Taomɔ Nɔ̃ Kpakpa yɛ Mɛi Fɛɛ Amli
Taomɔ Nɔ̃ Kpakpa yɛ Mɛi Fɛɛ Amli
“Oo mi-Nyɔŋmɔ, kaimɔ mi yɛ nɔ̃ kpakpa hewɔ.”—NEHEMIA 13:31, NW.
1. Mɛɛ gbɛ nɔ Yehowa feɔ mɛi fɛɛ ejurɔ yɛ?
HULUTSOO yɛ atatu kɛ oblɔtu gbii pii asɛɛ lɛ kɛ tsakemɔ ni asumɔɔ waa baa. Adesai náa miishɛɛ, ni amɛmli filiɔ amɛ. Nakai nɔŋŋ yɛ hulutsoo gbaŋgbaŋ ni sɛɛ tsɛɔ kɛ jeŋ gbimɔ sɛɛ lɛ, nugbɔnɛmɔ fioo—nugbɔnɛmɔ wulu ni nɛɔ trukaa po lɛ—haa anáa hejɔlɛ kɛ miishɛɛ. Wɔsuɔmɔ Bɔlɔ Yehowa efee kɔɔyɔɔ mlitsakemɔ ni yɔɔ naakpɛɛ nɛɛ ewo kɔɔyɔɔ ni ebɔle shikpɔŋ lɛ he lɛ mli. Yesu gbala jwɛŋmɔ kɛtee Nyɔŋmɔ ejurɔfeemɔ lɛ nɔ, beni etsɔɔ akɛ: “Nyɛsumɔa nyɛhenyɛlɔi, nyɛjɔɔa mɛi ni lomɔɔ nyɛ, nyɛfea mɛi ni nyɛɔ nyɛ lɛ ekpakpa, ni nyɛsɔlea nyɛhaa mɛi ni haoɔ nyɛ ni amɛwaa nyɛ yi lɛ; koni nyɛtsɔmɔ nyɛtsɛ ni yɔɔ ŋwɛi lɛ bii; shi ehaa ehulu teɔ shi yɛ mɛi fɔji kɛ mɛi kpakpai anɔ, ni ehaa nugbɔ nɛɔ yɛ jalɔi kɛ mɛi ni bɛ jalɛ lɛ anɔ.” (Mateo 5:43-45) Hɛɛ, Yehowa feɔ mɛi fɛɛ ejurɔ. Esa akɛ etsuji lɛ abɔ mɔdɛŋ ni amɛkase lɛ kɛtsɔ nɔ̃ kpakpa ni amɛaatao yɛ mɛi fɛɛ amli lɛ nɔ.
2. (a) Mɛni nɔ Yehowa damɔɔ efeɔ ejurɔ? (b) Mɛni Yehowa kwɛɔ yɛ bɔ ni wɔfeɔ wɔnii yɛ ejurɔ ni efeɔ lɛ he lɛ?
2 Mɛni nɔ Yehowa damɔɔ efeɔ ejurɔ lɛ? Kɛjɛ be mli ni Adam fee esha nɛɛ lɛ, Yehowa kpako nɔ̃ kpakpa taomɔ yɛ adesai amli. (Lala 130:3, 4) Eyiŋtoo ji ni esaa ekɛ adesai toibolɔi aba shihilɛ yɛ Paradeiso mli ekoŋŋ. (Efesobii 1:9, 10) Emlihilɛ lɛ eha wɔná kpɔmɔ kɛmiijɛ esha kɛ emuu ni ayeee lɛ he gbɛkpamɔ mli kɛtsɔ shiwoo Seshi lɛ nɔ. (1 Mose 3:15; Romabii 5:12, 15) Kpɔmɔnɔ gbɛjianɔtoo lɛ nɔkpɛlɛmɔ eha yɛ naagbee mli lɛ abaanyɛ aku sɛɛ kɛya emuuyeli mli ekoŋŋ. Amrɔ nɛɛ, kɛfata nibii krokomɛi ahe lɛ, Yehowa miikwɛ wɔnifeemɔ yɛ ejurɔ ni efeɔ lɛ he. (1 Yohane 3:16) Enaa nɔ fɛɛ nɔ ni wɔfeɔ koni wɔkɛtsɔɔ hiɛsɔɔ ni wɔyɔɔ kɛha ejurɔ ni wɔfeɔ lɛ. Bɔfo Paulo ŋma akɛ: “Nyɔŋmɔ jeee mɔ ni yeɔ sane ni ejaaa ni ehiɛ aaakpa nyɛnitsumɔ lɛ nɔ kɛ suɔmɔ deŋme ni nyɛgbo yɛ egbɛi lɛ ahewɔ . . . lɛ.”—Hebribii 6:10.
3. Mɛɛ sanebimɔ esa akɛ wɔsusu he?
3 Belɛ, mɛɛ gbɛ nɔ wɔɔtsɔ wɔkase bɔ ni Yehowa taoɔ nɔ̃ kpakpa yɛ mɛi amli lɛ? Nyɛhaa wɔsusua hetooi kɛha sanebimɔ nɛɛ he yɛ shihilɛ mli hei ejwɛ amli wɔkwɛa: (1) Kristofoi asɔɔmɔ nitsumɔ lɛ, (2) weku lɛ, (3) asafo lɛ, kɛ (4) wekukpaa ni yɔɔ wɔkɛ mɛi krokomɛi ateŋ lɛ.
Yɛ Shiɛmɔ kɛ Kaselɔ Feemɔ Mli
4. He ni akɛwoɔ Kristofoi asɔɔmɔ nitsumɔ lɛ mli lɛ ji nifeemɔ ko ni tsɔɔ nɔ̃ kpakpa ni ataoɔ yɛ mɛi krokomɛi amli yɛ mɛɛ gbɛ nɔ?
4 Yesu tsɔɔ mli yɛ hetoo ni ekɛha ekaselɔi lɛ asanebimɔ ni kɔɔ nɔ ni ŋmaa kɛ jwɛi ahe abɛbua lɛ tsɔɔ lɛ mli akɛ, “abɔɔ lɛ ji je nɛŋ.” Akɛ Kristo ŋmɛnɛŋmɛnɛ beaŋ kaselɔi lɛ, wɔyɔseɔ anɔkwale nɛɛ kɛ́ wɔkɛ wɔhe miiwo shiɛmɔ nitsumɔ lɛ mli lɛ. (Mateo 13:36-38; 28:19, 20) Wɔshiɛmɔ lɛ kɔɔ wɔhemɔkɛyeli lɛ jajemɔ yɛ faŋŋ mli lɛ he. Anɔkwa sane ni ji akɛ ale Yehowa Odasefoi jogbaŋŋ yɛ amɛsɔɔmɔ yɛ shia-kɛ-shia kɛ gbɛjegbɛi anɔ lɛ diɛŋtsɛ yeɔ mɔdɛŋ ni wɔbɔɔ yɛ mɛi fɛɛ ni sa Maŋtsɛyeli shɛɛ sane lɛ ataomɔ mli lɛ he odase. Yɛ anɔkwale mli lɛ, Yesu fã akɛ: “Maŋ fɛɛ maŋ aloo akrowa fɛɛ akrowa mli ni nyɛaatee lɛ, nyɛbia mɔ ni sa shi yɛ jɛi.”—Mateo 10:11; Bɔfoi lɛ Asaji 17:17; 20:20.
5, 6. Mɛni hewɔ wɔkãa he wɔyasaraa mɛi shii abɔ yɛ amɛshiai amli lɛ?
5 Kɛ́ wɔmiisara mɛi beni amɛtsɛko wɔ lɛ, wɔkwɛɔ bɔ ni amɛfeɔ amɛnii yɛ wɔshɛɛ sane lɛ he. Bei komɛi lɛ wɔnaa akɛ mɔ ko baabo wɔ toi yɛ shia ko mli, yɛ be mli ni mɔ kroko ni yɔɔ nakai shia lɛ nɔŋŋ mli lɛ baabo akɛ “wɔbɛ he miishɛɛ,” kɛkɛ lɛ ekɛfo saramɔ lɛ sɛɛ. Kwɛ bɔ ni edɔɔ wɔ akɛ nakai shitee-kɛ-woo loo wiemɔ lɛ he miishɛɛ ni mɔ kome bɛ lɛ saa toiboo ni mɔ kroko lɛ feɔ lɛ he! Belɛ, mɛni wɔbaanyɛ wɔfee koni wɔya nɔ wɔtao nɔ̃ kpakpa yɛ mɛi fɛɛ amli?
6 Bei pii lɛ wɔsɛɛ ni wɔkuɔ kɛyaa shia lɛ mli beni wɔshiɛɔ yɛ nakai akutso lɛ mli lɛ baanyɛ aha wɔná hegbɛ koni wɔkɛ mɔ ni fo wɔnaa yɛ klɛŋklɛŋ saramɔ lɛ mli lɛ awie tɛ̃ɛ. Nɔ ni tee nɔ yɛ nakai be lɛ mli lɛ ni wɔɔkai lɛ baanyɛ aye abua wɔ ni wɔsaa wɔhe. Ekolɛ shitee-kɛ-wolɔ lɛ fee enii yɛ yiŋtoi kpakpai ahewɔ kɛ hemɔkɛyeli akɛ esa akɛ etsĩ mɔ ni taoɔ abo toi lɛ naa koni ekabo Maŋtsɛyeli shɛɛ sane lɛ toi. Ekolɛ wɔyiŋtoi ahe amale saji ená esusumɔi anɔ hewalɛ. Shi no etsĩii wɔnaa kɛjɛɛɛ Maŋtsɛyeli sanekpakpa lɛ ni wɔɔya nɔ wɔshiɛ yɛ nakai shia lɛ mli, ní wɔkɛ nilee abɔ mɔdɛŋ wɔjaje yiŋfutumɔi lɛ. Wɔyɛ he miishɛɛ akɛ wɔɔye wɔbua mɛi fɛɛ koni amɛná Nyɔŋmɔ he anɔkwa nilee. Ekolɛ Yehowa baagbala nakai mɔ lɛ kɛba eŋɔɔ.—Yohane 6:44; 1 Timoteo 2:4.
7. Mɛni baaye abua wɔ koni wɔná jwɛŋmɔ kpakpa beni wɔyaa mɛi aŋɔɔ lɛ?
7 Weku shitee-kɛ-woo hu fata Yesu famɔi ni ekɛha ekaselɔi lɛ ahe. Ani ekɛɛɛ akɛ: “Miba ni mabatse mɔ kɛjɛ etsɛ he, kɛ biyoo kɛjɛ enyɛ he, kɛ shaayoo kɛjɛ eshaayoo he”? Yesu kɛfata he akɛ: “Mɔ diɛŋtsɛ shia teŋ bii aaatsɔmɔ ehenyɛlɔi.” (Mateo 10:35, 36) Kɛlɛ, shihilɛi kɛ subaŋi tsakeɔ. Hela ni mɔɔ mɔ trukaa, wekunyo ni jeɔ mli, osharai, henumɔŋ piŋmɔ ni naa wa, kɛ nibii krokomɛi baanyɛ aná bɔ ni mɛi feɔ amɛnii yɛ wɔshiɛmɔ lɛ he lɛ nɔ hewalɛ. Kɛ́ wɔhiɛ jwɛŋmɔ ni ejaaa—ákɛ gbɔmɛi ni wɔshiɛɔ wɔhaa amɛ lɛ baakã he afee mɛi ni boŋ toi lɛ—ani wɔmiitao nɔ̃ kpakpa ni yɔɔ amɛmli lɛ lɛɛlɛŋ? Mɛni hewɔ okɛ miishɛɛ ekuuu osɛɛ kɛyaaa amɛŋɔɔ ekoŋŋ yɛ be kroko mli? Ekolɛ wɔbaana shihilɛ kroko. Bei komɛi lɛ jeee nɔ ni wɔkɛɔ lɛ haa wɔnáa hetoo kpakpa, shi bɔ ni wɔkɛɔ lɛ wɔhaa lɛ. Hiɛdɔɔ ni wɔkɛaasɔle wɔha Yehowa dani wɔje shiɛmɔ shishi lɛ baaye abua wɔ diɛŋtsɛ koni wɔná jwɛŋmɔ kpakpa, ni wɔshiɛ Maŋtsɛyeli sanekpakpa lɛ yɛ gbɛ ni mɛi fɛɛ baaná he miishɛɛ nɔ.—Kolosebii 4:6; 1 Tesalonikabii 5:17.
8. Kɛ́ Kristofoi tao nɔ̃ kpakpa yɛ amɛwekumɛi ni heee yeee lɛ amli lɛ, mɛni baanyɛ ajɛ mli aba?
8 Weku kome too mli bii pii sɔmɔɔ Yehowa yɛ asafoi komɛi amli. Bei pii lɛ, nɔ ni haa gbekɛbii lɛ náa hiɛsɔɔ kɛ bulɛ ji shifimɔ ní weku lɛ mlinyo ko ni eda, ní ehaa wekukpaa kpakpa ni yɔɔ weku lɛ kɛ gbalashihilɛ tsakpaa lɛ mli lɛ haa efeɔ mlɛo kɛhaa gbekɛ lɛ koni etsake etsui lɛ. Toiboo ni ŋamɛi Kristofoi babaoo fee amɛha bɔfo Petro ŋaawoo lɛ eye ebua amɛ ni “ashi wiemɔ lɛ sɛɛ” ni amɛnine eshɛ amɛwumɛi lɛ anɔ.—1 Petro 3:1, 2.
Yɛ Weku lɛ Mli
9, 10. Yakob kɛ Yosef fɛɛ tao nɔ̃ kpakpa yɛ amɛweku lɛ mli yɛ mɛɛ gbɛ nɔ?
9 Wekukpaa ni yɔɔ gbagbalii ni haa weku mli bii feɔ ekome lɛ ji he kroko ni wɔbaanyɛ wɔtao nɔ̃ kpakpa yɛ mɛi krokomɛi amli yɛ. Susumɔ nɔkwɛmɔnɔ ni kɔɔ bɔ ni Yakob kɛ ebihii lɛ ye ha lɛ he lɛ he okwɛ. Biblia lɛ tsɔɔ yɛ Mose Klɛŋklɛŋ Wolo lɛ yitso 37, kukuji 3 kɛ 4 lɛ akɛ Yakob sumɔɔ ebi Yosef waa. Yosef nyɛmimɛi lɛ ye awuŋa aahu kɛyashi he ni amɛto ehe ŋaa koni amɛgbe amɛnyɛmi nuu lɛ po. Shi kɛlɛ, kadimɔ subaŋ ni Yakob kɛ Yosef jie lɛ kpo sɛɛ mli yɛ amɛshihilɛ mli lɛ. Amɛ fɛɛ amɛtao nɔ̃ kpakpa yɛ amɛweku lɛ mli.
10 Yosef kɛ hiɛmɛɛ here enyɛmimɛi lɛ beni esɔmɔɔ akɛ niyenii anɔkwɛlɔ nukpa yɛ Mizraim ni hɔmɔ eba jɛmɛ lɛ. Eyɛ mli akɛ ejieee mɔ diɛŋtsɛ ni eji lɛ shi etsɔɔɔ amrɔ nɔŋŋ moŋ, shi ekɛ ŋaalee tsu shihilɛi lɛ ahe nii ni ekwɛ ni akwɛ amɛ ni amɛná niyenii ni amɛkɛbaaya shia amɛkɛyaha amɛtsɛ ni egbɔ lɛ. Hɛɛ, yɛ nyɛ ni amɛnyɛ Yosef lɛ fɛɛ sɛɛ lɛ, efee nii kɛha amɛhilɛ-kɛ-hamɔ. (1 Mose 41:53–42:8; 45:23) Nakai nɔŋŋ beni Yakob kã egbele saa nɔ lɛ, egba wɔsɛɛ be mli jɔɔmɔi eha ebihii lɛ fɛɛ. Eyɛ mli akɛ amɛnifeemɔnii gbohii lɛ ha amɛhegbɛi komɛi anaa ba shi moŋ, shi amɛteŋ mɔ fɛɛ mɔ ná gboshinii yɛ shikpɔŋ lɛ nɔ. (1 Mose 49:3-28) Mɛɛ suɔmɔ ni sɛɛ tsɛɔ ni yɔɔ naakpɛɛ po Yakob jie lɛ kpo nɛkɛ!
11, 12. (a) Mɛɛ gbalɛ mli nɔkwɛmɔnɔ maa bɔ ni nɔ̃ kpakpa ni ataoɔ yɛ weku lɛ mli lɛ he hiaa lɛ nɔ mi? (b) Mɛni wɔkaseɔ yɛ nɔkwɛmɔnɔ ni tsɛ ni yɔɔ Yesu abɛbua ni kɔɔ bi nyenyeŋtswi lɛ he lɛ mli lɛ fee efɔ shi lɛ mli?
11 Mlihilɛ ni Yehowa jie lɛ kpo beni ekɛ Israel maŋ ni bɛ hemɔkɛyeli lɛ yeɔ lɛ haa wɔ nilee lolo yɛ bɔ ni etaoɔ nɔ̃ kpakpa yɛ ewebii lɛ amli lɛ he. Yehowa kɛ gbalɔ Hoshea weku mli shihilɛ lɛ fee esuɔmɔ ni sɛɛ tsɛɔ lɛ he nɔkwɛmɔnɔ. Gomer, ni ji Hoshea ŋa lɛ fite gbala shii abɔ. Yɛ fɛɛ sɛɛ lɛ, Yehowa fã Hoshea akɛ: “Yaa ekoŋŋ ní oyasumɔ yoo ko ní ewu sumɔɔ lɛ, shi kɛlɛ gbalafitelɔ ji lɛ, taakɛ bɔ ni Yehowa sumɔɔ Israelbii lɛ, tsɛ amɛ lɛ amɛkpale kɛtee nyɔŋmɔi krokomɛi aŋɔɔ, ni amɛsumɔɔ wein yibii atatalei lɛ.” (Hoshea 3:1) Mɛni hewɔ akɛ famɔi nɛɛ ha? Yehowa le akɛ aŋkroaŋkroi komɛi yɛ maŋ ni etsi ehe kɛjɛ egbɛ̀i lɛ ahe lɛ ateŋ ni amɛbaafee amɛnii bɔ ni sa yɛ etsuishiŋmɛɛ lɛ he. Hoshea jaje akɛ: “Kɛ́ fee sɛɛ lɛ Israelbii lɛ aaaku amɛsɛɛ, ni amɛaabatao Yehowa, amɛ-Nyɔŋmɔ lɛ, kɛ amɛmaŋtsɛ David lɛ; ni amɛkɛ hekpokpomɔ aaaba Yehowa kɛ enɔ̃ kpakpa feemɔ lɛ ŋɔɔ yɛ naagbee gbii lɛ amli.” (Hoshea 3:5) Yɛ anɔkwale mli lɛ, enɛ ji nɔkwɛmɔnɔ ni esa akɛ asusu he kɛji ákɛ akɛ weku mli naagbai kpe. Kɛ́ hooo kwraa lɛ, ya ni oooya nɔ otao nɔ̃ kpakpa yɛ weku mli bii krokomɛi amli lɛ baafee tsuishitoo he nɔkwɛmɔnɔ kpakpa.
12 Yesu nɔkwɛmɔnɔ ni kɔɔ binuu nyenyeŋtswi lɛ he lɛ haa wɔ nilee babaoo lolo yɛ bɔ ni wɔbaanyɛ wɔtao nɔ̃ kpakpa yɛ wɔ diɛŋtsɛ wɔweku lɛ mli lɛ he. Binuu fioo lɛ ku esɛɛ kɛba shia beni ekpa enyenyeŋtswibɔɔ shihilɛ lɛ sɛɛ. Tsɛ lɛ kɛ lɛ ye yɛ mlihilɛ mli. Te tsɛ lɛ fee enii yɛ nii ahe ni binuu nukpa ni shiko eweku lɛ dã lɛ wie lɛ he eha tɛŋŋ? Beni tsɛ lɛ kɛ ebinuu nukpa lɛ wieɔ lɛ, ekɛɛ akɛ: “Mibi, bo lɛ, okɛ mi yɔɔ daa nɛɛ, ni nɔ fɛɛ nɔ ni miyɔɔ lɛ onɔ̃ŋ.” Enɛ jeee mlifu ni akɛkuɔ mɔ naa, shi moŋ eji tsɛ lɛ suɔmɔ lɛ nɔmimaa diɛŋtsɛ. Etsa nɔ akɛ: “Esa akɛ wɔnya ni wɔmii ashɛ wɔhe; ejaakɛ onyɛmi nɛɛ gbo, ni ehiɛ etsɛ̃ ekoŋŋ, elaaje, ni ana lɛ.” Wɔ hu wɔbaanyɛ wɔya nɔ nakai nɔŋŋ wɔtao nɔ̃ kpakpa yɛ mɛi krokomɛi amli.—Luka 15:11-32.
Yɛ Kristofoi Asafo lɛ Mli
13, 14. Mɛni ji gbɛ ni abaanyɛ atsɔ nɔ atsu suɔmɔ ni ji mla lɛ mli otu lɛ he nii yɛ Kristofoi asafo lɛ mli?
13 Ákɛ Kristofoi lɛ, oti ni ma wɔhiɛ ji ni wɔtsu suɔmɔ ni ji mla lɛ mli otu lɛ he nii. (Yakobo 2:1-9) Yɛ anɔkwale mli lɛ, ekolɛ wɔkpɛlɛɔ mɛi ni esoro amɛshika shidaamɔ yɛ wɔnɔ lɛ he lɛ anɔ. Shi ani hewolonɔ su, kusum, loo jamɔi amli ni wɔjɛ kɛba lɛ po miiha “wɔmiijie mɛi amli” lolo? Kɛ́ nakai ni lɛ, mɛɛ gbɛ nɔ wɔɔtsɔ wɔkɛ Yakobo ŋaawoo lɛ atsu nii?
14 Hiɛmɛɛ ni wɔkɛhereɔ mɛi fɛɛ ni baa Kristofoi akpeei lɛ yeɔ wɔgbɔfeemɔ su lɛ he odase. Kɛ́ wɔ klɛŋklɛŋ wɔtsɔ hiɛ wɔkɛ mɛi heei ni baa Maŋtsɛyeli Asa lɛ nɔ lɛ wie lɛ, ekolɛ ebaajie shishijee gbeyei ni amɛsheɔ kɛ amɛhiɛ ni gboɔ lɛ kɛya. Yɛ anɔkwale mli lɛ, mɛi komɛi ni ba Kristofoi akpeei klɛŋklɛŋ kwraa lɛ wie akɛ: “Mɔ fɛɛ mɔ jie naanyobɔɔ su kpo waa. Oookɛɛ nɔ ni mɔ fɛɛ mɔ le mi momo. Mihe jɔ mi waa.”
15. Mɛɛ gbɛ nɔ abaanyɛ atsɔ aye abua oblahii kɛ oblayei ni yɔɔ asafo lɛ mli lɛ koni amɛná mɛi ni edara lɛ ahe miishɛɛ?
15 Ekolɛ yɛ asafoi komɛi amli lɛ, oblahii kɛ oblayei lɛ ateŋ mɛi fioo yabuaa amɛhe naa yɛ Maŋtsɛyeli Asa lɛ mli loo yɛ agbo lɛ naa, ni amɛjoɔ naanyo ni amɛkɛ mɛi ni edara lɛ aaabɔ lɛ naa foi kɛ́ akpa kpee. Mɛɛ gbɛ nɔ abaanyɛ atsɔ afee nɔ ko kpakpa kɛye subaŋ nɛɛ nɔ? Yɛ anɔkwale mli lɛ, klɛŋklɛŋ nii ni esa akɛ afee ji, ni fɔlɔi atsɔse amɛbii lɛ yɛ shia, ni amɛsaa amɛ kɛha kpeei lɛ. (Abɛi 22:6) Abaanyɛ aha amɛ nitsumɔ ni amɛyakɔlɔ woji heei srɔtoi ni eba lɛ bɔni afee ni mɔ fɛɛ mɔ aná nɔ ni he hiaa lɛ koni ekɛya kpeei lɛ. Fɔlɔi hu ji mɛi ni sa ni baawo amɛbii hewalɛ koni amɛkɛ mɛi ni edara kɛ mɛi ni bɛ gbɔmɔtsoŋ hewalɛ lɛ agba amɛ amɛsusumɔi ahe sane fioo yɛ Maŋtsɛyeli Asa lɛ nɔ. Nɔ ko ni jwɛŋmɔ yɔɔ mli ni aaakɛɛ mɛi ni tamɔ nɛkɛ lɛ baaha gbekɛbii lɛ aná miishɛɛ.
16, 17. Mɛɛ gbɛ nɔ mɛi ni edara lɛ baatsɔ atao nɔ̃ kpakpa yɛ oblahii kɛ oblayei ni yɔɔ asafo lɛ mli lɛ amli?
16 Esa akɛ nyɛmimɛi hii kɛ yei ni edara lɛ aná gbekɛbii ni yɔɔ asafo lɛ mli lɛ ahe miishɛɛ. (Filipibii 2:4) Amɛbaanyɛ amɛtsɔ hiɛ ni amɛkɛ oblahii kɛ oblayei lɛ awie yɛ gbɛ ni woɔ mɔ hewalɛ nɔ. Bei komɛi lɛ asusuɔ saji otii komɛi ni sa kadimɔ ahe yɛ kpeei lɛ ashishi. Abaanyɛ abi oblahii kɛ oblayei lɛ kɛji amɛná kpee lɛ he miishɛɛ, ni kɛji akɛ saji otii komɛi yɛ ni amɛhiɛ esɔ no waa ni amɛbaanyɛ amɛkɛtsu nii. Akɛni oblahii kɛ oblayei lɛ ji asafo lɛ mli bii ni he hiaa hewɔ lɛ, esa akɛ hiɛ asɔ toiboo ni amɛfeɔ lɛ ni ajie amɛyi yɛ hetooi fɛɛ ni amɛhaa yɛ asafoŋ kpeei ashishi loo gbɛfaŋnɔ fɛɛ ni amɛnáa yɛ gbɛjianɔtoo lɛ fãi komɛi amli lɛ he. Bɔ ni oblahii kɛ oblayei lɛ kɛ mɛi ni edara lɛ gbaa sane yɛ asafo lɛ mli, kɛ bɔ ni amɛtsuɔ nitsumɔi bibii ahe nii yɛ asafo lɛ mli lɛ baatsɔɔ kɛji ekolɛ amɛbaanyɛ amɛtsu gbɛnaa nii wuji ahe nii sɛɛ mli yɛ shihilɛ mli.—Luka 16:10.
17 Gbɛnaa nii anɔ ni oblahii kɛ oblayei komɛi ekpɛlɛ lɛ eha amɛtee hiɛ kɛyashɛ he ni amɛmumɔŋ sui lɛ eha amɛnine eshɛ nitsumɔi ni he hiaa waa anɔ. Nɔ ko feemɔ ni amɛyɔɔ lɛ hu baanyɛ aye abua amɛ koni amɛjo jeŋba gbonyo naa foi. (2 Timoteo 2:22) Nitsumɔi nɛɛ baanyɛ ‘aka’ nyɛmimɛi hii ni he miisa koni amɛsɔmɔ akɛ asafoŋ sɔɔlɔi lɛ hu ‘akwɛ.’ (1 Timoteo 3:10) Suɔmɔ mli ni amɛjɛɔ ni amɛnáa kpeei amli gbɛfaŋnɔ, kɛ ekãa ni amɛkɛwoɔ shiɛmɔ nitsumɔ lɛ mli, kɛ agbɛnɛ mɛi fɛɛ ni yɔɔ asafo lɛ mli lɛ ahe miishɛɛ ni amɛnáa lɛ haa onukpai nyɛɔ amɛyɔseɔ amɛnyɛmɔi beni amɛsusuɔ amɛhe kɛha gbɛnaa nii krokomɛi lɛ.
Nɔ̃ Kpakpa ni Ataoɔ yɛ Mɛi Fɛɛ Amli
18. Mɛɛ kojomɔ mli osharai esa akɛ akwa, ni mɛni hewɔ?
18 Abɛi 24:23 kɛɔ akɛ: “Hiɛŋtsei anɔ ni akwɛɔ yɛ kojomɔ mli lɛ, ehiii.” Ŋwɛi nilee biɔ ni onukpai akwa hiɛaŋkwɛmɔ beni amɛkojoɔ saji yɛ asafo lɛ mli. Yakobo jaje akɛ: “Nilee ni jɛ ŋwɛi lɛ, tsutsu lɛ ehe tse, no sɛɛ lɛ ehe jɔ, ehiɛ kã shi, eboɔ toi, eyi obɔ kɛ mɔbɔnalɛ kɛ yibii kpakpai, ejeee ŋwane, efeee osato.” (Yakobo 3:17) Eyɛ faŋŋ akɛ, beni onukpai lɛ taoɔ nɔ̃ kpakpa yɛ mɛi amli lɛ, ehe miihia ni amɛkwɛ ni amɛkɛ mɛi krokomɛi ateŋ wekukpaai loo henumɔi akaná amɛkojomɔ nɔ hewalɛ. Lalatsɛ Asaf ŋma akɛ: “Naanyɔŋmɔ damɔɔ shi yɛ Mawu asafo lɛŋ, ekojoɔ yɛ nyɔŋmɔi [loo “mɛi ni tamɔ nyɔŋmɔi,” ni kɔɔ adesai kojolɔi ahe] lɛ ateŋ. Mɛɛ beyinɔ nɔŋŋ nyɛaakɔ̃dɔ̃ nyɛtoi nyɛkojo ni nyɛaakwɛ mɛi fɔji ahiɛŋtsei anɔ kɛyashi?” (Lala 82:1, 2) No hewɔ lɛ, Kristofoi onukpai kwáa hiɛaŋkwɛmɔ subaŋi fɛɛ beni amɛtsuɔ sane ko ni kɔɔ amɛnaanyo loo wekunyo ko he lɛ he nii lɛ. Amɛtsɔɔ nɛkɛ gbɛ nɔ amɛbáa ekomefeemɔ ni yɔɔ asafo lɛ mli lɛ yi, ni ehaa Yehowa mumɔ lɛ baa mli ni nɔ ko etsĩii naa.—1 Tesalonikabii 5:23.
19. Mɛɛ gbɛ̀i anɔ wɔɔtsɔ wɔtao nɔ̃ kpakpa yɛ mɛi krokomɛi amli yɛ?
19 Yɛ nɔ̃ kpakpa ni wɔtaoɔ yɛ wɔnyɛmimɛi hii kɛ yei lɛ amli lɛ mli lɛ, wɔjieɔ su ni Paulo jie lɛ kpo beni ewie etsɔɔ Tesalonika asafo lɛ kpo wɔtsɔɔ. Ekɛɛ akɛ: “Shi wɔhiɛ kã nyɛnɔ yɛ Nuŋtsɔ lɛ mli akɛ, nii ni wɔwo nyɛ kita lɛ, nyɛmiifee ni nyɛaafee hu.” (2 Tesalonikabii 3:4) Kɛ́ wɔtao nɔ̃ kpakpa yɛ amɛmli lɛ, ebaaha wɔsumɔ waa akɛ wɔɔku wɔhiɛ wɔshwie mɛi krokomɛi atɔmɔi anɔ. Wɔbaatao hei ni wɔbaanyɛ wɔjie wɔnyɛmimɛi lɛ ayi yɛ, ni wɔbaakwa nii ahe wiemɔ kwraa. Paulo ŋma akɛ: “Nɔ ni . . . ataoɔ yɛ tsuji nukpai lɛ adɛŋ ji akɛ, ana amɛteŋ mɔ fɛɛ mɔ akɛ anɔkwafo.” (1 Korintobii 4:2) Anɔkwa ni mɛi ni kwɛɔ asafo lɛ nɔ kɛ Kristofoi hii kɛ yei ni yɔɔ mli lɛ yeɔ lɛ haa amɛbafeɔ mɛi ni wɔsumɔɔ amɛ. Ni ehaa wɔtsiɔ wɔbɛŋkɛɔ amɛ, ni ewoɔ Kristofoi anaanyobɔɔ tsakpaa lɛ mli hewalɛ. Wɔnáa susumɔ ni tamɔ nɔ ni Paulo ná yɛ nyɛmimɛi ni yɔɔ egbii lɛ amli lɛ ahe lɛ nɔŋŋ eko. Amɛji ‘nanemɛi nitsulɔi yɛ Nyɔŋmɔ maŋtsɛyeli lɛ hewɔ’ kɛ ‘tsuiwoo nɔ̃’ kɛha wɔ. (Kolosebii 4:11) Ni ehaa wɔjieɔ Yehowa su lɛ kpo.
20. Mɛɛ jɔɔmɔi mɛi ni taoɔ nɔ̃ kpakpa yɛ mɛi fɛɛ amli lɛ baaná?
20 Yɛ anɔkwale mli lɛ, wɔjajeɔ Nehemia sɔlemɔ lɛ akɛ: “Oo mi-Nyɔŋmɔ, kaimɔ mi yɛ nɔ̃ kpakpa hewɔ.” (Nehemia 13:31, NW) Kwɛ bɔ ni wɔmli filiɔ wɔ akɛ Yehowa taoɔ nɔ̃ kpakpa yɛ gbɔmɛi amli! (1 Maŋtsɛmɛi 14:13) Eba akɛ wɔɔfee wɔnii nakai nɔŋŋ yɛ wɔkɛ mɛi krokomɛi asharamɔ mli. No feemɔ haa wɔnáa kpɔmɔ kɛ naanɔ wala yɛ jeŋ ni ebɛŋkɛ kpaakpa lɛ mli lɛ he gbɛkpamɔ.—Lala 130:3-8.
Te Obaaha Hetoo Oha Tɛŋŋ?
• Mɛni nɔ Yehowa damɔɔ efeɔ mɛi fɛɛ ejurɔ?
• Mɛɛ gbɛ nɔ wɔɔtsɔ wɔtao nɔ̃ kpakpa yɛ mɛi krokomɛi amli
• yɛ wɔshiɛmɔ nitsumɔ lɛ mli?
• yɛ wɔweku lɛ mli?
• yɛ wɔsafo lɛ mli?
• yɛ wɔwekukpaai fɛɛ amli?
[Nikasemɔ lɛ he Sanebimɔi]
[Mfoniri ni yɔɔ baafa 18]
Yɛ nyɛɛ ni Yosef nyɛmimɛi hii lɛ ná ha lɛ lɛ fɛɛ sɛɛ lɛ, etao nɔ̃ kpakpa yɛ amɛmli
[Mfoniri ni yɔɔ baafa 19]
Shitee-kɛ-woo etsĩii wɔnaa yɛ mɔdɛŋ ni wɔbɔɔ ni wɔye wɔbua mɛi fɛɛ lɛ mli
[Mfoniri ni yɔɔ baafa 20]
Yɛ Yakob bihii lɛ atsutsu nifeemɔ lɛ fɛɛ sɛɛ lɛ, ajɔɔ amɛ fɛɛ
[Mfoniri ni yɔɔ baafa 21]
Heremɔ mɛi fɛɛ hiɛmɛɛ yɛ Kristofoi akpeei ashishi