Wala Shihilɛ He Sane

Mɔ ni Yehowa Ji E-Nyɔŋmɔ lɛ Yɛ Miishɛɛ

TAAKƐ TOM DIDUR GBA

Wɔ́yahai maŋbii asa lɛ momo. Wɔmiikpa mɛi aaafee 300 gbɛ kɛha kpee ni abaafee yɛ Porcupine Plain yɛ Saskatchewan, Canada lɛ. Snoo bɔi nɛmɔ kɛjɛ Shɔ, ni beni shɛɔ Sohaa lɛ kɔɔyɔŋ eyɛ futaa kɛ snoo bɔ ni anyɛɛɛ ana nii jogbaŋŋ. Kɔɔyɔŋ jɔ ŋanii waa kɛyashɛ digrii celcius 40 ni baa shi fe zɛro. Mɛi 28, ní gbekɛbii fioo fata he ba kpee lɛ. Enɛ ji klɛŋklɛŋ kpee ni mitee ákɛ kpokpaa nɔkwɛlɔ hee, ni miishe gbeyei akɛni miye afii 25 lɛ hewɔ. Dani magba bo nɔ ni ba yɛ nakai kpee lɛ shishi lɛ, ha magba bo bɔ ni fee ni minine shɛ nɛkɛ sɔɔmɔ hegbɛ krɛdɛɛ nɛɛ nɔ.

MIJI minyɛmimɛi lɛ ateŋ mɔ kpawo nɔ, afɔ́ wɔ hii kpaanyɔ sɔŋŋ. Wɔteŋ onukpa lɛ ji Bill, ni mɛi ni nyiɛ esɛɛ ji Metro, John, Fred, Mike, kɛ Alex. Afɔ́ mi yɛ afi 1925 mli, ni Wally ji nakutsoŋbi lɛ. Wɔhi he ko ni bɛŋkɛ Ukraina, Manitoba maŋ lɛ, he ni mifɔlɔi ni ji Michael kɛ Anna Didur yɔɔ ŋmɔ bibioo ko yɛ lɛ. Mitsɛ tsuɔ nii akɛ oketeke gbɛ saalɔ. Akɛni ebɛ hiŋmɛi nɔ ákɛ akɛ weku ni da aaahi tsũi bibii ni oketeke gbɛ saalɔi lɛ wɔɔ mli ni yɔɔ oketeke gbɛ ni etse ehe banee lɛ mli hewɔ lɛ, wɔhi ŋmɔ lɛ mli. Ataa efɔɔɔ shia hilɛ yɛ bei babaoo mli, no hewɔ lɛ Awo ji mɔ ni tsɔse wɔ. Yɛ be kɛ bei amli lɛ, eshiɔ shia ni ekɛ Ataa yahiɔ shi otsi loo nɔ ni fe nakai, shi ekwɛ akɛ wɔkase nihoomɔ, bodobodo shãa, kɛ shia nitsumɔi krokomɛi tsumɔ. Ni akɛni wɔji Hela Katolik Sɔlemɔ lɛ mli bii hewɔ lɛ, nɔ ni fata mra be mli tsɔsemɔ ni wɔnine shɛ nɔ kɛjɛ Awo dɛŋ lɛ he ji sɔlemɔi ni akaseɔ awoɔ yitsoŋ kɛ jamɔŋ kusumii nifeemɔi komɛi ni wɔkɛ wɔhe woɔ mli.

Biblia Mli Anɔkwale lɛ ni Mibale

Beni miji oblanyo lɛ, atée bɔ ni mishweɔ akɛ manu Biblia lɛ shishi lɛ shi. Yoo ko ni yɔɔ akutso lɛ  mli ni eji Yehowa Odasefoi lɛ ateŋ mɔ ko lɛ fɔɔ wɔweku lɛ saramɔ ni ekaneɔ Biblia lɛ fãi komɛi ni kɔɔ Nyɔŋmɔ Maŋtsɛyeli lɛ, Harmagedon, kɛ jeŋ hee lɛ mli jɔɔmɔi ahe lɛ he sane ehaa wɔ. Awo nyaaa nɔ ni ekɛɔ lɛ he kwraa, shi Mike kɛ Alex ná sane lɛ he miishɛɛ. Yɛ anɔkwale mli lɛ, nɔ ni amɛkase lɛ kanya amɛ ni amɛkpoo asraafoi anitsumɔ beni awuɔ jeŋ ta ni ji enyɔ lɛ ákɛ mɛi ni esaaa akɛ amɛhiɛɔ tawuu nii yɛ amɛhenilee ni eŋmɛɛɛ amɛ gbɛ lɛ hewɔ. No hewɔ lɛ, awo Mike tsuŋ be kukuoo ko, be mli ni akɛ Alex tee gboklɛfoi ni tsuɔ nii dɛŋdɛŋ lɛ ansara ni yɔɔ Ontario lɛ mli. No sɛɛ etsɛɛɛ tsɔ lɛ, Fred kɛ Wally hu kpɛlɛ anɔkwale lɛ nɔ. Shi kɛlɛ, minyɛmimɛi hii onukpai etɛ lɛ efeee nakai. Awo te shi ewo anɔkwale lɛ po afii babaoo, shi sɛɛ mli lɛ eha wɔ fɛɛ wɔnaa kpɛ wɔhe kɛtsɔ shidaamɔ ni ekɔ yɛ Yehowa gbɛfaŋ lɛ nɔ. Abaptisi lɛ beni eye afii 83. Awo gbo beni eye afii 96. Ataa hu ná anɔkwale lɛ he jwɛŋmɔ kpakpa dani egbo.

Beni miye afii 17 lɛ, mifã gbɛ kɛtee Winnipeg ní miyatao nitsumɔ ni mikɛ mɛi ni baanyɛ aye abua mi koni makase Biblia lɛ abɔ. Nakai beaŋ lɛ, atsĩ Yehowa Odasefoi anaa shi afeɔ kpee daa. Afee klɛŋklɛŋ kpee ni mitee lɛ yɛ mɔ ko shia. Akɛni Hela Katolik hemɔkɛyeli akɛtsɔse mi hewɔ lɛ, nɔ ni minu klɛŋklɛŋ kwraa lɛ ha mihiɛ fee mi yaa. Shi, fiofio lɛ mibanu nɔ hewɔ ni osɔfoi kɛ sɔlemɔyalɔi agbɛjianɔtoo lɛ kɛ ŋmalɛ lɛ kpãaa gbee, kɛ nɔ hewɔ ni Nyɔŋmɔ ekpɛlɛɛɛ tai ni osɔfoi lɛ jɔɔ nɔ lɛ shishi. (Yesaia 2:4; Mateo 23:8-10; Romabii 12:17, 18) Ákɛ mahi shi yɛ Paradeiso mli yɛ shikpɔŋ lɛ nɔ lɛ ji nɔ ko ni hi jogbaŋŋ ni jwɛŋmɔ yɔɔ mli fe nɔ ni mayahi shi yɛ he ko shɔŋŋ kɛya naanɔi anaanɔ.

Akɛni miyiŋ etsɔ akɛ anɔkwale lɛ nɛ hewɔ lɛ, mijɔɔ mihe nɔ miha Yehowa ni abaptisi mi yɛ Winnipeg yɛ afi 1942 mli. Beni shɛɔ afi 1943 mli lɛ, ajie naatsĩi ni akɛba Yehowa Odasefoi lɛ anɔ yɛ Canada lɛ, ni shiɛmɔ nitsumɔ lɛ tee nɔ waa diɛŋtsɛ. Biblia mli anɔkwale lɛ hu miiná mitsui nɔ hewalɛ waa. Miná hegbɛ akɛ masɔmɔ akɛ onukpa yɛ asafo lɛ mli, ní nakai beaŋ nɔŋŋ lɛ mikɛ mihe wo maŋshiɛmɔ he tafaai lɛ amli kɛ agbɛnɛ koni matsu nii yɛ shikpɔŋkuku ni akɛwoko mɔ ko dɛŋ lɛ mli. Kpeei wuji ni mitee yɛ United States lɛ ye ebua mi waa ni mitee hiɛ yɛ mumɔŋ.

Sɔɔmɔ ni Mikɛhaa Yehowa lɛ Mlilɛɛmɔ

Yɛ afi 1950 mli lɛ, mikɛ mihe wo daa gbɛgbamɔ nitsumɔ lɛ mli, ni yɛ December nakai afi lɛ nɔŋŋ mli lɛ, afɔ̃ mi nine koni miyasɔmɔ akɛ kpokpaa nɔkwɛlɔ. Miná hegbɛ kpele akɛ minine aaashɛ tsɔsemɔ nɔ kɛjɛ Charlie Hepworth, ni ji nyɛmi nuu anɔkwafo ni yɔɔ niiashikpamɔ lɛ ŋɔɔ yɛ kpokpaa ko ni bɛŋkɛ Toronto lɛ mli. Miná miishɛɛ hu akɛ yɛ mitsɔsemɔ lɛ naagbee otsi lɛ mli lɛ, minine shɛ tsɔsemɔ nɔ kɛjɛ minyɛmi nuu Alex, ni no mli lɛ eyɔɔ kpokpaa nitsumɔ lɛ mli momo yɛ Winnipeg lɛ dɛŋ.

Klɛŋklɛŋ kpokpaa nɔ kpee ni mitee, taakɛ mitsɔɔ mli yɛ yiteŋgbɛ lɛ ji nɔ ko ni mihiɛ kpaŋ nɔ kɔkɔɔkɔ. Taakɛ eji lɛ, no mli lɛ miisusu bɔ ni nibii baaji eha lɛ he waa. Ojogbaŋŋ, Nyɛminuu Jack Nathan, ni ji wɔ kpokpaa wuji anɔkwɛlɔ lɛ ha wɔ fɛɛ wɔkɛ wɔjwɛŋmɔ ma nifeemɔ lɛ nɔ, ni eha wɔná miishɛɛ. Wɔkɛ mɛi abɔ ni eba kpee lɛ shishi lɛ mu kpee gbɛjianɔtoo lɛ naa. Wɔto naa wɔgba niiashikpamɔi, wɔfee shiɛmɔ wiemɔi ni akɛtsuɔ nii yɛ shia kɛ shia nitsumɔ lɛ mli lɛ he nɔkwɛmɔnɔ, bɔ ni afeɔ sɛɛsaramɔ ahaa, kɛ bɔ ni afeɔ shia Biblia mli nikasemɔ ahaa lɛ he nɔkwɛmɔnɔ. Wɔlá Maŋtsɛyeli lalai. Niyenii babaoo yɛ jɛmɛ. Kɛ hooo kwraa lɛ, ŋmɛlɛtswai enyɔ fɛɛ ŋmɛlɛtswai enyɔ mli lɛ, wɔnuɔ kɔfi kɛ paai. Mɛi komɛi kãmɔ sɛii kakadaji anɔ kɛ wiemɔ kpoku lɛ nɔ amɛwɔ, yɛ be mli ni mɛi krokomɛi kãmɔ shikpɔŋ. Beni shɛɔ Hɔgbaa lɛ, snoo ahum lɛ naa eba shi fioo, no hewɔ lɛ mɛi 96 babo maŋshiɛmɔ lɛ toi. Niiashikpamɔ lɛ tsɔɔ mi bɔ ni akpeeɔ shihilɛi ni naa wa naa ahaa.

Kpokpaa nɔ nitsumɔ ni aha mi kɛnyiɛ sɛɛ lɛ kɛ mi tee Alberta kooyigbɛ, British Columbia, kɛ Yukon  Territory, ni ji nyɔɔŋteŋ hulu shikpɔŋ lɛ nɔ. Kɛ́ ojɛ Dawson Creek, British Columbia ni oofã gbɛ kɛmiitsɔ Alaska Highway ni nɔ yɔɔ dokoidokoi lɛ nɔ kɛmiiya Whitehorse, Yukon (ni gbɛ jɛkɛmɔ feɔ kilomitai 1,477) ní ooye odase yɛ gbɛ lɛ nɔ lɛ, ebiɔ tsuishitoo kɛ henɔkwɛmɔ jogbaŋŋ. Snoo ni kumɔɔ kɛjɛɔ gɔji anɔ ni kpataa nibii ahiɛ, gɔji ni nɔ shamɔɔ, kɛ bɔ ni snoo ni nɛɔ lɛ haaa jeŋ atse jogbaŋŋ lɛ bafeɔ kaa diɛŋtsɛ.

Bɔ ni anɔkwale lɛ nyɛ eyashɛ Kooyigbɛ Shɔŋŋ lɛ ha minaa kpɛ mihe. Be ko lɛ, mi kɛ Walter Lewkowicz tee shia bibioo ko ni bɛŋkɛ Lower Post, British Columbia, ní yɔɔ Alaska Highway ni bɛŋkɛ Yukon Territory husu lɛ naa lɛ. Wɔna akɛ mɔ ko yɛ nakai tsũ bibioo lɛ mli ejaakɛ wɔna kane kpɛmɔ fioo ko kɛtsɔ samfɛlɛ bibioo ko mli. No mli lɛ, aahe atswa gbɛkɛ ŋmɛlɛ nɛɛhu, ni wɔtswa shinaa lɛ. Wɔnu nuu ko gbeeŋ ni miikɛɛ akɛ nyɛbaa mli, no hewɔ lɛ wɔbote tsũ lɛ mli. Kwɛ bɔ ni wɔnaa kpɛ wɔhe eha akɛ wɔɔna nuumo ko ni kã saatso ko ni akɛ eko ema eko nɔ lɛ nɔ ní ehiɛ Buu-Mɔɔ lɛ eko yɛ edɛŋ ni eekane! Yɛ anɔkwale mli lɛ, nɔ ni ehiɛ lɛ ji ehee ni ba fe nɔ ni wɔkɛhaa mɛi lɛ. Etsɔɔ mli ákɛ akɛ enɔ̃ maje lɛ kɛtsɔ kɔɔyɔŋ lɛlɛ nɔ. Akɛni wɔkɛ asafo lɛ ebɔko nɔ ni fe gbii kpaanyɔ nɛ hewɔ lɛ, wɔnine shɛko woji tɛtrɛbii heei ni eba lɛ nɔ. Nuu lɛ jie ehe shi akɛ Fred Berg, ni eyɛ mli akɛ afii babaoo nɛ ni ebɔi woji tɛtrɛbii lɛ shɛɛ moŋ, shi enɛ ji klɛŋklɛŋ kwraa ni Yehowa Odasefoi basaraa lɛ. Fred ha wɔwɔ eshia lɛ nakai gbɛkɛ lɛ. Wɔnyɛ wɔgba lɛ Ŋmalɛ mli anɔkwalei babaoo, ni wɔto gbɛjianɔ koni Odasefoi krokomɛi ní fɔɔ akutso lɛ mli tsɔmɔ lɛ ayasara lɛ.

Mikɛ afii babaoo sɔmɔ kpokpai bibii etɛ. Kpokpaa nɛɛ jeɔ shishi kɛjɛɔ Grande Prairie, kɛtsɔɔ Alberta, yɛ Kodiak bokagbɛ, kɛ Alaska yɛ Kodiak anaigbɛ, efeɔ gbɛ jɛkɛmɔ ni fe kilomitai 3,500.

Miná miishɛɛ akɛ male akɛ Yehowa mɔbɔnalɛ ni wɔsaaa lɛ yɛ kɛha gbɔmɛi fɛɛ ni yɔɔ hei ni etse amɛhe banee lɛ mli taakɛ eji yɛ he fɛɛ he lɛ, ni ákɛ, Nyɔŋmɔ mumɔ lɛ kanyaa mɛi abɔ ni ajie ato naanɔ wala lɛ atsuii kɛ amɛjwɛŋmɔi. Nɛkɛ mɛi nɛɛ ateŋ mɔ kome ji Henry Lepine ní jɛ Dawson City, Yukon, ní amrɔ nɛɛ lɛ atsɛɔ lɛ Dawson lɛ. Henry hi shi yɛ he ko ni etse ehe banee. Yɛ anɔkwale mli lɛ, ehi nɛkɛ shikatsuru tsaahe nɛɛ mli nɔ ni fe afii 60 nɛ ni efãko gbɛ dã. Shi kɛlɛ, Yehowa mumɔ lɛ kanya nɛkɛ nuumo ni eye  afii 84 nɛɛ koni efã gbɛ nɔ ni fe kilomitai 1,600 kɛya kpokpaa nɔ kpee yɛ Anchorage, eyɛ mli moŋ akɛ eyako asafoŋ kpee ko dã. Ená gbɛjianɔtoo ni tee nɔ lɛ he miishɛɛ ni naanyobɔɔ ni tee nɔ lɛ ha enya waa. Beni Henry ku esɛɛ kɛtee Dawson City lɛ, etee nɔ eye anɔkwa kɛyashi egbele mli. Mɛi babaoo ni le Henry lɛ enaaa nɔ ni kanya nɛkɛ nuumo nɛɛ ni efã gbɛ kakadaŋŋ ni tamɔ nɛkɛ lɛ. Nɛkɛ nibii amli ni ataoɔ ale nɛɛ ha hiimeji fioo komɛi hu kpɛlɛ anɔkwale lɛ nɔ. No hewɔ lɛ, yɛ gbɛ ni bɛ tɛ̃ɛ nɔ lɛ, Henry nyɛ eye odase jogbaŋŋ kɛmɔ shi.

Minine Shɛ Yehowa Mlihilɛ ni Misaaa lɛ Nɔ

Yɛ afi 1955 mli lɛ, miná miishɛɛ akɛ afɔ̃ mi nine koni maya Buu Muu Biblia Gilead Skul klas ni ji 26 lɛ eko. Nɛkɛ tsɔsemɔ nɛɛ wo mihemɔkɛyeli mli hewalɛ ni eye ebua mi koni matsi mabɛŋkɛ Yehowa he kpaakpa. Beni migbe nikasemɔ lɛ naa lɛ, aha miyatsa kpokpaa nɔkwɛmɔ nitsumɔ lɛ nɔ yɛ Canada.

Mikɛ nɔ ni miihe ashɛ afi sɔmɔ yɛ Ontario kpokpai lɛ anɔ. No sɛɛ lɛ asaa aha mi nitsumɔ ekoŋŋ yɛ Kooyigbɛ, ni jɛmɛ yɔɔ fɛo lɛ. Minyɛɔ mifeɔ gbɛjegbɛi wuji ni yɔɔ fɛo, kpaakpoi ni mli tse kɛ beni mita tsɔne mli kɛkwɔɔ gɔji ni tsara nɔ ni snoo ehà nɔ lɛ ahe mfoniri yɛ mijwɛŋmɔ mli lolo. Yɛ latsa be mli lɛ, jwɛifɔ kɛ fɔfɔii hàa jɔɔi kɛ shikpɔji lɛ anɔ fɛfɛo tamɔ kapɛti fɛfɛo ko ni hà shi. Kɔɔyɔɔ kpakpa ko tswaa ni nu lɛ mli tse keŋkeŋ. Oshishibrishii, klaji, duŋ, afi koŋkome, kɛ kooloi krokomɛi ni amɛhiɛ yɔɔ lalaŋ nyiɛɔ kɛkpaa amɛshihilɛhei ni mɔ ko gbaaa amɛnaa.

Shi kɛlɛ, no mli lɛ mikɛ naagbai kpeɔ yɛ Alaska—jeee kɔɔyɔŋ dɔlɛ ni tsakeɔ lɛ pɛ kɛkɛ, shi moŋ gbɛ lɛ jɛkɛmɔ hu mli. Kpokpaa ni misɔmɔɔ yɛ mli lɛ mlilɛɛmɔ ji kilomitai 3,200 kɛjɛ bokagbɛ kɛtee anaigbɛ. Nakai bei amli lɛ, atoko gbɛjianɔ ko kɛhako kpokpaa nɔkwɛlɔ lɛ akɛ abaaha lɛ tsɔne. Nyɛmimɛi ni yɔɔ asafo lɛ mli lɛ kɛ amɛhe haa ni amɛwóɔ mi kɛ tsɔne kɛjɛɔ asafo kome mli kɛyaa ekroko mli. Shi kɛlɛ, bei komɛi lɛ, esa akɛ madamɔ gbɛjegbɛ he ni makpa tsɔne kudɔlɔi kɛ shisharalɔi afai koni amɛwo mi.

Shihilɛ ni tamɔ nɛkɛ lɛ eko ba yɛ Alaska Highway gbɛjegbɛ lɛ nɔ, yɛ gbɛ ni kã Tok Junction yɛ Alaska, kɛ Mile 1202, loo Scotty Creek akutso lɛ mli lɛ nɔ. Gbɛ ni kã maŋ lɛ mli nitsumɔhe ni kwɛɔ gbɛfalɔi anibii amli ni amɛheɔ too hu ni yɔɔ Tok Junction kɛ Mile 1202 teŋ lɛ miihe ashɛ kilomitai 160. Mitsɔ United States nitsumɔhe ni kwɛɔ gbɛfalɔi anibii amli ni amɛheɔ too ni yɔɔ Tok Junction lɛ, ni miná mɔ ko wó mi kɛ tsɔne kɛfo gbɛ aaafee kilomitai 50. No sɛɛ lɛ, tsɔne ko kwraa baaa dɔŋŋ, no hewɔ lɛ minyiɛ aaafee ŋmɛlɛtswai nyɔŋma kɛfo gbɛ nɔ ni fe kilomitai 40. Sɛɛ mli kwraa dani miná mile akɛ be mli ni mifo mli yɛ nitsumɔhe ni kwɛɔ gbɛfalɔi anibii amli ni amɛheɔ too lɛ he nɔŋŋ pɛ kɛkɛ ni atsĩ tsɔne kudɔlɔi anaa koni amɛkatsɔ̃ nakai gbɛ lɛ nɔ yɛ snoo ko ni ekumɔ kɛjɛ gɔji lɛ anɔ ni ebashwie gbɛ lɛ nɔ ní kɛ nitsumɔhe lɛ jɛkɛɛɛ lɛ hewɔ. Beni shɛɔ nyɔɔŋteŋ lɛ kɔɔyɔɔ lɛ mli efee ŋanii kɛbashɛ digrii celsius 23 ni baa shi fe zɛro, ni gbɛ aaafee kilomitai 80 kã mihiɛ lolo ni manyiɛ dani manyɛ maná he ko ni mikɛ miyitso afɔ̃. He ko ni manyɛ maná ni mikɛ miyitso afɔ̃ he miihia mi waa diɛŋtsɛ.

Beni mitsutsɔɔ kɛyaa lɛ, mina tsɔne ko ni ashi ama gbɛ lɛ toi ni snoo miihe ahà nɔ fɛɛ. Misusu akɛ kɛji minyɛ migbele shinaa lɛ ni miyakã kushin lɛ nɔ lɛ, manyɛ makpee gbɛkɛ fɛ̃i lɛ naa. Mibɔ mɔdɛŋ mikpɔlɔ snoo lɛ babaoo ni migbele  shinaa lɛ, dani mina akɛ afamɔ emli sɛii lɛ ni emli kã shi efolo. Miishɛɛ sane ji akɛ, minyiɛ gbɛ etsɛɛɛ tsɔ ni miyanina tsũ bibioo ko ni mɔ ko mɔ ko bɛ mli. Beni migbo deŋme migbele shinaa lɛ ni misu kane lɛ, minyɛ miwɔ ŋmɛlɛtswai fioo ko. Ní je tsɛre lɛ, mibɔ mɔdɛŋ miná tsɔne kɛtee gbɔiatoohe ni bɛŋkɛ jɛmɛ lɛ, ni jɛmɛ ji he ni minine shɛ niyenii ni he hiaa mi lɛ nɔ, ni mitao tsofa kɛto miwaobii ni efolɔ lɛ nɔ.

Yehowa Ha Eshwere yɛ Kooyigbɛ Lɛ

Klɛŋklɛŋ saramɔ ni miyasara Fairbanks lɛ ji nɔ ko ni woɔ mɔ hewalɛ waa diɛŋtsɛ. Wɔye omanye waa yɛ sɔɔmɔ nitsumɔ lɛ mli, ni mɛi aaafee 50 babo maŋshiɛmɔ ni aha nakai Hɔgbaa lɛ toi. Wɔyakpe yɛ maŋsɛɛ sanekpakpa shiɛlɔi ashia bibioo ko mli, he ni Vernor kɛ Lorraine Davis yɔɔ lɛ. Gbɔmɛi kpãkpãa amɛkuɛ mli kɛjɛ kpata lɛ shi, sɛɛtsu lɛ mli, kɛ ablanaa lɛ nɔ bɔni afee ni amɛbo wiemɔ lɛ toi. Wɔná wɔle yɛ mɛi abɔ ni ba nɛɛ hewɔ akɛ Maŋtsɛyeli Asa ni abaaná yɛ Fairbanks lɛ baaha shiɛmɔ nitsumɔ lɛ amɔ shi. No hewɔ lɛ, kɛtsɔ Yehowa yelikɛbuamɔ nɔ lɛ, wɔhe shia agbo ko ní tsutsu ko lɛ eji he ko ni ajoɔ yɛ lɛ, ni wɔfamɔ tsũ lɛ kɛtee shikpɔŋ ko ni sa nɔ. Atsa nubu, ni amamɔ hejuuhei, ni akɛ tsɔne ni haa tsũ mli dɔɔ wo mli. Beni shɛɔ afi lɛ, aná Maŋtsɛyeli Asa ni aaya nikasemɔ yɛ mli yɛ Fairbanks. Sɛɛ mli beni ama nihoomɔhe afata asa lɛ he lɛ, afee kpokpaa wulu nɔ kpee yɛ asa lɛ nɔ yɛ afi 1958 mli, ni mɛi 330 ba.

Yɛ afi 1960 latsa be lɛ mli lɛ, mikɛ tsɔne fã gbɛ kakadaŋŋ kɛtee Yehowa Odasefoi anitsumɔhe yitso ni yɔɔ New York lɛ kɛha nikasemɔ nɔtsamɔ ni ato he gbɛjianɔ kɛha kpokpaa nɔkwɛlɔi fɛɛ ni baasɔmɔ yɛ United States kɛ Canada lɛ. Beni miyɔɔ jɛmɛ lɛ, Nyɛminuu Nathan Knorr kɛ nyɛmimɛi hii krokomɛi ni hiɛ sɔɔmɔ hegbɛi lɛ bibii mi saji kɛji akɛ abaanyɛ aná nitsumɔhe nine yɛ Alaska. No sɛɛ nyɔji fioo lɛ, wɔná miishɛɛ akɛ wɔɔle akɛ beni aaashɛ September 1, 1961 lɛ, no mli lɛ Alaska ená lɛ diɛŋtsɛ enitsumɔhe nine. Akɛ nitsumɔ wo Nyɛminuu Andrew K. Wagner dɛŋ koni ekwɛ nitsumɔhe nine lɛ nitsumɔi lɛ anɔ. Lɛ kɛ eŋa Vera esɔmɔ yɛ Brooklyn afii 20, ni amɛyɛ niiashikpamɔ yɛ gbɛfaa nitsumɔ lɛ hu mli. Nitsumɔhe nine ni aná yɛ Alaska lɛ ji gbɛjianɔtoo ko ni anya he waa, ejaakɛ etse kpokpaa nɔkwɛlɔ lɛ gbɛfãa nɔ, ni no ha ená hegbɛ ni egbala ejwɛŋmɔ kɛtee asafoi lɛ kɛ shikpɔji ni etse amɛhe banee lɛ ahiamɔ nii pɔtɛɛ lɛ anɔ.

Afi 1962 latsa be lɛ bafee miishɛɛ be yɛ Kooyigbɛ lɛ. Ajɔɔ Alaska nitsumɔhe nine lɛ nɔ, ni afee kpokpaa wulu nɔ kpee ko yɛ Juneau, Alaska. Amamɔ Maŋtsɛyeli Asai heei yɛ Juneau kɛ Whitehorse, Yukon, ni atse kui heei ni etse amɛhe banee babaoo hu.

Miku Sɛɛ Kɛtee Canada

Mikɛ Margareta Petras ni jɛ Canada lɛ gbaa sane kɛtsɔ woloŋmaa nɔ afii babaoo nɛ. Reta, taakɛ afɔɔ lɛ tsɛmɔ lɛ, je gbɛgbamɔ nitsumɔ lɛ shishi yɛ afi 1947 mli, ni egbe Gilead nikasemɔ tsɔsemɔ lɛ naa yɛ afi 1955 lɛ mli, ni no mli lɛ eetsu gbɛgbamɔ nitsumɔ lɛ yɛ Canada bokagbɛ. Miha ele akɛ miisumɔ ni mikɛ lɛ abote gbalashihilɛ mli, ni ekpɛlɛ nɔ. Wɔbote gbalashihilɛ mli yɛ Whitehorse yɛ February 1963 lɛ mli. Yɛ nakai afi lɛ gbo be mli lɛ, aha mi nitsumɔ akɛ kpokpaa nɔkwɛlɔ yɛ Canada anaigbɛ, ni wɔná miishɛɛ akɛ wɔɔsɔmɔ yɛ jɛmɛ afii 25 ni nyiɛ sɛɛ kɛba lɛ mli.

Yɛ gbɔmɔtsoŋ naagbai hewɔ lɛ, yɛ afi 1988 mli lɛ, aha wɔ nitsumɔ akɛ gbɛgbalɔi krɛdɛɛi yɛ Winnipeg, Manitoba. Nɔ ni fata enɛ he ji Kpee Asa ko ni mikwɛ nɔ yɛ nɔ ni miihe ashɛ afii enumɔ mli. Wɔkã he wɔnáa kaselɔfeemɔ nitsumɔ lɛ mli gbɛfaŋnɔ lolo bɔ ni wɔbaanyɛ. Beni wɔyɔɔ kpokpaa nitsumɔ lɛ mli lɛ, wɔje Biblia mli nikasemɔi pii ashishi ni wɔha mɛi krokomɛi tsa nɔ. Amrɔ nɛɛ lɛ, kɛtsɔ Yehowa mlihilɛ ni wɔsaaa lɛ nɔ lɛ, wɔjeɔ nikasemɔi lɛ ashishi ni wɔnáa miishɛɛ kroko hu ákɛ wɔɔna ní nikaselɔi lɛ miiya amɛhiɛ kɛmiishɛ henɔjɔɔmɔ kɛ baptisimɔ he.

Miheɔ miyeɔ akɛ Yehowa sɔɔmɔ ji shihilɛ gbɛ ni hi fe fɛɛ. Shishinumɔ yɛ he, ni ehaa mɔ tsui nyɔɔ emli, ni ehaa suɔmɔ ni wɔyɔɔ kɛha Yehowa lɛ mli waa gbi fɛɛ gbi. Enɛ ji nɔ ni haa anáa miishɛɛ diɛŋtsɛ. Wɔkɛ lalatsɛ lɛ kpãa gbee yɛ teokrase nitsumɔ fɛɛ nitsumɔ ni wɔnine eshɛ nɔ, yɛ he fɛɛ he ni wɔyɔɔ yɛ shikpɔŋ lɛ nɔ, mɔ ni kɛɛ akɛ: “Mɔ ni Yehowa ji e-Nyɔŋmɔ lɛ yɛ miishɛɛ!”—Lala 144:15, NW.

[Mfoniri ni yɔɔ baafa 24, 25]

Yɛ kpokpaa nɔkwɛmɔ nitsumɔ lɛ mli

[Mfoniri ni yɔɔ baafa 25]

Miyasara Henry Lepine yɛ Dawson City. Mi midamɔ abɛkugbɛ lɛ

[Mfoniri ni yɔɔ baafa 26]

Klɛŋklɛŋ Maŋtsɛyeli Asa ni ama yɛ Anchorage

[Mfoniri ni yɔɔ baafa 26]

Mi kɛ Reta, afi 1998