Ani Eji Kusum Nifeemɔ ko Kɛkɛ loo Nyɔɔŋnihamɔ?

YƐ POLAND kɔlejii komɛi amli lɛ, eji skulbii lɛ akusum nifeemɔ akɛ amɛbua shika naa koni amɛkɛhe nikeenii amɛha amɛtsɔɔlɔi lɛ, kɛ hiɛnɔkamɔ akɛ amɛbaaná yijiemɔ kpakpa yɛ amɛkaai lɛ amli. Ebɛ naakpɛɛ mɔ akɛ Kristofonyo oblayoo ko ni atsɛɔ lɛ Katarzyna lɛ kɛ shihilɛ ko ni mli wa kpe. Esusu he akɛ: “Ani miha shika loo mikaha?” Enanemɛi skulbii lɛ wie akɛ: “Eji kusum nifeemɔ ko ni ale. Nɔ ko eŋmɛŋ bo, shi obaanyɛ oná nii babaoo kɛjɛ mli, no hewɔ lɛ mɛni hewɔ oyiŋ feɔ bo kɔshikɔshi?”

Katarzyna kɛɛ akɛ: “Esa akɛ makpɛlɛ nɔ akɛ yɛ miklɛŋklɛŋ nikasemɔ afi lɛ mli lɛ, mikɛ mihe wo shika ni abuaa naa lɛ mli. Sɛɛ mli dani mibayɔse akɛ mikɛ nakai feemɔ miifi nyɔɔŋnihamɔ, ni Biblia lɛ buɔ lɛ fɔ́ lɛ sɛɛ.” Ekai ŋmalɛi ni tsɔɔ akɛ Yehowa ekpɛlɛɛɛ nyɔɔŋnihamɔ nɔ kwraa lɛ. (5 Mose 10:17; 16:19; 2 Kronika 19:7) Katarzyna kɛɛ akɛ: “Minu bɔ ni ewaaa kwraa akɛ aaaŋmɛɛ he aha tipɛŋfoi anɔnyɛɛ lɛ shishi. Misusu he ekoŋŋ, ni kɛjɛ nakai beaŋ kɛbaa nɛɛ mikɛ mihe woko nɛkɛ kusum nifeemɔ nɛɛ mli dɔŋŋ.” Yɛ hefɛoyeli ni jɛ skulbii krokomɛi aŋɔɔ ba yɛ afii etɛ ni eho lɛ amli lɛ fɛɛ sɛɛ lɛ, enyɛ egbála mli eha amɛteŋ mɛi komɛi akɛ ekɛ ehe wooo nɛkɛ “nikeenii” anaabuamɔ nɛɛ mli yɛ ehemɔkɛyeli ni damɔ Biblia lɛ nɔ lɛ hewɔ.

Mɛi komɛi folɔ Katarzyna naa akɛ eefee pɛsɛmkunya ni esu teɔ shi woɔ shihilɛ kpakpa namɔ. Ekɛɛ akɛ: “Amɛteŋ mɛi komɛi kã he amɛkɛ mi bɛ jogbaŋŋ lolo. Shi yɛ gbɛ kroko nɔ lɛ, amɛteŋ mɛi babaoo kɛ bulɛ haa misusumɔ lɛ, ni ehaa mináa miishɛɛ.” Abale Katarzyna akɛ Yehowa Odasefoi lɛ ateŋ mɔ kome, ni kɛ Biblia shishitoo tɛi lɛ tsuɔ nii daa yɛ eshihilɛ mli.