Nyɛdamɔa Shi Diŋŋ ni Nyɛkwɛa Yehowa Yiwalaheremɔ Lɛ!
Nyɛdamɔa Shi Diŋŋ ni Nyɛkwɛa Yehowa Yiwalaheremɔ Lɛ!
“Nyɛtoa ní nyɛdamɔa shi diŋŋ ní nyɛkwɛa nyɛyiwala ní Yehowa baahere.”—2 KRONIKA 20:17.
1, 2. Mɛni hewɔ “Gog ni yɔɔ Magog shikpɔŋ lɛ nɔ” lɛ tutuamɔ ni baa lɛ yɔɔ oshara babaoo fe majimaji ateŋ awuiyeli ni akɛtutuaa mɔ lɛ he gbeyeishemɔ lɛ?
MƐI komɛi etsɔɔ bɔ ni awuiyeli ni akɛtutuaa mɔ ji lɛ mli akɛ je lɛ tutuamɔ, loo tutuamɔ ni akɛbaa hiŋmɛigbelemɔ diɛŋtsɛ po nɔ. Anuɔ shishi akɛ, esa ákɛ akɛ hiɛdɔɔ asusu hegbeyeiwoo nɛɛ he. Yɛ gbɛ kroko nɔ lɛ, oshara ko ni mli wa waa yɛ, ni eji tutuamɔ kroko ni hiɛdɔɔ yɔɔ mli fe fɛɛ eko, ni je lɛŋ bii kɛ amɛ jwɛŋmɔ eyaaa nɔ tsɔ̃ loo amɛsusuuu he kwraa po. Mɛni ji no?
2 No ji “Gog ní yɔɔ Magog shikpɔŋ lɛ nɔ” lɛ tutuamɔ ni Biblia lɛ wieɔ he yɛ Ezekiel yitso 38 lɛ. Ani eji sane ni áwo he tsɔ akɛ abaakɛɛ akɛ nɔ ni baajɛ nɛkɛ tutuamɔ nɛɛ mli aba lɛ yɛ oshara babaoo fe majimaji ateŋ awuiyeli ni akɛtutuaa mɔ? Dabi kwraa, ejaakɛ Gog tutuamɔ lɛ fe adesa nɔyelii ni atutuaa amɛ kɛkɛ. Etutuaa Nyɔŋmɔ ŋwɛi nɔyeli lɛ! Shi kɛlɛ, nɔ ni tamɔɔɔ adesai ni ekolɛ omanye fioo ko pɛ amɛyeɔ beni atutuaa amɛ gbɛjianɔtoo lɛ, yɛ Bɔlɔ lɛ gbɛfaŋ lɛ ebaanyɛ etsu Gog tutuamɔ ni naa wa fe fɛɛ lɛ he nii kɛmɔ shi kwraa.
Nyɔŋmɔ Nɔyeli lɛ Tutuamɔ
3. Kɛjɛ afi 1914 kɛbaa nɛɛ, mɛni áfɔ̃ je lɛŋ nɔyelɔi lɛ nine ni amɛfee, ni te ámɛhere nɔ amɛha tɛŋŋ?
3 Béi ni kã Nyɔŋmɔ Maŋtsɛ ni yeɔ nɔ amrɔ nɛɛ lɛ kɛ Satan yiwalɛ gbɛjianɔtoo lɛ teŋ lɛ etee nɔ aahu kɛjɛ be mli ni ato Nyɔŋmɔ Maŋtsɛyeli lɛ ama shi yɛ ŋwɛi yɛ afi 1914 lɛ. No mli abɔ adesa nɔyelɔi kɔkɔ koni amɛba amɛhe shi amɛha Nɔyelɔ ni Nyɔŋmɔ ehala lɛ lɛ. Shi amɛkpoo nakai feemɔ, taakɛ agba afɔ shi lɛ, akɛ: “Shikpɔŋ nɔ maŋtsɛmɛi lɛ ete shi edamɔ shi, ni lumɛi lɛ hu efee ekome amɛtee Yehowa kɛ mɔ ni efɔ lɛ mu lɛ yinɔ ajina [akɛ]: ‘Nyɛhaa wɔkumɔa amɛgboklɛi lɛ, ni wɔtserɛ amɛkpãai lɛ yɛ wɔhe wɔshwie!’” (Lala 2:1-3) Shi ni ateɔ awoɔ Maŋtsɛyeli nɔyeli nɛɛ baashɛ he ni kwɔ fe fɛɛ yɛ Gog ni jɛ Magog lɛ tutuamɔ be lɛ mli.
4, 5. Te aaafee tɛŋŋ ni adesai kɛ Nyɔŋmɔ ŋwɛi nɔyeli ni anaaa lɛ aaawu hu?
4 Ekolɛ wɔbaasusu bɔ ni adesai baanyɛ awu ashi ŋwɛi nɔyeli ni anaaa lɛ lɛ he. Biblia lɛ jieɔ lɛ kpo akɛ, mɛi ni feɔ nɔyeli nɛɛ ji “mɛi akpei oha-kɛ-nyɔŋmai-ejwɛ-kɛ-ejwɛ lɛ ni ahé kɛjɛ shikpɔŋ lɛ nɔ lɛ” kɛ “Toobi,” Kristo Yesu. (Kpojiemɔ 14:1, 3; Yohane 1:29) Akɛni eji ŋwɛi nɔ̃ hewɔ lɛ, awieɔ nɔyeli hee nɛɛ he akɛ “ŋwɛi hee,” ni awieɔ eshishibii ni yɔɔ shikpɔŋ nɔ lɛ ahe yɛ gbɛ ni ja nɔ akɛ “shikpɔŋ hee.” (Yesaia 65:17; 2 Petro 3:13) Mɛi ni ji Kristo nanemɛi niyelɔi 144,000 lɛ ateŋ mɛi ni fa egbe amɛshikpɔŋ nɔ nitsumɔ naa yɛ anɔkwayeli mli momo. No hewɔ lɛ, ámɛye bɔ ni amɛsa akɛ amɛŋɔɔ amɛsɔɔmɔ nitsumɔi heei yɛ ŋwɛi lɛ he odase.
5 Shi kɛlɛ, mɛi 144,000 lɛ ateŋ shwɛɛnii fioo ko yɛ shikpɔŋ nɔ lolo. Mɛi fe 15,000,000 ni ba Nuŋtsɔ lɛ Gbɛkɛnaashi Niyenii lɛ shishi yɛ afi 2002 mli lɛ ateŋ mɛi 8,760 pɛ jie amɛhiɛnɔkamɔ kpo akɛ ahala amɛ kɛha ŋwɛi nitsumɔ nɛɛ. Mɔ fɛɛ mɔ ni baaka akɛ ebaatutua mɛi ni kpaa gbɛ akɛ amɛbaafee Maŋtsɛyeli lɛ mli bii ni eshwɛ lɛ miitutua Nyɔŋmɔ Maŋtsɛyeli lɛ diɛŋtsɛ.—Kpojiemɔ 12:17.
Maŋtsɛ lɛ Gbe Ekunimyeli lɛ Naa
6. Te Yehowa kɛ Kristo buɔ shi ni ateɔ awoɔ Nyɔŋmɔ webii lɛ amɛhaa tɛŋŋ?
6 Agba bɔ ni Yehowa baafee enii yɛ shi ni ate awo e-Maŋtsɛyeli ni eto ema shi lɛ he akɛ: “Mɔ ni ta ŋwɛi lɛ miiŋmɔ; Nuŋtsɔ lɛ miiye amɛhe fɛo po. No dani ekɛ amɛ aaawie yɛ emlifu mli, ni eeewo amɛhe gbeyei yɛ emlila lɛ mli. ‘Shi miwo mimaŋtsɛ yɛ migɔŋ krɔŋkrɔŋ Zion lɛ nɔ!’” (Lala 2:4-6) Be eshɛ agbɛnɛ ni Kristo ‘baagbe ekunimyeli lɛ naa’ yɛ Yehowa gbɛtsɔɔmɔ shishi. (Kpojiemɔ 6:2) Te Yehowa buɔ shitee-kɛ-woo ni akɛbaa ewebii anɔ yɛ enaagbee kunimyeli be lɛ mli lɛ ehaa tɛŋŋ? Ákɛ nɔ ni akɛteɔ shi awoɔ lɛ kɛ e-Maŋtsɛ ni yeɔ nɔ lɛ diɛŋtsɛ. Yehowa kɛɛ: “Mɔ ni taa nyɛhe lɛ eeta ehiŋmɛiŋ ajaŋmalaatɛ he.” (Zakaria 2:12) Ni Yesu ma nɔ mi diɛŋtsɛ akɛ, ebuɔ nɔ ni mɛi feɔ enyɛmimɛi ni afɔ amɛ mu lɛ akɛ lɛ amɛfee amɛha, loo nɔ ni amɛfeee amɛhaaa amɛ lɛ akɛ lɛ amɛfeee amɛhaaa.—Mateo 25:40, 45.
7. Mɛɛ yiŋtoi ahewɔ ni “asafo babaoo” lɛ ni atsɔɔ bɔ ni amɛji yɛ Kpojiemɔ 7:9 lɛ hu kɛ Gog girimɔ lɛ kpeɔ lɛ?
7 Hɛɛ, mɛi ni kɛ ekãa fiɔ shwɛɛnii ni afɔ amɛ mu lɛ asɛɛ lɛ hu baanu Gog girimɔ lɛ he. Nɛkɛ mɛi ni kpaa gbɛ akɛ amɛbaafee Nyɔŋmɔ “shikpɔŋ hee” lɛ mli bii lɛ ji “asafo babaoo” ko ni atsɛ amɛ kɛjɛ “jeŋmaŋ fɛɛ jeŋmaŋ kɛ akutsei kɛ maji kɛ majianɔ wiemɔi amli.” (Kpojiemɔ 7:9) Awieɔ amɛhe akɛ ‘amɛdamɔ maŋtsɛsɛi lɛ hiɛ kɛ toobi lɛ hiɛ, ni amɛwo atadei yɛji.’ No hewɔ lɛ, amɛyɛ nɔkpɛlɛmɔ shidaamɔ yɛ Nyɔŋmɔ kɛ Kristo Yesu hiɛ. Ni amɛhiɛ “blɛoi yɛ amɛdɛŋ,” ni amɛkɛjieɔ Yehowa yi akɛ jeŋ muu fɛɛ Maŋtsɛ ni sa, ni Maŋtsɛ ni ewo, ni ji Yesu Kristo, “Nyɔŋmɔ toobi” lɛ jieɔ enɔyeli lɛ kpo yɛ enɔyeli be lɛ mli lɛ.—Yohane 1:29, 36.
8. Mɛni Gog tutuamɔ lɛ baaha Kristo afee, ni mɛni baajɛ mli aba?
8 Gog tutuamɔ lɛ baaha Maŋtsɛ ni Nyɔŋmɔ ewo lɛ afee nii ni ewu ta yɛ Harmagedon. (Kpojiemɔ 16:14, 16) Abaakpata mɛi ni ekpoo akɛ amɛaakpɛlɛ maŋtsɛ ni Yehowa ji lɛ nɔ lɛ ahiɛ. Shi yɛ gbɛ kroko nɔ lɛ, mɛi ni eŋmɛ amɛtsui shi yɛ amanehulu mli yɛ anɔkwa ni amɛyeɔ Nyɔŋmɔ Maŋtsɛyeli lɛ hewɔ lɛ, baaná naanɔ hejɔɔmɔ. Bɔfo Paulo ŋma yɛ enɛ he akɛ: “Nii ni ji Nyɔŋmɔ kojomɔ ni ja gbɛ lɛ he okadi ni anaa faŋŋ, koni abu nyɛ akɛ nyɛsa Nyɔŋmɔ maŋtsɛyeli ní nyɛnaa hewɔ nɔ̃ lɛ, kɛji eyɛ mli nakai akɛ eja yɛ Nyɔŋmɔ hiɛ akɛ mɛi ni haoɔ nyɛ lɛ eeehao amɛ eto najiaŋ, ni nyɛ mɛi ní ahao nyɛ lɛ, eeeha nyɛkɛ wɔ fɛɛ hejɔɔmɔ, beni aaajie Nuŋtsɔ Yesu kpo kɛaajɛ ŋwɛi kɛ ehewalɛ bɔfoi lɛ, mɔ ni kɛ lalilɛi aaatɔ owele yɛ mɛi ni leee Nyɔŋmɔ kɛ mɛi ni booo wɔ-Nuŋtsɔ Yesu Kristo sanekpakpa lɛ toi lɛ anɔ lɛ.”—2 Tesalonikabii 1:5-8.
9, 10. (a) Te fee tɛŋŋ ni Yehowa ha Yuda ye henyɛlɔ ko ni he yɔɔ gbeyei waa lɛ nɔ kunim? (b) Mɛni esa akɛ Kristofoi aya nɔ afee ŋmɛnɛ?
9 Kristo baawu ashi efɔŋfeemɔi fɛɛ yɛ amanehulu kpeteŋkpele ni baa ni baaya ayagbe naa yɛ Harmagedon lɛ mli. Shi ehe ebahiaŋ ni esɛɛnyiɛlɔi lɛ awu, tamɔ bɔ ni enɛ he ebahiaaa kɛha Yuda akutsei enyɔ maŋtsɛyeli lɛ mli bii lɛ afii akpei abɔ ni eho nɛ lɛ. Ta lɛ ji Yehowa nɔ̃, ni ekɛ kunimyeli ha. Nɔ ni aŋma afɔ shi lɛ kaneɔ akɛ: “Yehowa ha káwolɔi banina Amon kɛ Moab kɛ Seir gɔŋ lɛ nɔ bii ní ebatua Yuda lɛ, ni atswia amɛ nii. Ni Amonbii kɛ Moabbii lɛ hu te shi wo Seir gɔŋ lɛ nɔ bii lɛ, ni amɛfee amɛ musu ni amɛkpata amɛhiɛ; ni beni amɛgbe Seirbii lɛ butuu lɛ, amɛteŋ mɔ fɛɛ mɔ ye bua enaanyo ni amɛkɛkpatakpataa amɛhiɛ. Shi beni Yudabii lɛ bashɛ buuhe ní yɔɔ ŋã lɛ nɔ lɛ, ní amɛkwɛ ta babaoo lɛ, naa, amɛji gbohii sɔŋŋ ní jwere shi nɛɛ, ni mɔ ko ejeee mli.”—2 Kronika 20:22-24.
10 Eba mli pɛpɛɛpɛ taakɛ Yehowa egba efɔ shi lɛ, akɛ: “Jeee nyɛ nyɛbaawu ta nɛɛ.” (2 Kronika 20:17) Enɛ kɛ nɔkwɛmɔnɔ ni Kristofoi baanyiɛ sɛɛ lɛ haa amɛ beni Yesu Kristo feɔ nii “koni egbe ekunimyeli lɛ naa” lɛ. Dani enɛ aaaba lɛ, amɛyaa nɔ amɛwuɔ amɛshiɔ efɔŋ, jeee kɛ heloonaa tawuu nii, shi moŋ mumɔŋ tawuu nii. No hewɔ lɛ ‘amɛyaa nɔ amɛkɛ ekpakpafeemɔ yeɔ efɔŋ nɔ kunim.’—Romabii 6:13; 12:17-21; 13:12; 2 Korintobii 10:3-5.
Namɔ Baanyiɛ Gog Tutuamɔ lɛ Hiɛ?
11. (a) Mɛɛ najiaŋdamɔlɔi Gog kɛbaatsu nii koni amɛtsu etutuamɔ lɛ he nii? (b) Hiɛ ni hiɔ he nɔ yɛ mumɔŋ lɛ tsɔɔ mɛni?
11 Áyoo Gog ni yɔɔ Magog lɛ akɛ Satan Abonsam yɛ egbɛhe ni eba shi kɛjɛ afi 1914 kɛbaa lɛ mli. Ákɛ mumɔŋ bɔɔ nɔ lɛ, enyɛŋ etsu etutuamɔ lɛ he nii tɛ̃ɛ, shi ekɛ enajiaŋdamɔlɔi ni ji adesai baatsu nii ni amɛtsu enifeemɔi lɛ ahe nii. Namɛi baafee nɛkɛ adesai najiaŋdamɔlɔi nɛɛ? Biblia lɛ kɛ emlitsɔɔmɔ fitsofitso haaa, ni kɛlɛ, etsɔɔ wɔ nibii komɛi ni baaye abua wɔ koni wɔyoo mɛi ni amɛbaafee. Beni je lɛŋ nibii yaa nɔ ni ehaa Biblia gbalɛi baa mli lɛ, nibii baaya nɔ afee faŋŋ fiofio kɛha wɔ. Yehowa webii tsiɔ amɛhe kɛjɛɔ yiŋsusumɔ folo he, shi amɛhiɛ kãa yɛ mumɔŋ, ni amɛhiɛ yɛ amɛhe nɔ yɛ maŋkwramɔŋ kɛ jamɔŋ saji ni baa ni haa Biblia gbalɛ baa mli lɛ ahe.
12, 13. Te gbalɔ Daniel gba naagbee tutuamɔ ni baaba Nyɔŋmɔ webii lɛ anɔ lɛ eha tɛŋŋ?
12 Gbalɔ Daniel haa aleɔ naagbee tutuamɔ ni akɛbaaba Nyɔŋmɔ webii anɔ lɛ, beni eŋma akɛ: “[Kooyigbɛ maŋtsɛ lɛ] ekɛ mlila babaoo aaaje kpo, ní eyafite mɛi pii ní efee amɛ musu. Ni eeeshi emɔɔ lɛŋ buui lɛ yɛ ŋshɔi lɛ kɛ gɔŋ krɔŋkrɔŋ ní yɔɔ fɛo lɛ teŋ.”—Daniel 11:44, 45.
13 Yɛ Biblia bei amli lɛ “ŋshɔi” lɛ ji Ŋshɔ Kpeteŋkpele lɛ loo Mediteranea lɛ, ni “gɔŋ krɔŋkrɔŋ” lɛ ji Zion, ni Yehowa wie yɛ he akɛ: “Shi miwo mimaŋtsɛ yɛ migɔŋ krɔŋkrɔŋ Zion lɛ nɔ!” (Lala 2:6; Yoshua 1:4) No hewɔ lɛ, yɛ mumɔŋ shishinumɔ naa lɛ, shikpɔŋ ni kã “ŋshɔi lɛ kɛ gɔŋ krɔŋkrɔŋ lɛ teŋ” lɛ damɔ shi kɛha Kristofoi ni afɔ amɛ mu lɛ ashikpɔŋ ni shwereɔ babaoo lɛ. Aleee amɛ dɔŋŋ akɛ amɛfata adesai ni tamɔ ŋshɔ ni etse amɛhe kɛjɛ Nyɔŋmɔ he lɛ ahe, ni amɛmiikpa gbɛ akɛ amɛkɛ Kristo Yesu baaye maŋtsɛ yɛ ŋwɛi Maŋtsɛyeli lɛ mli. Eyɛ faŋŋ akɛ, Nyɔŋmɔ tsuji ni afɔ amɛ mu lɛ kɛ amɛnanemɛi anɔkwafoi ni feɔ asafo babaoo lɛ baafee mɛi ni kooyigbɛ maŋtsɛ lɛ baatutua, beni efãa eta ni naa wa fe fɛɛ lɛ ni haa Daniel gbalɛ lɛ baa mli lɛ.—Yesaia 57:20; Hebribii 12:22; Kpojiemɔ 14:1.
Te Nyɔŋmɔ Tsuji Baafee Amɛnii Amɛha Tɛŋŋ?
14. Mɛni nibii etɛ Nyɔŋmɔ webii baafee kɛ́ atutua amɛ?
14 Mɛni akpaa gbɛ akɛ Nyɔŋmɔ tsuji baafee beni ámɛbaje tutuamɔ shishi lɛ? Shikome ekoŋŋ lɛ, nɔ ni Nyɔŋmɔ maŋ lɛ diɛŋtsɛ fee yɛ Yehoshafat gbii lɛ amli lɛ kɛ nɔkwɛmɔnɔ haa. Kadimɔ akɛ afã emli bii lɛ akɛ amɛfee nibii etɛ: (1) amɛkɔ shidaamɔ, (2) amɛdamɔ shi diŋŋ, ni (3) amɛkwɛ Yehowa yiwalaheremɔ. Te Nyɔŋmɔ webii ni yɔɔ ŋmɛnɛ lɛ baafee amɛnii amɛha tɛŋŋ yɛ nɛkɛ wiemɔi nɛɛ anaa?—2 Kronika 20:17.
15. Ákɛ Yehowa webii akɔ amɛshidaamɔ lɛ tsɔɔ mɛni?
15 Amɛkɔ shidaamɔ: Nyɔŋmɔ webii lɛ baaya nɔ amɛhiɛ amɛgbɛhe ni amɛkɛfiɔ Nyɔŋmɔ Maŋtsɛyeli lɛ sɛɛ lɛ mli kpɛŋŋ ni amɛhe kpokpooo. Amɛbaaya nɔ amɛhiɛ amɛshidaamɔ ni ji maŋ saji ni Kristofoi kɛ amɛhe wooo mli lɛ mli. ‘Amɛbaafi shi shiŋŋ, ni amɛgbugbaaa’ yɛ amɛ anɔkwa sɔɔmɔ ni amɛkɛhaa Yehowa lɛ mli, ni amɛbaaya nɔ ni amɛjie Yehowa yi yɛ faŋŋ yɛ emɔbɔnalɛ lɛ hewɔ. (1 Korintobii 15:58; Lala 118:28, 29) Ŋmɛnɛŋmɛnɛ beaŋ loo wɔsɛɛ be mli nɔnyɛɛ ko bɛ ni baanyɛ ahoso amɛ kɛjɛ nɛkɛ shidaamɔ ni Nyɔŋmɔ nɔkpɛlɛmɔ yɔɔ mli nɛɛ he.
16. Yehowa tsuji baadamɔ shi shiŋŋ yɛ mɛɛ shishinumɔ naa?
16 Nyɛdamɔa shi shiŋŋ: Yehowa webii ebɔŋ mɔdɛŋ akɛ amɛaahere amɛ diɛŋtsɛ amɛyiwala, shi moŋ amɛkɛ amɛhiɛ baafɔ Yehowa nɔ kwraa kɛmɔ shi. Lɛ pɛ ji mɔ ni baanyɛ ahere etsuji lɛ ayiwala kɛjɛ jeŋ basabasafeemɔ mli, ni ewo shi akɛ ebaafee nakai. (Yesaia 43:10, 11; 54:15; Yaafo 3:26) Nɔ ni fata Yehowa ni wɔkɛ wɔhiɛ baafɔ enɔ lɛ he ji ŋmɛnɛŋmɛnɛ beaŋ gbɛjianɔtoo ni anaa ni eka shi faŋŋ akɛ ékɛtsu nii afii nyɔŋmai abɔ koni ekɛtsu eyiŋtoi ahe nii lɛ ni wɔkɛ wɔhiɛ baafɔ nɔ. Ehe baahia ni no mli lɛ anɔkwa Kristofoi kɛ amɛhe afɔ amɛnanemɛi jálɔi ni Yehowa kɛ e-Maŋtsɛ ni yeɔ nɔ lɛ kɛ hegbɛ eha amɛ akɛ amɛnyiɛ hiɛ lɛ anɔ. Nɛkɛ hii anɔkwafoi nɛɛ baakudɔ Nyɔŋmɔ webii lɛ. Amɛ gbɛtsɔɔmɔ ni aaaku hiɛ ashwie nɔ lɛ baanyɛ ekɛ oshara aba.—Mateo 24:45-47; Hebribii 13:7, 17.
17. Mɛni hewɔ Nyɔŋmɔ tsuji anɔkwafoi lɛ baana Yehowa yiwalaheremɔ lɛ?
17 Nyɛkwɛa Yehowa yiwalaheremɔ lɛ: Yiwalaheremɔ baafee nyɔmɔwoo ni akɛbaaha mɛi fɛɛ ni damɔɔ amɛgbɛhe akɛ Kristofoi ni hiɛɔ amɛ emuuyeli mli, ni kɛ amɛhiɛ fɔɔ Yehowa nɔ kɛha kpɔmɔ lɛ. Amɛbaatswa gbi ni Yehowa kojomɔ lɛ baashɛ shi lɛ he adafi—aahu kɛyashi he ni amɛbaanyɛ, kɛyashi naagbee ŋmɛlɛtswaa lɛ nɔ. Esa akɛ bɔɔ nii fɛɛ ale akɛ Yehowa ji anɔkwa Nyɔŋmɔ lɛ, ni ákɛ eyɛ tsuji anɔkwafoi yɛ shikpɔŋ nɔ. Ebaŋ kɔkɔɔkɔ akɛ jeŋ muu fɛɛ maŋtsɛ ni Yehowa ji lɛ he naataamɔ baate shi ekoŋŋ.—Ezekiel 33:33; 36:23.
18, 19. (a) Yɛ mɛɛ gbɛ nɔ kunimyeli lala ni yɔɔ 2 Mose yitso 15 lɛ jieɔ mɛi ni baaje Gog tutuamɔ lɛ mli shweshweeshwe lɛ henumɔi akpo yɛ? (b) Mɛni esa jogbaŋŋ akɛ Nyɔŋmɔ webii afee bianɛ?
18 Nyɔŋmɔ webii kɛ hewalɛ hee baabote jeŋ hee lɛ mli, ní amɛhe miitswa shi koni amɛlá kunimyeli lala, tamɔ bɔ ni blema Israelbii lɛ lá beni ahere amɛyiwala kɛtsɔ Ŋshɔ Tsuru lɛ mli lɛ. Amɛbaada Yehowa shi daa kɛha ehebuu akɛ aŋkroaŋkroi kɛ kuu, ni amɛbaaha blema lala nɛɛ mli wiemɔi nɛɛ ajije akɛ: “Mala maha Yehowa, ejaakɛ ewo ehiɛ nyam; . . . Yehowa lɛ, tawulɔ ni; Yehowa ji egbɛi. . . . Yehowa, oninejurɔ etserɛ henyɛlɔ lɛ mli. Ogbojee lɛ naa sɔŋŋ obutu mɛi ni te shi woo lɛ; otsu omlila lɛ kɛba, eshã amɛ tamɔ gbetselii. . . . Omlihilɛ naa okpala nɛkɛ maŋ ni okpɔ̃ nɛɛ, okɛ ohewalɛ lɛ tsɔɔ amɛ gbɛ kɛtee oshihilɛhe krɔŋkrɔŋ lɛ. . . . Okɛ amɛ aya ní oyatɛo amɛ yɛ onɔyeli gɔŋ lɛ nɔ, he ni oŋɔfee oshihilɛhe lɛ, Yehowa, ni ji hekrɔŋkrɔŋ lɛ, Nuŋtsɔ, ní oniji esaa eto lɛ. Yehowa aaaye maŋtsɛ kɛaatee naanɔi anaanɔ!”—2 Mose 15:1-19.
19 Agbɛnɛ, akɛni naanɔ wala gbɛkpamɔ lɛ mli efee faŋŋ fe bei fɛɛ hewɔ lɛ, mɛɛ hegbɛ po Nyɔŋmɔ tsuji ená nɛkɛ, akɛ amɛbaaye amɛhe ni amɛtuu amɛha Yehowa lɛ he odase, ní amɛsaa amɛfee amɛfaishitswaa akɛ amɛbaasɔmɔ lɛ akɛ amɛ naanɔ Maŋtsɛ lɛ ehee!—1 Kronika 29:11-13.
Ani Obaanyɛ Otsɔɔ Mli?
• Mɛni hewɔ Gog tutuamɔ lɛ baaba mɛi ni afɔ amɛ mu lɛ kɛ tooi krokomɛi lɛ anɔ lɛ?
• Mɛɛ gbɛ nɔ Nyɔŋmɔ webii baatsɔ akɔ shidaamɔ?
• Ákɛ adamɔ shi diŋŋ lɛ tsɔɔ mɛni?
• Mɛɛ gbɛ nɔ Nyɔŋmɔ webii baatsɔ ana Yehowa yiwalaheremɔ lɛ?
[Nikasemɔ lɛ he Sanebimɔi]
[Mfoniri ni yɔɔ baafa 18]
Yehowa kɛ kunimyeli ha Yehoshafat kɛ ewebii lɛ, ni ehe ehiaaa ni amɛwu ta
[Mfoniri ni yɔɔ baafa 20]
Mɛi ni afɔ amɛ mu lɛ kɛ tooi krokomɛi lɛ náa jeŋ muu fɛɛ maŋtsɛ ni Yehowa ji lɛ sɛɛfimɔ mli gbɛfaŋnɔ
[Mfoniri ni yɔɔ baafa 22]
Taakɛ blema Israelbii lɛ ji lɛ, etsɛŋ kwraa ni Nyɔŋmɔ webii lɛ baala kunimyeli lala