Bɔ ni Aaafee Aná Anɔkwa Suɔmɔ

“Suɔmɔ ji wala shihilɛ mli tsofa ni tsaa helai fɛɛ; suɔmɔ ji wala.”—Living to Purpose, ní Joseph Johnson ŋma yɛ afi 1871 lɛ mli.

TE ADESA aaafee tɛŋŋ akase bɔ ni asumɔɔ mɔ lɛ? Ani kɛtsɔ jwɛŋmɔ he nilee kasemɔ nɔ? Ani kɛtsɔ woji ni akɛɛ ekɛ yelikɛbuamɔ haa lɛ kanemɔ nɔ? Ani kɛtsɔ sinii ni kɔɔ suɔmɔ nifeemɔi ahe lɛ akwɛmɔ nɔ? Dabida. Adesai kaseɔ bɔ ni asumɔɔ mɔ klɛŋklɛŋ kwraa kɛtsɔ nɔkwɛmɔnɔ ni amɛfɔlɔi feɔ kɛ tsɔsemɔ ni amɛkɛhaa amɛ lɛ nɔ. Gbekɛbii baakase nɔ ni suɔmɔ tsɔɔ lɛ shishi kɛji yɛ shihilɛ ko ni ajieɔ hedɔɔ kpo yɛ mli lɛ, amɛnaa akɛ amɛfɔlɔi lɛɔ amɛ ni amɛbuɔ amɛhe, amɛkɛ amɛ gbaa sane ni amɛnáa amɛhe miishɛɛ waa lɛ. Amɛkaseɔ bɔ ni asumɔɔ mɔ hu kɛji amɛfɔlɔi tsɔɔ amɛ ni amɛye shishitoo mlai kpakpai ni kɔɔ nɔ ni hi kɛ nɔ ni ehiii lɛ he lɛ nɔ lɛ.

Anɔkwa suɔmɔ fe hedɔɔ loo henumɔ folo ko kɛkɛ. Be kɛ be fɛɛ lɛ, etsuɔ mɛi krokomɛi ahilɛ-kɛ-hamɔ he nii jogbaŋŋ, kɛji yɛ nakai beaŋ po lɛ amɛhiɛ esɔɔɔ waa po, tamɔ bɔ ni efɔɔ kaa yɛ gbekɛbii agbɛfaŋ kɛji ajɛ suɔmɔ mli akɛ tsɔsemɔ ha amɛ lɛ. Mɔ ni jieɔ suɔmɔ ni pɛsɛmkunya bɛ mli kpo lɛ he nɔkwɛmɔnɔ ni fe fɛɛ lɛ ji Bɔlɔ lɛ diɛŋtsɛ. Bɔfo Paulo ŋma akɛ: “Mibi, kaabu [Yehowa, NW] tsɔsemɔ lɛ akɛ nɔ ko bibioo, ni asaŋ, kɛ́ ekã ohiɛ lɛ, kaaha onijiaŋ miije wui; ejaakɛ mɔ ni [Yehowa, NW] sumɔɔ lɛ, lɛ etsɔseɔ.”—Hebribii 12:5, 6.

Fɔlɔi, te nyɛbaafee tɛŋŋ nyɛkase Yehowa yɛ suɔmɔ ni nyɛaajie lɛ kpo nyɛtsɔɔ nyɛweku lɛ mli bii lɛ mli? Ni te nɔkwɛmɔnɔ ni nyɛfeɔ lɛ he hiaa ha tɛŋŋ yɛ wekukpaa ni kã nyɛteŋ akɛ wu kɛ ŋa lɛ mli lɛ?

Nyɛtsɔ̃ɔa Suɔmɔ Kɛtsɔ Nɔkwɛmɔnɔ Nɔ

Kɛ́ oji wu lɛ, ani okɛ woo ni mli wa haa oŋa, loo obuɔ lɛ akɛ eji mɔ ko ni jara wa, ni okɛ lɛ yeɔ yɛ gbɛ ni woo kɛ bulɛ yɔɔ mli nɔ? Kɛ́ oji ŋa lɛ, ani osumɔɔ owu lɛ ni ofiɔ esɛɛ? Biblia lɛ kɛɔ akɛ esa akɛ wu kɛ ŋa asumɔ amɛhe ni amɛjie bulɛ kpo amɛtsɔɔ amɛhe. (Efesobii 5:28; Tito 2:4) Kɛ́ amɛfee nakai lɛ, amɛbii lɛ naa akɛ Kristofoi asuɔmɔ miitsu nii waa diɛŋtsɛ. Mɛɛ nikasemɔ ni náa mɔ nɔ hewalɛ ni sɛɛnamɔ yɔɔ he enɛ baanyɛ aji po nɛkɛ!

Fɔlɔi haa suɔmɔ hiɔ shia lɛ mli hu kɛ́ amɛkɛ jeŋba he tɛi ni nɔ kwɔlɔ tsu nii yɛ weku lɛ mli yɛ saji ni kɔɔ nibii tamɔ hiɛtserɛjiemɔ, jeŋba, kɛ otii ni akɛmamɔɔ hiɛ kɛ nibii ni esa akɛ akɛye klɛŋklɛŋ gbɛhe lɛ he. Yɛ je lɛŋ fɛɛ lɛ, gbɔmɛi ena akɛ Biblia lɛ he baa sɛɛnamɔ waa kɛji aato shishitoo mlai ni tamɔ nɛkɛ shishi kɛha weku lɛ, ni nomɛi bafeɔ odaseyeli ni tsɔɔ faŋŋ diɛŋtsɛ akɛ, Biblia lɛ “jɛ Nyɔŋmɔ Mumɔ lɛŋ [ni] ehi ha nitsɔɔmɔ kɛ hiɛkamɔ kɛ mɔsaamɔ kɛ tsɔsemɔ ni yɔɔ jalɛ mli.” (2 Timoteo 3:16) Yɛ anɔkwale mli lɛ, abuɔ jeŋba he mlai kɛ shihilɛ he gbɛtsɔɔmɔ ni yɔɔ Gɔŋ nɔ Shiɛmɔ lɛ diɛŋtsɛ mli lɛ  yɛ he fɛɛ he akɛ nɔ ko ni fe ekrokomɛi fɛɛ.—Mateo, yitso 5 kɛyashi yitso 7.

Kɛ́ weku muu lɛ fɛɛ kwɛɔ Nyɔŋmɔ gbɛ kɛha gbɛtsɔɔmɔ ni amɛkɛ eshishitoo mlai lɛ tsuɔ nii lɛ, amɛteŋ mɔ fɛɛ mɔ nuɔ he akɛ eyɛ shweshweeshwe waa, ni gbekɛbii baanyɛ amɛdara ni amɛná suɔmɔ kɛ bulɛ amɛha amɛfɔlɔi. Yɛ gbɛ kroko nɔ lɛ, yɛ shia ni abaa jeŋbai srɔtoi enyɔ yɛ, ni yɔɔ shishitoo mlai ni ejaaa loo emli waaa lɛ mli lɛ, ekolɛ gbekɛbii amli baawo la, amɛmli baafu, ni amɛbaatse atua.—Romabii 2:21; Kolosebii 3:21.

Ni fɔlɔi mɔ kome mɔ hu? Ani amɛyɛ shihilɛ ni ehiii kwraa mli akɛ amɛaatsɔɔ amɛbii bɔ ni asumɔɔ mɔ? Jeee nakai tsɔ̃. Eyɛ mli akɛ anyɛŋ akɛ nɔ ko ato tsɛ kpakpa kɛ nyɛ kpakpa ni amɛfee ekome kɛmiitsu nii najiaŋ moŋ, shi niiashikpamɔ tsɔɔ akɛ wekukpaa kpakpa ni yɔɔ weku lɛ mli lɛ baanyɛ aye abua kɛyashi he ko yɛ fɔlɔ ko ni bɛ lɛ najiaŋ. Kɛ́ oji fɔlɔ mɔ kome mɔ lɛ, bɔɔ mɔdɛŋ ni okɛ Biblia shishitoo mlai lɛ atsu nii yɛ oshia lɛ. Hɛɛ, abɛ ko kɛɔ wɔ akɛ: “Okɛ ohiɛ afɔ̃ Yehowa nɔ kɛ otsui fɛɛ, ni okɛ ohe akakpasa bo diɛŋtsɛ ojwɛŋmɔ; kaimɔ lɛ yɛ ogbɛ̀i fɛɛ mli, ni lɛ eeejaje otempɔŋi lɛ”—ni gbɛ ni atsɔɔ nɔ atsɔɔ fɔlɔi fata he.—Abɛi 3:5, 6; Yakobo 1:5.

Atsɔse oblahii kɛ oblayei babaoo yɛ fɔlɔi mɔ kome mɔ shiai amli ni amrɔ nɛɛ amɛmiisɔmɔ Nyɔŋmɔ yɛ anɔkwayeli mli yɛ Yehowa Odasefoi Kristofoi asafoi akpei abɔ ni yɔɔ jeŋ fɛɛ lɛ mli. Enɛ ji odaseyeli ni tsɔɔ akɛ fɔlɔi mɔ kome mɔ hu baanyɛ aye omanye yɛ suɔmɔ ni amɛaajie lɛ kpo amɛaatsɔɔ amɛbii lɛ mli.

Bɔ ni Mɔ Fɛɛ Mɔ Baanyɛ Aná Suɔmɔ

Biblia lɛ gba efɔ̃ shi akɛ nɔ ni baakadi “naagbee gbii lɛ” ji ‘suɔmɔ ni bɛ,’ ni ji akɛ, ajieŋ adebɔɔ naa suɔmɔ ni weku lɛ mli bii fɔɔ lɛ kpojiemɔ lɛ kpo dɔŋŋ. (2 Timoteo 3:1, 3) Ni kɛlɛ, mɛi po ni ekolɛ amɛdara yɛ shiai ni ajieee suɔmɔ kpo yɛ mli lɛ baanyɛ akase bɔ ni amɛaafee amɛná suɔmɔ. Yɛ mɛɛ gbɛ nɔ? Kɛtsɔ kasemɔ ni amɛaakase kɛjɛ Yehowa, mɔ ni ji suɔmɔ Jɛɛhe lɛ diɛŋtsɛ, ní ejieɔ suɔmɔ kɛ hedɔɔ kpo etsɔɔ mɛi fɛɛ ni jɛɔ amɛtsui mli fɛɛ mli amɛbaa eŋɔɔ lɛ ŋɔɔ. (1 Yohane 4:7, 8) Lalatsɛ ko kɛɛ akɛ: “Kɛ́ eeeba lɛ akɛ mi diɛŋtsɛ mitsɛ kɛ mi diɛŋtsɛ minyɛ aaashi mi lɛ, Yehowa diɛŋtsɛ baahere mi atuu.”—Lala 27:10, NW.

Yehowa tsɔɔ gbɛ̀i srɔtoi babaoo nɔ ejieɔ suɔmɔ ni eyɔɔ kɛha wɔ lɛ kpo. Nɔ ni fata enɛɛmɛi ahe ji ŋaawoo ni tamɔ tsɛ nɔ̃ kɛtsɔ Biblia lɛ, yelikɛbuamɔ ni mumɔ krɔŋkrɔŋ lɛ kɛhaa, kɛ yelikɛbuamɔ ni hedɔɔ yɔɔ mli ni Kristofoi anyɛmifeemɔ lɛ kɛhaa lɛ nɔ. (Lala 119:97-105; Luka 11:13; Hebribii 10:24, 25) Susumɔ bɔ ni nɛkɛ suɔmɔ kpojiemɔ sui etɛ nɛɛ baanyɛ aye abua bo ni oná suɔmɔ oha Nyɔŋmɔ kɛ naanyo gbɔmɔ hu lɛ he okwɛ.

Mumɔ Naa Gbɛtsɔɔmɔ ni Tamɔ Tsɛ Nɔ̃

Kɛji akɛ wɔbaaná wɔkɛ mɔ ko teŋ wekukpaa ni hedɔɔ yɔɔ mli lɛ, esa akɛ wɔná wɔle nakai mɔ lɛ jogbaŋŋ. Kɛtsɔ saji ni yɔɔ Biblia lɛ mli ni Yehowa tsɔɔ nɔ ejieɔ ehe kpo etsɔɔ wɔ lɛ nɔ lɛ, efɔ̃ɔ wɔ nine koni wɔtsi wɔbɛŋkɛ lɛ. Shi kɛlɛ, Biblia lɛ kanemɔ kɛkɛ faaa. Esa akɛ wɔkɛ tsɔɔmɔi ni yɔɔ mli lɛ atsu nii koni wɔná sɛɛnamɔi ni jɛɔ mli baa lɛ he sɛɛ. (Lala 19:8-11) Yesaia 48:17 lɛ kɛɔ akɛ: “Mi ji Yehowa, o-Nyɔŋmɔ lɛ, mɔ ni tsɔɔo nii ni hi hao, mɔ ni tsɔɔo gbɛ ni onyiɛ nɔ lɛ.” Hɛɛ, Yehowa, ni ji suɔmɔ ni jieɔ ehe kpo yɛ gbɔmɔtso su mli lɛ tsɔseɔ wɔ koni wɔná he sɛɛ—jeee akɛ eetao ni etsĩ heyeli ni wɔyɔɔ lɛ naa kɛtsɔ mlai kɛ akpɔi ni he ehiaaa lɛ nɔ.

Biblia mli anɔkwa nilee ni wɔɔná hu baaye abua wɔ ni wɔná suɔmɔ kɛha wɔnanemɛi adesai. Enɛ baa lɛ nakai ejaakɛ Biblia mli anɔkwa nilee lɛ tsɔɔ wɔ yiŋtoo ni Nyɔŋmɔ yɔɔ kɛha adesai, ni etsɔɔ wɔ shishitoo mlai ni esa akɛ wɔkɛtsu nii yɛ  bɔ ni wɔkɛ wɔhe yeɔ wɔhaa lɛ mli. Akɛni nɛkɛ ji bɔ ni sane lɛ ji hewɔ lɛ, wɔyɛ nɔdaamɔnɔ ni yɔɔ shiŋŋ yɛ suɔmɔ ni wɔɔná wɔha wɔnaanyo lɛ he. Bɔfo Paulo kɛɛ akɛ: “Enɛ he fai mikpaa, akɛ nyɛsuɔmɔ lɛ afa kɛya nɔ, ni eteke nɔ fe tsutsu lɛ yɛ [anɔkwa, NW] nilee kɛ sɛɛyomɔ fɛɛ gbɛfaŋ.”—Filipibii 1:9, wɔma efã ko nɔ mi.

Kɛ wɔɔfee bɔ ni abaanyɛ atsɔ ‘anɔkwa nilee’ nɔ ni ajie suɔmɔ kpo lɛ he nɔkwɛmɔnɔ lɛ, susumɔ shishijee anɔkwalei ni aŋmala yɛ Bɔfoi lɛ Asaji 10:34, 35 lɛ he okwɛ, akɛ: “Nyɔŋmɔ jeee mɛi ahiɛaŋkwɛlɔ; shi moŋ maŋ fɛɛ maŋ mli lɛ, mɔ ni sheɔ lɛ gbeyei ni etsuɔ jalɛ nii lɛ, lɛ ji mɔ ni saa ehiɛ.” Kɛ́ Nyɔŋmɔ tsɔɔ nitsumɔi kpakpai kɛ Nyɔŋmɔ gbeyeishemɔ su ni gbɔmɛi yɔɔ lɛ nɔ ekojoɔ amɛ, shi etsɔɔɔ maŋ nɔ ni amɛjɛ loo amɛ hewolonɔ su nɔ lɛ, ani esaaa akɛ wɔbuɔ wɔnaanyo adesa yɛ gbɛ ni tamɔ nakai nɔŋŋ nɔ ni hiɛaŋkwɛmɔ ko kwraa bɛ mli?—Bɔfoi lɛ Asaji 17:26, 27; 1 Yohane 4:7-11, 20, 21.

Suɔmɔ—Nyɔŋmɔ Mumɔ lɛ Yibii

Tamɔ bɔ ni kɛ́ nugbɔ nɛ yɛ ebe mli ni ehaa yeli tsei woɔ yibii babaoo lɛ, nakai nɔŋŋ Nyɔŋmɔ mumɔ lɛ baanyɛ aha aŋkroaŋkroi ni kpɛlɛɔ nɔ lɛ aná sui ni Biblia lɛ tsɔɔ mli akɛ eji “mumɔ lɛ yibii” lɛ eko. (Galatabii 5:22, 23) Yibii nɛɛ ateŋ nɔ ni fe fɛɛ ji suɔmɔ. (1 Korintobii 13:13) Shi te wɔbaafee tɛŋŋ ni wɔnine ashɛ Nyɔŋmɔ mumɔ lɛ nɔ? Gbɛ ni hi jogbaŋŋ ji kɛtsɔ sɔlemɔ nɔ. Kɛ́ wɔsɔle wɔbi Nyɔŋmɔ kɛha emumɔ lɛ, ekɛbaaha wɔ. (Luka 11:9-13) Ani ‘oyaa nɔ’ osɔleɔ obiɔ ni aha bo mumɔ krɔŋkrɔŋ lɛ? Kɛ́ ofeɔ nakai lɛ, no lɛ esa akɛ eyibii ni nɔ bɛ ní suɔmɔ fata he lɛ aje kpo faŋŋ yɛ oshihilɛ mli.

Shi kɛlɛ, mumɔ kroko hu yɛ ni tsuɔ nii kɛteɔ shi eshiɔ Nyɔŋmɔ mumɔ lɛ. Biblia lɛ tsɛɔ enɛ akɛ “je nɛŋ mumɔ lɛ.” (1 Korintobii 2:12; Efesobii 2:2) Eji hewalɛ fɔŋ, ni ejɛɛɛ mɔ ko mɔ ko ŋɔɔ fe Satan Abonsam, ni ji adesai ‘ajeŋ’ ni etsi ehe kɛjɛ Nyɔŋmɔ he nɛɛ nɔ “lumɔ lɛ.” (Yohane 12:31) Tamɔ bɔ ni kɔɔyɔɔ tswaa ni elooɔ mulu kɛ jwɛi kɛyaa lɛ, nakai nɔŋŋ hu “je nɛŋ mumɔ lɛ” teeɔ henumɔi ni esaaa ni fiteɔ suɔmɔ lɛ shi, ni ekanyaa helooŋ gbɔjɔmɔi lɛ.—Galatabii 5:19-21.

Gbɔmɛi gbalaa nakai mumɔ lɛ amɛwoɔ amɛmli kɛ́ amɛkɛ amɛhe wo heloonaa ninámɔ, pɛsɛmkunya yiŋsusumɔ, awuiyeli nifeemɔi, kɛ susumɔ ni ejaaa ni ahiɛ yɛ suɔmɔ he ní ehe shi waa yɛ je lɛ mli lɛ mli lɛ. Kɛji ootao ni oná anɔkwa suɔmɔ diɛŋtsɛ lɛ, esa akɛ okɛ shifimɔ ate shi ashi je lɛŋ mumɔ lɛ. (Yakobo 4:7) Shi kɛlɛ, okɛ ohe akafɔ̃ bo diɛŋtsɛ ohewalɛ nɔ; boo otsɛ́ Yehowa kɛha yelikɛbuamɔ. Emumɔ lɛ—ni ji hewalɛ ni fe fɛɛ yɛ jeŋ muu fɛɛ lɛ—baanyɛ awo bo hewalɛ ni eha oye omanye.—Lala 121:2.

Kasemɔ Suɔmɔ Kɛjɛ Kristofoi Anyɛmifeemɔ lɛ Mli

Tamɔ bɔ ni gbekɛbii kaseɔ suɔmɔ kɛtsɔ na ni amɛaana ni aajie lɛ kpo aatsɔɔ amɛ yɛ shia lɛ nɔ lɛ, wɔ fɛɛ—gbekɛbii kɛ onukpai—baanyɛ aná suɔmɔ kɛtsɔ Kristofoi krokomɛi ni wɔkɛaabɔ lɛ nɔ. (Yohane 13:34, 35) Yɛ anɔkwale mli lɛ, shishijee nibii ni Kristofoi asafo lɛ tsuɔ he nii lɛ eko ji koni eha shihilɛ ni yɔɔ lɛ afee nɔ ni hi kɛha aŋkroaŋkroi lɛ ni “amɛwowoo amɛhe hewalɛ kɛha suɔmɔ  kɛ nitsumɔi kpakpai atsumɔ.”—Hebribii 10:24, New International Version.

Mɛi ni ekolɛ “etɔ amɛ ni amɛfee yuyaa” lɛ ahiɛ sɔɔ suɔmɔ ni tamɔ nɛkɛ lɛ waa yɛ jeŋ ni suɔmɔ bɛ mli ni ebɔle wɔ lɛ mli. (Mateo 9:36) Niiashikpamɔ etsɔɔ akɛ suɔmɔ naanyobɔɔ ni anáa beni atsɔ onukpa lɛ baanyɛ aye abua mɔ ko ni ajieee suɔmɔ kpo atsɔɔɔ lɛ yɛ egbekɛbiiashi ni sui gbohii babaoo ená enɔ hewalɛ lɛ. Enɛ hewɔ lɛ, kwɛ bɔ ni ehe hiaa akɛ Kristofoi fɛɛ ni ejɔɔ amɛhe nɔ lɛ baajɛ amɛtsuii amli diɛŋtsɛ amɛhere mɛi heei fɛɛ ni jeɔ shishi akɛ amɛkɛ amɛ baabɔ lɛ!

“Suɔmɔ Sɛɛ Efooo Gbi ko Gbi Ko”

Biblia lɛ kɛɔ akɛ “suɔmɔ sɛɛ efooo gbi ko gbi ko.” (1 Korintobii 13:8) Te feɔ tɛŋŋ ebaa lɛ nakai lɛ? Bɔfo Paulo kɛɔ wɔ akɛ: “Suɔmɔ toɔ etsui shi, emli hi; suɔmɔ he tsɛ̃ɛɛ mɔ; suɔmɔ eshwãaa, efeee pupuupu, efeee nii ni esaaa, epeleee lɛ diɛŋtsɛ enɔ̃, emli wooo la, eniŋŋ efɔŋ he.” (1 Korintobii 13:4, 5) Eyɛ faŋŋ akɛ suɔmɔ nɛɛ jeee susumɔ ni aka yiŋ aŋmala loo hiɛaŋhiɛaŋ henumɔ ko kɛkɛ. Nɔ ni tamɔɔɔ nakai lɛ—mɛi ni jieɔ lɛ kpo lɛ le ni amɛkpɛlɛɔ nɔ akɛ amɛkɛ nijiaŋwujee kɛ piŋmɔi kpeɔ yɛ amɛshihilɛi amli, shi amɛŋmɛɛɛ gbɛ ni enɛ afite suɔmɔ ni amɛyɔɔ kɛha amɛnanemɛi adesai lɛ. Suɔmɔ ni tamɔ nɛkɛ “ji emuuyeli kpãa lɛ” lɛɛlɛŋ.—Kolosebii 3:12-14.

Susumɔ Kristofonyo oblayoo ko ni eye afii 17 ni yɔɔ Korea lɛ he okwɛ. Beni eje shishi akɛ eesɔmɔ Yehowa Nyɔŋmɔ lɛ, eweku mli bii lɛ ekpɛlɛɛɛ nɔ, ni ehe bahia ni eshi shia lɛ. Shi kɛlɛ, yɛ nɔ najiaŋ ni emli baafu lɛ, esɔle yɛ sane lɛ he, ni eŋmɛ gbɛ ni Nyɔŋmɔ Wiemɔ kɛ emumɔ lɛ jaje esusumɔ. No sɛɛ lɛ, efɔɔ eweku lɛ mli bii lɛ woji ŋmalamɔ, ni eŋmalaa wiemɔ ni tsɔɔ anɔkwa suɔmɔ kɛ hedɔɔ ni eyɔɔ kɛha amɛ lɛ yɛ ewoji ni eŋmalaa lɛ mli. Nɔ ni jɛ mli ba ji, enyɛmimɛi hii onukpai enyɔ je Biblia lɛ kasemɔ shishi, ni amrɔ nɛɛ amɛji Kristofoi ni abaptisi amɛ. Enyɛ kɛ enyɛmi nuu fioo hu kpɛlɛ Biblia mli anɔkwale lɛ nɔ. Yɛ naagbee kwraa lɛ, etsɛ ni teɔ shi woɔ lɛ waa lɛ tsake esu kwraa. Gbekɛ yoo Odasefonyo lɛ ŋma akɛ: “Wɔ fɛɛ lɛ wɔkɛ nanemɛi Kristofoi bote gbalashihilɛ mli, ni mɛi ni naa shɛɔ 23 yɛ wɔ weku lɛ mli ni jamɔ efee amɛ ekome.” Mɛɛ kunim po eji kɛha suɔmɔ nɛkɛ!

Ani oosumɔ ni oná anɔkwa suɔmɔ koni oye obua mɛi krokomɛi ni amɛ hu amɛfee nakai nɔŋŋ? Belɛ, okɛ ohe aha Yehowa, nakai su ni nɔ bɛ lɛ Jɛɛhe lɛ. Hɛɛ, bó e-Wiemɔ lɛ toi, sɔlemɔ ni obi mumɔ krɔŋkrɔŋ lɛ, ni okɛ Kristofoi anyɛmifeemɔ lɛ abɔ daa. (Yesaia 11:9; Mateo 5:5) Kwɛ bɔ ni ehaa mɔ tsui nyaa akɛ aaale akɛ etsɛŋ ni efɔŋfeelɔi fɛɛ anaagbee baaba, ni ebaashwɛ mɛi pɛ ni jieɔ Kristofoi anɔkwa suɔmɔ kpo lɛ! Eji anɔkwale akɛ, suɔmɔ ji nɔ diɛŋtsɛ ni haa anáa miishɛɛ kɛ wala.—Lala 37:10, 11; 1 Yohane 3:14.

[Mfoniri ni yɔɔ baafa 6]

Sɔlemɔ kɛ Nyɔŋmɔ Wiemɔ lɛ kasemɔ baaye abua wɔ ni wɔná anɔkwa suɔmɔ