Gilead Skul—Maŋsɛɛ Sanekpakpa Shiɛmɔ Tsɔsemɔ lɛ Eye Afii 60

“YƐ BIBLIA kasemɔ ni wɔkɛ wɔhe wo mli vii lɛ hewɔ lɛ, eha wɔbɛŋkɛ Yehowa kpaakpa ni wɔkase egbɛjianɔtoo lɛ he nii waa. Enɛ saa wɔ kɛha shihilɛ yɛ maŋsɛɛ nitsumɔ mli.” Nɛkɛ ji bɔ ni nyɛmi yoo ko ni gbe klɛŋklɛŋ klas lɛ naa lɛ tsɔɔ nikasemɔ ni ená mli gbɛfaŋnɔ yɛ Buu-Mɔɔ Biblia Gilead Skul lɛ mli eha. Kɛjɛ beni ato Gilead Skul lɛ shishi afii 60 ni eho nɛ lɛ, ajɛɔ mli atsuɔ maŋsɛɛ sanekpakpa shiɛlɔi kɛyaa maji anɔ. Yɛ March 8, 2003 lɛ, afee klasbii ni ji 114 nikasemɔ naagbee nifeemɔ lɛ yɛ Watchtower Educational Center ni yɔɔ Patterson, New York lɛ. Mɛi 6,404 ni bua amɛhe naa yɛ tsũ lɛ mli kɛ hei ni akwɛ nifeemɔ lɛ kɛtsɔ tɛlivishiŋ nɔ lɛ bo nifeemɔ lɛ toi jogbaŋŋ, ni nibii ni fata he ji wiemɔi ni ahaa, sanebimɔi, kɛ kuu sanegbaa.

Theodore Jaracz, ni ji Yehowa Odasefoi a-Nɔyeli Kuu lɛ mlinyo lɛ ji sɛinɔtalɔ. Yɛ ehiɛkpamɔ wiemɔi lɛ amli lɛ, egbala jwɛŋmɔ kɛtee bɔ ni toibolɔi ni jɛ majimaji srɔtoi amli, ni amɛji saralɔi ni jɛ Asia, Caribbean, Amerika Teŋgbɛ kɛ Amerika Wuoyigbɛ, kɛ Europa lɛ asu yɔɔ ha lɛ nɔ. Nyɛminuu Jaracz kɛ ewiemɔ lɛ damɔ 2 Timoteo 4:5 lɛ nɔ, ni ema nitsumɔ ni fe fɛɛ ni maŋsɛɛ sanekpakpa shiɛlɔ ni Gilead tsɔse lɛ lɛ náa lɛ nɔ mi—akɛ ‘etsu sanekpakpa jajelɔ nitsumɔ lɛ.’ Amɛyeɔ anɔkwale lɛ he odase kɛtsɔ Biblia lɛ ní amɛaatsɔɔ mɛi lɛ nɔ.

Nikaselɔi Anine Shɛ Naagbee Gbɛtsɔɔmɔ Nɔ

John Larson ni ji United States Nitsumɔhe Nine Ajinafoi Akuu lɛ mlinyo lɛ je wiemɔi kukuji ni ahaa lɛ shishi kɛ saneyitso ko ni woɔ mɔ hemɔkɛyeli mli hewalɛ ni ji, “Kɛ́ Nyɔŋmɔ Yɛ Wɔ Sɛɛ lɛ, Namɔ Aaate Shi Awo Wɔ?” (Romabii 8:31) Wielɔ lɛ tsɔɔ Biblia mli nɔdaamɔnɔ ni nikaselɔi lɛ baanyɛ amɛkɛtsu nii kɛná hekɛnɔfɔɔ ni mli wa waa yɛ hewalɛ ni Yehowa yɔɔ ni ekɛaaye ebua amɛ lɛ mli bɔni afee ni amɛye gbɛtsii nibii ni ekolɛ amɛkɛbaakpe yɛ amɛnitsumɔi lɛ amli lɛ anɔ kunim. Beni Nyɛminuu Larson kɛ Romabii 8:38, 39 lɛ tsuɔ nii ni ekɛwoɔ nikaselɔi lɛ aŋaa lɛ, ekɛɛ akɛ: “Nyɛmɛa ni nyɛsusua hewalɛ ni Nyɔŋmɔ kɛmiitsu nii yɛ nyɛgbɛfaŋ lɛ he nyɛkwɛa, ni nyɛkaia akɛ nɔ ko nɔ ko bɛ ni baanyɛ atsĩ suɔmɔ ni Yehowa diɛŋtsɛ yɔɔ kɛha nyɛ lɛ naa.”

Wielɔ ni nyiɛ sɛɛ ji Guy Pierce, ni eji Nɔyeli Kuu lɛ mlinyo lɛ. Ehala saneyitso ni ji “Ha Ohiŋmɛii Aná Miishɛɛ!” (Luka 10:23) Etsɔɔ mli akɛ, nibii ni haa anáa anɔkwa miishɛɛ ji ni aaale Yehowa kɛ enaanɔ yiŋtoi lɛ, kɛ Biblia mli gbalɛi hu ni aaana akɛ eeba mli lɛ. He fɛɛ he ni nikaselɔi lɛ baaya lɛ, amɛbaanyɛ amɛhiɛ amɛ anɔkwa miishɛɛ lɛ mli kɛtsɔ amɛhiŋmɛii ni amɛaaha ená miishɛɛ lɛ nɔ. Nyɛminuu Pierce wo mɛi ni egbe nikasemɔ naa lɛ hewalɛ koni amɛjwɛŋ nibii kpakpai ni Yehowa efee eha amɛ lɛ nɔ jogbaŋŋ, ni amɛha amɛjwɛŋmɔ kɛ amɛtsui ahi E-suɔmɔnaa nii ni amɛaafee lɛ nɔ. Kɛtsɔ jwɛŋmɔ ni ja ni mɛi ni egbe nikasemɔ naa lɛ aaaná lɛ nɔ lɛ, amɛbaanyɛ amɛye naagba fɛɛ naagba ni ekolɛ amɛkɛbaakpe lɛ nɔ kunim.—Lala 77:13.

Kɛkɛ ni tsɔɔlɔi ni tsɔɔ klasbii lɛ anii daa gbi lɛ ateŋ mɛi enyɔ kɛ amɛ ye shɛɛ ni hewalɛwoo yɔɔ mli. Lawrence Bowen bi yɛ ewiemɔ lɛ saneyitso lɛ mli akɛ: “Ani Ootao Hiɛnyam?” Mɛi babaoo tsɔɔ hiɛnyam shishi akɛ eji yijiemɔ, bulɛ, kɛ woo ni amɛkɛaaha amɛ diɛŋtsɛ amɛhe. Ni kɛlɛ, lalatsɛ Asaf nu nɔ̃ diɛŋtsɛ ni hiɛnyam ji lɛ shishi akɛ—eji wekukpaa ni jara wa waa ni he tse ni aaakã mɔ kɛ Yehowa teŋ. (Lala 73:24, 25) Awo mɛi 48 ni  miigbe nikasemɔ naa lɛ hewalɛ koni amɛya nɔ amɛhiɛ wekukpaa gbagbalii ni kã amɛ kɛ Yehowa teŋ lɛ mli kɛtsɔ Biblia lɛ ni amɛaaya nɔ amɛkase lɛ jogbaŋŋ lɛ nɔ. Ŋwɛibɔfoi lɛ “shweɔ akɛ amɛaana” saji ni kɔɔ Yehowa yiŋtoi ahe nitsumɔ he lɛ mli fitsofitso kɛtsɔ Kristo nɔ. (1 Petro 1:12) Amɛmiisumɔ ni amɛle amɛ-Tsɛ lɛ he nii jogbaŋŋ bɔ ni amɛaanyɛ bɔni afee ni amɛjie hiɛnyam ni eyɔɔ lɛ kpo yɛ amɛnitsumɔ ni Nyɔŋmɔ etu ewo amɛdɛŋ lɛ mli. Kɛkɛ ni wielɔ lɛ wo nikaselɔi lɛ hewalɛ koni amɛwo Yehowa hiɛnyam yɛ amɛmaŋsɛɛ sanekpakpa shiɛmɔ nitsumɔ lɛ mli kɛtsɔ mɛi krokomɛi ni amɛaaye amɛbua amɛ bɔni afee ni amɛnine ashɛ wekukpaa ni jara wa waa lɛ nɔ.

Wallace Liverance ni ji mɔ ni ŋmalaa mɛi agbɛi kɛha skul lɛ yaa lɛ kɛ wiemɔi ni ahaa kɛtsaraa nɔ lɛ klɛŋklɛŋ fã lɛ ba naagbee kɛ saneyitso ni ji, “Wiemɔ Nyɔŋmɔ Nilee ní Aŋɔtee yɛ Teemɔŋ Saji Amli Lɛ.” (1 Korintobii 2:7) Mɛni ji nɛkɛ Nyɔŋmɔ nilee ni bɔfo Paulo wie he beni esɔmɔɔ yɛ emaŋsɛɛ sanekpakpa shiɛmɔ nitsumɔ lɛ mli lɛ? No ji nilee kɛ nyɛmɔ ni Yehowa yɔɔ ni ekɛaaha toiŋjɔlɛ kɛ ekomefeemɔ aba jeŋ muu fɛɛ lɛ. Nɛkɛ nilee nɛɛ damɔ Yesu nɔ. Yɛ nɔ najiaŋ ni Paulo aaashiɛ kɛkɔ bɔ ni aaafee akɛ Nyɔŋmɔ wiemɔ lɛ atsu maŋ saji ahe nii lɛ he lɛ, eye ebua mɛi koni amɛna bɔ ni Nyɔŋmɔ baatsake nibii ni jɛɔ Adam esha lɛ mli kɛbaa lɛ. (Efesobii 3:8, 9) Wielɔ lɛ wo etoibolɔi lɛ hewalɛ  akɛ: “Nyɛkɛ nyɛ sɔɔmɔ hegbɛ ni nyɛná lɛ atsua nii taakɛ Paulo fee lɛ, mɔ ni na emaŋsɛɛ sanekpakpa shiɛmɔ nitsumɔ lɛ akɛ eji hegbɛ ni ená ni ekɛaaye ebua mɛi koni amɛna bɔ ni Bɔlɔ ni ji Yehowa lɛ baatsɔ Yesu nɔ etsu eyiŋtoi ahe nii lɛ.”

Yɛ enɛ sɛɛ lɛ, Mark Noumair ni eji Gilead tsɔɔlɔ kroko hu lɛ, kwɛ sanegbaa ko ni teeɔ henumɔi ashi ni tee nɔ yɛ lɛ kɛ klasbii srɔtoi ateŋ lɛ nɔ. Saneyitso ni ji “Nyɔŋmɔ Wiemɔ Kasemɔ Haa Atsɔmɔɔ Sɔɔlɔi ni Yɔɔ Ekãa” lɛ ma Paulo wiemɔi ni yɔɔ Romabii 10:10 lɛ nɔ mi. Klasbii lɛ gba niiashikpamɔi srɔtoi ni amɛná yɛ shiɛmɔ nitsumɔ lɛ mli yɛ skul be lɛ mli lɛ he sane. Amɛniiashikpamɔi lɛ tsɔɔ akɛ, kɛji akɛ wɔkase Nyɔŋmɔ Wiemɔ lɛ ni wɔjwɛŋ nɔ lɛ, no lɛ nibii kpakpai ni kɔɔ Yehowa Nyɔŋmɔ kɛ e-Maŋtsɛyeli lɛ he lɛ baayimɔ wɔtsuii amli obɔbɔ ni wɔbaagba mɛi krokomɛi hu. Yɛ nyɔji enumɔ ni nikaselɔi lɛ kɛhi Watchtower Educational Center lɛ mli lɛ, amɛkɛ mɛi 30 ni yɔɔ wiemɔ lɛ he miishɛɛ lɛ je shia Biblia mli nikasemɔi ashishi yɛ shikpɔŋkuku ko ni asafoi ni bɛŋkɛ jɛmɛ lɛ etsu mli nii shii abɔ lɛ mli.

Mɛi ni Edara yɛ Mumɔŋ lɛ kɛ Ekãa Wie

Beni skul lɛ yaa nɔ lɛ, nikaselɔi lɛ ná sharamɔ ni amɛkɛ United States Betel weku lɛ mli bii shara lɛ he sɛɛ jogbaŋŋ. Robert Ciranko kɛ Robert P. Johnson ni amɛji nitsumɔhe nine lɛ mli bii ateŋ mɛi komɛi lɛ bibii anɔkwafoi ni kɛ afii babaoo esɔmɔ Yehowa lɛ saji, ni mɛi ni fata he ji nɔkwɛlɔi gbɛfalɔi ni amrɔ nɛɛ akɛ tsɔsemɔ krɛdɛɛ miiha amɛ yɛ Watchtower Educational Center lɛ. Mɛi fɛɛ ni abibii amɛ saji lɛ ji mɛi ni egbe Gilead nikasemɔ lɛ naa ni amɛsɔmɔ dã akɛ maŋsɛɛ sanekpakpa shiɛlɔi. Wiemɔi ni nilee yɔɔ mli ni anu kɛjɛ nɛkɛ mumɔŋ gbɔmɛi ni yɔɔ niiashikpamɔi nɛɛ anaa lɛ bafee hewalɛwoo nɔ̃ diɛŋtsɛ kɛha nikaselɔi lɛ, amɛwekumɛi, kɛ amɛnanemɛi lɛ.

Ŋaawoo wiemɔi ni amɛkɛha lɛ ekomɛi ji: “Nyɛhaa nyɛhiɛ adɔa waa yɛ shiɛmɔ nitsumɔ lɛ kɛ asafo lɛ mli.” “Nyɛkasusua nyɛ diɛŋtsɛ nyɛhe tsɔ fe nine. Nyɛhaa nyɛjwɛŋmɔi ahia oti ni nyɛkɛma nyɛhiɛ akɛ maŋsɛɛ sanekpakpa shiɛlɔi lɛ nɔ, ni nyɛkɛ hei ni nyɛbaayasɔmɔ yɛ lɛ afea nyɛshiai.” Wiemɔi krokomɛi ni yeɔ ebuaa lɛ fee bɔ ni Gilead tsɔsemɔ sáa sɔɔlɔ kɛha nitsumɔ kpakpa he mfoniri, ekɔɔɔ he eko he fɛɛ he ni abaaha eyatsu nii yɛ. Wiemɔi nɛɛ ateŋ ekomɛi ji nɔ ni nyiɛ sɛɛ nɛɛ: “Wɔkase bɔ ni wɔɔfee ekome kɛtsu nii kutuu.” “Skul lɛ ye ebua wɔ ni wɔkpɛlɛ kusumii krokomɛi anɔ.” “Atsɔɔ wɔ nii ni wɔkɛ Ŋmalɛi lɛ atsu nii yɛ gbɛ ni yɔɔ srɔto kwraa nɔ.”

John E. Barr ni kɛ afii babaoo esɔmɔ ákɛ Nɔyeli Kuu lɛ mlinyo lɛ, ha wiemɔ ni tere nifeemɔ muu lɛ fɛɛ lɛ. Esaneyitso ni damɔ Ŋmalɛ nɔ lɛ kɛɔ akɛ, “Amɛgbee Ejije Kɛtee Shikpɔŋ Muu lɛ Fɛɛ Nɔ.” (Romabii 10:18) Ebi sane akɛ, Ani Nyɔŋmɔ webii enyɛ etsu nɛkɛ nitsumɔ ni wa waa nɛɛ he nii ŋmɛnɛ? Hɛɛ, amɛnyɛ amɛfee nakai! Yɛ afi 1881 lɛ mli tɔŋŋ ni abibii mɛi ni kaneɔ Buu-Mɔɔ wolo tɛtrɛɛ lɛ akɛ: “Ani ooshiɛ”? Kɛkɛ ni wielɔ lɛ kai toibolɔi lɛ fɛɛ yinɔsane mli sane ko ni kɔɔ ninefɔɔ ni akɛha lɛ he yɛ afi 1922 yɛ kpokpaa wulu nɔ kpee ni afee yɛ Cedar Point yɛ Ohio, U.S.A. lɛ shishi lɛ akɛ: “Nyɛtswaa Maŋtsɛ lɛ kɛ Emaŋtsɛyeli lɛ He Adafi!” Beni be shwieɔ mli lɛ, ekãa ni Nyɔŋmɔ sɔɔlɔi anɔkwafoi yɔɔ lɛ kanya amɛ koni amɛjaje anɔkwa saji ni sa ni kɔɔ Maŋtsɛyeli lɛ he lɛ amɛtsɔɔ majimaji fɛɛ. Kɛtsɔ woji ni akala kɛ wiemɔi ni ajajeɔ lɛ anɔ lɛ, sanekpakpa lɛ he saji enyɛ eshɛ shikpɔŋ lɛ nɔ he fɛɛ he—fɛɛ kɛha Yehowa woo kɛ eyijiemɔ. Beni Nyɛminuu Barr mua ewiemɔ lɛ naa kɛ kanyamɔ wiemɔi, ni ewo mɛi ni egbe nikasemɔ naa lɛ hewalɛ koni amɛkadi jɔɔmɔi ni amɛnine eshɛ nɔ lɛ, ekɛɛ akɛ: “Kɛji nyɛmiisɔle nyɛmiiha Yehowa daa gbi yɛ hei ni nyɛbaayatsu nii yɛ lɛ, nyɛdaa lɛ shi kɛjɛa nyɛtsui mli tɔ̃ɔ yɛ hegbɛ ni nyɛná akɛ nyɛaaha wiemɔi nɛɛ aba mli akɛ, ‘Amɛgbee ejije kɛtee shikpɔŋ muu lɛ fɛɛ nɔ.’”

Yɛ wiemɔ ni aha nɛɛ sɛɛ lɛ, akane ŋamɔi ni jɛ maji srɔtoi anɔ lɛ atsɔɔ, ni sɛinɔtalɔ lɛ jara nikasemɔ yijiemɔ woji eha mɛi fɛɛ ni egbe nikasemɔ lɛ naa lɛ. Yɛ enɛ sɛɛ lɛ, nyɛmi nuu ko damɔ klasbii lɛ anajiaŋ ni ejɛ awerɛho kɛ miishɛɛ ni efutu henumɔ ni amɛná yɛ shimɔ ni amɛbaashi skul ni amɛsumɔɔ waa lɛ mli lɛ mli ekane wolo ko ni mɛi ni egbe nikasemɔ naa lɛ ŋma kɛha Nɔyeli Kuu lɛ kɛ Betel weku lɛ, ni jieɔ fai shi ni amɛtswa akɛ amɛbaajie Yehowa yi “kɛjɛ be nɛ mli aahu kɛyashi naanɔ” lɛ kpo lɛ etsɔɔ.—Lala 115:18.

Wɔsɔlemɔ ji akɛ, nɛkɛ mɛi ni egbe nikasemɔ naa nɛɛ baatsake amɛhe amɛwo shihilɛhei heei ni abaaha amɛ lɛ amli, koni amɛye amɛbua kɛha jeŋ muu fɛɛ shiɛmɔ nitsumɔ lɛ hiɛyaa, taakɛ bɔ ni mɛi ni tsɔ amɛhiɛ kɛjɛ afii 60 ni eho nɛ lɛ fee lɛ pɛpɛɛpɛ.

[Akrabatsa ni yɔɔ baafa 23]

KLASBII LƐ AHE SAJI

Maji srɔtoi anɔ ni amɛjɛ kɛba: 12

Maji srɔtoi anɔ ni aha amɛ nitsumɔ yɛ mli: 16

Nikaselɔi lɛ ayifalɛ: 48

Afii abɔ ni amɛye lɛ mlijaa: 34.4

Afii abɔ ni amɛkɛhi anɔkwale lɛ mli lɛ mlijaa: 17.6

Afii abɔ ni amɛkɛsɔmɔ kɛ amɛbe fɛɛ mlijaa: 13.5

[Mfoniri ni yɔɔ baafa 24]

Buu-Mɔɔ Biblia Gilead Skul Klasbii ni Ji 114 ni Gbe Nikasemɔ Naa

Gbɛii ni yɔɔ shishigbɛ lɛ miitsɔɔ bɔ ni amɛdamɔ shi amɛha lɛ mli, kɛjɛ hiɛgbɛ kɛyaa sɛɛgbɛ, ni amɛgbɛi lɛ jeɔ shishi kɛjɛɔ abɛkugbɛ kɛyaa ninejurɔgbɛ.

(1) Rosa, D.; Garrigolas, J.; Lindström, R.; Pavanello, P.; Tait, N. (2) Van Hout, M.; Donabauer, C.; Martínez, L.; Millar, D.; Festré, Y.; Nutter, S. (3) Martínez, P.; Clarke, L.; Maughan, B.; Fischer, L.; Romo, G. (4) Romo, R.; Eadie, S.; Tuynman, C.; Campbell, P.; Millar, D.; Rosa, W. (5) Lindström, C.; Garrigolas, J.; Markevich, N.; Lindala, K.; van den Heuvel, J.; Tait, S.; Nutter, P. (6) Maughan, P.; Pavanello, V.; Eadie, N.; West, A.; Clarke, D.; Markevich, J. (7) Fischer, D.; Donabauer, R.; Curry, P.; Curry, Y.; Carfagno, W.; West, M.; Tuynman, A. (8) Van Hout, M.; Campbell, C.; Festré, Y.; Carfagno, C.; van den Heuvel, K.; Lindala, D.