‘Salomo Ewulaaa Tamɔ Enɛɛmɛi Ateŋ Eko’

FƆFƆII ni ajeee gbɛ aduuu, tamɔ nɔ ni yɔɔ biɛ nɛɛ ji nɔ ni afɔɔ namɔ yɛ Afrika wuoyigbɛ gbɛjegbɛi lɛ ahe. Atsɛɔ amɛ cosmos, ni amɛkwɛ̃ɔ yɛ Amerika shikpɔji ni hulu tsoɔ yɛ nɔ lɛ anɔ. Ekolɛ fɔfɔii ni tamɔ nɛkɛ ni yɔɔ fɛo waa nɛɛ baanyɛ eha akai nikasemɔ ko ni Yesu tsɔɔ lɛ. Mɛi ni boɔ lɛ toi lɛ ateŋ mɛi babaoo ji ohiafoi, ni amɛfee yeyeeye yɛ amɛheloonaa hiamɔ nibii, amɛniyenii kɛ atadei ahe.

Yesu bi akɛ: “Ni mɛɛ hewɔ nyɛfeɔ yeyeeye yɛ atade hewɔ? Nyɛjwɛŋa ŋa nɔ fɔfɔii lɛ ahe, bɔ ni amɛkwɛ̃ɔ: amɛtsuuu nii, asaŋ amɛtsɛ̃ɛɛ kpãa. Shi miikɛɛ nyɛ akɛ, Salomo kɛ enunyam lɛ fɛɛ tete, ewulaaa tamɔ enɛɛmɛi ateŋ ekome.”—Mateo 6:28, 29.

Aka yiŋ srɔtoi yɛ nɔ̃ fɔfɔi pɔtɛɛ ni yɔɔ Yesu jwɛŋmɔ mli lɛ he. Kɛlɛ, Yesu tee nɔ ekɛto ŋa nɔ jwɛi ni abuuu lɛ he beni ekɛɛ: “Shi kɛji ŋa nɔ jwɛi ni ŋmɛnɛ eyɛ ni wɔ ni aŋɔwo flɔnɔɔ mli lɛ ni Nyɔŋmɔ wulaa nɛkɛ lɛ, efeŋ nɔ ni fe enɛ ehaŋ nyɛ ni nyɛhemɔkɛyeli faaa lɛ lo?”—Mateo 6:30.

Eyɛ mli akɛ cosmos jeee fɔfɔi ni kwɛ̃ɔ yɛ Israel moŋ, shi amɛmaa nikasemɔi ni Yesu tsɔɔ lɛ nɔ mi diɛŋtsɛ. Kɛji adamɔ sɛɛ shɔŋŋ loo abɛŋkɛ amɛ ni akwɛ amɛ jogbaŋŋ lɛ, amɛyɛ fɛo naakpa, ni eji nɔ ko ni mfonirishalɔi kɛ nitɛŋlɔi nyaa he waa diɛŋtsɛ. Eji anɔkwale akɛ, jeee nii ahe Yesu woɔ beni ekɛɛ akɛ, “Salomo kɛ enunyam lɛ fɛɛ tete, ewulaaa tamɔ enɛɛmɛi ateŋ ekome” lɛ.

Mɛni wɔkaseɔ kɛjɛɔ mli ŋmɛnɛ? Mɛi ni sɔmɔɔ Nyɔŋmɔ lɛ baanyɛ aná hekɛnɔfɔɔ akɛ ebaaye ebua amɛ bɔni afee ni amɛnine ashɛ amɛhiamɔ nii anɔ yɛ shihilɛi ni mli wawai po amli. Yesu tsɔɔ mli akɛ: “Nyɛtaoa Nyɔŋmɔ maŋtsɛyeli lɛ sɛɛgbɛ, ni aaaŋɔ nii nɛɛ fɛɛ [tamɔ niyenii kɛ atade ni he baahia lɛ] afata he ahã nyɛ.” (Luka 12:31) Hɛɛ, sɛɛnamɔi diɛŋtsɛ jɛɔ Nyɔŋmɔ Maŋtsɛyeli lɛ sɛɛgbɛ ni aaatao lɛ mli kɛbaa. Shi ani ole nɔ ni Nyɔŋmɔ Maŋtsɛyeli lɛ ji kɛ nɔ ni ebaafee eha adesai? Yehowa Odasefoi amii baashɛ amɛhe akɛ amɛaaye amɛbua bo koni otao hetooi lɛ kɛjɛ Biblia lɛ mli.