“Mɛi Enyɔ Komɛi Batswa Wɔshinaa Lɛ”

“AFII enyɔ ni eho nɛ ni wɔye awerɛho waa yɛ wɔbiyoo fioo ni je mli lɛ hewɔ.” Nɛkɛ ji bɔ ni aje niŋmaa ko ni yɔɔ Le Progrès adafitswaa wolo ni akala yɛ Saint-Étienne, France lɛ mli lɛ shishi aha.

“Mélissa eye nyɔji etɛ ni eye hela ko ni yɔɔ gbeyei waa ni atsɛɔ lɛ Edwards’ syndrome. Hiɛ nyɛɛɛ akpa nɛkɛ oshara shihilɛ ni tamɔ nɔ ni jalɛsaneyeli bɛ mli nɛɛ nɔ kwraa kɛmɔ shi. Eyɛ mli akɛ atsɔse wɔ yɛ Katolik hemɔkɛyeli lɛ mli moŋ, shi susumɔ nɛɛ gba wɔjwɛŋmɔ naa waa akɛ, ‘Nyɔŋmɔ, kɛji akɛ oyɛ shihilɛ mli lɛ, no lɛ mɛni hewɔ ohaa nibii ni tamɔ nɛkɛ baa?’” Eka shi faŋŋ akɛ, nyɛ ni ŋma nakai wolo lɛ hao ni enyɛɛɛ nɔ ko efee. Etsa nɔ yɛ wolo ni eŋma lɛ mli akɛ:

“Yɛ shihilɛi nɛɛ asɛɛ etsɛɛɛ nɔŋŋ lɛ, mɛi enyɔ komɛi batswa wɔshinaa lɛ. Amrɔ nɔŋŋ ni miyɔse akɛ amɛji Yehowa Odasefoi. Mifee klalo ni matsɔ mlihilɛ gbɛ nɔ maha amɛya, shi no sɛɛ lɛ miyɔse wolo tɛtrɛɛ ko ni amɛkɛmiiha mi lɛ. Ekɔɔ nɔ hewɔ ni Nyɔŋmɔ ŋmɛɔ piŋmɔ gbɛ lɛ he. No hewɔ lɛ mikpɛ miyiŋ akɛ maha amɛba tsu lɛ mli kɛ yiŋtoo akɛ matsɔɔ amɛ akɛ susumɔi ni amɛhiɛ lɛ ejaaa. Misusu akɛ yɛ piŋmɔ gbɛfaŋ lɛ, miweku lɛ ena nɔ̃ tsɔ fe nine, ni ákɛ wiemɔ kome too ni afɔɔ wiemɔ be fɛɛ be akɛ ‘Nyɔŋmɔ ŋɔ lɛ ha wɔ, ni Nyɔŋmɔ eŋɔ lɛ kɛtee’ lɛ numɔ etɔ wɔ. Odasefoi lɛ hi shi nɔ ni fa fioo fe ŋmɛlɛtswaa kome. Amɛkɛ mlihilɛ kpele bo mi toi, ni beni amɛshiɔ lɛ, minu he akɛ mihe ejɔ mi aahu akɛ mikpɛlɛ ni amɛku sɛɛ amɛbasara mi ekoŋŋ. Enɛ ba yɛ afii enyɔ ni eho lɛ mli. Mitsɔko Yehowa Odasefoi ateŋ mɔ ko, shi mikɛ amɛ bɔi Biblia lɛ kasemɔ, ni miyaa amɛkpeei lɛ shii abɔ ni manyɛ.”