Miishɛjemɔ Kɛha Mɛi ni Bolɔɔ Tsɛɔ Yelikɛbuamɔ Lɛ

BIBLIA lɛ jeee jwɛŋmɔŋ hewalɛnamɔ he gbɛtsɔɔmɔ wolo. Shi kɛlɛ, eshɛjeɔ wɔmii ni eyeɔ ebuaa wɔ ni wɔnáa shihilɛ mli miishɛɛ yɛ naagbai ni wɔkɛkpeɔ lɛ fɛɛ sɛɛ. Yɛ anɔkwale mli lɛ, Ŋmalɛi lɛ kɛɔ akɛ: “Gbɔmɔ ni yoo fɔ́ lɛ yɔɔ nɛɛ, kukuoo kɛkɛ ji egbii lɛ, ni emli eyi tɔ́ kɛ haomɔ sɔŋŋ.” (Hiob 14:1) Kaai komɛi ni baa wɔnɔ lɛ jɛ emuu ni wɔyeee lɛ hewɔ. Shi namɔ ji mɔ titri ni kɛ amanehulu baa adesai anɔ?

Biblia lɛ tsɔɔ nakai mɔ lɛ akɛ mumɔ fɔŋ ni atsɛɔ lɛ Satan kɛ Abonsam lɛ. ‘Eshishiuɔ jeŋ muu lɛ fɛɛ,’ ni lɛ ekɛ naagbai ni haoɔ adesai aweku lɛ ateŋ babaoo baa. Ni kɛlɛ, Biblia lɛ hu kɛɔ wɔ akɛ be fioo kɛkɛ eyɔɔ. (Kpojiemɔ 12:9, 12) Etsɛŋ ni haomɔi fɛɛ ni Satan kɛba adesai ni yɔɔ shikpɔŋ lɛ nɔ lɛ sɛɛ baafo kɛtsɔ Nyɔŋmɔ he ni ekɛbaawo mli lɛ nɔ. Taakɛ Biblia lɛ tsɔɔ lɛ, Nyɔŋmɔ jalɛ jeŋ hee ni ewo shi yɛ he lɛ baafo nijiaŋwujee sɛɛ.—2 Petro 3:13.

Mɛɛ miishɛjemɔ eji nɛkɛ akɛ aaale akɛ adesai anɔnaa lɛ ehiŋ shi daa! Jalɛ sane ni ayeee kɛ amanehulu sɛɛ baafo yɛ Nyɔŋmɔ ŋwɛi Maŋtsɛyeli ni enɔyelɔ ji Yesu Kristo lɛ nɔyeli shishi. Yɛ nɔ ni kɔɔ Nyɔŋmɔ Maŋtsɛ ni ehala lɛ lɛ gbɛfaŋ lɛ, Ŋmalɛi lɛ kɛɔ akɛ: “Eeejie ohiafoi ni bolɔɔ lɛ, kɛ nɔnalɔ ni bɛ bualɔ lɛ. Eeena ohiafo kɛ mɔ ni efĩ lɛ lɛ mɔbɔ, ni ehere mɛi ni efĩ amɛ lɛ asusumai ayiwala. Eeekpɔ̃ amɛsusuma kɛaajɛ fĩfĩamɔ kɛ yiwalɛ mli, ni amɛlá jara aaawa yɛ ehiɛ.”—Lala 72:12-14.

Be ni nɛkɛ gbalɛ wiemɔi nɛɛ baaná amɛmli baa lɛ ebɛŋkɛ kpaakpa. Wɔbaanyɛ wɔhi shi kɛya naanɔ yɛ paradeiso shikpɔŋ nɔ yɛ shihilɛi ni hi jogbaŋŋ mli. (Luka 23:43; Yohane 17:3) Nilee ni kɔɔ Ŋmalɛ mli shiwoi ni shɛjeɔ mɔ mii nɛɛ he lɛ kɛ hiɛnɔkamɔ kɛ miishɛjemɔ bahaa mɛi ni bolɔɔ amɛtsɛɔ yelikɛbuamɔ lɛ.

[He ni Mfoniri ni yɔɔ baafa 32 lɛ Jɛ]

Gbekɛyoo ni ehao: Photo ILO/J. Maillard