Alexander VI—Paapa ni Roma Hiɛ Kpaaa Enɔ

“YƐ KATOLIK shishinumɔ naa lɛ, fɔbuu wiemɔi ni mli wa waa bɛ bɔ ni sa ni abaanyɛ akɛbu Alexander VI fɔ kɛmɔ shi.” (Geschichte der Päpste seit dem Ausgang des Mittelalters [Paapai Ahe Yinɔsane Kɛjɛ Teŋgbɛ Afii lɛ Anaagbee]) “Gbɛ ko kwraa bɛ ni abaanyɛ atsɔ nɔ afã eshihilɛ yɛ teemɔŋ lɛ he . . . Esa akɛ wɔkpɛlɛ nɔ akɛ be ni paapa nɛɛ kɛye nɔ lɛ wooo Sɔlemɔ lɛ hiɛnyam kwraa. Eyɛ mli akɛ mɛi ni kɛ Borgia weku lɛ hi shi yɛ be kome mli lɛ ena nifeemɔi ni yɔɔ nyaŋemɔ nɛɛ ekomɛi moŋ, shi amɛna amɛ nɔ fɔŋ feemɔ lɛ akɛ nɔ ko ni ehiii kwraa, ni saji ni awie yɛ amɛhe, yɛ afii 400 sɛɛ lɛ sɛɛ efoko kwraa lolo.”—L’Église et la Renaissance (1449-1517)(Sɔlemɔ lɛ kɛ Nibii Atsakemɔ).

Mɛni hewɔ yinɔsane he nibii ni akɛ bulɛ haa ni aŋmala ni kɔɔ Roma Katolik Sɔlemɔ lɛ he lɛ wie wiemɔi ni mli wa nɛkɛ yɛ paapa ko kɛ eweku lɛ he lɛ? Mɛni amɛfee ni haa awieɔ ashiɔ amɛ waa nɛkɛ? Nibii ni ajieɔ atsɔɔ ni afee yɛ Roma (kɛjɛ October 2002-February 2003), ni egbɛi ji I Borgia—l’arte del potere (Borgia—Hewalɛ Kpojiemɔ) lɛ kɛ be ha koni akɛjwɛŋ hewalɛ ni paapa nitsumɔ lɛ kɛhaa ehe lɛ he, titri lɛ yɛ gbɛ ni Rodrigo Borgia, loo Alexander VI (paapa 1492-1503) lɛ tsɔ nɔ ekɛtsu nii lɛ hewɔ.

Bɔ ni Fee ni Ená Hewalɛ

Afɔ́ Rodrigo Borgia yɛ afi 1431 mli awo weku ko ni ehe gbɛi waa mli yɛ Játiva, yɛ Aragon maŋtsɛyeli lɛ, ni amrɔ nɛɛ eji Spain lɛ mli. Etsɛkwɛ̃, ni ji Alfonso de Borgia, Valencia osɔfonukpa lɛ kudɔ ewɔfase lɛ wolokasemɔ, ni ekwɛ koni beni Rodrigo ji oblanyo fioo ni yeko afii 20 lolo lɛ, ená osɔfoi anitsumɔ lɛ he sɛɛ (osɔfoi anitsumɔi ni shika nyɔmɔwoo fata he). Rodrigo fã kɛyahi Italy, he ni ekase mlalee yɛ beni eye afii 18, ni Alfonso, ni no mli lɛ eji osɔfonukpa lɛ kwɛɔ lɛ lɛ. Beni Alfonso batsɔ Paapa Calixtus III lɛ, efee Rodrigo kɛ ewɔfase kroko osɔfonukpai. Afee Pere Lluís Borgia amralo ni kwɛɔ maŋtiasei srɔtoi anɔ. Etsɛɛɛ ni ahala Rodrigo akɛ sɔlemɔ lɛ nɔkwɛlɔ sɛɛmɔ, gbɛhe ni ehi mli yɛ paapai srɔtoi ashishi, ni ye ebua lɛ ni ekɛná nii babaoo, ni ebua jwetri babaoo naa eha ehe, ni ená mɛi anɔ hewalɛ babaoo, ni ehi shi tamɔ odehe lɛ.

Rodrigo le nii, enaa tse, efiɔ ŋaa nitsumɔi kɛ nikasemɔ sɛɛ, ni enine shɛɔ nibii ni ekɛmamɔɔ ehiɛ akɛ eetao lɛ anɔ. Ekɛ ehe wo bɔlɛnamɔi babaoo ni mla eŋmɛɛɛ gbɛ mli, ni ekɛ ehemɔ ni ekɛ lɛ hi shi yɛ ewala be fɛɛ mli lɛ fɔ bii ejwɛ, ni ekɛ yei krokomɛi hu fɔ bii. Eyɛ mli akɛ Paapa Pius II kã ehiɛ yɛ “nyenyeŋtswibɔɔ babaoo” he  miishɛɛ ni eyɔɔ lɛ kɛ “ŋɔɔmɔyeli ni husu bɛ he” lɛ hewɔ moŋ, shi Rodrigo tsakeee esubaŋ.

Beni Paapa Innocent VIII gbo yɛ afi 1492 mli lɛ, sɔlemɔ lɛ mli osɔfonukpai lɛ kpe koni amɛhala esɛɛyelɔ. Ale jogbaŋŋ ni ŋwanejee ko bɛ he akɛ, Rodrigo Borgia kɛ nikeei ni nɔ bɛ kɛ mɛi aheguɔgbee ha enanemɛi osɔfonukpai lɛ fɔ̃ oshiki amɛha lɛ koni eje kpo kɛjɛ nakai teemɔŋ kpee lɛ mli akɛ Paapa Alexander VI. Mɛɛ gbɛ nɔ etsɔ ewo oshiki ni osɔfonukpai lɛ fɔ amɛha lɛ lɛ he nyɔmɔ? Kɛtsɔ sɔlemɔ lɛ mli gbɛhei, maŋtsɛmɛi awei, mɔji, sɔlemɔtsui wuji, kɛ osɔfonukpai anɔyelihe ni anáa shika babaoo kɛjɛɔ jɛmɛ lɛ nɔ. Obaanyɛ onu nɔ hewɔ ni sɔlemɔ he yinɔsaneŋmalɔ ko tsɛ́ Alexander VI nɔyeli be lɛ akɛ “Roma Sɔlemɔ lɛ efɔŋfeemɔ kɛ hiɛgbeji agbii” lɛ shishi.

Ejeee Mɔ ni Hi Fe Je Lɛŋ Lumɛi

Yɛ mumɔŋ hewalɛ ni Alexander VI ná akɛ sɔlemɔ lɛ yitso hewɔ lɛ, eye ebua ni asaa mligbalamɔ ni kã Spain kɛ Portugal teŋ yɛ shikpɔŋkukuji heei ni ayaná yɛ Amerika lɛ hewɔ. Ehewalɛi ni sɛɛ etsɛɛɛ lɛ ha etsɔ paapa lɛ maji ni yɔɔ shikpɔŋkukuji yɛ Italy teŋgbɛ lɛ yitso, ni eye enɔyeli lɛ nɔ tamɔ Nibii Atsakemɔ maŋtsɛmɛi lɛ eko fɛɛ eko fee lɛ pɛpɛɛpɛ. No hewɔ lɛ, nɔ ni kadi Alexander VI nɔyeli be lɛ, tamɔ paapai ni tsɔ ehiɛ kɛ mɛi ni ba yɛ esɛɛ lɛ fɛɛ anɔ̃ ji nyɔɔŋnihemɔ, wekumɛi ahiɛaŋkwɛmɔ, kɛ gbɔmɔgbee hesusumɔ.

Italy shikpɔŋkukuji ahepelemɔ he akaŋshii tee nɔ yɛ nɛkɛ basabasafeemɔ be nɛɛ mli, ni paapa lɛ efeee mɔ ni kɛ ehe wooo mli. Ato emaŋkwramɔŋ ŋaatsɔɔi kɛ ekpaŋmɔi ni efeɔ ni efoɔ mli lɛ ahe gbɛjianɔ koni no aha ená hewalɛ babaoo, ni eha ebii lɛ ashwere yɛ nitsumɔ kɛ nikasemɔ mli, koni ewó Borgia weku lɛ nɔ kɛteke ekrokomɛi fɛɛ. Ebinuu Juan kɛ Castile maŋtsɛ lɛ tsɛ nyɛmi bi bote gbalashihilɛ mli, ni afee lɛ Gandía ni yɔɔ Spain lɛ nɔ ablade. Jofré, ni ji ebinuu kroko kɛ Naples maŋtsɛ lɛ nabi bote gbalashihilɛ mli.

Beni hefatalɔ ko he hiaa paapa lɛ koni ewaje wekukpaa ni kã ekɛ France teŋ lɛ, ekũ eshiwoo akɛ ekɛ ebiyoo Lucrezia, ni eye afii 13 lɛ baaha Aragon ablade ko lɛ gbãlã lɛ mli, ni yɛ no najiaŋ lɛ, ekɛ lɛ ha Milan odehe ko wekunyo. Beni nakai gbalashihilɛ lɛ he eyahiaaa dɔŋŋ yɛ maŋkwramɔŋ shishinumɔ ko naa hewɔ lɛ, etsɔ shishiumɔ ŋaa gbɛ ko nɔ efite gbalashihilɛ lɛ ni ekpee Lucrezia eha odehei aweku ni kɛ amɛ yeɔ bienyɛ lɛ mlinyo, ni ji Alfonso ni jɛ Aragon lɛ. Beni be shwieɔ mli lɛ, Lucrezia nyɛmi nuu ni ji hiɛnyamtaolɔ, Cesare Borgia, ni yitsoŋ wa waa lɛ kɛ Louis XII ni jɛ France lɛ fee kpaŋmɔ, ni enyɛmi yoo ni kɛ Aragonnyo ko ebote gbalashihilɛ mli ehee lɛ bafee hiɛgbele sane. Mɛni abaanyɛ afee yɛ he? Wolo ko tsɔɔ mli akɛ, “mɛi ejwɛ ni taoɔ ni amɛju shi amɛgbe” Alfonso, ni ji oblayoo lɛ wu ni he bɛ nii lɛ “pila lɛ yɛ St. Peter sɔlemɔtsu agbo lɛ atrakwei lɛ anɔ. Ni beni ehe waa lɛ lɛ, Cesare tsuji lɛ ateŋ mɔ kome mia esɛ̃ ni egbe lɛ.” Paapa lɛ ni sumɔɔ ni ená hafatalɔi heei ni he baaba sɛɛnamɔ aha lɛ lɛ, to gbalashihilɛ ni ji etɛ he gbɛjianɔ kɛha Lucrezia, ni no mli lɛ eye afii 21 lɛ, koni ekɛ Ferrara odehe ko ni hiɛ nɔyeli hewalɛ waa lɛ binuu abote gbalashihilɛ mli.

Atsɔɔ bɔ ni Cesare nitsumɔ kɛ eshihilɛ ji lɛ mli akɛ eji “sane ko ni ehiii kwraa ni lá ehã emli etsu faa.” Eyɛ mli akɛ etsɛ hala Cesare akɛ osɔfo beni eye afii 17 moŋ, shi esa jogbaŋŋ moŋ kɛha tawuu fe sɔlemɔ he saji, akɛni eji mɔ ni le ŋaa, esumɔɔ ni ehiɛ aba nyam, ni ebɛ jeŋba tamɔ amɛteŋ mɛi fioo komɛi lɛ hewɔ. Beni eŋmɛɛ osɔfoyeli lɛ he lɛ, ekpee French maŋtsɛ biyoo ko, ni ebaná  hegbɛ akɛ Valentinois ablade. Kɛkɛ ni yɛ sɛɛfimɔ ni French asraafoi lɛ kɛha hewɔ lɛ, eje hekawoo kɛ ju ni ajuɔ shi agbeɔ mɛi lɛ ahe tafaa shishi, koni Italy kooyigbɛ abaje ehewalɛ shishi.

Bɔni afee ni paapa lɛ nine ashɛ sɛɛfimɔ ni he hiaa ni French asraafoi kɛbaaha lɛ nɔ koni etsu Cesare yiŋtoi ahe nii lɛ, paapa lɛ kpɛlɛ gbalamlitsemɔ ko ni ebaaná he sɛɛ, shi eyɔɔ hiɛgbele, ni Louis XII ni jɛ France lɛ tao, ni ŋmɛɔ lɛ gbɛ koni ekɛ Anne ni jɛ Brittany lɛ abote gbalashihilɛ mli koni ekɛ yoo nɛɛ nɔyelihe lɛ afata emaŋtsɛyeli lɛ he lɛ nɔ. Nɔ ni jɛ mli ba ni wolo ko tsɔɔ ji akɛ, paapa lɛ “kɛ bulɛ ni ayɔɔ kɛha Sɔlemɔ lɛ kɛ shishitoo mlai ni mli wa waa lɛ shã afɔle, koni enine ashɛ je lɛŋ sɛɛnamɔi komɛi ni sɛɛ etsɛɛɛ nɔ eha eweku lɛ mli bii.”

Nɔ ni Awie Ashi Nibii ni Paapa lɛ Fee Kɛteke Nɔ Lɛ

Nibii ni Borgia weku lɛ fee kɛteke nɔ lɛ ha ená henyɛlɔi, ni awie ashi amɛ. Paapa lɛ ku ehiɛ eshwie mɛi ni wieɔ shiɔ lɛ lɛ anɔ, shi mɔ ni anyɛŋ aku hiɛ ashwie enɔ ji Girolamo Savonarola. Eji Dominica osɔfo mɔ kome shihilɔ, mɔ ni shiɛmɔ naa wa waa, kɛ maŋkwramɔŋ hiɛnyiɛlɔ yɛ Florence. Ewie eshi nibii fɔji ni paapa lɛ saneyelihe lɛ feɔ lɛ kɛ agbɛnɛ paapa lɛ diɛŋtsɛ kɛ emaŋkwramɔŋ nifeemɔi lɛ, ni ebi ni akpa lɛ kɛjɛ egbɛhe lɛ koni afee tsakemɔ yɛ osɔfoyeli lɛ mli. Savonarola bolɔ waa akɛ: “Sɔlemɔ lɛ hiɛnyiɛlɔi, . . . gbɛkɛnaashi lɛ, nyɛyaa nyɛ hemɛi lɛ aŋɔɔ, ni leebi lɛ, nyɛyaa nyɛ krɔŋkrɔŋnii lɛ ahe.” Yɛ sɛɛ mli lɛ ewie akɛ: “[Nakai hiɛnyiɛlɔi lɛ] hiɛ ajwamaŋ hiɛ, amɛhiɛnyam lɛ yeɔ Sɔlemɔ lɛ awui. Miikɛɛ nyɛ akɛ, mɛnɛɛmɛi heee Kristofoi ahemɔkɛyeli lɛ amɛyeee.”

Bɔni afee ni eha Savonarola afee dioo lɛ, paapa lɛ kɛ osɔfonukpa gbɛhe ha lɛ, shi ekpoo. Kɛji akɛ ehe ni ekɛwo maŋkwramɔŋ ni ekɛte shi ewo paapa lɛ, loo eshiɛmɔ lɛ ni ha eshigbeemɔ ba lɛ jio lɛ, yɛ naagbee lɛ ashwie Savonarola kɛjɛ sɔlemɔ lɛ mli, amɔ lɛ, afee lɛ niseniianii koni ejaje etɔmɔ, asɛŋ lɛ, ni ashã lɛ.

Sanebimɔi ni Hiɛdɔɔ Yɔɔ Mli

Nɛkɛ yinɔsane mli nibii ni ba nɛɛ teeɔ sanebimɔi ni he hiaa ashi. Te abaatsɔɔ paapa lɛ teemɔŋ ŋaatsɔɔi kɛ jeŋba nɛɛ mli aha tɛŋŋ? Te yinɔsaneŋmalɔi tsɔɔ mli amɛhaa tɛŋŋ? Amɛkɛ naataomɔi srɔtoi tsuɔ nii.

Mɛi pii heɔ yeɔ akɛ esa akɛ asusu Alexander VI he yɛ jwɛŋmɔ ni mɛi ni hi shi yɛ nakai be lɛ mli lɛ susu ehe lɛ naa. Emaŋkwramɔŋ kɛ osɔfoi anitsumɔi amli nifeemɔ lɛ baanyɛ adamɔ bɔ ni eshweɔ ni eha toiŋjɔlɛ ahi shi, eha maji ni teɔ shi woɔ amɛhe lɛ ateŋ ajɔ, ewaje naanyobɔɔ tsakpaai ni kã ehefatalɔi ni baafã paapa lɛ he, ni eha Kristendom maŋtsɛmɛi lɛ afee ekome ni amɛkɛdamɔ Turkeybii ahegbeyeiwoo lɛ naa lɛ nɔ.

Ni ejeŋba hu? Woloŋlelɔ ko kɛɛ akɛ: “Sɔlemɔ lɛ ena Kristofoi gbohii kɛ osɔfoi ni esaaa kwraa be fɛɛ be. No hewɔ lɛ, bɔni afee ni enɛ akaha mɔ ko he miijɔ̃ ehe lɛ, Kristo diɛŋtsɛ gba fɔ shi; ekɛ e-Sɔlemɔ lɛ po to ŋmɔ ni ŋmaa kɛ jwɛi fɛɛ kwɛ̃ɔ yɛ mli lɛ he, aloo yaa ni duɔ looi kpakpai kɛ nɔ ni jeee ekpakpa fɛɛ, tamɔ bɔ ni eto etsui shi eha Yuda yɛ ebɔfoi lɛ ateŋ lɛ.” *

Woloŋlelɔ nɛɛ nɔŋŋ tee nɔ akɛ: “Bɔ ni sũ nii ni eboda baaa ojarawa tɛ jarawalɛ shi lɛ, nakai nɔŋŋ esha ni osɔfo ko baafee lɛ nyɛŋ eha aná jwɛŋmɔ fɔŋ . . . yɛ tsɔɔmɔi ni etsɔɔ lɛ ahe. . . . Shikatsuru yaa nɔ ehiɔ shi akɛ shikatsuru, kɛji akɛ niji ni jaa enɛ lɛ yɛ krɔŋŋ loo ebɛ krɔŋŋ.” Katolik  yinɔsaneŋmalɔ ko kɛ naataomɔ ba akɛ, tɛ ni áfo áfɔ̃ shi ni esa akɛ kulɛ Katolikbii anɔkwafoi anyiɛ sɛɛ yɛ Alexander VI sane lɛ mli lɛ ji ŋaawoo ni Yesu kɛha ekaselɔi lɛ yɛ woloŋmalɔi lɛ kɛ Farisifoi lɛ ahe lɛ, akɛ: ‘Nyɛfea nɔ ni amɛkɛɔ nyɛ lɛ, shi jeee nɔ ni amɛfeɔ lɛ.’ (Mateo 23:2, 3) Shi, yɛ anɔkwayeli fɛɛ mli lɛ, ani susumɔ ni tamɔ nɛkɛ tsɔɔ oyiŋ lo?

Ani Anɔkwa Kristojamɔ Nɛ?

Yesu shi gbɛtsɔɔmɔ ko ni mli kã shi faŋŋ koni akɛka mɛi ni kɛɛ Kristofoi ji amɛ lɛ akwɛ akɛ amɛhi lo, akɛ: “Amɛyibii lɛ nyɛkɛaale amɛ. Ani atseɔ wein yibii yɛ ŋmeitsei anɔ, aloo atseɔ agbamii yɛ aklatii anɔ? Nakai nɔŋŋ tso fɛɛ tso ni ji ekpakpa lɛ woɔ yibii kpakpai; shi tso fɔŋ woɔ yibii fɔ̃ji. Tso kpakpa nyɛɛɛ awo yibii fɔ̃ji, ni asaŋ tso fɔŋ nyɛɛɛ awo yibii kpakpai. No hewɔ lɛ amɛyibii lɛ nyɛkɛaale amɛ.”—Mateo 7:16-18, 20.

Yɛ fɛɛ mli lɛ, ani ana taomɔ nii nɛɛ yɛ jamɔ mli hiɛnyiɛlɔi lɛ ahe, ni te anaa amɛ tɛŋŋ bianɛ, yɛ anɔkwa Kristojamɔ he nɔkwɛmɔnɔ ni Yesu fee efɔ shi, ni esɛɛnyiɛlɔi anɔkwafoi lɛ feɔ he nɔkwɛmɔnɔ lɛ mli? Nyɛhaa wɔsusua nibii enyɔ pɛ he—amɛhe ni amɛkɛwoɔ maŋkwramɔŋ kɛ amɛshihilɛ gbɛ.

Yesu jeee je lɛŋ odehe. Eshihilɛ yɛ mlɛo aahu akɛ ekpɛlɛ nɔ akɛ, ebɛ “he ni ekɛ eyitso tsɔleɔ.” E-Maŋtsɛyeli lɛ “jɛɛɛ je nɛŋ,” ni ekaselɔi lɛ hu ‘jɛɛɛ je lɛ mli, taakɛ bɔ ni lɛ hu ejɛɛɛ je lɛ mli lɛ.’ Yesu kpoo akɛ ekɛ ehe aaawo egbii lɛ amli maŋkwramɔŋ saji amli.—Mateo 8:20; Yohane 6:15; 17:16; 18:36.

Shi, ani ejeee anɔkwale akɛ nɔ ni jamɔ gbɛjianɔtoi efee afii ohai abɔ ji ni amɛkɛ maŋkwramɔŋ nɔyelɔi ni ehiii abɔ koni amɛkɛna hewalɛ kɛ heloo gbɛfaŋ nibii, eyɛ mli akɛ nɔ ni ejɛ enɛ mli kɛba ji piŋmɔ ni baa gbɔmɛi foji lɛ anɔ? Ani ejeee anɔkwale hu akɛ osɔfoi lɛ ateŋ mɛi pii hiɛ ninámɔ kɛ ŋɔɔmɔyeli mli, yɛ be mli ni gbɔmɛi babaoo ni esa akɛ amɛsɔmɔ amɛ lɛ moŋ hiɔ shi yɛ ohia futaa mli?

Yesu nyɛ bi, Yakobo, jaje akɛ: “Gbalafitelɔi! nyɛleee akɛ je nɛɛ hedɔɔ lɛ Nyɔŋmɔ nyɛɛ ni lo? No hewɔ lɛ mɔ fɛɛ mɔ ni sumɔɔ akɛ etsɔ je nɛɛ hedɔlɔ lɛ etsɔ Nyɔŋmɔ henyɛlɔ.” (Yakobo 4:4) Mɛni hewɔ eji “Nyɔŋmɔ henyɛlɔ”? Klɛŋklɛŋ Yohane 5:19 kɛɔ akɛ: “Jeŋ muu lɛ fɛɛ kã mɔ fɔŋ lɛ mli.”

Yɛ Alexander VI jeŋbai ahe lɛ, yinɔsaneŋmalɔ ko ni hi shi yɛ Borgia gbii lɛ amli lɛ ŋma akɛ: “Ehi shi akɛ ahoshwibɔlɔ. Eleee nɔ ni ji hiɛgbele loo anɔkwayeli, ebɛ hemɔkɛyeli, ni ebɛ jamɔ hu. Nɔ ni ná enɔ hewalɛ pɛ ji hiɛjoomɔ kpele, ni nɔ ko esaaa ehiɛ, hiɛnyamtaomɔ ni husu bɛ he, yiwalɛ tamɔ mɔ ni hiŋmɛi gbeleko, kɛ ebii babaoo lɛ anɔyaa he akɔnɔ ni baaa shi.” Shi kɛlɛ, jeee Borgia pɛ ji osɔfoi anɔyeli kuu lɛ mlinyo ni fee enii yɛ nɛkɛ gbɛ nɔ.

Mɛni Ŋmalɛi lɛ wieɔ yɛ jeŋba ni tamɔ nɛkɛ he? Bɔfo Paulo bi akɛ: “Ani nyɛleee akɛ amimyelɔi anine shɛŋ Nyɔŋmɔ maŋtsɛyeli lɛ nɔ? Nyɛkahaa alakaa nyɛ! Ajwamaŋbɔlɔi loo . . . gbala mli kulɔi loo . . . amimyelɔi anine shɛŋ Nyɔŋmɔ maŋtsɛyeli lɛ nɔ kwraa.”—1 Korintobii 6:9, 10.

Nibii ni afee ni ajieɔ atsɔɔ ni ba yɛ Roma nyɛsɛɛ nɛɛ ni kɔɔ Borgia weku lɛ he lɛ yiŋtoo kome ji ni “adamɔ be ni nɛkɛ gbɔmɛi wuji nɛɛ hi shi yɛ mli lɛ nɔ anu amɛ shishi . . . , koni anu shishi, shi eyɛ faŋŋ akɛ jeee ni aha amɛye amɛhe loo ni abu amɛ fɔ.” Yɛ anɔkwale mli lɛ, ashi saralɔi lɛ akɛ mɛi ni yɔɔ hegbɛ akɛ amɛmuɔ sane naa bɔ ni amɛsumɔɔ. No hewɔ lɛ, te omu sane lɛ naa oha tɛŋŋ?

[Shishigbɛ niŋmaa]

[Mfoniri ni yɔɔ baafa 26]

Rodrigo Borgia, Paapa Alexander VI

[Mfoniri ni yɔɔ baafa 27]

Lucrezia Borgia tsɛ kɛ lɛ tsu nii koni enɔyeli hewalɛ afa

[Mfoniri ni yɔɔ baafa 28]

Cesare Borgia ji hiɛnyamtaolɔ ni bɛ jeŋba

[Mfoniri ni yɔɔ baafa 29]

Akɛni anyɛɛɛ aha Girolamo Savonarola afee dioo hewɔ lɛ, asɛŋ lɛ ni ashã lɛ