Vidio ko ni Ato He Gbɛjianɔ Koni Esa Oblahii kɛ Oblayei Atsui He
Vidio ko ni Ato He Gbɛjianɔ Koni Esa Oblahii kɛ Oblayei Atsui He
BENI oblahii kɛ oblayei lɛ ateŋ mɛi babaoo kwɛ vidio ni ji Young People Ask—How Can I Make Real Friends? * lɛ, ewo amɛ hewalɛ ni amɛkɛ hiɛdɔɔ asusu amɛjeŋba he. Nibii ni yɔɔ vidio lɛ mli ji ŋmalɛ mli ŋaawoo kpakpa, Kristofoi oblahii kɛ oblayei adaaŋ wiemɔi, kɛ ŋmɛnɛŋmɛnɛ beaŋ drama ko ni kanyaa mɔ ni damɔ Biblia mli sane ni kɔɔ Dina he lɛ nɔ. (1 Mose, yitso 34) Wiemɔi ni nyiɛ sɛɛ nɛɛ ni kɔɔ vidio lɛ he lɛ jɛ Mexico.
Martha tsɔɔ mli akɛ: “Vidio lɛ sa mitsui he waa diɛŋtsɛ. Etamɔ nɔ ni mi tuuntu ji mɔ ni afee aha. Misusu akɛ le ni mitsɔɔlɔi kɛ miskulbii lɛ le akɛ miji Yehowa Odasefoi lɛ ateŋ mɔ kome lɛ pɛ kɛkɛ fa. Minyɛɛɛ mamã nɔ mi maha amɛ kɛtsɔ odase ni maye amɛ lɛ nɔ. Mihiɛ sɔɔ nitsɔɔmɔi fɛɛ ni Yehowa kɛhaa lɛ, titri lɛ kɛji esa wɔtsui he waa tamɔ vidio nɛɛ ji lɛ.”
Juan Carlos kɛɛ akɛ: “Vidio nɛɛ haa mɔ susuɔ nii ahe waa diɛŋtsɛ. Ákɛ oblanyo lɛ, mitɔ̃ tɔmɔi komɛi ni manyɛ mikɛto mɛi ni yɔɔ drama lɛ mli lɛ ateŋ mɛi komɛi ahe. Yɛ afii komɛi ni eho lɛ mli lɛ, mihiɛ jeŋbai enyɔ, shi miyɔse akɛ, nibii fɔji baanyɛ ajɛ shihilɛ ni tamɔ nakai lɛ mli aba. Beni mikwɛ vidio lɛ migbe naa lɛ, mitswa mifai shi akɛ maye Yehowa anɔkwa.”
Sulem jaje akɛ: “Beni mikwɛ vidio lɛ, ekanya mihenumɔi waa. Yɛ be ni tsɔ hiɛ lɛ mli lɛ, no mli lɛ mikpa Biblia lɛ kanemɔ, ni mifɔɔɔ sɔlemɔ kɛ Yehowa hamɔ. Beni mibo wiemɔi ni oblahii kɛ oblayei ni yɔɔ vidio lɛ mli lɛ wie lɛ atoi lɛ, ekanya mi koni mabɔi Biblia lɛ kasemɔ ekoŋŋ ní masɔle maha Yehowa.”
Oblahii kɛ oblayei kɛ kaai babaoo kpeɔ ŋmɛnɛ, ni bei pii lɛ nanemɛi ni amɛhalaa lɛ baanyɛ aná bɔ ni amɛhiɔ shi amɛhaa lɛ nɔ hewalɛ waa diɛŋtsɛ. (Lala 26:4; Abɛi 13:20) Vidio ni ji Young People Ask—How Can I Make Real Friends? lɛ miiye kɛmiibua mɛi babaoo koni amɛfee yiŋkpɛi ni ja yɛ enɛ gbɛfaŋ.
[Shishigbɛ niŋmaa]
^ kk. 2 Yehowa Odasefoi ji mɛi ni fee.