Mɛni Ji Nɔ ni Baa Ejurɔfeemɔ Nɔ?

YƐ TUTUAMƆ ni ba yɛ September 11, 2001, yɛ New York City kɛ Washington, D.C. lɛ sɛɛ lɛ, maŋbii asɛɛfimɔ ni amɛkɛha mɛi ni oshara lɛ ba amɛnɔ lɛ sa kadimɔ waa diɛŋtsɛ. Yelikɛbuamɔ nitsumɔhei anaa kpɛ amɛhe yɛ U.S. dɔlai ni naa shɛɔ akpekpei toi akpei 2.7 ni akɛke bɔni afee ni akɛye abua mɛi ni oshara lɛ ba amɛnɔ lɛ awekumɛi lɛ hewɔ. Gbɔmɛi ni yɔɔ he fɛɛ he lɛ tao akɛ amɛaaye amɛbua yɛ bɔ ni amɛnaa kpɛ amɛhe yɛ nibii babaoo ni fite lɛ hewɔ.

Kɛlɛ, beni maŋbii lɛ ná amɛnu he akɛ yelikɛbuamɔ nitsumɔhei ni ale jogbaŋŋ lɛ kɛ shikai lɛ miitsu nii yɛ gbɛ ni ejaaa nɔ lɛ, amɛteŋ mɛi komɛi amli wo la waa. Mɛi amli fu waa beni amɛnu amaniɛbɔɔ ni je kpo akɛ yelikɛbuamɔ nitsumɔhe wulu ko eto yiŋ akɛ ebaatsĩ shika aaafee U.S. dɔlai akpekpei 546 ni enine shɛ nɔ lɛ fã naa bɔni afee ni ekɛtsu yiŋtoi krokomɛi ahe nii lɛ. Eyɛ mli akɛ yɛ sɛɛ mli lɛ nitsumɔhe lɛ tsake eyiŋkpɛɛ lɛ ni ekpa fai moŋ, shi adafitswalɔ ko jaje akɛ: “Mɛi ni wieɔ shiɔ nii lɛ na nɛkɛ tsakemɔ ni afee nɛɛ akɛ ekpe sɛɛ tsɔ̃ bɔ ni akɛaaná hekɛnɔfɔɔ ni ayɔɔ yɛ emli lɛ ekoŋŋ” dani tutuamɔ lɛ ba lɛ. Ni bo hu? Ani aha hekɛnɔfɔɔ ni oyɔɔ kɛha yelikɛbuamɔ nitsumɔhei lɛ amli egbɔjɔ nyɛsɛɛ nɛɛ?

Yelikɛbuamɔ loo Shikafitemɔ?

Kɛ hooo lɛ, abuɔ nikeenii ni akɛhaa yelikɛbuamɔ nitsumɔhei lɛ akɛ eji subaŋ kpakpa. Ni kɛlɛ, jeee mɔ fɛɛ mɔ kpɛlɛɔ nɔ nakai. Aaafee afii 200 ni eho lɛ, Samuel Johnson ni ji Ŋleshi woloŋmalɔ lɛ ŋma akɛ: “Onáa hekɛnɔfɔɔ ni fe fɛɛ akɛ oofee ekpakpa kɛji akɛ owo mɛi ni tsu nii anyɔmɔ ákɛ amɛdeŋmegbomɔ lɛ najiaŋtoo nɔ̃, fe kɛ okɛ shika yake yelikɛbuamɔ nitsumɔhei lɛ kɛkɛ.” Mɛi komɛi hiɛ susumɔi ni tamɔ nakai nɔŋŋ ŋmɛnɛ, ni amaniɛbɔi ni kɔɔ yelikɛbuamɔ nitsumɔhei ni kɛ shikai ni akɛkeɔ lɛ tsuɔ nii yɛ gbɛ ni ejaaa nɔ loo yɛ gbɛ ni esaaa nɔ lɛ he lɛ haaa maŋbii aná hekɛnɔfɔɔ. Susumɔ nɔkwɛmɔnii enyɔ ni ba nyɛsɛɛ nɛɛ ahe okwɛ.

Ashwie jamɔ mli yelikɛbuamɔ nitsumɔhe ko ni yɔɔ San Francisco lɛ nɔkwɛlɔ ko beni anu akɛ ekɛ opireshɛn ni afee lɛ lɛ he nyɔmɔ, kɛ nyɔmɔ ni ebɔɔ yɛ edaa otsi niyeli mli yɛ niyelihei, ni jara shɛɔ U.S. dɔlai 500 ni tee nɔ fe afii enyɔ lɛ bahaa nitsumɔhe lɛ ni awoɔ lɛ nyɔmɔ lɛ. Yɛ Britain lɛ, mɛi komɛi ni to tɛlivishiŋ nɔ nifeemɔ wulu ko he gbɛjianɔ bɔni afee ni akɛye abua mɛi ni ehia amɛ lɛ ahiɛ gboi beni  mɛi ná le akɛ yɛ pound akpekpei 6.5 (U.S. dɔlai aaashɛ akpekpei 10) ni akɛha koni akɛye abua kɛmamɔ awusãi akwɛmɔhei heei yɛ Romania lɛ gbɛfaŋ lɛ, shiai 12 ni shɛɛɛ bɔ ni ataoɔ lɛ lɛ pɛ ji nɔ ni amamɔ, ni anaaa he ni dɔlai akpei ohai abɔ tsɔ. Amaniɛbɔi ni esaaa ni tamɔ enɛɛmɛi lɛ eha mɛi ni keɔ shika lɛ ateŋ mɛi komɛi ahiɛ eba amɛhe nɔ waa yɛ shikai abɔ ni amɛkɛkeɔ kɛ mɛi ni amɛkɛhaa lɛ he.

Esa akɛ Ake Nii Aloo Esaaa

Kɛlɛ, eji dɔlɛ sane akɛ wɔɔha aŋkroaŋkroi loo nitsumɔhei fioo komɛi anifeemɔ afite mɛi ahesusumɔ kɛ mlihilɛ su diɛŋtsɛ ni wɔyɔɔ kɛha mɛi krokomɛi lɛ. Biblia lɛ kɛɔ akɛ: “Nyɔŋmɔ jamɔ ni he tse ni ehe bɛ muji ko yɛ Nyɔŋmɔ kɛ tsɛ lɛ hiɛ ji enɛ, akɛ mɔ asara awusãi kɛ okulafoi yɛ amɛmanehulu lɛ mli.” (Yakobo 1:27) Hɛɛ, nii ni aaafee aha ohiafoi kɛ mɛi ni yelikɛbuamɔ he miihia amɛ lɛ ji Kristojamɔ lɛ mli otu.

Ni kɛlɛ, ekolɛ obaasusu akɛ, ‘Ani esa akɛ maya nɔ mikɛ shika ake yelikɛbuamɔ nitsumɔhei, aloo ani esa akɛ mabɔ mɔdɛŋ kɛkɛ koni maye mabua kɛtsɔ nii ni mikɛaake aŋkroaŋkroi lɛ nɔ?’ Mɛɛ nihamɔ nɛkɛ Nyɔŋmɔ kpaa gbɛ? Sane ni nyiɛ sɛɛ lɛ baaha nakai sanebimɔi lɛ ahetoo.