“Etsu Hiamɔ Nii ko ni Yɔɔ Mitsuiŋ lɛ He Nii”

“MIIDA nyɛ shi kɛjɛ mitsuiŋ tɔ̃ɔ yɛ nikeenii kpakpa ni ji Tsi Obɛŋkɛ Yehowa lɛ hewɔ. Etsu hiamɔ nii ko ni yɔɔ mitsuiŋ lɛ he nii—bɔ ni ehe hiaa ni manu he akɛ Yehowa sumɔɔ mi ni edɔɔ mihe lɛ. Amrɔ nɛɛ minuɔ he akɛ mibɛŋkɛ Yehowa kɛ esuɔmɔ Bi lɛ kpaakpa. Miisumɔ ni magba mɔ fɛɛ mɔ wolo nɛɛ he sane ni maha misuɔlɔi fɛɛ eko.” Nakai ji bɔ ni Yehowa Odasefoi lɛ ateŋ mɔ kome nu he eha yɛ wolo hee ni hiɛ baafai 320 ni ajie lɛ kpo yɛ “Maŋtsɛyeli Jajelɔi ni Yɔɔ Ekãa” Kpokpaa Wulu nɔ Kpeei ni afee yɛ afi 2002 kɛ afi 2003 mli lɛ shishi lɛ. Nyɛhaa wɔpɛia nibii komɛi ni yɔɔ wolo hee nɛɛ mli, kɛ nɔ hewɔ ni afee lɛ mli wɔkwɛa.

Nibii Komɛi ni Yɔɔ Wolo Hee lɛ Mli

Mɛni yɔɔ wolo hee nɛɛ mli? Saji fɛɛ ni aŋma ni jeɔ kpo yɛ nikasemɔi enyɔ nɛɛ mli lɛ—kɛ babaoo ni fata he! Yitsei 31 yɔɔ wolo lɛ mli, ni eko fɛɛ eko sɛɛkɛlɛ tamɔ Buu-Mɔɔ nikasemɔ sɛɛkɛlɛ. Yɛ hiɛkpamɔ lɛ kɛ klɛŋklɛŋ yitsei etɛ lɛ asɛɛ lɛ, aja wolo lɛ mli awo fãi ejwɛ mli, ni eko fɛɛ eko kɔɔ Yehowa sui titrii lɛ ahe. Fã fɛɛ fã jeɔ shishi kɛ su lɛ hesusumɔ kuku. Yitsei fioo ni nyiɛ sɛɛ lɛ wieɔ bɔ ni Yehowa jieɔ su lɛ kpo ehaa lɛ he. Yitso ko ni kɔɔ Yesu he yɛ fã fɛɛ fã mli. Mɛni hewɔ? Ojogbaŋŋ, Yesu kɛɛ akɛ: “Mɔ ni ena mi lɛ, ena tsɛ lɛ.” (Yohane 14:9) Akɛni Yesu ji Yehowa henɔ pɛpɛɛpɛ hewɔ lɛ, ekɛ nɔkwɛmɔnii ni mli ka shi faŋŋ ni kɔɔ Nyɔŋmɔ sui lɛ kɛ nitsumɔ he lɛ haa wɔ. Fã fɛɛ fã baa naagbee kɛ yitso ko ni miitsɔɔ bɔ ni wɔbaafee wɔkase Yehowa yɛ su ni asusuɔ he lɛ kpojiemɔ mli. Kɛ́ wolo hee nɛɛ miiwie Yehowa sui lɛ ahe lɛ, etsɛɔ Biblia mli woji lɛ fɛɛ asɛɛ.

Nibii krɛdɛɛi komɛi hu yɛ Tsi Obɛŋkɛ Yehowa wolo lɛ mli. Kɛjɛ yitso 2 kɛyaa lɛ, yitso fɛɛ yitso hiɛ akrabatsa ko ni hiɛ saneyitso ni ji “Sanebimɔi Kɛha Sane Nɔjwɛŋmɔ.” Akalaaa ŋmalɛi kɛ sanebimɔi ni yɔɔ mli lɛ kɛha yitso lɛ mlitĩi. Shi moŋ, afee koni eye ebua bo ni okɛ Biblia lɛ ajwɛŋ sane lɛ nɔ vii. Aajie yi akɛ okane Ŋmalɛ mli saji lɛ eko fɛɛ eko jogbaŋŋ. No sɛɛ lɛ jwɛŋmɔ sanebimɔ lɛ nɔ, ni obɔ mɔdɛŋ okɛto bo diɛŋtsɛ ohe. Nii anɔjwɛŋmɔ ni tamɔ nɛkɛ baanyɛ ata otsui mli, ni eye ebua bo ni otsi obɛŋkɛ Yehowa kpaakpa diɛŋtsɛ.—Lala 19:15.

Aje gbɛ atao mfoniri ni yɔɔ Tsi Obɛŋkɛ Yehowa wolo lɛ mli lɛ mli, ni ato he gbɛjianɔ ní etsɔɔ nii ni ekanya mɔ. Biblia mli saji ahe mfonirii ni yɔɔ baafai muji amli lɛ yɛ yitsei 17 mli.

Mɛni Hewɔ Afee?

Mɛni hewɔ afee Tsi Obɛŋkɛ Yehowa wolo lɛ? Yiŋtoo titri hewɔ ni afee wolo hee nɛɛ ji ni eye ebua wɔ ní wɔle Yehowa jogbaŋŋ, ní wɔ diɛŋtsɛ wɔná wɔkɛ Nyɔŋmɔ teŋ wekukpaa ni yɔɔ gbagbalii.

Ani obaanyɛ okai mɔ ko ni ekolɛ ebaaná Tsi Obɛŋkɛ Yehowa wolo lɛ he sɛɛ, ekolɛ Biblia mli nikaselɔ ko loo nyɛmi nuu loo nyɛmi yoo Kristofonyo ko po ni ekpa shiɛmɔyaa? Ni bo hu—ani oje wolo hee nɛɛ kanemɔ shishi? Kɛ́ ofeko nakai lɛ, mɛni hewɔ otooo obe he gbɛjianɔ ní oje shishi amrɔ nɔŋŋ? Hemɔ be ni okɛjwɛŋ nɔ ni okane lɛ nɔ. Eba akɛ wolo hee nɛɛ baaye abua bo koni otsi obɛŋkɛ Yehowa Nyɔŋmɔ kpaakpa, koni okɛ miishɛɛ kɛ ekãa babaoo ajaje Maŋtsɛyeli sanekpakpa lɛ!