duromɔ ni akpã mli aha mɛi krokomɛi nɛɛ?

Daniel 9:27 (NW) lɛ kɛɔ akɛ: “Esa akɛ [Mesia lɛ] aha kpaŋmɔ lɛ ahi shi aha mɛi pii otsi kome.” Kpaŋmɔ ni aha ehi shi afii kpawo, loo “otsi kome,” kɛjɛ Yesu baptisimɔ kɛ Mesia lɛ maŋshiɛmɔ nitsumɔ shishijee mli yɛ afi 29 Ŋ.B. lɛ ji Abraham kpaŋmɔ lɛ. Bɔni afee ni mɔ ko abote nakai wekukpaa kpaŋmɔ lɛ mli lɛ, esa akɛ mɔ lɛ afee Abraham Hebri seshibii lɛ ateŋ mɔ kome. Nakai mɔ kome kpaŋmɔ lɛ haaa mɔ aŋkro lɛ aná ekɛ Yehowa teŋ henɔjɔɔmɔ mli wekukpaa. No hewɔ lɛ, akɛni ajie Mla kpaŋmɔ lɛ kɛtee hewɔ lɛ, Yudafoi heyelilɔi ni abaptisi amɛ yɛ Pentekoste afi 33 Ŋ.B. yɛ Petro wiemɔ ni ekɛha lɛ sɛɛ lɛ nyɛŋ akɛɛ akɛ amɛkɛ Nyɔŋmɔ yɛ henɔjɔɔmɔ mli wekukpaa, eyɛ mli moŋ akɛ ákɛ heloonaa Yudafoi lɛ, egbala ejwɛŋmɔ kɛba amɛnɔ yɛ gbɛ krɛdɛɛ nɔ. Ehe miihia ni amɛ diɛŋtsɛ amɛjɔɔ amɛhe nɔ amɛha Nyɔŋmɔ.

Yudafoi kɛ mɛi ni tsake amɛtsɔmɔ Yudafoi lɛ ahe ni amɛkɛha kɛha baptisimɔ akɛ aŋkroaŋkro yɛ Pentekoste afi 33 Ŋ.B. lɛ nɔ lɛ ji nɔ ko ni he hiaa waa diɛŋtsɛ yɛ yiŋtoo kroko hu hewɔ. Bɔfo Petro wo etoibolɔi lɛ hewalɛ koni amɛtsake amɛtsui ni abaptisi amɛ yɛ Yesu gbɛi amli. Nakai ni amɛaafee lɛ biɔ ni amɛkpoo je lɛ gbɛ̀i lɛ ni amɛkpɛlɛ Yesu nɔ ákɛ Nuŋtsɔ kɛ Mesia, ákɛ Osɔfonukpa, kɛ ákɛ mɔ ni ta Nyɔŋmɔ ninejurɔ nɔ yɛ ŋwɛi. Ehe miihia ni amɛtsɛ Yehowa Nyɔŋmɔ gbɛi kɛha yiwalaheremɔ kɛtsɔ Kristo Yesu nɔ, ni nɔ ni fata he ji hemɔkɛyeli ní amɛaaná yɛ Kristo mli, ni amɛbu lɛ akɛ amɛ-Hiɛnyiɛlɔ. Agbɛnɛ nɔdaamɔnɔ kɛha Nyɔŋmɔ teŋ wekukpaa ní aaaná kɛ eshaifaa ní aaaná lɛ etsake. Ákɛ aŋkroaŋkroi lɛ, ehe miihia ni Yudafoi heyelilɔi lɛ akpɛlɛ nɛkɛ gbɛjianɔtoo hee nɛɛ nɔ. Yɛ mɛɛ gbɛ nɔ? Kɛtsɔ amɛhe nɔ ni amɛaajɔɔ amɛha Nyɔŋmɔ kɛ jajemɔ ni amɛaajaje yɛ faŋŋ mli amɛtsɔɔ akɛ amɛfee nakai kɛtsɔ nu ni aaamii amɛ yɛ Yesu Kristo gbɛi amli lɛ nɔ. Nu mli baptisimɔ ji amɛhenɔjɔɔmɔ kɛha Nyɔŋmɔ lɛ he okadi, ni no kɛ amɛ boteɔ ekɛ amɛteŋ wekukpaa hee mli kɛtsɔ Yesu Kristo nɔ.—Bɔfoi lɛ Asaji 2:21, 33-36; 3:19-23.

[Shishigbɛ niŋmaa]