Sanebimɔi ni Jɛ Kanelɔi Adɛŋ

Ani eji tɔ̃mɔ akɛ aaagbe kooloo ko ni akɛshwɛɔ ni bɛ hewalɛ kwraa loo egbɔ waa lɛ?

Mɛi babaoo ji mɛi ni naa kooloi srɔtoi akɛ amɛji miishɛɛ kɛ ŋɔɔmɔ jɛɛhe. Kooloi komɛi ni aha amɛtsɔmɔ shia kooloi lɛ bafeɔ hefatalɔi kpakpai akɛ kooloi ni akɛshwɛɔ. Ákɛ nɔkwɛmɔnɔ lɛ, ale gbeei akɛ amɛkɛ toiboo ni sa kɛ hedɔɔ haa amɛnuŋtsɔmɛi. No hewɔ lɛ, ekolɛ shishinumɔ yɛ hedɔɔ ni gbɔmɛi baaná kɛha kooloo ni akɛshwɛɔ tamɔ nɛkɛ lɛ he, titri lɛ kooloo ko ni akɛshwɛɔ ni amɛkɛ lɛ ehi shi afii babaoo lɛ.

Shi kɛlɛ, kooloi ni akɛshwɛɔ lɛ ateŋ babaoo awala sɛɛ kɛɛɛ. Gbeei baanyɛ ahi shi afii 10 kɛyashi afii 15 loo nɔ̃, taakɛ ekolɛ eji yɛ alɔntei agbɛfaŋ yɛ amɛhenɔ naa lɛ. Ekolɛ kooloi ni akɛshwɛɔ lɛ baapiŋ yɛ amɛgbɔlɛ be mli yɛ amɛhelai kɛ kpajeei ahewɔ bɔ ni baanyɛ ahao amɛnɔtsɛmɛi ni kaiɔ afii komɛi ni eho be mli ni kooloi nɛɛ darako kwraa ni amɛyɔɔ ekãa waa lɛ. Ani eeefee tɔ̃mɔ akɛ aaafo kooloi ni tamɔ nɛkɛ lɛ anɔnaa lɛ sɛɛ, koni agbe amɛ?

Kristofonyo baasumɔ ni efee nii yɛ Nyɔŋmɔ suɔmɔnaa nii kɛ gbeekpamɔ naa kɛji ekɛ kooloi miiye. Eka shi faŋŋ akɛ amɛ ni akɛaaye yɛ yiwalɛ gbɛ nɔ lɛ teɔ shi woɔ Nyɔŋmɔ suɔmɔnaa nii, ejaakɛ e-Wiemɔ lɛ kɛɔ akɛ: “Jalɔ nuɔ he ehaa eshia kooloo tete.” (Abɛi 12:10) Shi kɛlɛ, enɛ etsɔɔɔ akɛ Nyɔŋmɔ naa kooloi yɛ gbɛ ni enaa gbɔmɛi ehaa lɛ nɔŋŋ naa. Beni Nyɔŋmɔ bɔ gbɔmɛi lɛ, etsɔɔ akɛ srɔtofeemɔ ni yɔɔ faŋŋ yɛ amɛ kɛ kooloi lɛ ateŋ. Ákɛ nɔkwɛmɔnɔ lɛ, eha adesai naanɔ wala he hiɛnɔkamɔ, shi ekpãaa nɛkɛ hiɛnɔkamɔ nɛɛ mli ehaaa kooloi. (Romabii 6:23; 2 Petro 2:12) Ákɛ Bɔlɔ lɛ, eyɛ hegbɛ ni ekɛhalaa wekukpaa ni sa ni baakã adesai kɛ kooloi ateŋ.

Mose Klɛŋklɛŋ Wolo 1:28 lɛ kɛɔ wɔ nɔ ni nakai wekukpaa lɛ ji. Nyɔŋmɔ kɛɛ klɛŋklɛŋ adesai lɛ akɛ: “Nyɛyea ŋshɔŋloi kɛ ŋwɛi loofɔji kɛ kooloo fɛɛ kooloo ni tsiɔ ehe yɛ shikpɔŋ lɛ nɔ lɛ nɔ.” Nakai nɔŋŋ Lala 8:7-9 lɛ kɛɔ akɛ: “[Nyɔŋmɔ] oŋɔ nibii fɛɛ kwa oto enajiashi: Tooi kɛ tsinai fɛɛ tswɛm kɛ ŋaŋ kooloi hu, ŋwɛi loofɔji kɛ ŋshɔŋloi.”

Nyɔŋmɔ fee lɛ faŋŋ akɛ gbɔmɔ baanyɛ ekɛ kooloi atsu nii yɛ gbɛ ni sa nɔ koni egbe amɛ. Ákɛ nɔkwɛmɔnɔ lɛ, abaanyɛ akɛ amɛhewolo lɛ afee atadei loo mamai. Nyɔŋmɔ ha gbɔmɔ hegbɛ hu koni eye kooloi lɛ alòo yɛ Nu Afua ni ba yɛ Noa gbii lɛ amli lɛ sɛɛ, ni enɛ bafata shishijee niyenii ni akɛha amɛ lɛ he.—1 Mose 3:21; 4:4; 9:3.

Enɛ haaa hegbɛ akɛ aje gbɛ agbe kooloi kɛha shwɛmɔ. Biblia lɛ wie Nimrod he yɛ 1 Mose 10:9 lɛ akɛ “gbɔbilɔ kpanaa.” Shi nakai kuku lɛ nɔŋŋ kɛɛ akɛ enɛ ha ‘ete shi ewo Yehowa.’

No hewɔ lɛ, yɛ be mli ni gbɔmɔ yeɔ kooloi anɔ lɛ, esaaa akɛ ekɛ nakai hegbɛ lɛ tsuɔ nii yɛ gbɛ ni ejaaa nɔ, shi moŋ ekɛtsu nii yɛ Nyɔŋmɔ Wiemɔ lɛ shishitoo tɛi lɛ kɛ gbeekpamɔ naa. Ekolɛ nɔ ni baanyɛ afata enɛ he ji kooloo ko ni akɛshwɛɔ ni ahaŋ epiŋ yɛ gbɛ ni he ehiaaa nɔ yɛ gbɔlɛ hewɔ, pilamɔ ko ni naa wa waa hewɔ, loo yɛ gbele hela ko hewɔ. Yɛ shihilɛ ni tamɔ nakai mli lɛ, eji Kristofonyo lɛ gbɛnaa nii akɛ ekpɛ eyiŋ yɛ nɔ ni ebaafee he. Kɛji ekpɛ eyiŋ akɛ ebaafee mɔbɔnalɛ kpojiemɔ akɛ akaha kooloo ni akɛshwɛɔ lɛ tee nɔ epiŋ be mli ni hiɛnɔkamɔ kpakpa ko bɛ akɛ ehe aaawa lɛ lɛ, no lɛ eeenyɛ eha agbe lɛ.