Suɔmɔ He Miihia Waa

EKƆƆƆ he eko afii abɔ ni aye, maŋ kusum, wiemɔ ni awieɔ, loo hewolonɔ su lɛ, suɔmɔ babaoo he miihia adesai fɛɛ. Kɛ́ atsuuu nakai hiamɔ nii ni naa wa lɛ he nii lɛ, amɛnáaa miishɛɛ. Tsofafeelɔ niiamlipɛilɔ ko ŋma akɛ: “Suɔmɔ kɛ naanyobɔɔ ni mli wa ji nibii titrii ni haa hela mɔɔ wɔ kɛ nɔ ni haa wɔhe waa wɔ, nɔ ni haa wɔyeɔ awerɛho kɛ nɔ ni kɛ miishɛɛ baa, nɔ ni haa wɔpiŋɔ kɛ nɔ ni haa wɔnáa tsamɔ. Kɛji tsofa hee ko yɛ hewalɛ ni tamɔ nɛkɛ nɔŋŋ lɛ, datrɛfoi fɛɛ ni yɔɔ maŋ nɛɛ mli lɛ baajie yi kɛha helatsɛmɛi ni amɛkwɛɔ lɛ. Ebaafee nɔ fɔŋ feemɔ kɛji akɛhaŋ helatsɛmɛi ni amɛkɔlɔ.”

Ni kɛlɛ, ŋmɛnɛŋmɛnɛ beaŋ shihilɛ, titri lɛ edafitswaa nibii kɛ mɛi ni ehe gbɛi ni mɛi krokomɛi kaseɔ amɛ nɔkwɛmɔnɔ lɛ, fɔɔ ninámɔ, hewalɛnamɔ, gbɛihemɔ, kɛ bɔlɛnamɔ he wiemɔ waa diɛŋtsɛ moŋ fe bɔ ni amɛwieɔ hedɔɔ kɛ naanyobɔɔi ni miishɛɛ yɔɔ mli ni adesai taoɔ lɛ he sane amɛhaa. Nitsɔɔlɔi babaoo maa jeŋ otii kɛ heloonaa nitsumɔi ni akɛaama hiɛ lɛ nɔ mi, ni amɛhaa aleɔ akɛ omanye ni aaaye lɛ damɔ enɛɛmɛi pɛ anɔ. Eji anɔkwale akɛ wolokasemɔ kɛ nyɛmɔi ni mɔ yɔɔ ni eeeya hiɛ yɛ mli lɛ he hiaa moŋ, shi ani esa akɛ atiu nomɛi asɛɛ waa bɔ ni nakai feemɔ haŋ mɔ aná be kɛha weku kɛ nanemɛi po? Blema woloŋlelɔ ko ni eji woloŋmalɔ ni kɛ nilee kpaa adesai ashihilɛ shi ekwɛɔ lɛ kɛ mɔ aŋkro ko ni yɔɔ nyɛmɔ babaoo ni ebɛ suɔmɔ lɛ to “ayawa ni jijeɔ loo ŋmɛlɛ ni gbɛɛɔ” lɛ he. (1 Korintobii 13:1) Ekolɛ mɛi ni tamɔ nɛkɛ baatsɔmɔ niiatsɛmɛi, amɛbaahe gbɛi po, shi amɛfeŋ mɛi ni yɔɔ miishɛɛ ko kwraa.

Yesu Kristo, mɔ ni nuɔ adesai ashishi jogbaŋŋ ní eyɔɔ suɔmɔ krɛdɛɛ ko kɛha amɛ lɛ, kɛ suɔmɔ ni aaaná aha Nyɔŋmɔ kɛ naanyo lɛ fee oti titri ni ewie he yɛ enitsɔɔmɔ lɛ mli. Ekɛɛ akɛ: “Suɔmɔ [Yehowa, NW] o-Nyɔŋmɔ lɛ, kɛ otsui muu lɛ fɛɛ kɛ osusuma muu lɛ fɛɛ kɛ ojwɛŋmɔ muu lɛ fɛɛ. . . . Suɔmɔ onaanyo tamɔ bɔ ni osumɔɔ bo diɛŋtsɛ ohe.” (Mateo 22:37-39) Mɛi pɛ ni kɛ wiemɔi nɛɛ tsuɔ nii lɛ baatsɔmɔ Yesu sɛɛnyiɛlɔ diɛŋtsɛ. No hewɔ lɛ, ekɛɛ akɛ: “Kɛji nyɛsumɔɔ nyɛhe lɛ, no mɛi fɛɛ kɛaale akɛ mikaselɔi ji nyɛ.”—Yohane 13:35.

Shi kɛlɛ, te aaafee tɛŋŋ ni mɔ ko aaaná suɔmɔ yɛ ŋmɛnɛŋmɛnɛ jeŋ nɛɛ mli lɛ? Ni te fɔlɔi aaafee tɛŋŋ amɛtsɔɔ amɛbii ni amɛjie suɔmɔ kpo? Sane ni nyiɛ sɛɛ lɛ baaha sanebimɔi nɛɛ ahetoo.

[Mfoniri ni yɔɔ baafa 3]

Eji kaa akɛ aaaná suɔmɔ yɛ jeŋ ko ni hiɛjoomɔ ji nɔ ni yeɔ nɔ lɛ mli