Anɔkwale Nyɔŋmɔ lɛ Kasemɔ
Anɔkwale Nyɔŋmɔ lɛ Kasemɔ
“Nyɛfea Nyɔŋmɔ kaselɔi, tamɔ bii ni asumɔɔ.”—EFESOBII 5:1.
1. Mɛni mɛi komɛi heɔ yeɔ yɛ anɔkwale he, ni mɛni hewɔ tɔmɔ yɔɔ amɛsusumɔ lɛ he lɛ?
“MƐNI ji anɔkwale?” (Yohane 18:38) Nakai sane ni bulɛ bɛ mli ni Pontio Pilato bi nɔ ni miihe ashɛ afii 2,000 nɛ lɛ tsɔɔ akɛ, anɔkwale jeee nɔ ko ni anaa naa tsɔ̃ bɔ ni no aaaha adi sɛɛ. Mɛi pii baakpɛlɛ nɔ ŋmɛnɛ. Aatutua nɔ ni anɔkwale diɛŋtsɛ ji lɛ. Ekolɛ onu ni áwie akɛ mɔ fɛɛ mɔ kpɛɔ eyiŋ yɛ nɔ ni anɔkwale ji he, aloo ákɛ nɔ ni anɔkwale ji lɛ baadamɔ bɔ ni shihilɛ lɛ ji lɛ naa, aloo anɔkwale miitsake be fɛɛ be. Tɔmɔ yɛ susumɔ ni tamɔ nɛkɛ he. Oti diɛŋtsɛ ni ma nibii amlipɛimɔ kɛ nikasemɔ hiɛ ji ni ale anɔkwalei lɛ, anɔkwale ni kɔɔ jeŋ ni wɔyɔɔ mli lɛ he. Anɔkwale jeee sane ni kɔɔ mɔ ko diɛŋtsɛ susumɔ he. Ákɛ nɔkwɛmɔnɔ lɛ, ákɛ adesa susuma lɛ gboɔ loo egbooo. Ákɛ Satan yɛ loo ebɛ. Ákɛ yiŋtoo yɛ shihilɛ sɛɛ loo yiŋtoo ko bɛ sɛɛ. Anɔkwale kome pɛ baanyɛ ahi saji nɛɛ eko fɛɛ eko mli. Ekome lɛ anɔkwaleŋ, ekroko lɛ amaleŋ; enyɔ lɛ fɛɛ nyɛŋ afee anɔkwale.
2. Yehowa ji anɔkwale Nyɔŋmɔ lɛ yɛ mɛɛ gbɛ̀i anɔ, ni mɛɛ sanebimɔi abaasusu he agbɛnɛ?
2 Wɔsusu akɛ Yehowa ji anɔkwale Nyɔŋmɔ lɛ yɛ nikasemɔ ni tsɔ hiɛ lɛ mli. Ele anɔkwale ni yɔɔ nibii fɛɛ mli. Ákɛ mɔ ni tamɔɔɔ ehenyɛlɔ shishiulɔ Satan Abonsam kwraa lɛ, Yehowa yeɔ anɔkwa be fɛɛ be. Nɔ ni fata he lɛ, Yehowa jieɔ anɔkwale babaoo kpo etsɔɔ mɛi krokomɛi. Bɔfo Paulo wo nanemɛi Kristofoi ahewalɛ akɛ: “Nyɛfea Nyɔŋmɔ kaselɔi, tamɔ bii ni asumɔɔ.” (Efesobii 5:1) Ákɛ Yehowa Odasefoi lɛ, te wɔɔfee tɛŋŋ wɔkase lɛ yɛ anɔkwale lɛ wiemɔ kɛ shihilɛ mli? Mɛni hewɔ ehe hiaa ni afee nakai? Ni mɛɛ nɔmimaa wɔyɔɔ ni tsɔɔ akɛ Yehowa kpɛlɛɔ mɛi ni diɔ anɔkwale gbɛ lɛ sɛɛ lɛ anɔ? Nyɛhaa wɔkwɛa.
3, 4. Te bɔfoi ni ji Paulo kɛ Petro tsɔɔ nɔ ni baaba yɛ “naagbee gbii” lɛ amli lɛ mli amɛha tɛŋŋ?
3 Be ni jamɔ mli amale efa babaoo yɛ mli lɛ mli wɔyɔɔ lɛ. Taakɛ bɔfo Paulo gba fɔ̃ shi yɛ mumɔ lɛ tsirɛmɔ naa lɛ, mɛi pii yɛ nɛkɛ “naagbee gbii” nɛɛ amli ni hiɛ Nyɔŋmɔ jamɔ hetuu-kɛhamɔ su, shi amɛyeee hewalɛ ni yɔɔ mli lɛ anɔkwale. Mɛi komɛi teɔ shi woɔ anɔkwale lɛ, ni ‘amɛjwɛŋmɔ efite kwraa.’ Kɛfata he lɛ “gbɔmɛi fɔji kɛ shishiulɔi miiwo wu yɛ efɔŋ mli; amɛlakaa mɛi ni amɛ hu alakaa amɛ.” Eyɛ mli akɛ nɛkɛ gbɔmɛi nɛɛ miikase nii be fɛɛ be moŋ, shi amɛnine shɛɛɛ ‘anɔkwale lɛ he nilee ni ja’ lɛ nɔ.—2 Timoteo 3:1, 5, 7, 8, 13.
4 Akɛ mumɔ tsirɛ bɔfo Petro hu koni eŋma naagbee gbii lɛ ahe sane. Tamɔ bɔ ni egba lɛ, jeee akɛ gbɔmɛi kpooɔ anɔkwale lɛ kɛkɛ, shi amɛyeɔ Nyɔŋmɔ Wiemɔ lɛ kɛ mɛi ni shiɛɔ enɔkwale lɛ ahe fɛo hu. ‘Yɛ amɛ akɔnɔi anaa’ hewɔ lɛ, nɛkɛ hefɛoyelɔi nɛɛ kuɔ amɛhiɛ amɛshwieɔ anɔkwale ni eji akɛ, akɛ nu afua kpata Noa gbi lɛ mli je lɛ hiɛ, ni akɛto okadi aha wɔsɛɛ be mli kojomɔ lɛ nɔ. Amɛsusumɔ ni ejaaa lɛ kɛ oshara baaba amɛnɔ kɛ́ be ni Nyɔŋmɔ baakpata mɛi ni leee Nyɔŋmɔ lɛ ahiɛ lɛ ba lɛ.—2 Petro 3:3-7.
Yehowa Tsuji Le Anɔkwale Lɛ
5. Taakɛ gbalɔ Daniel tsɔɔ lɛ, mɛni baaba yɛ “naagbee be” lɛ mli, ni gbalɛ nɛɛ eba mli yɛ mɛɛ gbɛ nɔ?
5 Beni gbalɔ Daniel tsɔɔ “naagbee be” lɛ mli lɛ, egba nɔ ko ni yɔɔ srɔto kwraa ni baa yɛ Nyɔŋmɔ webii ateŋ lɛ efɔ shi—jamɔ mli anɔkwale ni akɛbaaba ekoŋŋ. Eŋma akɛ: “Mɛi pii aaakane fitsofitso, ni nilee aaafá.” (Daniel 12:4) Shishiulɔ kpeteŋkpele lɛ futuko Yehowa webii ajwɛŋmɔ ni eshwilako amɛ. Akɛni amɛkwɛɔ Biblia lɛ baafai amli hewɔ lɛ, amɛbaná anɔkwale nilee. Yesu ha ekaselɔi lɛ nu saji ashishi yɛ klɛŋklɛŋ afii 100 lɛ mli. ‘Egbele amɛjwɛŋmɔi anaa kwraa koni amɛna Ŋmalɛi lɛ anaa.’ (Luka 24:45) Yehowa efee nakai nɔŋŋ yɛ wɔgbii nɛɛ amli. Étsɔ e-Wiemɔ, emumɔ lɛ, kɛ egbɛjianɔtoo lɛ nɔ éha gbɔmɛi akpekpei abɔ ni yɔɔ shikpɔŋ lɛ fɛɛ nɔ lɛ énu nɔ ni ele momo—ni ji, anɔkwale lɛ shishi.
6. Mɛɛ Biblia mli anɔkwalei Nyɔŋmɔ webii nuɔ shishi ŋmɛnɛ?
6 Ákɛ Nyɔŋmɔ webii lɛ, wɔnuɔ nibii pii ni kulɛ wɔleŋ kɔkɔɔkɔ lɛ shishi. Wɔle sanebimɔi ni jeŋ nilelɔi kɛ afii akpei abɔ ebɔ mɔdɛŋ akɛ amɛaale lɛ ahetooi. Ákɛ nɔkwɛmɔnɔ lɛ, wɔle nɔ hewɔ ni amanehulu yɔɔ, nɔ hewɔ ni gbɔmɛi gboiɔ, kɛ nɔ hewɔ ni gbɔmɛi nyɛŋ ni amɛkɛ jeŋ toiŋjɔlɛ kɛ ekomefeemɔ aba lɛ. Akɛ nɔ ni yɔɔ wɔsɛɛ be lɛ he ninaa hu—Nyɔŋmɔ Maŋtsɛyeli lɛ, paradeiso shikpɔŋ, kɛ naanɔ wala yɛ emuuyeli mli—ejɔɔ wɔ. Wɔbale Yehowa, Mɔ ni Ji Ofe lɛ. Wɔkase esu kɛ baŋ ni gbalaa mɔ lɛ kɛ nɔ ni esa akɛ wɔfee koni wɔná ejɔɔmɔ lɛ mli ŋɔɔmɔ. Anɔkwale lɛ ni wɔle lɛ haa wɔnyɛɔ wɔyɔseɔ nɔ ni jeee anɔkwale. Anɔkwale lɛ kɛ nitsumɔ buɔ wɔhe kɛjɛɔ nibii asɛɛdii yakatswaa lɛ ahe, ehaa wɔnine shɛɔ nɔ ni hi fe fɛɛ yɛ shihilɛ mli lɛ nɔ, ni ehaa wɔnáa wɔsɛɛ be he hiɛnɔkamɔ ni nɔ bɛ.
7. Namɛi pɛ anine shɛɔ Biblia mli anɔkwalei anɔ, ni namɛi anine shɛɛɛ nɔ?
7 Ani onuɔ Biblia mli anɔkwale lɛ shishi? Kɛji nakai ni lɛ, belɛ ajɔɔ bo babaoo. Kɛji akɛ woloŋmalɔ ko ŋma wolo ko lɛ, mɔ lɛ toɔ he gbɛjianɔ koni eŋɔɔ gbɔmɛi akuu pɔtɛɛ ko naa. Aŋmaa woji komɛi ahaa mɛi ni le woloŋ jogbaŋŋ, ekrokomɛi hu kɛha gbekɛbii, kɛ ekrokomɛi hu kɛha mɛi ni tsuɔ nitsumɔi pɔtɛɛi komɛi. Yɛ be mli ni mɔ fɛɛ mɔ nine shɛɔ Biblia lɛ nɔ yɛ gbɛ ni waaa nɔ lɛ, afee koni gbɔmɛi akuu pɔtɛɛ ko anu shishi ni amɛhiɛ asɔ. Yehowa to he gbɛjianɔ kɛha humii, shikpɔŋ lɛ nɔ heshibalɔi lɛ. Gbɔmɛi ni tamɔ nɛkɛ baanu Biblia lɛ shishi, ni amɛwoloŋlee, hiŋmɛigbelemɔ, shihilɛ, loo weku kɔɔɔ he eko. (1 Timoteo 2:3, 4) Yɛ gbɛ kroko nɔ lɛ, akɛ Biblia mli anɔkwale lɛ he shishinumɔ haaa mɛi ni bɛ he tsui lɛ, yɛ bɔ ni amɛle nii ha loo amɛtsɔsemɔ ji lɛ fɛɛ sɛɛ. Mɛi ni ji hetsɔɔlɔi, henɔwolɔi, nyɛŋ anu Nyɔŋmɔ Wiemɔ lɛ mli anɔkwalei ni jara wawai lɛ ashishi. (Mateo 13:11-15; Luka 10:21; Bɔfoi lɛ Asaji 13:48) Nyɔŋmɔ pɛ baanyɛ afee wolo ni tamɔ nɛkɛ.
Yehowa Tsuji Wieɔ Anɔkwale
8. Mɛni hewɔ Yesu ji anɔkwale lɛ diɛŋtsɛ lɛ?
8 Taakɛ Yehowa ji lɛ, e-Dasefoi anɔkwafoi lɛ wieɔ anɔkwale. Yesu Kristo, Odasefonyo ni fe fɛɛ kɛha Yehowa lɛ ma anɔkwale lɛ nɔ aduatsɔ kɛtsɔ nibii ni etsɔɔ kɛ gbɛ ni etsɔ nɔ ehi shi ni egbo lɛ nɔ. Efi Yehowa wiemɔ lɛ kɛ eshiwoi lɛ amli anɔkwale lɛ sɛɛ. No hewɔ lɛ, Yesu diɛŋtsɛ ji anɔkwale lɛ, taakɛ lɛ diɛŋtsɛ ejaje lɛ.—Yohane 14:6; Kpojiemɔ 3:14; 19:10.
9. Mɛni Ŋmalɛi lɛ wieɔ yɛ anɔkwale ni aaawie lɛ he?
9 Yesu ji mɔ ko ni “duromɔ kɛ anɔkwale eyi lɛ obɔ” ni “apasa ko bɛ edaaŋ.” (Yohane 1:14; Yesaia 53:9) Anɔkwa Kristofoi nyiɛɔ nɔkwɛmɔnɔ ni Yesu fee efɔ̃ shi yɛ mɛi krokomɛi ni eye amɛ anɔkwa lɛ sɛɛ. Paulo wo nanemɛi heyelilɔi ŋaa akɛ: “Nyɛteŋ mɔ fɛɛ mɔ kɛ enaanyo awie anɔkwale, ejaakɛ gbɔmɔtso kome he nii ji wɔ.” (Efesobii 4:25) Mra mli ni gbalɔ Zakaria ŋma akɛ: “Nyɛteŋ mɔ fɛɛ mɔ kɛ enaanyo awie anɔkwale.” (Zakaria 8:16) Kristofoi wieɔ anɔkwale ejaakɛ amɛmiisumɔ ni amɛsa Nyɔŋmɔ hiɛ. Yehowa wieɔ anɔkwale ni ele awui ni amale yeɔ. No hewɔ lɛ, ekpáa etsuji agbɛ yɛ gbɛ ni ja nɔ akɛ amɛbaawie anɔkwale.
10. Mɛni hewɔ gbɔmɛi maleɔ, ni mɛni nibii ni ehiii jɛɔ mli kɛbaa?
10 Kɛha mɛi pii lɛ, ni aaamale lɛ baanyɛ atamɔ gbɛ ni waaa ni atsɔɔ nɔ anáa hegbɛi pɔtɛɛi komɛi. Gbɔmɛi maleɔ koni amɛjo toigbalamɔ naa foi, koni amɛná nɔ ko he sɛɛ yɛ gbɛ ko nɔ, loo mɛi krokomɛi ajie amɛyi. Kɛlɛ, amale ni etsɔ mɔ ko subaŋ lɛ ji jeŋba mli tɔ̃mɔ. Nɔ ni fata he lɛ, amalelɔ lɛ náŋ Nyɔŋmɔ nɔkpɛlɛmɔ. (Kpojiemɔ 21:8, 27; 22:15) Kɛji akɛ ale wɔ akɛ wɔwieɔ anɔkwale lɛ, ehaa mɛi krokomɛi heɔ nɔ ni wɔwieɔ lɛ amɛyeɔ; amɛkɛ amɛhe fɔ̃ɔ wɔnɔ. Shi, kɛ akpá wɔhe mama akɛ wɔmiiwie amale kome pɛ po lɛ, mɛi krokomɛi ayiŋ baafee amɛ kɔshikɔshi yɛ anɔkwale ni nɔ fɛɛ nɔ ni wɔbaawie wɔsɛɛ lɛ ji lɛ he. Afrika abɛbua ko kɛɔ akɛ: “Amale kome fiteɔ anɔkwalei akpe.” Abɛbua kroko hu kɛɔ akɛ: “Aheŋ amalelɔ ayeŋ, kɛji akɛ ewie anɔkwale po.”
11. Yɛ mɛɛ gbɛ nɔ anɔkwayeli tsɔɔ babaoo fe anɔkwale ni awieɔ kɛkɛ lɛ?
11 Anɔkwayeli tsɔɔ babaoo fe anɔkwale ni awieɔ kɛkɛ. Eji shihilɛ gbɛ. Etsɔɔ nɔ gbɔmɛi ni wɔji. Wɔhaa mɛi leɔ anɔkwale lɛ, ni jeee kɛtsɔ nɔ ni wɔkɛɔ lɛ pɛ nɔ, shi kɛtsɔ nɔ ni wɔfeɔ lɛ hu nɔ. Bɔfo Paulo bi akɛ: “Bo ni otsɔɔ mɛi krokomɛi anii lɛ, otsɔɔɔ bo diɛŋtsɛ ohe; oshiɛɔ akɛ akaju, shi ojuɔ; okɛɔ akɛ akabɔ ajwamaŋ, shi obɔɔ ajwamaŋ?” (Romabii 2:21, 22) Kɛji akɛ wɔkɛ anɔkwale aaaha mɛi krokomɛi lɛ, belɛ esa akɛ wɔwie anɔkwale yɛ wɔgbɛ̀i fɛɛ mli. Gbɛi ni wɔɔná akɛ mɛi ni wieɔ anɔkwale kɛ anɔkwafoi lɛ baaná bɔ ni mɛi kpɛlɛɔ nɔ ni wɔtsɔɔ amɛ lɛ nɔ lɛ nɔ hewalɛ waa.
12, 13. Mɛni gbekɛ ko ŋma yɛ anɔkwayeli he, ni mɛni ji yiŋtoo hewɔ ni ehiɛɔ jeŋba he tɛi ni nɔ kwɔlɔ lɛ amli lɛ?
12 Gbekɛbii ni yɔɔ Yehowa tsuji ateŋ lɛ hu nuɔ bɔ ni ehe hiaa ni awie anɔkwale lɛ shishi. Yɛ skul kaa ko mli lɛ, Jenny, ni no mli lɛ eye afii 13 lɛ ŋma akɛ: “Anɔkwayeli ji nɔ ko ni mibuɔ akɛ ejara wa waa diɛŋtsɛ. Shi nɔ ni ehiii ji akɛ, jeee mɛi pii yeɔ anɔkwa kɛmɔɔ shi ŋmɛnɛ. Miwo mihe shi akɛ maye anɔkwa yɛ mishihilɛ mli be fɛɛ be. Maye anɔkwa hu kɛji akɛ anɔkwale ni mawie lɛ he baŋ sɛɛnamɔ kɛhaŋ mi loo minanemɛi amrɔ nɔŋŋ po. Mikwɛɔ jogbaŋŋ koni minanemɛi afee mɛi ni wieɔ anɔkwale ni amɛfee gbɔmɛi anɔkwafoi.”
13 Beni Jenny tsɔɔlɔ lɛ wieɔ skul kaa nɛɛ he lɛ, ekɛɛ akɛ: “Odako kwraa bɔ ni no aaaha oná jeŋba kɛ shihilɛ he mla kpakpa ni mli wa waa nɛkɛ. Mile akɛ okɛ ohe baakpɛtɛ omla lɛ he ejaakɛ oyɛ hewalɛ yɛ jeŋba kpakpa mli.” Mɛni kɛ jeŋba kpakpa ni skul gbekɛ yoo nɛɛ yɔɔ lɛ ba? Beni Jenny kɛ wiemɔ kpáa ekaa lɛ hiɛ lɛ, ekɛɛ akɛ ejamɔ “toɔ eshihilɛ mli jeŋba he tɛi lɛ kɛmamɔɔ shi.” Afii kpawo eho kɛjɛ be mli ni Jenny ŋma nakai kaa lɛ. Taakɛ etsɔɔlɔ lɛ wie lɛ, Jenny kã he ejieɔ jeŋba he tɛi ni nɔ kwɔlɔ kpo lolo yɛ eshihilɛ mli akɛ Yehowa Odasefoi lɛ ateŋ mɔ kome.
Yehowa Tsuji Jieɔ Anɔkwale lɛ Kpo
14. Mɛni hewɔ Nyɔŋmɔ tsuji titri yɔɔ gbɛnaa nii pɔtɛɛ ko ni da waa akɛ amɛfi nɔ ni ji anɔkwale sɛɛ lɛ?
14 Kɛlɛ, yɛ Yehowa Odasefoi asɛɛ lɛ, mɛi krokomɛi baanyɛ awie anɔkwale ni amɛbɔ mɔdɛŋ ni amɛfee anɔkwafoi. Shi kɛlɛ, ákɛ Nyɔŋmɔ tsuji lɛ, wɔyɛ gbɛnaa nii pɔtɛɛ ko ni da waa akɛ wɔfi nɔ ni ji anɔkwale sɛɛ. Akɛ Biblia mli anɔkwalei ewo wɔdɛŋ—anɔkwalei ni baanyɛ ekɛ mɔ aya naanɔ wala mli. No hewɔ lɛ, gbɛnaa nii kã wɔnɔ akɛ wɔgba mɛi krokomɛi nakai nilee lɛ he sane. Yesu kɛɛ akɛ: “Mɔ fɛɛ mɔ ni aŋɔ pii aha lɛ lɛ, pii aaatao yɛ edɛŋ.” (Luka 12:48) Eji anɔkwale akɛ ‘aatao pii’ kɛmiijɛ mɛi ni akɛ Nyɔŋmɔ he nilee ni jara wa lɛ ejɔɔ amɛ lɛ adɛŋ.
15. Mɛɛ miishɛɛ onáa yɛ Biblia mli anɔkwale lɛ ni okɛhaa mɛi krokomɛi lɛ mli?
15 Miishɛɛ yɛ Biblia mli anɔkwale ni akɛhaa mɛi krokomɛi lɛ mli. Taakɛ Yesu klɛŋklɛŋ afii 100 lɛ mli kaselɔi lɛ ji lɛ, wɔjajeɔ sanekpakpa lɛ—hiɛnɔkamɔ shɛɛ sane ni haa mɔ tsui nyaa lɛ—wɔhaa mɛi ni “etɔ amɛ ni amɛfee yuyaa tamɔ tooi ni bɛ kwɛlɔ lɛ” kɛ mɛi ni “daimonioi atsɔɔmɔi” eshwila amɛ ni amɛfutu amɛjwɛŋmɔ lɛ. (Mateo 9:36; 1 Timoteo 4:1) Bɔfo Yohane ŋma akɛ: “Mibɛ miishɛɛ ni fa fe enɛ akɛ manu akɛ mibii lɛ nyiɛɔ anɔkwale mli lɛ.” (3 Yohane 4) Yohane ‘bii’ lɛ—ekolɛ mɛi ni etsɔɔ amɛ anɔkwale lɛ—anɔkwayeli lɛ ha ená miishɛɛ babaoo. Wɔ hu wɔnáa miishɛɛ kɛji akɛ wɔna bɔ ni mɛi kɛ hiɛsɔɔ hereɔ Nyɔŋmɔ Wiemɔ lɛ nɔ lɛ.
16, 17. (a) Mɛni hewɔ mɔ fɛɛ mɔ ekpɛlɛɛɛ anɔkwale lɛ nɔ lɛ? (b) Mɛɛ miishɛɛ obaaná mli niiashikpamɔ yɛ be mli ni ojajeɔ Biblia mli anɔkwale lɛ?
16 Wɔkpɛlɛɔ nɔ akɛ jeee mɔ fɛɛ mɔ baakpɛlɛ anɔkwale lɛ nɔ. Yesu wie anɔkwale ni kɔɔ Nyɔŋmɔ he lɛ, yɛ be ni akpɛlɛɛɛ nɔ akɛ aaafee nakai lɛ po mli. Ekɛɛ Yudafoi ni teɔ shi woɔ lɛ lɛ akɛ: “Mɛni hewɔ ni nyɛheee mi nyɛyeee lɛ? Mɔ ni jɛ Nyɔŋmɔ mli lɛ, enuɔ Nyɔŋmɔ wiemɔi; no hewɔ ni nyɛ lɛ nyɛnuuu lɛ, ejaakɛ nyɛjɛɛɛ Nyɔŋmɔ mli.”—Yohane 8:46, 47.
17 Taakɛ Yesu ji lɛ, wɔgbalaaa wɔhe shi kɛjɛɛɛ Yehowa he anɔkwalei ni jara wa lɛ ni wɔɔgba mɛi krokomɛi lɛ he. Wɔkpaaa gbɛ akɛ mɔ fɛɛ mɔ baakpɛlɛ nɔ ni wɔkɛɔ amɛ lɛ nɔ, ejaakɛ jeee mɔ fɛɛ mɔ kpɛlɛ nɔ ni Yesu kɛɛ lɛ nɔ. Fɛɛ sɛɛ lɛ, wɔnáa miishɛɛ kɛjɛɔ le ni wɔleɔ akɛ wɔmiifee nɔ ni ja lɛ mli. Yehowa duromɔ hewɔ lɛ eesumɔ ni ajie anɔkwale lɛ kpo atsɔɔ adesai. Ákɛ mɛi ni hiɛ anɔkwale lɛ, Kristofoi batsɔmɔɔ mɛi ni hiɛ la yɛ jeŋ ni mli ewo duŋ lɛ mli. Yɛ be mli ni wɔhaa anɔkwale lɛ la lɛ kpɛ́ɔ kɛtsɔɔ wɔwiemɔi kɛ nifeemɔi amli lɛ, wɔbaanyɛ wɔye wɔbua mɛi krokomɛi ni amɛwo wɔŋwɛi Tsɛ lɛ hiɛ nyam. (Mateo 5:14, 16) Wɔhaa aleɔ yɛ faŋŋ mli akɛ wɔkpooɔ Satan kantafiti anɔkwale lɛ, ni wɔfiɔ Nyɔŋmɔ Wiemɔ ni yɔɔ krɔŋŋ ni afutuko mli lɛ sɛɛ. Anɔkwale ni wɔle ni wɔgbaa mɛi krokomɛi lɛ baanyɛ ni ekɛ anɔkwa heyeli aha mɛi ni kpɛlɛɔ nɔ lɛ.—Yohane 8:32.
Dii Anɔkwayeli Gbɛ lɛ Sɛɛ
18. Mɛni hewɔ, ni mɛɛ gbɛ nɔ Yesu tsɔ eduro Natanael yɛ?
18 Yesu sumɔɔ ni ewie anɔkwale lɛ. Ejie mlihilɛ kpo etsɔɔ mɛi ni sumɔɔ anɔkwale lɛ yɛ eshikpɔŋ nɔ sɔɔmɔ be lɛ mli. Yesu wie Natanael he akɛ: “Naa, anɔkwa Israelnyo, mɔ mli ni apasa bɛ.” (Yohane 1:47) Fee sɛɛ lɛ, ahala Natanael, ni ekolɛ atsɛɔ lɛ Bartolomeo hu lɛ akɛ bɔfoi 12 lɛ ateŋ mɔ kome. (Mateo 10:2-4) Mɛɛ woo po nɛ!
19-21. Te fee tɛŋŋ ni ajɔɔ nuu ni be ko lɛ eji shwilafo lɛ yɛ anɔkwale ni ekɛ ekãa wie lɛ hewɔ?
19 Yitso muu kroko hu yɛ Biblia mli wolo ni ji Yohane lɛ mli ni gbaa nuu anɔkwafo kroko hu ni Yesu jɔɔ lɛ lɛ he sane. Wɔleee egbɛi. Nɔ ni wɔle ji akɛ nuu lɛ ji nibalɔ ni afɔ lɛ shwilafo. Gbɔmɛi anaa kpɛ amɛhe beni Yesu ha ena nii lɛ. Agba naakpɛɛ tsamɔ nɛɛ he sane atsɔɔ Farisifoi lɛ ní nyɛɔ anɔkwale, ni amɛkpɛlɛ nɔ yɛ amɛteŋ akɛ esa akɛ ashwie mɔ fɛɛ mɔ ni baahe Yesu nɔ aye lɛ kɛjɛ kpeehe lɛ ateŋ mɛi komɛi. Akɛni amɛle amɛ ŋaatsɔɔ fɔŋ nɛɛ hewɔ lɛ, nuu ni be ko lɛ eji shwilafo lɛ fɔlɔi ni sheɔ gbeyei lɛ kɛɛ Farisifoi lɛ amale ko akɛ, amɛleee bɔ ni fee ni amɛbinuu lɛ naa nii agbɛnɛ lɛ, aloo mɔ ni ha ena nii lɛ hu.—Yohane 9:1-23.
20 Aku sɛɛ atsɛ nuu ni atsa lɛ lɛ ekoŋŋ kɛba Farisifoi lɛ ahiɛ. Akɛni nɔ fɛɛ nɔ ni baajɛ mli aba lɛ gbaaa enaa hewɔ lɛ, ekɛ ekãa kɛɛ amɛ nɔ ni ji anɔkwale lɛ. Etsɔɔ bɔ ni fee ni atsa lɛ, ni ákɛ Yesu ji mɔ ni tsa lɛ. Akɛni nuu ni átsa lɛ lɛ naa kpɛ ehe fe nine akɛ nɛkɛ hii ni ehe gbɛi ni le woloŋ nɛɛ heee yeee akɛ Yesu jɛ Nyɔŋmɔ ŋɔɔ hewɔ lɛ, ekɛ gbeyei ni esheee wo amɛ hewalɛ koni amɛkpɛlɛ nɔ ni eba lɛ nɔ, akɛ: “Kɛji mɔ nɛɛ jɛɛɛ Nyɔŋmɔ ŋɔɔ kulɛ, enyɛŋ nɔ ko efee.” Akɛni Farisifoi lɛ bɛ sane ko ni amɛkɛbaaku enaa hewɔ lɛ, amɛshwie nuu lɛ kɛjɛ amɛhiɛ akɛ ebuuu mɔ.—Yohane 9:24-34.
21 Beni Yesu nu sane nɛɛ he lɛ, ekɛ mlihilɛ hé be ni ekɛtao nuu lɛ. Beni efee nakai sɛɛ lɛ, ewaje hemɔkɛyeli ni nuu nɛɛ ni be ko lɛ eji shwilafo lɛ yɔɔ lɛ waa. Yesu jie lɛ diɛŋtsɛ ehe kpo faŋŋ akɛ lɛ ji Mesia lɛ. Kwɛ bɔ ni ajɔɔ nakai nuu lɛ aha yɛ anɔkwale ni ewie lɛ hewɔ! Eji anɔkwale akɛ, ŋwɛi duromɔ hiɔ mɛi ni wieɔ anɔkwale lɛ anɔ.—Yohane 9:35-37.
22. Mɛni hewɔ esa akɛ wɔdi anɔkwayeli gbɛ lɛ sɛɛ?
22 Anɔkwale kɛ nitsumɔ ji shihilɛ mli nifeemɔ ko ni esa akɛ wɔkɛ hiɛdɔɔ atsu he nii. Eji shishitoo nɔ̃ ni haa anáa naanyobɔɔ kpakpa ni bakãa gbɔmɛi kɛ Nyɔŋmɔ teŋ lɛ ní ahiɛɔ mli. Anɔkwafo ni ooofee lɛ tsɔɔ akɛ obaafee mɔ ni yɔɔ faŋŋ, krɔŋŋ, ni anyɛɔ abɛŋkɛɔ lɛ, kɛ mɔ ni anyɛɔ akɛ he fɔɔ enɔ, ni enɛ haa anáa Yehowa nɔkpɛlɛmɔ. (Lala 15:1, 2) Anɔkwale ni owieee lɛ tsɔɔ akɛ oshishiuɔ mɔ, anyɛɛɛ akɛ he afɔ̃ onɔ, kɛ amalelɔ, ni ekɛ Yehowa nɔkpɛlɛmɔ ni anáaa baa. (Abɛi 6:16-19) No hewɔ lɛ, tswaa ofai shi akɛ obaanyiɛ anɔkwayeli gbɛ lɛ nɔ. Yɛ anɔkwale mli lɛ, kɛji akɛ wɔɔkase anɔkwale Nyɔŋmɔ lɛ, no lɛ esa akɛ wɔle anɔkwale lɛ, wɔwie anɔkwale lɛ he, ni wɔhi shi yɛ anɔkwale lɛ naa.
Te Obaaha Hetoo Oha Tɛŋŋ?
• Mɛni hewɔ wɔbaanyɛ wɔda shi yɛ anɔkwale lɛ ni wɔle lɛ hewɔ?
• Te wɔɔfee tɛŋŋ wɔkase Yehowa yɛ anɔkwale ni wɔɔwie lɛ mli?
• Mɛɛ sɛɛnamɔi yɔɔ Biblia mli anɔkwale lɛ ni wɔkɛhaa mɛi krokomɛi lɛ mli?
• Mɛni hewɔ ehe hiaa ni wɔdi anɔkwale wiemɔ sɛɛ lɛ?
[Nikasemɔ lɛ he Sanebimɔi]
[Mfonirii ni yɔɔ baafa 17]
Akɛni atuu Biblia mli anɔkwale awo Kristofoi kɛ mɛi krokomɛi adɛŋ hewɔ lɛ, amɛgbaa he sane yɛ ekãa naa
[Mfonirii ni yɔɔ baafa 18]
Ajɔɔ nuu shwilafo ni Yesu tsa lɛ lɛ babaoo yɛ anɔkwale ni ewie lɛ hewɔ