“Nyɛkashea Gbeyei ni Nyɛtsui Akafãa!”
“Nyɛkashea Gbeyei ni Nyɛtsui Akafãa!”
“Nyɛkashea gbeyei ni nyɛtsui akafãa! . . . Yehowa kɛ nyɛ yɛ!”—2 KRONIKA 20:17.
1. Mɛɛ hewalɛ awuiyeli ni akɛtutuaa mɔ náa yɛ mɛi anɔ, ni mɛni hewɔ shishinumɔ yɔɔ gbeyei ni amɛsheɔ lɛ he lɛ?
AWUIYELI ni akɛtutuaa mɔ! Wiemɔ lɛ tatsĩi po kɛkɛ haa mɔ tsui fãa, ni ehaa anuɔ he akɛ abɛ shweshweeshwe kɛ hiɛnɔkamɔ. Eteeɔ gbeyeishemɔ, awerɛhoyeli, kɛ mlifu henumɔi ashi. Ni eji wiemɔ ni tsɔɔ nɔ ni mɛi babaoo sheɔ gbeyei akɛ ebaahao adesai yɛ afii ni kã wɔhiɛ ni baa lɛ amli. Anɔkwale ni eji akɛ maji komɛi kɛ afii nyɔŋmai abɔ ewu kɛshi awuiyelii srɔtoi babaoo ni akɛtutuaa mɔ, ní yibiiwoo kpakpa ko jɛko mli kɛbako lɛ ji nɔ ni kɛ gbeyeishemɔ nɛɛ baa.
2. Te Yehowa Odasefoi feɔ amɛnii yɛ awuiyeli ni akɛtutuaa mɔ he naagba lɛ he amɛhaa tɛŋŋ, ni mɛɛ sanebimɔi ekɛbaa?
2 Shi kɛlɛ, yiŋtoo kpakpa yɛ kɛha hiɛnɔkamɔ. Yehowa Odasefoi, ni kɛ ekãa miishiɛ yɛ shikpɔji kɛ shikpɔŋkukuji 234 nɔ yɛ shikpɔŋ lɛ nɔ lɛ yɛ gbɛkpamɔ kpakpa ni sa kadimɔ. Yɛ nɔ najiaŋ ni amɛaashe gbeyei akɛ anyɛŋ afo awuiyeli ni akɛtutuaa mɔ sɛɛ lɛ, amɛyɛ hekɛnɔfɔɔ akɛ abaafo sɛɛ—ni ákɛ etsɛŋ. Ani abaanyɛ aná amɛgbɛkpamɔ kpakpa nɛɛ eko diɛŋtsɛ? Namɔ baanyɛ aha je lɛ aye ehe kɛjɛ haomɔ nɛɛ mli, ni mɛɛ gbɛ nɔ enɛ baatsɔ aba? Akɛni ekolɛ wɔteŋ mɔ fɛɛ mɔ kɛ awuiyeli henɔ ko ekpe pɛŋ hewɔ lɛ, ebaafee nɔ ni hi jogbaŋŋ akɛ wɔɔpɛi nɔdaamɔnɔ kɛha gbɛkpamɔ kpakpa nɛɛ lɛ mli wɔkwɛ.
3. Mɛni kɛ gbeyeishemɔ ni yɔɔ lɛ baa, ni mɛni agba afɔ shi yɛ wɔgbii nɛɛ ahe?
3 Ŋmɛnɛ, gbɔmɛi miishe gbeyei ni amɛtsui efã yɛ yiŋtoi srɔtoi ahewɔ. Susumɔ mɛi babaoo ni yɛ gbɔlɛ hewɔ lɛ amɛnyɛɛɛ amɛkwɛ amɛ diɛŋtsɛ amɛhe dɔŋŋ, aŋkroaŋkroi ni helai ni anyɛɛɛ atsa miigbɔjɔ amɛ, kɛ wekui ni miibɔ mɔdɛŋ koni amɛnine ashɛ shihilɛ mli nibii anɔ lɛ ahe okwɛ. Yɛ anɔkwale mli lɛ, susumɔ nibii ni baa yɛ shihilɛ mli diɛŋtsɛ ni aleee lɛ he okwɛ! Etamɔ nɔ ni kpatu gbele ni oshara loo amanehulu kɛbaa lɛ baanyɛ aba yɛ he fɛɛ he, ni efee klalo akɛ ebaafite nɔ fɛɛ nɔ ni wɔsumɔɔ. Gbeyeishemɔ kɛ yeyeeyefeemɔ ni tamɔ nɛkɛ, kɛ béi kɛ nijiaŋwujee babaoo lɛ eha wɔbe nɛɛ ebatsɔ tamɔ bɔ pɛ ni bɔfo Paulo tsɔɔ mli lɛ pɛpɛɛpɛ akɛ: “Na enɛ ole akɛ naagbee gbii lɛ anɔ lɛ jaramɔ bei baaba. Ejaakɛ gbɔmɛi aaatsɔmɔ hesuɔlɔi, . . . mɛi ni edɔɔɔ mɔ he, kpaŋmɔ mlikulɔi, oshekuyelɔi, mɛi ni nyɛɛɛ amɛkɔnɔ nɔ amɛye, mɛi ni hiɛ yɔɔ la, mɛi ni sumɔɔɔ ekpakpa.”—2 Timoteo 3:1-3.
4. Mɛɛ sane kpakpa fata shihilɛ ni mli wa ni atsɔɔ mli yɛ 2 Timoteo 3:1-3 lɛ he?
4 Eyɛ mli akɛ ŋmalɛ nɛɛ tsɔɔ shihilɛ ni mli wa moŋ, shi ekɛ hiɛnɔkamɔ haa. Kadimɔ akɛ jaramɔ bei lɛ baahi shi yɛ Satan yiwalɛ nibii agbɛjianɔtoo ni yɔɔ bianɛ lɛ “naagbee gbii lɛ anɔ.” Enɛ tsɔɔ akɛ heyeli ebɛŋkɛ, ni ákɛ etsɛŋ ni akɛ Nyɔŋmɔ Maŋtsɛyeli ni yeɔ emuu ni Yesu tsɔɔ ekaselɔi lɛ ni amɛsɔle yɛ he lɛ baaye yiwalɛ jeŋ gbɛjianɔtoo lɛ najiaŋ. (Mateo 6:9, 10) Nakai Maŋtsɛyeli lɛ ji Nyɔŋmɔ ŋwɛi nɔyeli ní gbalɔ Daniel kɛɛ akɛ, “efiteŋ dɔŋŋ kɛaatee naanɔ,” shi “eeejwara [adesai] maŋtsɛyelii nɛɛ fɛɛ wɔtsɔwɔtsɔ, ni eeekpata amɛhiɛ, shi lɛ diɛŋtsɛ lɛ eeedamɔ shi kɛaatee naanɔ” lɛ.—Daniel 2:44.
Kristofoi Ahe ni Amɛkɛwooo Maŋ Saji Amli Aloo Awuiyeli ni Akɛtutuaa Mɔ
5. Te majimaji lɛ fee amɛnii nyɛsɛɛ nɛɛ yɛ awuiyeli ni akɛtutuaa mɔ lɛ hegbeyeiwoo lɛ he amɛha tɛŋŋ?
5 Awuiyeli ni akɛtutuaa mɔ ekpata mɛi babaoo ahiɛ yɛ afii nyɔŋmai abɔ ni eho lɛ amli. Tutuamɔi ni akɛba New York City kɛ Washington, D.C. nɔ yɛ September 11, 2001 lɛ ha jeŋ muu lɛ fɛɛ hiɛ ba awuiyeli ni akɛtutuaa mɔ he oshara nɛɛ nɔ waa diɛŋtsɛ. Bɔ ni awuiyeli ni akɛtutuaa mɔ lɛ mli wa kɛ bɔ ni ekpele jeŋ muu fɛɛ hewɔ lɛ, maji ni yɔɔ shikpɔŋ lɛ nɔ lɛ kɛ oyaiyeli fee ekome koni amɛwu amɛshi nifeemɔ nɛɛ. Akɛ nɔkwɛmɔnɔ lɛ, taakɛ adafitswaa saji tsɔɔ lɛ, yɛ December 4, 2001 lɛ, “maŋ sɔɔlɔi ni kwɛɔ amɛmaji lɛ kɛ maŋsɛɛ maji asharamɔ nɔ ni jɛ maji 55 ni yɔɔ Europa, Amerika Kooyigbɛ kɛ Asia Teŋgbɛ anɔ lɛ kɛ jwɛŋmɔ kome kpɛlɛ yiŋ ko ni ato” koni amɛfee amɛhewalɛ ekome lɛ “nɔ.” U.S. maŋ onukpa ko jie nifeemɔ nɛɛ yi akɛ ekɛ “hewalɛ falɛ hee ko” ebawo ta ni awuɔ ashiɔ awuiyeli ni akɛtutuaa mɔ lɛ mli. Trukaa lɛ, gbɔmɛi akpei ohai abɔ kɛ amɛhe wo nɔ ni The New York Times Magazine tsɛ lɛ akɛ “tawuu kpele shishijee lɛ” mli. Aleee kɛji mɔdɛŋbɔi nɛɛ baaye omanye. Kɛlɛ, nɔ ni ejɛ ta ni awuɔ ashiɔ awuiyeli tutuamɔi lɛ mli eba lɛ etée gbeyeishemɔ kɛ yeyeeyefeemɔ henumɔi ashi yɛ mɛi babaoo amli, shi ebɛ lɛ nakai yɛ mɛi ni kɛ amɛhiɛ fɔ̃ɔ Yehowa nɔ lɛ agbɛfaŋ.
6. (a) Mɛni hewɔ bei komɛi lɛ ebaanyɛ ewa kɛha mɛi komɛi akɛ amɛaakpɛlɛ Kristofoi ahe ni amɛkɛwooo maŋ saji amli he shidaamɔ ni Yehowa Odasefoi ekɔ lɛ nɔ lɛ? (b) Mɛɛ maŋkwramɔŋ nifeemɔ he nɔkwɛmɔnɔ Yesu fee efɔ̃ shi eha esɛɛnyiɛlɔi lɛ?
6 Ale Yehowa Odasefoi waa akɛ amɛkɛ amɛhe wooo maŋkwramɔŋ saji amli. Yɛ be mli ni ekolɛ mɛi pii baasumɔ ni amɛkpɛlɛ shidaamɔ nɛɛ nɔ yɛ toiŋjɔlɛ be mli lɛ, amɛbafeɔ mɛi ni ekpɛlɛɛɛ nɔ tsɔ̃ kɛji akɛ shihilɛi ni yɔɔ srɔto te shi. Bei pii lɛ, gbeyeishemɔ kɛ yiŋkɔshikɔshifeemɔ ni ta kɛbaa lɛ téeɔ maŋhedɔɔ henumɔi ni mli wawai ashi. Enɛ baanyɛ eha ewa kɛha mɛi komɛi akɛ amɛaanu nɔ hewɔ ni mɔ ko baakpoo akɛ eeefi maŋ tafaai asɛɛ lɛ shishi. Shi kɛlɛ, anɔkwa Kristofoi le akɛ esa akɛ amɛbo Yesu famɔ akɛ ‘amɛjɛɛɛ je lɛ mli’ lɛ toi. (Yohane 15:19; 17:14-16; 18:36; Yakobo 4:4) Enɛ biɔ ni amɛhiɛ amɛhe ni amɛkɛwooo maŋkwramɔŋ loo maŋ saji amli lɛ mli. Yesu diɛŋtsɛ fee enɛ he nɔkwɛmɔnɔ kpakpa. Yɛ enilee ni yeɔ emuu kɛ enyɛmɔi ni ekaaa hewɔ lɛ, kulɛ ebaanyɛ eha adesai ashihilɛ aya hiɛ yɛ egbii lɛ amli. Shi kɛlɛ, etsi ehe kɛjɛ ehe ni ekɛaawo maŋkwramɔŋ saji amli lɛ he. Yɛ esɔɔmɔ lɛ shishijee mli lɛ, ekɛ shiŋŋfeemɔ kpoo jeŋ maŋtsɛyelihei fɛɛ nɔ nɔyeli ni Satan kɛha lɛ lɛ. Sɛɛ mli lɛ, ekpɛ eyiŋ oya ni ekpoo mɔ́ ni abaamɔ lɛ koni awo lɛ maŋtsɛ lɛ.—Mateo 4:8-10; Yohane 6:14, 15.
7, 8. (a) Mɛni maŋkwramɔŋ saji amli ni Yehowa Odasefoi kɛ amɛhe wooo lɛ etsɔɔɔ, ni mɛni hewɔ? (b) Romabii 13:1, 2 lɛ teɔ shi ewoɔ he ni akɛwoɔ yiwalɛ nifeemɔi ni akɛshiɔ nɔyelii lɛ amli lɛ yɛ mɛɛ gbɛ nɔ?
7 Esaaa akɛ anuɔ maŋ saji amli ni Yehowa Odasefoi kɛ amɛhe wooo lɛ shishi yɛ gbɛ ni ejaaa nɔ akɛ amɛfiɔ yiwalɛ nifeemɔi asɛɛ loo amɛkpɛlɛɔ nɔ. No feemɔ baate shi awo “suɔmɔ kɛ hejɔlɛ Nyɔŋmɔ lɛ” tsuji ni amɛkɛɛ amɛji lɛ. (2 Korintobii 13:11) Amɛkase bɔ ni Yehowa nuɔ yiwalɛ he ehaa lɛ he nii. Lalatsɛ lɛ ŋma akɛ: “Yehowa lɛ, jalɔ moŋ ekaa; shi mɔ fɔŋ kɛ mɔ ni sumɔɔ yiwalɛ lɛ, esusuma nyɛ̃ɔ amɛ.” (Lala 11:5) Amɛhiɛ yɛ nɔ ni Yesu kɛɛ bɔfo Petro lɛ hu nɔ akɛ: “Ŋɔɔ oklante lɛ oto etoohe; ejaakɛ mɛi fɛɛ ni kɔlɔɔ klante lɛ, klante nɔŋŋ akɛaakpata amɛhiɛ.”—Mateo 26:52.
8 Eyɛ mli akɛ yinɔsane etsɔɔ yɛ faŋŋ mli akɛ amale Kristofoi kɛ “klante” etsu nii yɛ bei pii amli moŋ, shi ebɛ lɛ nakai yɛ Yehowa Odasefoi agbɛfaŋ. Amɛtsiɔ amɛhe kɛjɛɔ nifeemɔi fɛɛ ni tamɔ nɛkɛ lɛ he. Odasefoi lɛ kɛ anɔkwayeli boɔ famɔ ni yɔɔ Romabii 13:1, 2 lɛ toi akɛ: “Mɔ fɛɛ mɔ aba ehe shi aha hegbɛi ni yeɔ nɔ [maŋkwramɔŋ nɔyelɔi] lɛ. Ejaakɛ hegbɛ ko bɛ ni jɛɛɛ Nyɔŋmɔ ŋɔɔ; shi hegbɛi ni yɔɔ lɛ, Nyɔŋmɔ to. No hewɔ lɛ mɔ fɛɛ mɔ ni kuɔ hegbɛ lɛ naa lɛ, Nyɔŋmɔ gbɛjianɔtoo lɛ eteɔ shi ewoɔ; ni mɛi ni teɔ shi nakai lɛ aaaná amɛkojomɔ.”
9. Mɛɛ gbɛ̀i enyɔ nɔ Yehowa Odasefoi tsɔɔ amɛwuɔ amɛshiɔ awuiyeli ni akɛtutuaa mɔ yɛ?
9 Shi, akɛni awuiyeli ni akɛtutuaa mɔ ehiii kwraa hewɔ lɛ, ani esaaa akɛ Yehowa Odasefoi feɔ nɔ ko yɛ he ni amɛkɛye kɛbua kɛtsĩ naa? Hɛɛ, esa akɛ amɛfee nɔ ko yɛ he, ni amɛmiifee nakai hu. Klɛŋklɛŋ kwraa lɛ, amɛtsiɔ amɛhe kɛjɛɔ nifeemɔi nɛɛ fɛɛ ahe. Nɔ ni ji enyɔ lɛ, amɛtsɔɔ gbɔmɛi Kristofoi ashishitoo mlai ni kɛ́ amɛkɛtsu nii lɛ ehaa amɛkpáa yiwalɛ nifeemɔi srɔtoi fɛɛ lɛ. * Nyɛsɛɛ afi lɛ, Odasefoi lɛ kɛ ŋmɛlɛtswai 1,202,381,302 tsu nii kɛye amɛbua mɛi koni amɛkase Kristofoi ashihilɛ gbɛ lɛ. Enɛ jeee be fitemɔ, ejaakɛ nɔ ni jɛ nitsumɔ nɛɛ mli ba ji akɛ, abaptisi mɛi 265,469 akɛ Yehowa Odasefoi, ni no tsɔɔ yiwalɛ nifeemɔi ni amɛkpoo kwraa ni amɛha ale yɛ faŋŋ mli.
10. Mɛɛ gbɛkpamɔi yɔɔ akɛ abaajie awuiyeli kɛjɛ ŋmɛnɛŋmɛnɛ jeŋ nɛɛ mli kɛya kwraa?
10 Kɛfata he lɛ, Yehowa Odasefoi lɛ le akɛ amɛ diɛŋtsɛ amɛnyɛŋ amɛjie nɔ fɔŋ feemɔ kɛjɛ je lɛ mli. No hewɔ ni amɛkɛ amɛhe fɔ̃ɔ mɔ ni baanyɛ—Yehowa Nyɔŋmɔ nɔ kwraa lɛ. (Lala 83:19) Yɛ mɔdɛŋ ni adesai bɔɔ yɛ anɔkwayeli mli lɛ fɛɛ sɛɛ lɛ, amɛnyɛŋ amɛfo yiwalɛ sɛɛ. Biblia ŋmalɔ ni akɛ mumɔ tsirɛ lɛ lɛ tsɔ hiɛ ebɔ wɔ kɔkɔ yɛ wɔbe nɛɛ, ni ji “naagbee gbii” lɛ ahe, ni ekɛɛ akɛ: “Gbɔmɛi fɔji kɛ shishiulɔi aaawo wu yɛ efɔŋ mli; amɛlakaa mɛi ni amɛ hu alakaa amɛ.” (2 Timoteo 3:1, 13) Kɛ́ wɔsusu nii ahe yɛ shishinumɔ nɛɛ naa lɛ, adesai agbɛkpamɔ akɛ amɛbaaye omanye yɛ ta ni amɛwuɔ amɛshiɔ nifɔjianii lɛ mli lɛ nyɛŋ aye omanye. Yɛ gbɛ kroko nɔ lɛ, wɔbaanyɛ wɔkɛ wɔhe afɔ̃ Yehowa nɔ akɛ ebaajie yiwalɛ kɛya kwraa kɛmɔ shi.—Lala 37:1, 2, 9-11; Abɛi 24:19, 20; Yesaia 60:18.
Amɛsheee Gbeyei yɛ Tutuamɔ ni Baa lɛ Fɛɛ Sɛɛ
11. Mɛni Yehowa efee momo koni ekɛjie yiwalɛ kɛya?
11 Akɛni toiŋjɔlɛ Nyɔŋmɔ lɛ nyɛ̃ɔ yiwalɛ nifeemɔ hewɔ lɛ, wɔbaanyɛ wɔnu nɔ hewɔ ni eje shishi eto gbɛjianɔ koni ekɛkpata mɔ ni kɛba, ni ji Satan Abonsam lɛ hiɛ lɛ shishi. Yɛ anɔkwale mli lɛ, Eha bɔfonukpa Mikael—Nyɔŋmɔ Maŋtsɛ hee ni ewo lɛ, ni ji Kristo Yesu lɛ eye Satan nɔ kunim butuu momo. Biblia lɛ tsɔɔ mli yɛ nɛkɛ gbɛ nɔ akɛ: “Ta te shi yɛ ŋwɛi: Mikael kɛ ebɔfoi lɛ fã drako lɛ nɔ ta. Ni drako lɛ bɔfoi lɛ fata ehe kɛwu, ni amɛnyɛɛɛ, ni asaŋ amɛnáaa gbɛ dɔŋŋ yɛ ŋwɛi. Ni ashɛ́ drako kpeteŋkpele lɛ afɔ̃, mɔ ni ji blema onufu lɛ ní atsɛɔ lɛ diabolo (naafolɔlɔ loo abonsam) lɛ kɛ satan (henyɛlɔ) lɛ ní shishiuɔ jeŋ muu lɛ fɛɛ lɛ, ashɛ́ lɛ afɔ̃ shikpɔŋ lɛ nɔ, ni ashɛrɛ ebɔfoi lɛ hu ashwie afata ehe.”—Kpojiemɔ 12:7-9.
12, 13. (a) Mɛni sa kadimɔ yɛ afi 1914 he? (b) Mɛni Ezekiel gbalɛ lɛ gba yɛ mɛi ni fiɔ Nyɔŋmɔ Maŋtsɛyeli lɛ sɛɛ lɛ ahe?
12 Biblia mli be he akɔntaabuu kɛ je lɛŋ shihilɛi fɛɛ kpãa gbee kɛtsɔɔ akɛ afi 1914 ji be ni awu nakai ta lɛ yɛ ŋwɛi lɛ. Kɛjɛ no sɛɛ kɛbaa nɛɛ lɛ, je lɛŋ shihilɛi etee nɔ efite fiofio. Kpojiemɔ 12:12 tsɔɔ nɔ hewɔ lɛ mli akɛ: “No hewɔ lɛ nyɛ ŋwɛii kɛ nyɛ mɛi ni nyɛyɔɔ jɛi nyɛnáa tsuijurɔ! Kpóo ha mɛi ni yɔɔ shikpɔŋ lɛ nɔ kɛ ŋshɔ hiɛ lɛ! ejaakɛ abonsam lɛ ekpeleke shi kɛba nyɛŋɔɔ, egiri naakpa, ni ele akɛ be fioo kɛkɛ eyɔɔ.”
13 Shishinumɔ yɛ mli akɛ, Abonsam kɛ mlifu miitutua Nyɔŋmɔ jálɔi ni afɔ amɛ mu lɛ kɛ amɛnanemɛi “tooi krokomɛi” lɛ titri. (Yohane 10:16; Kpojiemɔ 12:17) Etsɛŋ ni shitee-kɛ-woo nɛɛ baaba enaagbee yɛ be mli ni Abonsam kɛ tutuamɔ ni naa wa baa mɛi fɛɛ ni fiɔ Nyɔŋmɔ Maŋtsɛyeli ni ato shishi lɛ sɛɛ kɛ mɛi ni kɛ amɛhiɛ fɔ̃ɔ nɔ lɛ anɔ lɛ. Atsɛ́ tutuamɔ ni mli wa fe fɛɛ nɛɛ yɛ Ezekiel yitso 38 lɛ akɛ tutuamɔ ni jɛ “Gog ní yɔɔ Magog shikpɔŋ lɛ nɔ” lɛ ŋɔɔ.
14. Mɛɛ hebuu Yehowa Odasefoi ená yɛ be ni eho lɛ amli, ni ani enɛ baaya nɔ nakai daa?
14 Kɛjɛ be mli ni ashwie Satan kɛjɛ ŋwɛi kɛbaa nɛɛ lɛ, maŋkwramɔŋ gbɛjianɔtoi komɛi, ní akɛ mfonirifeemɔŋ wiemɔ tsɔɔ bɔ ni amɛji lɛ mli lɛ yɛ Kpojiemɔ 12:15, 16 lɛ ebɔ mɔdɛŋ amɛbu Nyɔŋmɔ webii lɛ ahe yɛ bei komɛi amli kɛjɛ Satan tutuamɔi lɛ amli. Nɔ ni tamɔɔɔ nakai lɛ, Biblia lɛ tsɔɔ akɛ yɛ Satan naagbee tutuamɔ lɛ mli lɛ, adesai agbɛjianɔtoo ko nyɛŋ afã mɛi ni kɛ amɛhiɛ fɔ̃ɔ Yehowa nɔ lɛ ahe. Ani esa akɛ enɛ aha Kristofoi ashe gbeyei loo amɛtsui afã? Dabi kwraa!
15, 16. (a) Yehowa hewalɛwoo wiemɔi ni ekɛha ewebii lɛ yɛ Yehoshafat gbii lɛ amli lɛ kɛ mɛɛ gbɛkpamɔ kpakpa haa Kristofoi ŋmɛnɛ? (b) Mɛɛ nɔkwɛmɔnɔ Yehoshafat kɛ gbɔmɛi lɛ fee amɛha Nyɔŋmɔ tsuji ŋmɛnɛ?
15 Nyɔŋmɔ baafi ewebii lɛ asɛɛ tamɔ bɔ ni efi emaŋ krɛdɛɛ lɛ sɛɛ yɛ Maŋtsɛ Yehoshafat gbii lɛ amli lɛ. Wɔkaneɔ akɛ: “Nyɛboa toi, Yuda fɛɛ kɛ Yerusalembii kɛ bo maŋtsɛ Yehoshafat! Bɔ ni Yehowa kɛɔ nyɛ nɛ: Nyɛkashea gbeyei ni nyɛtsui akafãa yɛ nɛkɛ ta babaoo nɛɛ hewɔ; ejaakɛ ta lɛ jeee nyɛnɔ̃ ni, shi moŋ Nyɔŋmɔ nɔ̃ ni! . . . Jeee nyɛ nyɛbaawu ta nɛɛ; nyɛtoa ní nyɛdamɔa shi diŋŋ ní nyɛkwɛa nyɛyiwala ní Yehowa baahere, Yuda kɛ Yerusalem! Nyɛkashea gbeyei ni nyɛtsui akafãa! Wɔ́ lɛ nyɛfãa ní nyɛkɛ amɛ ayakpea, ejaakɛ Yehowa kɛ nyɛ yɛ!”—2 Kronika 20:15-17.
16 Ama nɔ mi aha Yudafoi lɛ akɛ ehe ehiaaa ni amɛnɔ̃. Nakai nɔŋŋ Nyɔŋmɔ webii lɛ kɔlɔŋ tawuu nibii kɛfaŋ amɛhe beni Gog ni yɔɔ Magog lɛ tutuaa amɛ lɛ. Yɛ no najiaŋ lɛ, ‘amɛbaadamɔ shi diŋŋ ni amɛkwɛ amɛyiwala ní Yehowa baahere’ lɛ. Yɛ anɔkwale mli lɛ, shi ni adamɔɔ diŋŋ lɛ etsɔɔɔ nɔ ko ni afeee kwraa, ejaakɛ Nyɔŋmɔ webii ni hi shi yɛ Yehoshafat gbii lɛ amli lɛ po damɔɔɔ shi ni amɛfeee nɔ ko. Wɔkaneɔ akɛ: “Kɛkɛ ni Yehoshafat ma eyi shi ni ekɛ ehiɛ bu shi, ni Yuda kɛ Yerusalembii lɛ fɛɛ bumɔ shi yɛ Yehowa hiɛ, ni amɛjá Yehowa. . . . Ni [Yehoshafat] ekɛ maŋ lɛ tee ajina, ni eto lalatsɛmɛi ní alá aha Yehowa ní amɛjie eyi yɛ wulamɔ krɔŋkrɔŋ mli, ní amɛje kpo kɛnyiɛ tabilɔi lɛ ahiɛ ní amɛkɛɛ: Nyɛdaa Yehowa shi; ejaakɛ naanɔ emɔbɔnalɛ hiɔ shi kɛyaa!” (2 Kronika 20:18-21) Hɛɛ, beni gbɔmɛi lɛ kɛ henyɛlɔi atutuamɔ kpe po lɛ, amɛtee nɔ amɛkɛ ekãa jie Yehowa yi. Enɛ fee nɔkwɛmɔnɔ kɛha Yehowa Odasefoi lɛ koni amɛnyiɛ sɛɛ beni Gog kɛ enaagbee tutuamɔ lɛ baa amɛnɔ lɛ.
17, 18. (a) Mɛɛ su kpakpa Yehowa Odasefoi yɔɔ yɛ Gog tutuamɔ lɛ he? (b) Mɛɛ kaimɔ akɛha Kristofoi oblahii kɛ oblayei nyɛsɛɛ nɛɛ?
17 Kɛyashi nakai be lɛ aaashɛ—kɛ beni Gog tutuamɔ lɛ eje shishi lɛ sɛɛ po lɛ—Yehowa Odasefoi baaya nɔ amɛfi Nyɔŋmɔ Maŋtsɛyeli lɛ sɛɛ. Amɛbaaya nɔ amɛná nyɛmɔ kɛ hebuu yɛ asafoi ni fa fe 94,600 ni yɔɔ jeŋ fɛɛ ni amɛkɛbɔɔ lɛ mli. (Yesaia 26:20) Mɛɛ be ni esa akɛ wɔkɛ ekãa ajie Yehowa yi wɔbe nɛɛ ji nɛkɛ! Dabi, Gog tutuamɔ ni baa lɛ gbɛ ni amɛkpáa lɛ haaa amɛkɛ gbeyeishemɔ akpale kɛya sɛɛsɛɛ. Yɛ no najiaŋ lɛ, ewoɔ amɛ hewalɛ koni amɛha amɛyijiemɔ afɔle lɛ aya hiɛ kɛyashɛ he ni fe fɛɛ ni amɛaanyɛ.—Lala 146:2.
18 Oblahii kɛ oblayei akpei abɔ ni yɔɔ jeŋ fɛɛ ni kɛ amɛhe ewo be-fɛɛ sɔɔmɔ nitsumɔ lɛ mli lɛ miijie ekãa su ni sa nɛɛ kpo. Bɔni afee ni ama bɔ ni shihilɛ gbɛ ni tamɔ nɛkɛ ni aaahala lɛ nɔ bɛ lɛ nɔ mi lɛ, ajie wolo bibioo ni ji Oblahii kɛ Oblayei—Mɛni Nyɛkɛ Nyɛshihilɛ Baafee lɛ kpo yɛ afi 2002 kpokpaa wulu nɔ kpeei lɛ ashishi. Kristofoi oblahii kɛ oblayei kɛ mɛi ni edara fɛɛ hiɛ sɔ kaimɔ ni yɔɔ ebe naa pɛpɛɛpɛ nɛɛ.—Lala 119:14, 24, 99, 119, 129, 146.
19, 20. (a) Mɛni hewɔ Kristofoi bɛ yiŋtoo ko ni amɛaadamɔ nɔ amɛshe gbeyei loo amɛtsui afã lɛ? (b) Mɛni nikasemɔ ni nyiɛ sɛɛ lɛ baafee?
19 Yɛ je lɛŋ shihilɛi lɛ fɛɛ sɛɛ lɛ, ehe ehiaaa ni Kristofoi ashe gbeyei loo amɛtsui afã. Amɛle akɛ etsɛŋ ni Yehowa Maŋtsɛyeli lɛ baajie yiwalɛ nifeemɔi srɔtoi fɛɛ kɛya shikome nyɔŋlo. Amɛnáa miishɛjemɔ hu kɛjɛɔ le ni amɛle akɛ mɛi babaoo ni egboi yɛ yiwalɛ nifeemɔi amli lɛ baate shi yɛ gbohiiashitee lɛ mli lɛ mli. Yɛ be mli ni enɛ baaha mɛi komɛi aná hegbɛ klɛŋklɛŋ kwraa kɛkase Yehowa he nii lɛ, ebaaha mɛi komɛi hu aná hegbɛ kɛtsa amɛhenɔjɔɔmɔ sɔɔmɔ nifeemɔ ni amɛkɛhaa lɛ lɛ nɔ.—Bɔfoi lɛ Asaji 24:15.
20 Ákɛ anɔkwa Kristofoi lɛ, wɔnuɔ nɔ hewɔ ni ehe hiaa ni wɔhiɛ wɔhe ni wɔkɛwooo maŋ saji amli lɛ mli akɛ Kristofoi lɛ shishi, ni wɔtswa wɔfai shi akɛ wɔbaafee nakai. Wɔmiisumɔ ni wɔya nɔ wɔhiɛ gbɛkpamɔ ni yɔɔ naakpɛɛ ni tsɔɔ bɔ ni wɔbaanyɛ ‘wɔdamɔ shi diŋŋ ni wɔkwɛ wɔyiwala ni Yehowa baahere lɛ’ mli. Nikasemɔ ni nyiɛ sɛɛ lɛ baawo wɔhemɔkɛyeli lɛ mli hewalɛ kɛtsɔ le ni eeeha wɔle nibii ni yaa nɔ fiofio amrɔ nɛɛ ni haa shishinumɔ ni wɔyɔɔ yɛ Biblia mli gbalɛi amlibaa he lɛ yaa hiɛ lɛ nɔ.
[Shishigbɛ niŋmaa]
^ kk. 9 Kɛha aŋkroaŋkroi ni kpa amɛyiwalɛ shihilɛi lɛ koni amɛbatsɔmɔ Odasefoi lɛ ahe nɔkwɛmɔnii lɛ, kwɛmɔ Awake! srɔtoi ni je kpo yɛ March 22, 1990 lɛ baafa 21; August 8, 1991 lɛ baafa 18; kɛ Buu-Mɔɔ srɔtoi ni je kpo yɛ January 1, 1996 lɛ baafa 5; kɛ August 1, 1998 lɛ baafa 5 lɛ.
Ani Obaanyɛ Otsɔɔ Mli?
• Mɛni hewɔ mɛi babaoo kpaa nɔ fɔŋ gbɛ ŋmɛnɛ lɛ?
• Mɛni hewɔ Yehowa Odasefoi yɔɔ wɔsɛɛ be he gbɛkpamɔ kpakpa lɛ?
• Mɛni Yehowa efee momo yɛ mɔ ni kɛ yiwalɛi fɛɛ ba lɛ he?
• Mɛni hewɔ yiŋtoo ko bɛ ni wɔɔdamɔ nɔ wɔshe Gog tutuamɔ lɛ gbeyei lɛ?
[Nikasemɔ lɛ he Sanebimɔi]
[Mfoniri ni yɔɔ baafa 13]
Yesu fee nɔkwɛmɔnɔ kpakpa efɔ̃ shi yɛ Kristofoi ahe ni amɛkɛwooo maŋ saji amli lɛ he
[Mfonirii ni yɔɔ baafa 16]
Odasefoi oblahii kɛ oblayei akpei abɔ kɛ amɛhe ewo be-fɛɛ sɔɔmɔ lɛ mli kɛ miishɛɛ
[He ni Mfoniri ni yɔɔ baafa 12 lɛ Jɛ]
UN PHOTO 186226/M. Grafman