Mɛni Ba Amɛnɔ?

NOF kɛ No ji Biblia mli gbɛii kɛha Mizraim maŋtiasei ni tsutsu ko lɛ amɛhe gbɛi waa ni ji Memfis kɛ Thebes lɛ. Nof (Memfis) jɛkɛmɔ aaashɛ kilomitai 23 kɛjɛ Cairo wuoyigbɛ yɛ Nilo Faa lɛ anaigbɛ. Ni kɛlɛ, yɛ sɛɛ mli lɛ, Memfis laaje gbɛhe ni eyɔɔ akɛ Mizraim maŋtiase lɛ. Yɛ afi 1500 D.Ŋ.B. lɛ shishijee mli lɛ, Mizraim ná maŋtiase hee, ni ji No (Thebes), ni jɛkɛmɔ aaafee kilomitai 500 kɛjɛ Memfis wuoyigbɛ lɛ. Nɔ ni fata Thebes sɔlemɔtsui babaoo ni akpata hiɛ lɛ he lɛ ji Karnak sɔlemɔtsu ni abuɔ akɛ eji tsũ ko ni da fe fɛɛ eko ni akɛ akulashiŋi ema pɛŋ lɛ. Ajɔɔ Thebes kɛ Karnak sɔlemɔtsu ni yɔɔ jɛmɛ lɛ anɔ aha Amon, ni ji Mizraimbii lɛ anyɔŋmɔ nukpa lɛ jamɔ.

Mɛni ji nɔ ni Biblia gbalɛi kɛɔ yɛ Memfis kɛ Thebes he? Agba kojomɔ ashi Farao kɛ Mizraim nyɔŋmɔi lɛ, titri lɛ “Amon ni jɛ No” ni ji nyɔŋmɔ nukpa lɛ. (Yeremia 46:25, 26) ‘Abaafo’ jálɔi akuu ni keɔ yuu kɛyaa jɛmɛ lɛ ‘ashɛ afɔ.’ (Ezekiel 30:14, 15) Ni nakai pɛpɛɛpɛ ji bɔ ni eba lɛ. Sɔlemɔtsu ni akpata hiɛ kwraa lɛ ji nɔ pɛ ni shwɛ kɛha Amon jamɔ. Anaa ŋmɛnɛŋmɛnɛ beaŋ maŋ ni ji Luxor lɛ yɛ blema Thebes shikpɔŋ lɛ afãgbɛ, ni akrowai bibii krokomɛi hu yɛ eshikpɔji ni akpata hiɛ lɛ ekomɛi anɔ.

Yɛ Memfis gbɛfaŋ lɛ, ehe nibii fioo pɛ ji nɔ ni ana akɛ eshwɛ akɛ ja efuuhei lɛ kɛkɛ. Biblia he nilelɔ Louis Golding kɛɛ akɛ: “Arabbii ni ye Mizraim nɔ kunim lɛ kɛ afii ohai abɔ tsu nii ni amɛkɛtsa tɛi kɛjɛ Memfis hiɛkpatamɔ nibii babaoo lɛ mli ni amɛkɛma amɛmaŋtiase [Cairo] ni yɔɔ faa lɛ hiɛgbɛ lɛ. Arab tsumalɔi lɛ kɛ Nilo Faa lɛ mli sũ lɛ tsu nii jogbaŋŋ diɛŋtsɛ aahu akɛ yɛ kilomitai abɔ kɛkpele blema maŋtiase lɛ kpokpai lɛ amli lɛ, tɛ kome folo po ejieee ehiɛ kpo yɛ sũ diŋ lɛ mli.” Yɛ anɔkwale mli lɛ, taakɛ agba afɔ shi yɛ Biblia lɛ mli lɛ, Memfis batsɔ ‘amaŋfɔ ni mɔ ko ehiii mli dɔŋŋ.’—Yeremia 46:19.

Enɛɛmɛi ji nɔkwɛmɔnii babaoo ni feɔ ja ni Biblia gbalɛi ja lɛ he mfoniri lɛ ateŋ enyɔ pɛ. Thebes kɛ Memfis hiɛkpatamɔ lɛ haa wɔnáa yiŋtoo kpakpa ni wɔɔdamɔ nɔ wɔná hekɛnɔfɔɔ yɛ Biblia gbalɛi ni bako mli lolo lɛ amli.—Lala 37:10, 11, 29; Luka 23:43; Kpojiemɔ 21:3-5.

[He ni Mfoniri ni yɔɔ baafa 32 lɛ Jɛ]

Photograph taken by courtesy of the British Museum