Sanebimɔi ni Jɛ Kanelɔi Adɛŋ

Mɛni hewɔ atsɛɔ Satan akɛ “mɔ ni yɔɔ nyɛmɔ ni ekɛaagbe mɔ” yɛ Hebribii 2:14 (NW) lɛ?

Yɛ kukufoo mli lɛ, Paulo miitsɔɔ akɛ Satan diɛŋtsɛ baanyɛ ekɛ gbele diɛŋtsɛ aba gbɔmɛi anɔ loo kɛtsɔ enajiaŋdamɔlɔi anɔ. Yɛ enɛ kɛ gbeekpamɔ naa lɛ, Yesu tsɛ Satan akɛ “gbɔmɔgbelɔ ji lɛ kɛjɛ teteete.”—Yohane 8:44.

Yiŋkɔshikɔshifeemɔ baanyɛ ate shi yɛ Hebribii 2:14 lɛ he yɛ bɔ ni shishitsɔɔmɔi komɛi tsɔɔ shishi lɛ hewɔ, ejaakɛ amɛtsɔɔ shishi akɛ Satan yɛ “gbele hewalɛ” loo “gbele nɔ hewalɛ.” (King James Version; Revised Standard; New International Version; Jerusalem Bible) Nakai shishitsɔɔmɔi lɛ baanyɛ aha efee tamɔ nɔ ni Satan yɛ hewalɛ ni husu bɛ he ni ekɛaagbe mɔ fɛɛ mɔ ni esumɔɔ. Shi kɛlɛ, ekã shi faŋŋ akɛ jeee nɛkɛ ji bɔ ni sane lɛ ji. Nakai eji kulɛ, ekã shi faŋŋ akɛ ebaakpata Yehowa jálɔi ahiɛ kɛje shikpɔŋ lɛ nɔ afii babaoo ni eho nɛ.—1 Mose 3:15.

Hela wiemɔ ni atsɔɔ shishi akɛ “gbele nɔ hewalɛ” yɛ shishitsɔɔmɔi komɛi amli kɛ “nyɛmɔ ni akɛaagbe mɔ” yɛ New World Translation lɛ mli lɛ ji “kraʹtos tou tha·naʹtou.” Tou tha·naʹtou ji wiemɔ ni shishi ji “gbele.” Kraʹtos shishi diɛŋtsɛ ji “hewalɛ, nyɛmɔ, ekãa.” Taakɛ Theological Dictionary of the New Testament lɛ tsɔɔ lɛ, etsɔɔ “hewalɛ loo nyɛmɔ ni yɔɔ fe ekɛ nitsumɔ.” No hewɔ lɛ, yɛ Hebribii 2:14 lɛ mli lɛ, Paulo etsɔɔɔ akɛ Satan yɛ hewalɛ kwraa yɛ gbele nɔ. Shi moŋ, eetsɔɔ akɛ Satan yɛ nyɛmɔ loo ebaanyɛ ekɛ gbele aba mɔ nɔ.

Mɛɛ gbɛ nɔ Satan kɛ “nyɛmɔ ni ekɛaagbe mɔ” lɛ tsuɔ nii yɛ? Yɛ Hiob wolo lɛ mli lɛ, wɔkaneɔ shihilɛ kome ni baanyɛ afee nɔ ni efɔɔɔ kaa yɛ gbɛ ko nɔ. Nɔ ni aŋma afɔ shi lɛ kɛɔ akɛ Satan kɛ ahum tsu nii ni ‘ekɛgbe’ Hiob bii lɛ. Shi, kadimɔ akɛ Satan baanyɛ enɛ afee yɛ Nyɔŋmɔ gbɛŋmɛɛ naa pɛ, nɔ ni aŋmɛ gbɛ akɛni aatao sane ko ni he hiaa waa naa lɛ hewɔ. (Hiob 1:12, 18, 19) Eji anɔkwale akɛ, Satan nyɛɛɛ agbe Hiob diɛŋtsɛ. Aŋmɛɛɛ no feemɔ gbɛ. (Hiob 2:6) Enɛ tsɔɔ akɛ eyɛ mli akɛ yɛ bei komɛi amli lɛ, Satan kɛ gbele baa adesai anɔkwafoi anɔ moŋ, shi ehe ehiaaa ni wɔshe gbeyei akɛ ebaanyɛ ekpata wɔhiɛ be fɛɛ be ni esumɔɔ.

Satan etsɔ adesai najiaŋdamɔlɔi anɔ hu ekɛ gbele eba mɛi anɔ. No hewɔ lɛ, Kristofoi babaoo egboi yɛ amɛhemɔkɛyeli lɛ hewɔ, ni mɛi komɛi lɛ basabasafeelɔi ni mli ewo la kpata amɛhiɛ loo nɔyeli hegbɛi loo kojolɔi fɔji lɛ fã ni akpata amɛhiɛ yɛ gbɛ ni ejaaa nɔ.—Kpojiemɔ 2:13.

Kɛfata he lɛ, bei komɛi lɛ Satan kɛ adesai agbɔjɔmɔi tsuɔ nii ni ekɛgbeɔ amɛ. Yɛ Israel gbii lɛ amli lɛ, gbalɔ Bileam wo Moabbii ŋaa koni amɛlaka Israelbii lɛ ‘ni amɛtɔ̃ Yehowa nɔ.’ (4 Mose 31:16) Enɛ ha agbe Israelbii ni fa fe 23,000. (4 Mose 25:9; 1 Korintobii 10:8) Nakai nɔŋŋ ŋmɛnɛ, mɛi komɛi yagbeeɔ Satan “ŋaatsɔɔi” lɛ amli ni alakaa amɛ awoɔ jeŋba shara loo nibii fɔji ni afeɔ lɛ amli. (Efesobii 6:11) Eji anɔkwale akɛ, bei pii lɛ, nakai gbɔmɛi lɛ ahiɛ kpataaa amrɔ nɔŋŋ. Shi hegbɛ ni amɛnáa ni amɛnine kɛbaashɛ naanɔ wala nɔ lɛ jeɔ amɛdɛŋ, ni kɛtsɔ nakai gbɛ nɔ lɛ, Satan haa amɛgboiɔ.

Eyɛ mli akɛ wɔyɔseɔ akɛ Satan baanyɛ aye wɔ awui moŋ, shi esaaa akɛ wɔsheɔ lɛ gbeyei fe nine. Beni Paulo kɛɛ akɛ Satan yɛ nyɛmɔ ni ekɛaagbe mɔ lɛ, ekɛɛ hu akɛ Kristo gbo bɔni afee ni “ekpata . . . [Satan] hiɛ, ni ekpɔ̃ mɛi ni gbele gbeyeishemɔ hewɔ lɛ amɛtsɔmɔ nyɔji yɛ amɛwala be fɛɛ mli lɛ.” (Hebribii 2:14, 15) Hɛɛ, Yesu wo kpɔmɔnɔ lɛ he jara lɛ, ni no hewɔ lɛ eha adesai ni heɔ yeɔ lɛ ye amɛhe kɛjɛ esha kɛ gbele nyɔŋyeli mli.—2 Timoteo 1:10.

Eji anɔkwale akɛ, eji hiɛdɔɔ sane akɛ wɔɔsusu akɛ Satan yɛ nyɛmɔ ni ekɛaagbe mɔ moŋ, shi wɔyɛ nɔmimaa akɛ Yehowa baanyɛ asaa awui fɛɛ ni Satan kɛ enajiaŋdamɔlɔi lɛ eye lɛ. Yehowa maa nɔ mi ehaa wɔ akɛ Yesu ni atee lɛ shi lɛ ‘baafite Abonsam nitsumɔi lɛ.’ (1 Yohane 3:8) Yesu baatsɔ Yehowa hewalɛ nɔ etee gbohii ashi, ni no baafo gbele diɛŋtsɛ sɛɛ kwraa. (Yohane 5:28, 29) Naagbee lɛ, Yesu baakpa he ni Satan hewalɛ lɛ yashɛɔ lɛ he mama kɛtsɔ bu kwɔŋkwɔŋ lɛ mli ni ekɛ lɛ aaawo lɛ nɔ. Naagbee kwraa lɛ, akɛ Satan baawo naanɔ hiɛkpatamɔ mli.—Kpojiemɔ 20:1-10.