Wala Shihilɛ Mli Sane

Mɛi Krokomɛi Asɔɔmɔ Haa Mɔ Diɛŋtsɛ Piŋmɔ Naa

BAA SHI TAAKƐ JULIÁN ARIAS GBA

Yɛ afi 1988 mli beni miye afii 40 lɛ, minitsumɔ ni mitsuɔ lɛ bafee tamɔ nɔ ni eyɛ shweshweeshwe. Mi ji nitsumɔ ko ni yɔɔ je lɛŋ hei babaoo lɛ kpokpaa lɛ nɔkwɛlɔ. Kɛha minitsumɔ lɛ he nyɔmɔwoo lɛ, nitsumɔhe lɛ ha mi tsɔne ko ni jara wa waa, nyɔmɔwoo kpakpa, kɛ ɔfis ko ni yɔɔ fɛo waa yɛ Madrid, Spain maŋ-te lɛŋ. Nitsumɔhe lɛ wie yɛ gbɛ ni bɛ tɛ̃ɛ po nɔ akɛ amɛbaafee mi amɛ majimaji ateŋ nɔkwɛlɔ. Miyɔseee yɛ nakai beaŋ akɛ mishihilɛ baatsake kwraa.

MIDATRƐFONYO lɛ kɛɛ mi gbi ko yɛ nakai afi lɛ mli akɛ miyɛ multiple sclerosis (ansɔ kɛ mliteŋ wu mli hela), ni ji hela ko ni anyɛɛɛ atsa. Ehao mi waa. Sɛɛ mli beni mikane nɔ ni multiple sclerosis (ansɔ kɛ mliteŋ wu mli hela) lɛ baanyɛ afee mɔ lɛ, mishe gbeyei. * Etamɔ nɔ ni mahi hegbeyeiwoo shihilɛ mli yɛ miwala beaŋ fɛɛ. Te mafee tɛŋŋ makwɛ miŋa, Milagros, kɛ mibinuu Ismael ni eye afii etɛ lɛ? Te wɔɔfee tɛŋŋ wɔkpee shihilɛ nɛɛ naa? Yɛ be mli ni migbugbuuɔ shi kɛha sanebimɔi nɛɛ ahetooi lɛ, nɔ kroko hu ni ewa akɛ makpɛlɛ nɔ lɛ ba minɔ.

Yɛ nyɔŋ kome sɛɛ beni mi datrɛfonyo lɛ ha mile hela ni yeɔ mi lɛ, mɔ ni kwɛɔ minɔ yɛ nitsumɔhe lɛ tsɛ mi kɛtee ɔfis he ni eyɔɔ lɛ ni eha mile akɛ nitsumɔ lɛ miitao gbɔmɛi ni “amɛgbɔmɔtso yɔɔ fɛo.” Ni mɔ ko ni hela ni mli woɔ wu emɔ lɛ—yɛ hela lɛ shishijee mli po lɛ—náaa nakai gbɔmɔtso lɛ. No hewɔ lɛ amrɔ lɛ nɔŋŋ ni minukpa lɛ shwie mi. Trukaa lɛ, miheloonaa nitsumɔ lɛ eba naagbee!

 Mibɔ mɔdɛŋ mifee ekãa yɛ miweku lɛ hiɛ, shi mishwe akɛ maná be maha mi diɛŋtsɛ mihe, koni mikɛjwɛŋ shihilɛ hee ni miyaje mli lɛ he, ní agbɛnɛ masusu mi wɔsɛɛ he. Mibɔ mɔdɛŋ akɛ mawu mashi nɔnyɛɛ henumɔ ní miiya nɔ eewo wu lɛ. Nɔ ni dɔ mi fe fɛɛ ji akɛ, trukaa lɛ mibatsɔ mɔ ko ni he bɛ sɛɛnamɔ kɛha minitsumɔ lɛ.

Miná Hewalɛ Kɛjɛ Gbɔjɔmɔ Mli

Miida shi akɛ, yɛ nɛkɛ nɔnyɛɛ be nɛɛ mli lɛ, manyɛ mikɛ mihe afɔ hewalɛwoo jɛɛhei srɔtoi anɔ. Aaafee afii 20 ni ho dani nakai be lɛ shɛ lɛ, mibatsɔ Yehowa Odasefoi lɛ ateŋ mɔ kome. No hewɔ lɛ mikɛ anɔkwayeli sɔle miha Yehowa yɛ mihenumɔi kɛ yiŋkɔshikɔshifeemɔi ni kɔɔ wɔsɛɛ be he lɛ he. Miŋa, mɔ ni kɛ mi fɛɛ hiɛ hemɔkɛyeli kome lɛ ji hewalɛwoo jɛɛhe be fɛɛ be, ni miná nanemɛi ni bɛŋkɛ mi kpaakpa lɛ ateŋ mɛi komɛi asɛɛfimɔ, mɛi ni amɛ mlihilɛ kɛ mɔbɔnalɛ lɛ he ba sɛɛnamɔ waa lɛ.—Abɛi 17:17.

Mɛi krokomɛi ahe gbɛnaa nii ni minu he akɛ ekã minɔ lɛ hu ye ebua. Miisumɔ ni matsɔse mibinuu lɛ jogbaŋŋ, ni matsɔɔ lɛ nii, mikɛ lɛ ashwɛ, ni matsɔse lɛ yɛ shiɛmɔ nitsumɔ lɛ mli. No hewɔ lɛ minijiaŋ ejeee wui. Kɛfata he lɛ, miji onukpa yɛ Yehowa Odasefoi asafoi lɛ ateŋ ekome mli, ni misɛɛfimɔ he miihia minyɛmimɛi hii kɛ yei ni yɔɔ jɛmɛ lɛ. Kɛji akɛ miŋmɛ gbɛ ni mipiŋmɔ lɛ ba mihemɔkɛyeli lɛ shi lɛ, mɛɛ nɔkwɛmɔnɔ nɛkɛ matsɔ maha mɛi krokomɛi?

Bɔ fɛɛ bɔ ni fee lɛ, mishihilɛ tsake yɛ gbɔmɔtsoŋ kɛ shika gbɛfaŋ—yɛ gbɛ̀i komɛi anɔ lɛ ehiii kwraa shi yɛ gbɛ̀i krokomɛi hu anɔ lɛ eha mishihilɛ bahi. Be ko lɛ minu ni datrɛfonyo ko kɛɛ akɛ: “Hela fiteee mɔ; shi yɛ no najiaŋ lɛ, etsakeɔ mɔ.” Ni mikase akɛ jeee tsakemɔi lɛ fɛɛ ehiii.

Klɛŋklɛŋ kwraa lɛ, ‘ŋmei ni yɔɔ miheloo mli lɛ’ ye ebua mi ni minu mɛi krokomɛi agbɔmɔtsoŋ hewalɛnamɔ mli naagbai lɛ ashishi ni minu he miha amɛ. (2 Korintobii 12:7) Minu wiemɔi ni yɔɔ Abɛi 3:5 lɛ shishi fe bei fɛɛ ni eho akɛ: “Okɛ ohiɛ afɔ̃ Yehowa nɔ kɛ otsui fɛɛ, ni okɛ ohe akakpasa bo diɛŋtsɛ ojwɛŋmɔ.” Nɔ ni fe fɛɛ lɛ, shihilɛ hee ni miyaje mli lɛ ha mina nɔ̃ diɛŋtsɛ ni he hiaa yɛ shihilɛ mli kɛ nɔ̃ diɛŋtsɛ ni kɛ anɔkwa tsui ni nyɔɔ mɔ mli kɛ henumɔ ni haa mɔ nuɔ he akɛ ehe yɛ sɛɛnamɔ lɛ baa. Babaoo yɛ lolo ni manyɛ mafee yɛ Yehowa gbɛjianɔtoo lɛ mli. Mina Yesu wiemɔi akɛ: “Nɔ̃ hãmɔ mli yɛ jɔɔmɔ fe hemɔ” lɛ shishinumɔ diɛŋtsɛ.—Bɔfoi lɛ Asaji 20:35.

Shihilɛ Gbɛ Hee

Beni ana hela ni yeɔ mi lɛ sɛɛ etsɛɛɛ nɔŋŋ lɛ, afɔ mi nine kɛtee kpee ko shishi yɛ Madrid, he ni atsɔɔ Kristofoi ni kɛ amɛhe eha lɛ anii koni amɛto wekukpaa kpakpa shishi yɛ tsofafeelɔi kɛ amɛhelatsɛmɛi Odasefoi lɛ ateŋ yɛ lɛ. Ato mɛi ni kɛ amɛhe eha nɛɛ ahe gbɛjianɔ awo Hospital Liaison Committee srɔtoi lɛ amli yɛ sɛɛ mli. Yɛ migbɛfaŋ lɛ, nakai kpee lɛ ba yɛ ebe naa pɛpɛɛpɛ diɛŋtsɛ. Miná nitsumɔ kpakpa, nɔ ni baaha maná tsui ni nyɔɔ mɔ mli fe jarayeli nitsumɔ fɛɛ nitsumɔ.

Wɔkase yɛ kpee lɛ shishi akɛ abaatsu Hospital Liaison Committee heei srɔtoi ni ato shishi lɛ koni amɛyasara helatsamɔhei, amɛkɛ datrɛfoi agba sane, ni amɛkɛ nibii ahe gbɛtsɔɔmɔi aha helatsamɔ nitsulɔi, fɛɛ kɛ yiŋtoo akɛ amɛaato wekukpaa kpakpa shishi ni amɛtsĩ naataamɔi anaa. Ajinafoi akui lɛ yeɔ amɛbuaa nanemɛi Odasefoi koni amɛnine ashɛ datrɛfoi ni miisumɔ ni amɛkɛ tsofafeemɔ mli nifeemɔi ni lá fataaa he atsu nii lɛ anɔ. Eji anɔkwale akɛ, akɛni mibɛ tsɔsemɔ yɛ tsofafeemɔ mli hewɔ lɛ, miyɛ babaoo ni makase yɛ tsofafeemɔ mli wiemɔi, tsofafeemɔ mli jeŋbai, kɛ helatsamɔhe mli gbɛjianɔtoo he. Fɛɛ sɛɛ lɛ, mitee shia yɛ nakai kpee lɛ sɛɛ akɛ mɔ ni kɛ otii heei emamɔ ehiɛ, mɔ ni asaa lɛ kɛ nitsumɔ hee ni eha miná miishɛɛ.

 Helatsamɔhe Saramɔi—Miishɛɛ Jɛɛhe

Eyɛ mli akɛ mihela lɛ miikumɔ mi fiofio bɔ ni baaa shi moŋ, shi migbɛnaa nii akɛ Hospital Liaison Committee lɛ mlinyo lɛ tee hiɛ. Aha mi nyɔŋgbele shika ni akɛhaa mɛi ni nyɛɛɛ atsu nii yɛ kpá ni amɛje hewɔ lɛ, no hewɔ lɛ miná be ni mikɛsara helatsamɔhei. Yɛ nijiaŋwujei ni baa yɛ bei kɛ beaŋ lɛ fɛɛ sɛɛ lɛ, nɛkɛ saramɔi nɛɛ bafee mlɛo kɛ nɔ ni woɔ yibii babaoo fe bɔ ni mikpa gbɛ akɛ ebaaji. Eyɛ mli akɛ amrɔ nɛɛ mika shwiili sɛi mli moŋ, shi enɛ efeko naatsii wulu ko. Hefatalɔ ajinafoi akuu mlinyo ko fataa mihe daa. Kɛfata he lɛ, datrɛfoi le bɔ ni akɛ gbɔmɛi ni taraa shwiili mli wieɔ, ni bei komɛi lɛ etamɔ nɔ ni amɛkɛ bulɛ kpele boɔ mi toi kɛji amɛyɔse mɔdɛŋ ni mibɔɔ koni mibasara amɛ lɛ.

Yɛ afii nyɔŋma ni eho lɛ mli fɛɛ lɛ, miyasara datrɛfoi ohai abɔ. Amɛteŋ mɛi komɛi miisumɔ ni amɛye amɛbua wɔ kɛjɛ shishijee mli tɔŋŋ. Datrɛfonyo Juan Duarte—ni feɔ tsui opireshɛn yɛ Madrid, mɔ ni tsui nyɔɔ emli yɛ bulɛ ni ekɛhaa helatsɛ henilee lɛ hewɔ lɛ—kɛ ehe ha amrɔ nɔŋŋ koni etsu he nii. Kɛjɛ nakai beaŋ kɛbaa nɛɛ, efee Odasefoi helatsɛmɛi ni fa fe 200 ni jɛ Spain hei babaoo lɛ opireshɛn ni ekɛ lá tsuuu nii. Yɛ afii abɔ ni eho lɛ amli lɛ datrɛfoi babaoo ebɔi opireshɛn feemɔ ni amɛkɛ lá tsuuu nii. Wɔ daa gbi saramɔi lɛ tsu gbɛfaŋnɔ ko he nii, shi nɔyaa lɛ hu jɛ hiɛyaa ni aná yɛ tsofafeemɔ kɛ yibiiwoo kpakpai ni aná yɛ opireshɛn feemɔ ni lá fataaa he lɛ mli lɛ mli. Ni wɔyɛ nɔmimaa akɛ Yehowa ejɔɔ wɔmɔdɛŋbɔi lɛ anɔ.

Bɔ ni datrɛfoi komɛi ni feɔ tsui opireshɛn ni amɛhe esa waa yɛ gbekɛbii akwɛmɔ mli lɛ hereɔ mɔ lɛ eha miná hewalɛwoo waa. Wɔkɛ afii enyɔ yasara datrɛfoi akuu ko ni mɛi enyɔ yɔɔ mli ni amɛfeɔ opireshɛn kɛ amɛ mɛi ni kɛ tsofafeemɔ haa mɔ wɔɔ vii lɛ. Wɔkɛ tsofafeemɔ he woji ni tsɔɔ nɔ ni datrɛfoi krokomɛi feɔ yɛ tsofafeemɔ nifeemɔ nɛɛ mli lɛ yaha amɛ. Awo wɔ mɔdɛŋbɔɔ lɛ he nyɔmɔ yɛ afi 1999 mli beni afee Tsofafeemɔ He Kpee ni kɔɔ Opireshɛn ni Afeɔ Gbekɛbii Alá Fãji lɛ he lɛ. Opireshɛnfeelɔi enyɔ—ni opireshɛnfeelɔ ko ni jɛ England lɛ kɛ amɛ fee ekome, ni ekɛ hiɛnyiɛmɔ kpakpa tsu nii lɛ—fee Odasefonyo abifao ko ni ebiɔ ni atsake egbɔmɔtso lɛ mli kpãa kɛ emli fɔlɔ ni lá tsɔɔ mli kɛjɛɔ tsui lɛ mli kɛyaa gbɔmɔtso lɛŋ hei srɔtoi lɛ opireshɛn ko ni mli wa waa diɛŋtsɛ. * Mikɛ fɔlɔi lɛ nyá beni opireshɛnfeelɔi lɛ ateŋ mɔ kome jɛ opireshɛn tsũ lɛ mli ebatswa adafi akɛ opireshɛn lɛ eye omanye ni akɛ bulɛ eha weku lɛ henilee lɛ. Amrɔ nɛɛ datrɛfoi enyɔ nɛɛ kwɛɔ Odasefoi helatsɛmɛi ni jɛ Spain he fɛɛ he lɛ be fɛɛ be.

Nɔ ni mina akɛ eshɛjeɔ mimii waa yɛ saji ni tamɔ enɛɛmɛi amli lɛ ji yɔsemɔ ni miyɔseɔ akɛ manyɛ maye mabua minyɛmimɛi Kristofoi lɛ. Bei pii lɛ, kɛji amɛyana Hospital Liaison Committee lɛ, eji bei ni mli wa waa yɛ amɛshihilɛ mli lɛ ateŋ eko. Ebaabi ni afee amɛ opireshɛn, ni datrɛfoi ni yɔɔ helatsamɔhei ni amɛyɔɔ lɛ sumɔɔɔ loo amɛnyɛɛɛ amɛkwɛ amɛ ni amɛkɛ lá tsuuu nii. Shi kɛlɛ, kɛji nyɛmimɛi lɛ ná amɛle akɛ opireshɛnfeelɔi komɛi yɛ Madrid ni amɛfee ekome kɛtsuɔ tsofafeemɔ mli nitsumɔi srɔtoi fɛɛ ahe nii lɛ, amɛnáa miishɛɛ babaoo. Mina ni nyɛmi nuu ko hiɛ su etsake kɛjɛ nii ahesusumɔ kɛtee kpoofeemɔ shihilɛ mli, yɛ emasɛi ni wɔyɔɔ yɛ helatsamɔhe lɛ kɛkɛ hewɔ.

 Kojolɔi kɛ Tsofafeemɔ Mli Jeŋba He Mlai Ajeŋ

Yɛ nyɛsɛɛ afii nɛɛ amli lɛ, Hospital Liaison Committee lɛ mli bii lɛ eyasara kojolɔi hu. Yɛ nakai saramɔi lɛ amli lɛ, wɔhaa amɛ wolo ko ni atsɛɔ lɛ Family Care and Medical Management for Jehovah’s Witnesses (Weku Kwɛmɔ kɛ Tsofafeemɔ He Nitsumɔ Kɛha Yehowa Odasefoi), nɔ ni aje gbɛ ato he gbɛjianɔ koni eha maŋ onukpai ni tamɔ nakai lɛ ale wɔshidaamɔ yɛ lá kɛ nitsumɔ he, kɛ tsofafeemɔ mli najiaŋtoo nibii ni lá bɛ mli ni yɔɔ. Nɛkɛ saramɔi nɛɛ ahe bahia babaoo akɛni yɛ be ko ni eho lɛ ewaaa kwraa kɛha kojolɔi yɛ Spain akɛ amɛbaafã datrɛfonyo koni aha helatsɛ lɛ lá ni akɛte shi awo esuɔmɔnaa nii lɛ hewɔ.

Tsũi amli ni kojolɔi tsuɔ nii yɛ lɛ amli yɛ fɛo waa, ni yɛ miklɛŋklɛŋ saramɔ lɛ mli lɛ, minu he akɛ mijeee mɔ ko kwraa ni miinyiɛ kɛmiitsɔ ablanaai lɛ anɔ yɛ mishwiili lɛ mli. Nɔ ni fite sane lɛ kwraa ji akɛ, wɔná oshara fioo ko, ni mijɛ shwiili lɛ mli migbee shi yɛ minakutsei anaa. Kojolɔi kɛ mlalelɔi fioo ni na mijaramɔ shihilɛ lɛ jɛ mlihilɛ mli amɛye amɛbua mi, shi mihiɛ gbo yɛ amɛhiɛ.

Eyɛ mli akɛ kojolɔi lɛ leee nɔ yiŋtoi ahewɔ ni wɔbaa wɔbasara amɛ lɛ moŋ, shi amɛteŋ mɛi babaoo kɛ wɔ ye yɛ mlihilɛ mli. Klɛŋklɛŋ kojolɔ ni miyasara lɛ lɛ miisusu wɔshidaamɔ lɛ he momo, ni ekɛɛ ebaasumɔ ni ekɛ wɔ aya nɔ agba sane babaoo. Yɛ wɔsaramɔ ni nyiɛ sɛɛ lɛ mli lɛ, lɛ diɛŋtsɛ etsi mi kɛtee etsũ ni etsuɔ nii yɛ mli lɛ mli ni ebo mi toi jogbaŋŋ. Nibii kpakpai ni jɛ nɛkɛ shishijee saramɔ nɛɛ mli ba lɛ wo mi kɛ mihefatalɔi lɛ hewalɛ ni wɔye wɔ gbeyeishemɔ lɛ nɔ kunim, ni etsɛɛɛ ni wɔna akɛ yibiiwoo kpakpai babaoo baajɛ mli aba.

Yɛ nakai afi lɛ nɔŋŋ mli lɛ, wɔshi Family Care wolo lɛ eko wɔha kojolɔ kroko ni jɛ mlihilɛ mli ehere wɔ lɛ, ni ewo wɔ shi akɛ ebaakane adafitswaa lɛ. Mikɛ mitɛlifoŋ nɔmba ha lɛ kɛji aleenɔ ehe bahia ni enine ashɛ wɔnɔ yɛ hiamɔ be ko mli lɛ. Otsii enyɔ sɛɛ lɛ etswa ni ekɛɛ akɛ opireshɛnfeelɔ ko ni yɔɔ jɛmɛ lɛ ebi lɛ koni efã ni aha Odasefonyo ko ni ebiɔ ni afee lɛ opireshɛn lɛ lá. Kojolɔ lɛ kɛɛ wɔ akɛ eesumɔ ni wɔye wɔbua lɛ koni ená tsabaa ni kɛ bulɛ baaha Odasefonyo lɛ shwelɛ akɛ etsi ehe kɛjɛ lá he lɛ. Wɔná helatsamɔhe kroko yɛ gbɛ ni waaa kwraa nɔ, he ni opireshɛnfeelɔi lɛ fee opireshɛn lɛ yɛ omanyeyeli mli ni amɛkɛ lá tsuuu nii. Kojolɔ lɛ ná miishɛɛ beni enu nɔ ni ejɛ mli eba lɛ, ni ema nɔ mi eha wɔ akɛ ebaatao tsabaai ni tamɔ nakai nɔŋŋ yɛ wɔsɛɛ be mli.

Akɛni wɔmiitao ni datrɛfoi lɛ asusu hegbɛi ni helatsɛ lɛ yɔɔ kɛ ehenilee he hewɔ lɛ, yɛ mi helatsamɔhei asaramɔ lɛ mli lɛ, sanebimɔi ni kɔɔ tsofafeemɔ  mli jeŋbai ahe lɛ fɔɔ shitee. Helatsamɔhe ko ni yɔɔ Madrid ni kɛ wɔ fee ekome lɛ fɔ nine etsɛ mi koni mibaná gbɛfaŋnɔ yɛ nikasemɔ ko ni amɛkɛmiiha ni kɔɔ jeŋbai ahe lɛ mli. Nɛkɛ nikasemɔ nɛɛ ye ebua mi ni mikɛ wɔsusumɔ ni damɔ Biblia lɛ nɔ lɛ ha nilelɔi babaoo ni tsuɔ nɛkɛ nitsumɔ nɛɛ. Eye ebua mi hu ni minu yiŋkpɛi babaoo ni mli wa ni ebiɔ ni datrɛfoi afee lɛ ashishi.

Nikasemɔ lɛ mli tsɔɔlɔi lɛ ateŋ mɔ kome ni ji Nilelɔ Diego Gracia lɛ, toɔ nikasemɔ ni hi jogbaŋŋ ni ehe gbɛi waa ni kɔɔ jeŋbai ahe lɛ he gbɛjianɔ daa kɛha Spain datrɛfoi, ni ebatsɔ mɔ ni fiɔ hegbɛ ni wɔyɔɔ yɛ sanegbaa kɛha gbeekpamɔ lɛ mli lɛ ni kɔɔ lá ni agbalaa awoɔ mɔ mli lɛ he sane lɛ he lɛ sɛɛ kpɛŋŋ. * Sharamɔ ni wɔkɛ lɛ náa daa lɛ eha afɔ nine atsɛ Yehowa Odasefoi anitsumɔhe nine ni yɔɔ Spain lɛ mli najiaŋdamɔlɔi lɛ ateŋ mɛi komɛi koni amɛbatsɔɔ wɔshidaamɔ lɛ mli amɛha Nilelɔ Gracia nikaselɔi ni hiɛ univɛsiti klɛŋklɛŋ yijiemɔ woji lɛ, mɛi ni abuɔ amɛteŋ mɛi komɛi akɛ amɛji datrɛfoi ni he esa fe fɛɛ yɛ maŋ lɛ mli lɛ.

Shihilɛ Diɛŋtsɛ ni Yɔɔ lɛ Naa ni Aaadamɔ

Eji anɔkwale akɛ, nɛkɛ nitsumɔ ni haa mɔ tsui nyɔɔ emli nɛɛ ni mitsuɔ yɛ minanemɛi heyelilɔi anajiaŋ lɛ tsuko mi diɛŋtsɛ minaagbai lɛ ahe nii. Mihela lɛ miiya hiɛ ni enaa baaa shi. Shi kɛlɛ, heniianaa lɛ, mijwɛŋmɔ efee klalo. Mikɛ shidaa miiha miŋa kɛ mibinuu lɛ, mɛi ni ewieee amɛshiii mi kɔkɔɔkɔ lɛ, manyɛ matsu migbɛnaa nii lɛ ahe nii lolo. Eji amɛ sɛɛfimɔ fataaa he kulɛ, minyɛŋ enɛ matsu. Minyɛɛɛ mala mi trɔza lɛ po loo ni mawo kootu. Mináa shiɛmɔ ni mikɛ mibinuu Ismael náa mli gbɛfaŋnɔ lɛ mli miishɛɛ waa diɛŋtsɛ, mɔ ni tsiɔ mi kɛyaa kɛbaa daa Hɔɔ bɔni afee ni manyɛ mikɛ shiatsɛmɛi srɔtoi awie lɛ. Ni manyɛ matsu minitsumɔi akɛ asafo mli onukpa lɛ he nii lolo.

Miná shihilɛi komɛi ni piŋɔ mɔ waa yɛ afii 12 ni eho lɛ mli. Bei komɛi lɛ, na ni minaa bɔ ni mikpajee lɛ saa miweku lɛ he ehaa lɛ haa mipiŋɔ babaoo fe hela lɛ diɛŋtsɛ po. Mile akɛ amɛpiŋɔ, tsɛbelɛ ejɛɛɛ amɛnaa amɛwieee moŋ. Etsɛko tsɔ ni yɛ afi pɛ mli lɛ, mishaayoo kɛ mitsɛ gbo. Yɛ nakai afi lɛ mli nɔŋŋ lɛ, mina akɛ minyɛɛɛ maya he ko ni shwiili lɛ fataaa he. Mitsɛ ni yɔɔ wɔshia lɛ gbo yɛ hela kroko ni mli waa be fɛɛ be lɛ hewɔ. Milagros ni kwɛ lɛ lɛ, nu he tamɔ nɔ ni eeye nɔ ni baaba minɔ yɛ wɔsɛɛ be mli lɛ he odase.

Kɛlɛ, yɛ gbɛ kpakpa nɔ lɛ, wɔweku lɛ efee ekome be mli ni wɔfeɔ ekome kɛkpeeɔ naagbai lɛ anaa lɛ. Mikɛ nitsumɔ nɔkwɛlɔ sɛi lɛ etsake shwiili, shi yɛ anɔkwale mli lɛ mishihilɛ hi kwraa amrɔ nɛɛ ejaakɛ eji nɔ ni mijɔɔ nɔ miha mɛi krokomɛi asɔɔmɔ. Nihamɔ baanyɛ aha mɔ diɛŋtsɛ piŋmɔ naa aba shi, ni Yehowa yeɔ eshiwoo akɛ ebaawaje wɔ yɛ fimɔ be mli lɛ nɔ. Taakɛ Paulo ji lɛ, Manyɛ makɛɛ yɛ anɔkwale mli akɛ: “Minyɛɔ nii fɛɛ mifeɔ yɛ mɔ ni wajeɔ mi . . . lɛ mli.”—Filipibii 4:13.

[Shishigbɛ niŋmai]

[Akrabatsa ni yɔɔ baafa 24]

Ŋa ko Susumɔ

Eji nɔ ni wa waa kɛha ŋa ko ni kɛ hefatalɔ ko ni miipiŋ yɛ multiple sclerosis hewɔ miihi shi—yɛ jwɛŋmɔŋ, henumɔŋ, kɛ gbɔmɔtsoŋ. Esa akɛ mikɛ nilee atsu nii yɛ nɔ ni mitoɔ he gbɛjianɔ akɛ mafee lɛ he, ni makwa yeyeeyefeemɔ ni he ehiaaa ni kɔɔ wɔsɛɛ be he lɛ. (Mateo 6:34) Kɛlɛ, piŋmɔ ni akɛaahi shi lɛ baanyɛ ajie sú kpakpa ni mɔ ko yɔɔ lɛ kpo. Wɔ gbalashihilɛ lɛ mli ewa fe tsutsu lɛ, ni mikɛ Yehowa teŋ wekukpaa lɛ ebɛŋkɛ kpaakpa. Mɛi krokomɛi ni yɔɔ haomɔ shihilɛ mli lɛ awala shihilɛ he saji lɛ hu ewaje mi babaoo. Mináa tsui ni nyɔɔ mɔ mli ni Julián nuɔ he yɛ esɔɔmɔ ni jara wa yɛ nyɛmimɛi lɛ ni esɔmɔɔ amɛ lɛ hewɔ lɛ eko, ni mina akɛ Yehowa kwaaa wɔ kɔkɔɔkɔ, eyɛ mli akɛ ekolɛ gbi fɛɛ gbi kɛ kaa hee ko baaba.

[Akrabatsa ni yɔɔ baafa 24]

Binuu ko Susumɔ

Yɛ mitsɛ tsuishiŋmɛɛ kɛ mumɔ kpakpa lɛ naa lɛ, minaa nɔkwɛmɔnɔ ko ni nɔ bɛ, ni minuɔ he akɛ mihe yɛ sɛɛnamɔ kɛji miitsi lɛ kɛmiiya kɛmiiba. Mile akɛ minyɛŋ mafee nɔ ni masumɔ ni mafee lɛ be fɛɛ be lɛ. Amrɔ nɛɛ miyeko afii 20, shi kɛji mida lɛ, masumɔ akɛ masɔmɔ akɛ Hospital Liaison Committee lɛ mlinyo. Mile kɛjɛ Biblia lɛ mli shiwoi lɛ amli akɛ piŋmɔ ji be kukuoo nɔ ko, ni akɛ nyɛmimɛi hii kɛ yei pii piŋɔ babaoo fe bɔ ni wɔpiŋɔ lɛ.

[Mfoniri ni yɔɔ baafa 22]

Miŋa ji hewalɛwoo jɛɛhe kɛha mi

[Mfoniri ni yɔɔ baafa 23]

Mikɛ Datrɛfonyo Juan Duarte ni feɔ tsui opireshɛn lɛ miigba sane

[Mfoniri ni yɔɔ baafa 25]

Mikɛ mibinuu lɛ náa miishɛɛ kɛji wɔfee ekome kɛtsu nii yɛ sɔɔmɔ nitsumɔ lɛ mli