“Nyɔŋmɔ lɛ, Suɔmɔ Ji lɛ”
“Nyɔŋmɔ lɛ, Suɔmɔ Ji lɛ”
“Mɔ ni sumɔɔɔ mɔ lɛ, eleee Nyɔŋmɔ; ejaakɛ Nyɔŋmɔ lɛ, suɔmɔ ji lɛ.”—1 YOHANE 4:8.
1-3. (a) Mɛni Biblia lɛ wieɔ yɛ Yehowa su ni ji suɔmɔ he, ni wiemɔ nɛɛ yɛ srɔto kwraa yɛ mɛɛ gbɛ nɔ? (b) Mɛni hewɔ Biblia lɛ kɛɔ akɛ “Nyɔŋmɔ lɛ, suɔmɔ ji lɛ” lɛ?
YEHOWA sui lɛ fɛɛ yɛ krɔŋŋ, amɛye emuu, ni anáa amɛhe miishɛɛ. Shi Yehowa sui lɛ ateŋ nɔ ni anáa he miishɛɛ fe fɛɛ ji suɔmɔ. Nɔ kroko gbalaaa wɔ kɛbɛŋkɛɛɛ Yehowa he waa diɛŋtsɛ taakɛ esuɔmɔ lɛ feɔ lɛ. Miishɛɛ sane ji akɛ, suɔmɔ ji esu hu ni nɔ kwɔ fe fɛɛ. Te wɔfeɔ tɛŋŋ wɔleɔ enɛ?
2 Biblia lɛ wieɔ nɔ ko yɛ suɔmɔ he ní ewieee nakai nɔ ko yɛ Yehowa sui titrii krokomɛi lɛ ahe kɔkɔɔkɔ. Ŋmalɛi lɛ ekɛɛɛ akɛ Nyɔŋmɔ lɛ, hewalɛ ji lɛ, loo ákɛ Nyɔŋmɔ lɛ, jalɛsaneyeli ji lɛ, aloo po akɛ Nyɔŋmɔ lɛ, nilee ji lɛ. Eyɛ nakai sui lɛ, ni eji sui etɛ lɛ jɛɛhe ni nɔ kwɔ fe fɛɛ. Shi, awieɔ wiemɔ ko ni mli kwɔ waa yɛ suɔmɔ he yɛ 1 Yohane 4:8, akɛ: “Nyɔŋmɔ lɛ, suɔmɔ ji lɛ.” (Wɔma efã ko nɔ mi.) Hɛɛ, suɔmɔ jeɔ kpo yɛ Yehowa nɔ fɛɛ nɔ feemɔ mli. Nakai eji diɛŋtsɛ, loo eji esu. Bei pii lɛ, wɔbaanyɛ wɔsusu he yɛ nɛkɛ gbɛ nɔ: Yehowa hewalɛ lɛ haa enyɛɔ efeɔ nii. Ejalɛsaneyeli kɛ enilee kudɔɔ gbɛ ni etsɔɔ nɔ efeɔ nii. Ni kɛlɛ, Yehowa suɔmɔ lɛ kanyaa lɛ ni efeɔ nii. Ni esuɔmɔ lɛ jeɔ kpo yɛ gbɛ ni etsɔɔ nɔ ekɛ esui krokomɛi lɛ tsuɔ nii lɛ mli be fɛɛ be.
3 Afɔɔ he wiemɔ akɛ Yehowa ji suɔmɔ ni ejie ehe kpo yɛ gbɔmɔ su diɛŋtsɛ mli. No hewɔ lɛ, kɛ́ wɔmiitao ni wɔkase suɔmɔ he nii lɛ, esa akɛ wɔkase Yehowa he nii. Belɛ, nyɛhaa wɔpɛia Yehowa suɔmɔ ni eko kɛ lɛ yeee egbɔ lɛ fãi komɛi amli wɔkwɛa.
Suɔmɔ Nifeemɔ Kpele Fe Fɛɛ Lɛ
4, 5. (a) Mɛni ji suɔmɔ nifeemɔ kpele ni fe fɛɛ yɛ yinɔsane mli? (b) Mɛni hewɔ wɔbaanyɛ wɔkɛɛ akɛ suɔmɔ kpãa ni mli wa fe eko fɛɛ eko ni ehi shi dã lɛ efee Yehowa kɛ e-Bi lɛ ekome lɛ?
4 Yehowa ejie suɔmɔ kpo yɛ gbɛ̀i babaoo nɔ, shi ekome ko yɛ ni fe ekrokomɛi lɛ fɛɛ. Mɛni ji no? No ji e-Bi lɛ ni etsu kɛba koni ebana amanehulu ni egbo yɛ wɔ hewɔ lɛ. Wɔbaanyɛ ni wɔkɛɛ ni tɔmɔ ko kwraa bɛ he akɛ enɛ ji suɔmɔ nifeemɔ kpele ni fe fɛɛ yɛ yinɔsane fɛɛ mli. Mɛni hewɔ wɔbaanyɛ wɔkɛɛ nakai?
5 Biblia lɛ tsɛɔ Yesu akɛ “bɔɔ nii fɛɛ ateŋ kromɔbi.” (Kolosebii 1:15) Bo diɛŋtsɛ susumɔ enɛ he okwɛ—Yehowa Bi lɛ yɛ shihilɛ mli kwraa dani abɔ jeŋ muu fɛɛ ni wɔnaa nɛɛ. Belɛ, bei enyiɛ Tsɛ lɛ kɛ Bi lɛ kɛhi shi kutuu? Jeŋ nilelɔi komɛi kaa amɛhiɛ amɛkɛɔ akɛ jeŋ muu lɛ fɛɛ eye afii akpekpei akpei 13. Ni kɛlɛ, kɛ́ akɔntaa ni akaa hiɛ abuɔ nɛɛ ja po lɛ, efeŋ nɔ ni sɛɛ kɛ bɔ ni sa ní eeenyɛ edamɔ shi kɛha afii abɔ ni Yehowa kromɔ-Bi lɛ eye lɛ! Mɛɛ nitsumɔ ená etsu yɛ nakai be kakadaŋŋ ní eho lɛ fɛɛ mli? Bi lɛ kɛ miishɛɛ sɔmɔ akɛ e-Tsɛ lɛ nitsumɔ “ŋaalɔ.” (Abɛi 8:30; Yohane 1:3) Yehowa kɛ e-Bi lɛ fee ekome kɛtsu nii ni amɛbɔ nibii krokomɛi fɛɛ kɛba shihilɛ mli. Kwɛ miishɛɛ bei diɛŋtsɛ ní amɛná mli ŋɔɔmɔ! Belɛ, wɔteŋ namɔ baanyɛ aka akɛ eeje shishi ní enu hewalɛ ni yɔɔ ekomefeemɔ ni ehi shi aahu yɛ nakai be kakadaŋŋ diɛŋtsɛ lɛ mli lɛ shishi? Eyɛ faŋŋ akɛ, suɔmɔ kpãa ni mli wa fe eko fɛɛ eko ni ehi shi dã lɛ efee Yehowa Nyɔŋmɔ kɛ e-Bi lɛ ekome diɛŋtsɛ.
6. Beni abaptisi Yesu lɛ, te Yehowa jie ehenumɔi akpo yɛ E-Bi lɛ he eha tɛŋŋ?
6 Shi yɛ enɛ fɛɛ sɛɛ lɛ, Yehowa tsu e-Bi lɛ kɛba shikpɔŋ lɛ nɔ ni afɔ́ lɛ akɛ adesa bi abifao. Nakai feemɔ tsɔɔ akɛ ehe bahia ni Yehowa aŋmɛɛ naanyobɔɔ ni mli wa ni ekɛ e-Bi lɛ náa yɛ ŋwɛi nɛɛ he yɛ afii nyɔŋmai komɛi amli. Ekɛ miishɛɛ ni mli wa waa jɛ ŋwɛi E-kwɛ beni Yesu daa kɛtsɔɔ nuu ni eye emuu lɛ. Beni Yesu ye aaafee afii 30 lɛ, abaptisi lɛ. Yɛ nakai be lɛ mli lɛ, Tsɛ lɛ diɛŋtsɛ wie kɛjɛ ŋwɛi akɛ: “Mɔnɛ ji misuɔmɔ bi ní mináa ehe tsui lɛ.” (Mateo 3:17) Akɛni Tsɛ lɛ na akɛ Yesu kɛ anɔkwayeli etsu nibii fɛɛ ni agba afɔ̃ shi, ni ji nibii fɛɛ ni ataoɔ yɛ ehe lɛ he nii hewɔ lɛ, ekã shi faŋŋ akɛ ená miishɛɛ waa!—Yohane 5:36; 17:4.
7, 8. (a) Mɛɛ shihilɛ Yesu tsɔ mli yɛ Nisan 14, afi 33 Ŋ.B., ni te esa eŋwɛi Tsɛ lɛ he eha tɛŋŋ? (b) Mɛni hewɔ Yehowa ŋmɛ gbɛ ni e-Bi lɛ na amanehulu ni egbo lɛ?
7 Shi te Yehowa nu he eha tɛŋŋ beni atsɔɔ Yesu sɛɛgbɛ ní no sɛɛ lɛ asafo yuu ko ni mli ewo la bamɔ lɛ yɛ Nisan 14, afi 33 Ŋ.B lɛ? Ni beni aye Yesu he fɛo, ní afɛ̃ lajɔ̃ ashwie ehe, ní amamɔ lɛ atswɛrɛ lɛ hu? Ni beni akɛ kpelebii yi lɛ, ní esɛɛ fɛɛ folɔ kɛ lá sɔŋŋ lɛ hu? Beni akɛ plɛkoobii kala eniji kɛ enaji akpɛtɛ tso ni ma shi jaŋŋ nɔ, ní ashĩ lɛ atsotsoro shi ní gbɔmɛi kɛ jɛmɔi sopaa lɛ lɛ hu? Te Tsɛ lɛ nu he eha tɛŋŋ beni esuɔmɔ Bi lɛ bolɔɔ etsɛɔ lɛ yɛ piŋmɔ ní naa wa waa mli lɛ? Te Yehowa nu he eha tɛŋŋ beni Yesu mu enaagbee mumɔ, ní kɛjɛ be mli ni abɔ jeŋ muu lɛ fɛɛ aahu kɛbashi nakai beaŋ lɛ, E-suɔmɔ Bi lɛ je shihilɛ mli nɔ ni ji klɛŋklɛŋ kwraa lɛ?—Mateo 26:14-16, 46, 47, 56, 59, 67; 27:26, 38-44, 46; Yohane 19:1.
8 Akɛni Yehowa yɛ henumɔ hewɔ lɛ, dɔlɛ ni enu he yɛ e-Bi lɛ gbele lɛ hewɔ lɛ mli wa kwraa fe bɔ ni wɔwiemɔ mli hewalɛ baanyɛ atsɔɔ mli. Nɔ ni abaanyɛ atsɔɔ mli ji yiŋtoo ni Yehowa hiɛ hewɔ ní eŋmɛ gbɛ ni eha eba lɛ nakai lɛ. Mɛni hewɔ Tsɛ lɛ ŋmɛ gbɛ ni etsɔ piŋmɔ ni tamɔ nɛkɛ mli? Yehowa jieɔ nɔ ko ni yɔɔ naakpɛɛ kpo ehaa wɔ yɛ Yohane 3:16—eji Biblia lɛ mli kuku ko ni he hiaa aahu akɛ awo lɛ gbɛi akɛ Sanekpakpa lɛ yɛ gbɛ bibioo ko nɔ. Ekaneɔ akɛ: “Nɛkɛ Nyɔŋmɔ sumɔ je lɛ, akɛ eŋɔ ebi koome lɛ eha, koni mɔ fɛɛ mɔ ni heɔ enɔ yeɔ lɛ hiɛ akakpata, shi moŋ ená naanɔ wala.” No hewɔ lɛ, Nyɔŋmɔ yiŋtoo lɛ naa yashiɔ enɛ: suɔmɔ. Ajieko suɔmɔ kpele ko ni tamɔ nakai kpo dã.
Bɔ ni Yehowa Maa Esuɔmɔ lɛ nɔ Mi Kɛhaa Wɔ
9. Mɛni Satan sumɔɔ ni wɔhe wɔye yɛ bɔ ni Yehowa buɔ wɔ ehaa lɛ he, shi mɛɛ nɔmimaa Yehowa kɛhaa wɔ?
9 Shi kɛlɛ, sanebimɔ ko ni he hiaa waa teɔ shi: Ani Nyɔŋmɔ sumɔɔ wɔ akɛ aŋkroaŋkroi? Ekolɛ mɛi komɛi baakpɛlɛ nɔ akɛ Nyɔŋmɔ sumɔɔ adesai fɛɛ, taakɛ Yohane 3:16 lɛ kɛɔ lɛ. Shi ekolɛ amɛnuɔ he akɛ, ‘Nyɔŋmɔ nyɛŋ asumɔ mi kɔkɔɔkɔ akɛ mɔ aŋkro.’ Anɔkwale lɛ ji akɛ, Satan Abonsam miisumɔ waa ni wɔhe wɔye akɛ Yehowa sumɔɔɔ wɔsane ni asaŋ ebuuu wɔhe akɔntaa hu. Yɛ gbɛ kroko nɔ lɛ, bɔ ni ekolɛ wɔbaasusu akɛ asumɔɔɔ wɔ loo wɔhe bɛ sɛɛnamɔ lɛ fɛɛ sɛɛ lɛ, Yehowa maa nɔ mi ehaa wɔ akɛ enɔkwa tsuji lɛ ateŋ mɔ fɛɛ mɔ jara wa kɛha lɛ.
10, 11. Yesu abɛbua ní kɔɔ afilimatai ahe lɛ tsɔɔ akɛ wɔjara wa yɛ Yehowa hiɛ yɛ mɛɛ gbɛ nɔ?
10 Akɛ nɔkwɛmɔnɔ lɛ, susumɔ Yesu wiemɔi ni aŋma yɛ Mateo 10:29-31 lɛ he okwɛ. Beni Yesu feɔ bɔ ni ekaselɔi lɛ ajara wa ha lɛ he nɔkwɛmɔnɔ lɛ, ekɛɛ akɛ: “Ani afilimatai enyɔ lɛ jeee hiɛbii nyɔŋma ahɔɔ aheɔ? shi amɛteŋ ekome folo enyɔŋ shikpɔŋ, ja ejɛ nyɛtsɛ lɛ dɛŋ. Shi nyɛyiteŋtsɔi po lɛ akane fɛɛ. No hewɔ lɛ nyɛkashea gbeyei; nyɛjara wa aahu fe afilimatai babaoo.” Susumɔ nɔ ni nakai wiemɔi lɛ tsɔɔ kɛha Yesu toibolɔi ni hi shi yɛ klɛŋklɛŋ afii 100 lɛ mli lɛ he okwɛ.
11 Yɛ Yesu gbii lɛ amli lɛ, no mli lɛ afilimata ji loofɔji ni ayeɔ, ní ahɔ̃ɔ lɛ ateŋ nɔ ni jara waaa kwraa. Kɛ́ nihelɔ hiɛ hiɛbii nyɔŋma lɛ, ebaaná afilimatai enyɔ. Shi taakɛ Luka 12:6, 7 tsɔɔ lɛ, Yesu tsɔɔ mli yɛ sɛɛ mli akɛ kɛ́ mɔ ko miitao ní ekɛ shika ni ji hiɛbii nyɔŋmai enyɔ ahe nii lɛ, jeee afilimatai ejwɛ ebaaná, shi moŋ enumɔ. Akɛ loofɔlɔ kome lɛ fataa he kɛhaa lɛ tamɔ nɔ ni no bɛ jara ko kwraa. Benɛ ekolɛ nɛkɛ loofɔji nɛɛ ajara waaa yɛ adesai ahiɛ, shi te Bɔlɔ lɛ buɔ amɛ ehaa tɛŋŋ? Yesu kɛɛ akɛ: “Nyɔŋmɔ hiɛ kpaaa amɛteŋ ekome folo [nɔ ni akɛfata he akɛ mliwoo po] nɔ.” Ekolɛ amrɔ nɛɛ, wɔbɔi oti ní Yesu wieɔ he lɛ shishinumɔ. Akɛni afilimata kome jara wa yɛ Yehowa hiɛ nɛkɛ hewɔ lɛ, kwɛ bɔ ni adesa jara baawa kwraa fe nakai! Taakɛ Yesu kɛɛ lɛ, Yehowa le wɔhe saji fɛɛ fitsofitso. Ejaakɛ, wɔyiteŋtsɔi tete po lɛ akane fɛɛ!
12. Mɛni hewɔ wɔbaanyɛ wɔná nɔmimaa akɛ nɔ ni Yesu wie lɛ baahi feemɔ diɛŋtsɛ beni ewie wɔyiteŋtsɔi kanemɔ he lɛ?
12 Ekolɛ mɛi komɛi baasusu akɛ Yesu miiwo saji ahe yɛ biɛ. Shi bo diɛŋtsɛ susumɔ gbohiiashitee lɛ he okwɛ. Kwɛ bɔ ni esa akɛ Yehowa ale wɔ jogbaŋŋ diɛŋtsɛ kɛmɔ shi, bɔni afee ni enyɛ ebɔ wɔ ekoŋŋ! Wɔjara wa kɛha lɛ aahu akɛ ekaiɔ wɔhe saji fɛɛ, ni nɔ ni fata he ji wɔfɔmɔ su mli nibii ni yɔɔ hwanyaŋŋ kɛ saji ni wɔkɛto wɔjwɛŋmɔ mli afii abɔ kɛ wɔniiashikpamɔi fɛɛ fitsofitso. Wɔyiteŋtsɔi—ní kɛ́ aja mli lɛ, aaashɛ 100,000 tsaa yɛ adesa kome yitso nɔ lɛ—kanemɔ baafee nitsumɔ bibioo kwraa kɛ́ akɛto he. Kwɛ bɔ ni Yesu wiemɔi lɛ kɛ nɔmimaa kpele haa wɔ akɛ Yehowa susuɔ wɔhe akɛ aŋkroaŋkroi!
13. Yɛ mɛɛ gbɛ nɔ Maŋtsɛ Yehoshafat sane lɛ tsɔɔ akɛ Yehowa taoɔ nibii kpakpai ní yɔɔ wɔmli lɛ eyɛ mli akɛ wɔyeee emuu?
13 Biblia lɛ jieɔ nɔ kroko hu kpo ni maa suɔmɔ ni Yehowa yɔɔ kɛha wɔ lɛ nɔ mi. Etaoɔ nibii kpakpai ní yɔɔ wɔmli lɛ ni ebuɔ no akɛ ejara wa. Ákɛ nɔkwɛmɔnɔ lɛ, susumɔ Maŋtsɛ kpakpa Yehoshafat he okwɛ. Beni Maŋtsɛ lɛ fee kwashiai anii ko lɛ, Yehowa gbalɔ lɛ kɛɛ lɛ akɛ: “Enɛ hewɔ lɛ Yehowa mlifu kã onɔ!” Mɛɛ susumɔ ni hiɛdɔɔ yɔɔ mli waa nɛ! Shi Yehowa shɛɛ sane lɛ waaa jɛmɛ. Etee nɔ akɛ: “Shi kɛlɛ ana nibii kpakpai komɛi yɛ ohe.” (2 Kronika 19:1-3) No hewɔ lɛ Yehowa jalɛ mlifu lɛ haaa eku ehiɛ efɔ̃ “nibii kpakpai” ni yɔɔ Yehoshafat mli lɛ nɔ. Ani ejeee nɔ ni woɔ mɔ hewalɛ akɛ wɔɔle akɛ wɔ-Nyɔŋmɔ lɛ taoɔ ekpakpa ní yɔɔ wɔmli lɛ eyɛ mli akɛ wɔyeee emuu?
Nyɔŋmɔ ní ‘Ŋɔfaa Mra’
14. Kɛ́ wɔfee esha lɛ, mɛɛ henumɔi ni haoɔ mɔ wɔbaanyɛ wɔná, shi mɛɛ gbɛ nɔ wɔbaanyɛ wɔná Yehowa dɛŋ eshaifaa he sɛɛ yɛ?
14 Kɛ́ wɔfee esha lɛ, ekolɛ nijiaŋwujee, hiɛgbele, kɛ fɔyeli ní wɔnuɔ he lɛ baaha wɔsusu akɛ wɔnyɛŋ wɔfee mɛi ni sa akɛ wɔsɔmɔɔ Yehowa kɔkɔɔkɔ. Shi, kaimɔ akɛ, Yehowa ‘ŋɔfaa mra.’ (Lala 86:5) Hɛɛ, kɛ́ wɔshwa wɔhe kɛjɛ wɔhe eshai lɛ amli ni wɔbɔ mɔdɛŋ waa ní wɔkafee nakai eshai lɛ dɔŋŋ lɛ, wɔbaanyɛ wɔná Yehowa dɛŋ eshaifaa he sɛɛ. Susumɔ bɔ ni Biblia lɛ tsɔɔ Yehowa suɔmɔ lɛ fã ní yɔɔ naakpɛɛ nɛɛ mli eha lɛ he okwɛ.
15. Te Yehowa haa wɔkɛ wɔhe eshai lɛ ateŋ jɛkɛɔ ehaa tɛŋŋ?
15 Lalatsɛ David kɛ wiemɔ ko ni mli kã shi faŋŋ tsu nii ni ekɛtsɔɔ Yehowa eshaifaa lɛ mli: “Bɔ ni boka kɛ anai teŋ jɛkɛ lɛ, nakai E-jie wɔnɔtɔmɔi lɛ kɛjɛ wɔhe kwraa.” (Wɔma efã ko nɔ mi; Lala 103:12, The Amplified Bible) Te boka kɛ anai teŋ jɛkɛ ha tɛŋŋ? Yɛ shishinumɔ ko naa lɛ, be fɛɛ be lɛ, boka kɛ anai teŋ jɛkɛɔ fe bɔ fɛɛ bɔ ni abaanyɛ asusu he; naagbeehei enyɔ lɛ nyɛŋ akpe kɔkɔɔkɔ. Woloŋlelɔ ko wie akɛ nɛkɛ wiemɔ nɛɛ tsɔɔ “he ni jɛkɛ waa diɛŋtsɛ; he ni yɔɔ shɔŋŋ fe fɛɛ ni wɔɔnyɛ wɔsusu he.” David wiemɔi ni jɛ mumɔŋ lɛ kɛɔ wɔ akɛ kɛ́ Yehowa kɛ eshai fa wɔ lɛ, ehaa wɔkɛ wɔhe eshai lɛ ateŋ jɛkɛɔ aahu fe bɔ ni wɔɔnyɛ wɔsusu he.
16. Kɛ́ Yehowa kɛ wɔhe eshai lɛ ke wɔ lɛ, mɛni hewɔ wɔbaanyɛ wɔná nɔmimaa akɛ yɛ no sɛɛ lɛ ebuɔ wɔ akɛ wɔhe tse lɛ?
16 Ani oka akɛ obaajie muji ko ní eka atade ní yɛɔ fioo ko mli dã? Ekolɛ yɛ omɔdɛŋbɔɔ ni fe fɛɛ lɛ fɛɛ sɛɛ lɛ, aana muji lɛ yɛ mli lolo. Kwɛmɔ bɔ ni Yehowa tsɔɔ nyɛmɔ ni eyɔɔ kɛha eshai ni ekɛfaa lɛ mli lɛ, akɛ: “Kɛ́ nyɛhe eshai lɛ tsuɔ tamɔ lá po, amɛaayɛ tamɔ snoo; kɛ́ amɛtsuɔ tamɔ muneele lɛ, amɛaatsɔmɔ tamɔ too he tsɔi yɛŋ.” (Yesaia 1: 18, wɔma efã ko nɔ mi.) Wiemɔ ni ji “lá” lɛ miitsɔɔ nɔ ko ni tsuɔ faa. * “Muneele” ji sui ni akɛwoɔ mamai lɛ ateŋ ekome ni mli wa. Wɔ diɛŋtsɛ wɔnyɛŋ wɔtsɔ wɔmɔdɛŋbɔi anɔ wɔjie muji ni ji esha lɛ kɛjɛ wɔhe kɔkɔɔkɔ. Kɛlɛ, Yehowa baanyɛ ajie eshai ni tamɔ lá kɛ muneele lɛ kwraa ní eha amɛyɛ́ futaa tamɔ snoo loo too he tsɔi yɛŋ ní awoko lɛ tsofa. No hewɔ lɛ, kɛ́ Yehowa kɛ wɔhe eshai lɛ ke wɔ lɛ, ehe ehiaaa ni wɔnu he akɛ muji ní nakai eshai lɛ kɛwo wɔhe lɛ yɛ wɔhe lolo yɛ wɔwala be ni eshwɛ lɛ mli fɛɛ.
17. Yehowa shɛrɛɔ wɔhe eshai eshwieɔ esɛɛ yɛ mɛɛ shishinumɔ naa?
17 Hezekia kɛɛ Yehowa, yɛ shidaa lala ko ní kanyaa mɔ henumɔ ní efo beni aha eye ehe kɛjɛ gbele hela lɛ mli lɛ mli akɛ: “Oshɛrɛ mihe eshai lɛ fɛɛ oshwie osɛɛ!” (Yesaia 38:17, wɔma efã ko nɔ mi.) Afee Yehowa he mfoniri yɛ biɛ akɛ ejieɔ eshafeelɔ ní tsakeɔ etsui lɛ he eshai lɛ ni eshɛrɛɔ eshwieɔ E-sɛɛ, he ni E-naaa ní ekadiii nakai eshai lɛ hu dɔŋŋ lɛ. Taakɛ wolo ko ni akɛtaoɔ saji amli lɛ tsɔɔ mli lɛ, abaanyɛ atsɔɔ susumɔ lɛ mli akɛ: “Ófee [mihe eshai lɛ] tamɔ nɔ ni amɛbako mli dã.” Ani jeee hewalɛwoo wiemɔ diɛŋtsɛ nɛ?
18. Mɛɛ gbɛ nɔ gbalɔ Mika tsɔɔ yɛ akɛ kɛ́ Yehowa kɛ wɔhe eshai lɛ ke wɔ lɛ, E-jieɔ kɛjɛɔ wɔhe kɛyaa naanɔ?
18 Gbalɔ Mika jie hekɛnɔfɔɔ ní eyɔɔ lɛ kpo yɛ sɛɛkuu he shiwoo ko ní akɛha lɛ mli akɛ Yehowa kɛ emaŋ ní eshwa amɛhe lɛ ahe baake amɛ, ni ekɛɛ: “Namɔ ji Mawu tamɔ bo . . . ní ekuɔ ehiɛ efɔ̃ɔ egbɛfaŋnɔ lɛ mli mɛi ní eshwɛ lɛ amlatɔ̃mɔ nɔ? . . . Ni oooshɛrɛ wɔhe eshai lɛ fɛɛ oshwie ŋshɔ bu kwɔŋkwɔŋ lɛ mli.” (Mika 7:18, 19, wɔma efã ko nɔ mi.) Bo diɛŋtsɛ feemɔ nɔ ni nakai wiemɔi lɛ tsɔɔ kɛha mɛi ni hi shi yɛ Biblia beaŋ lɛ he mfoniri yɛ ojwɛŋmɔŋ okwɛ. Ani hegbɛ ko yɛ akɛ kɛ́ ashɛ nɔ ko afɔ̃ “ŋshɔ bu kwɔŋkwɔŋ lɛ mli” lɛ, nine baanyɛ ashɛ nɔ ekoŋŋ? Enɛ hewɔ lɛ Mika wiemɔi lɛ tsɔɔ akɛ kɛ́ Yehowa kɛ wɔhe eshai lɛ ke wɔ lɛ, ejieɔ kwraa kɛjɛɔ wɔhe kɛyaa naanɔ.
“Wɔ-Nyɔŋmɔ lɛ Mɔbɔnalɛ ní Hãa Emusuŋ Tsɔɔ Lɛ Lɛ”
19, 20. (a) Mɛni ji Hebri feemɔ-wiemɔ ni atsɔɔ shishi akɛ “ajie mɔbɔnalɛ kpo” loo “ana mɔbɔ” lɛ shishinumɔ? (b) Biblia lɛ kɛ henumɔ ní yoofɔyoo yɔɔ kɛha ebi abifao lɛ tsuɔ nii ni ekɛtsɔɔ wɔ Yehowa musuŋtsɔlɛ lɛ he nii yɛ mɛɛ gbɛ nɔ?
19 Suɔmɔ ni Yehowa jieɔ lɛ kpo lɛ fã kroko hu ji musuŋtsɔlɛ. Mɛni ji musuŋtsɔlɛ? Tsakpãa ní bɛŋkɛ kpaakpa yɛ musuŋtsɔlɛ kɛ mɔbɔnalɛ teŋ yɛ Biblia lɛ mli. Hebri kɛ Hela wiemɔi babaoo hiɛ shishinumɔ ní tsɔɔ mlihilɛ. Ákɛ nɔkwɛmɔnɔ lɛ, bei pii lɛ atsɔɔ Hebri feemɔ-wiemɔ ni ji ra·chamʹ shishi akɛ “ajie mɔbɔnalɛ kpo” loo “ana mɔbɔ.” Nɛkɛ Hebri wiemɔ nɛɛ, ní Yehowa kɛtsuɔ nii kɛkɔɔ lɛ diɛŋtsɛ ehe lɛ, kɛ wiemɔ ní akɛtsuɔ nii kɛha “fɔmɔ kotoku” lɛ yɛ tsakpãa, ni abaanyɛ awie he akɛ “yoofɔyoo musuŋtsɔlɛ.”
20 Biblia lɛ kɛ henumɔ ní yoofɔyoo yɔɔ kɛha ebi abifao lɛ tsuɔ nii ni ekɛtsɔɔ wɔ nii yɛ Yehowa musuŋtsɔlɛ lɛ he. Yesaia 49:15 kɛɔ akɛ: “Ani yoo hiɛ baanyɛ akpa ebi fufɔoo nɔ, aloo emusuŋ etsɔŋ lɛ [ra·chamʹ] yɛ emusuŋ bi hewɔ? Hɛɛ, amɛhiɛ baanyɛ akpa onɔ, ni kɛlɛ, mi lɛ mihiɛ kpaŋ onɔ.” (The Amplified Bible) Ewa waa akɛ aaasusu he akɛ yoofɔyoo ko hiɛ aaakpa ebi fufɔoo nɔ ní ehaaa lɛ nii loo ekwɛɛɛ lɛ. Ejaakɛ kɛ hooo lɛ, abifao nyɛɛɛ ehe nɔ ko kwraa efee; shwane kɛ nyɔɔŋ fɛɛ lɛ, nyɛ lɛ suɔmɔ kwɛmɔ he hiaa abifao lɛ. Shi kɛlɛ, dɔlɛ sane ji akɛ, yeifɔyei ní joɔ foi amɛshiɔ amɛbii lɛ ji nɔ ni fɔɔ kaa, titri lɛ yɛ nɛkɛ “jaramɔ bei” nɛɛ amli. (2 Timoteo 3:1, 3) Yehowa jajeɔ akɛ, “Ni kɛlɛ, mi lɛ mihiɛ kpaŋ onɔ.” Musuŋtsɔlɛ henumɔ ni Yehowa yɔɔ lɛ mli wa kwraa fe adebɔɔ naa mlitsɔlɛ henumɔ ní wɔbaanyɛ wɔsusu he—ni ji musuŋtsɔlɛ ní yoofɔyoo nuɔ he ehaa ebi abifao lɛ, ni anyɛŋ atsɔɔ bɔ ni emliwalɛ lɛ ji lɛ hu mli.
21, 22. Mɛni ji nɔ ni Israelbii lɛ kɛkpe yɛ blema Mizraim, ni te Yehowa fee enii yɛ amɛbolɔmɔi lɛ ahe eha tɛŋŋ?
21 Taakɛ fɔlɔ ni yɔɔ suɔmɔ ji lɛ, mɛɛ gbɛ nɔ Yehowa jieɔ musuŋtsɔlɛ kpo etsɔɔ? Anaa nɛkɛ su nɛɛ faŋŋ yɛ gbɛ ni etsɔ nɔ ekɛ blema Israel ye ha lɛ mli. Beni shɛɔ afii ohai 16 D.Ŋ.B lɛ naagbee gbɛ lɛ, no mli lɛ aaye Israelbii akpekpei abɔ anɔ nyɔji yɛ Mizraim, ni aanyɛ amɛnɔ waa yɛ jɛmɛ. (2 Mose 1:11, 14) Israelbii lɛ bolɔ amɛtsɛ́ Yehowa kɛha yelikɛbuamɔ yɛ amɛ haomɔ lɛ mli. Te Nyɔŋmɔ ni yɔɔ musuŋtsɔlɛ lɛ here nɔ eha tɛŋŋ?
22 Yehowa musuŋ tsɔ lɛ yɛ amɛhe. Ekɛɛ akɛ: “Mina amanehulu ni mimaŋ ni yɔɔ Mizraim lɛ naa lɛ, ni amɛbolɔmɔ ni amɛbolɔɔ . . . lɛ minu, . . . mile amɛ nidɔɔnii lɛ.” (2 Mose 3:7) Yehowa nyɛŋ ana amanehulu ní ewebii naa lɛ loo enu amɛbolɔmɔi lɛ ní enuuu he ehaaa amɛ. Yehowa ji Nyɔŋmɔ ni yɔɔ mlitsɔlɛ. Ni mlitsɔlɛ—ni ji nyɛ ní anyɛɔ anuɔ mɛi krokomɛi apiŋmɔi ahe lɛ—kɛ musuŋtsɔlɛ yɛ tsakpãa ní bɛŋkɛ kpaakpa. Shi kɛlɛ, jeee akɛ Yehowa nu he eha ewebii lɛ kɛkɛ; nɔ ko tsirɛ lɛ ni efee nii yɛ amɛgbɛfaŋ. Yesaia 63:9 lɛ kɛɔ akɛ: “Ekpɔ̃ amɛ yɛ esuɔmɔ kɛ emɔbɔnalɛ hewɔ.” Ekɛ “nineshiwalɛ” jie Israelbii lɛ kɛjɛ Mizraim. (5 Mose 4:34) Yɛ no sɛɛ lɛ, ekɛ niyenii ko ni yɔɔ naakpɛɛ lɛ̀ amɛ, ni ekɛ amɛ tee shikpɔŋ kpakpa ni ji amɛ diɛŋtsɛ amɛshikpɔŋ nɔ.
23. (a) Lalatsɛ lɛ wiemɔi lɛ maa nɔ mi ehaa wɔ akɛ Yehowa susuɔ wɔhe waa akɛ aŋkroaŋkroi yɛ mɛɛ gbɛ nɔ? (b) Yehowa yeɔ ebuaa wɔ yɛ mɛɛ gbɛ̀i anɔ?
23 Yehowa ejieee musuŋtsɔlɛ kpo etsɔɔɔ ewebii lɛ akɛ kuu kɛkɛ. Wɔ-Nyɔŋmɔ ni yɔɔ suɔmɔ lɛ susuɔ wɔhe waa akɛ aŋkroaŋkroi. Ele amanehulu shihilɛ ní ekolɛ wɔyɔɔ mli lɛ jogbaŋŋ diɛŋtsɛ. Lalatsɛ lɛ kɛɛ akɛ: “Yehowa hiŋmɛi kã jalɔi ahe, ni efeɔ toi ehaa amɛbolɔmɔi lɛ. Yehowa bɛŋkɛɔ mɛi ni tsuii ekumɔ lɛ, ni ehereɔ mɛi ni mumɔ tswiaa shi kɛ dɔlɛ lɛ.” (Lala 34:16, 19) Mɛɛ gbɛ nɔ Yehowa tsɔɔ eyeɔ ebuaa wɔ akɛ aŋkroaŋkroi? Jeee doo akɛ ejieɔ nɔ ni haa wɔnaa amanehulu kɛjɛɔ jɛmɛ. Shi eto gbɛjianɔ babaoo diɛŋtsɛ kɛha mɛi ní bolɔɔ amɛtsɛɔ lɛ kɛha yelikɛbuamɔ lɛ. E-Wiemɔ lɛ kɛ ŋaawoo ní anyɛɔ akɛtsuɔ nii ní baanyɛ ekɛ srɔtofeemɔ diɛŋtsɛ aba haa wɔ. Ekɛ nɔkwɛlɔi ni he esa yɛ mumɔŋ, ní bɔɔ mɔdɛŋ akɛ amɛaajie musuŋtsɔlɛ ni ejieɔ lɛ kpo etsɔɔ mɛi krokomɛi ni eyeɔ ebuaa amɛ lɛ kpo lɛ eha yɛ asafo lɛ mli. (Yakobo 5:14, 15) Akɛni Yehowa ji ‘Sɔlemɔ Toibolɔ’ hewɔ lɛ, ekɛ ‘mumɔ krɔŋkrɔŋ lɛ haa mɛi ní biɔ lɛ lɛ.’ (Lala 65:3; Luka 11:13) Nɛkɛ gbɛjianɔtoi nɛɛ fɛɛ ji “wɔ-Nyɔŋmɔ lɛ mɔbɔnalɛ ní haa emusuŋ tsɔɔ lɛ lɛ” kpojiemɔi.—Luka 1:78.
24. Mɛɛ gbɛ nɔ obaatsɔ ni ohere Yehowa suɔmɔ lɛ nɔ?
24 Ani ebɛ miishɛɛ akɛ wɔɔsusu wɔŋwɛi Tsɛ lɛ suɔmɔ lɛ he? Yɛ nikasemɔ ni tsɔ hiɛ lɛ mli lɛ, akai wɔ akɛ Yehowa ejie ehewalɛ, ejalɛsaneyeli, kɛ enilee lɛ kpo yɛ suɔmɔ gbɛ nɔ koni wɔná he sɛɛ. Ni yɛ nikasemɔ nɛɛ mli lɛ, wɔna akɛ Yehowa ejie suɔmɔ ni eyɔɔ kɛha adesa—kɛ wɔ aŋkroaŋkroi hu—lɛ kpo tɛ̃ɛ yɛ gbɛ ni yɔɔ naakpɛɛ nɔ. Agbɛnɛ, esa akɛ wɔteŋ mɔ fɛɛ mɔ abi ehe akɛ, ‘Te mafee tɛŋŋ mahere Yehowa suɔmɔ lɛ nɔ?’ Eba akɛ ooofee he nɔ ko kɛtsɔ suɔmɔ ní ooosumɔ lɛ kɛ otsui fɛɛ, osusuma fɛɛ, ojwɛŋmɔ fɛɛ kɛ ohewalɛ fɛɛ lɛ nɔ. (Marko 12:29, 30) Eba akɛ bɔ ni ohiɔ shi ohaa gbi fɛɛ gbi lɛ baajie otsuiŋ shwelɛ akɛ obaatsi obɛŋkɛ Yehowa he kpaakpa lɛ kpo. Ni eba akɛ Yehowa, ni ji suɔmɔ Nyɔŋmɔ lɛ, baatsi ebɛŋkɛ bo gbagbalii—kɛya naanɔi anaanɔ!—Yakobo 4:8.
[Shishigbɛ niŋmaa]
^ kk. 16 Woloŋlelɔ ko wie akɛ su ni ji muneele lɛ “ji su ní kwaaa, aloo su ní kaa. Bɔ́ loo nugbɔnɛmɔ, loo niiahefɔmɔ, loo ekɛ nitsumɔ yɛ be kpalaŋŋ mli, nyɛɛɛ eha ekwá.”
Ani Okaiɔ?
• Te wɔfeɔ tɛŋŋ wɔleɔ akɛ suɔmɔ ji Yehowa su ni nɔ kwɔ fe fɛɛ?
• Mɛni hewɔ abaanyɛ akɛɛ akɛ Yehowa Bi lɛ ni etsu kɛba koni ebana amanehulu ni egbo kɛha wɔ lɛ ji suɔmɔ nifeemɔ kpele fe fɛɛ ni afee dã lɛ?
• Mɛɛ gbɛ nɔ Yehowa maa nɔ mi ehaa wɔ yɛ akɛ esumɔɔ wɔ ákɛ aŋkroaŋkroi?
• Biblia lɛ wieɔ Yehowa eshaifaa lɛ he yɛ gbɛ̀i ni mli kã shi faŋŋ nɔ yɛ mɛɛ gbɛ nɔ?
[Nikasemɔ lɛ he Sanebimɔi]
[Mfoniri ni yɔɔ baafa 15]
‘Nyɔŋmɔ ŋɔ e-Bi koome lɛ eha’
[Mfoniri ni yɔɔ baafa 16, 17]
“Nyɛjara wa aahu fe afilimatai babaoo”
[He ni Sane lɛ Jɛ]
© J. Heidecker/VIREO
[Mfoniri ni yɔɔ baafa 18]
Henumɔ ní yoofɔyoo yɔɔ kɛha ebi abifao lɛ baanyɛ atsɔɔ wɔ nii yɛ Yehowa musuŋtsɔlɛ lɛ he