Sanebimɔi ni Jɛ Kanelɔi Adɛŋ

Yehowa ŋmɛ yei pii kɛ shihilɛ gbɛ yɛ esɔɔlɔi Israelbii ni hi shi yɛ blema lɛ ateŋ, shi amrɔ nɛɛ eŋmɛɛɛ enɛ gbɛ. Ani tɛ ni efo efɔ̃ shi lɛ tsakeɔ?

Yehowa tsakeko esusumɔ yɛ yei pii kɛ shihilɛ lɛ he. (Lala 19:8; Maleaki 3:6) Ejeee egbɛjianɔtoo kɛha adesai yɛ shishijee mli lɛ fã, ni ejeee egbɛjianɔtoo amrɔ nɛɛ. Beni Yehowa bɔ Hawa eha Adam akɛ eŋa lɛ, ewie akɛ ŋwɛi tɛ ni afo afɔ̃ shi ji, ŋa kome kɛha wu kome. “No hewɔ lɛ nuu aaashĩ etsɛ kɛ enyɛ, ni eeekpɛtɛ eŋa he, ni amɛaatsɔ̃ heloo kome.”—1 Mose 2:24.

Beni Yesu Kristo yɔɔ shikpɔŋ nɔ lɛ, esaa etĩ nɛkɛ tɛ ni afo afɔ̃ shi nɛɛ mli ekoŋŋ ni ekɛha mɛi ni bi lɛ sane yɛ gbalamlitsemɔ kɛ gbalashihilɛ mlibotemɔ ekoŋŋ lɛ he lɛ hetoo. Ekɛɛ akɛ: “Ani nyɛkaneko akɛ, mɔ ni bɔ gbɔmɔ yɛ shishijee lɛŋ lɛ, ‘nuu kɛ yoo ebɔ amɛ’? Ni ekɛɛ: ‘Enɛ hewɔ ni nuu aaashĩ etsɛ kɛ enyɛ ni eeekpɛtɛ eŋa he, ni amɛyi enyɔ lɛ fɛɛ amɛaatsɔ heloo kome lɛ.’ Belɛ agbɛnɛ amɛjeee mɛi enyɔ dɔŋŋ shi moŋ heloo kome.’” Yesu kɛɛ kɛfata he akɛ: “Mɔ fɛɛ mɔ ni jeee ajwamaŋbɔɔ hewɔ jɛ ni eeeshwie eŋa ni eyawɛ yoo kroko lɛ, efite gbala; ni mɔ fɛɛ mɔ ni wɛɔ yoo ni ashwie lɛ lɛ, lɛ hu efite gbala.” (Mateo 19:4-6, 9) Enɛ haa wɔnaa faŋŋ akɛ, ŋa kome loo ŋamɛi babaoo ni aaaná afata nɔ ni ayɔɔ momo lɛ he lɛ hu ji gbalafitemɔ.

Belɛ, mɛni hewɔ ni aŋmɛ yei babaoo kɛ shihilɛ gbɛ yɛ blema beaŋ lɛ? Ha ehi ojwɛŋmɔ mli akɛ Yehowa etooo nakai nifeemɔ lɛ shishi. Mɔ klɛŋklɛŋ ni atsĩ etã yɛ Biblia lɛ mli akɛ ekɛ ŋamɛi ni fa fe ekome hi shi lɛ ji Lamek ni ji Kain seshinyo lɛ. (1 Mose 4:19-24) Beni Yehowa kɛ Noa gbii lɛ amli Nu Afua lɛ ba lɛ, Noa kɛ ebihii etɛ lɛ fɛɛ yɛ ŋa kome kome pɛ. Akpata mɛi ni kɛ yei pii hi shi lɛ fɛɛ ahiɛ yɛ Nu Afua lɛ mli.

Afii ohai abɔ komɛi asɛɛ beni Yehowa hala Israelbii akɛ ewebii lɛ, no mli lɛ amɛteŋ mɛi komɛi kɛ yei pii ehi shi momo, eyɛ mli akɛ ŋa kome pɛ kɛ shihilɛ ji nɔ ko ni yɔɔ faŋŋ ni ale waa moŋ. Nyɔŋmɔ biii koni agbála wekui ni ŋamɛi ni yɔɔ mli lɛ fa fe ekome lɛ amli. Yɛ no najiaŋ lɛ, ekɛ shiŋŋfeemɔ kudɔ nifeemɔ lɛ.—2 Mose 21:10, 11; 5 Mose 21:15-17.

Jeee nɔ ni Yesu wie ni kɔɔ Yehowa shishijee gbalashihilɛ he tɛ ni efo efɔ̃ shi yɛ yei pii kɛ shihilɛ he lɛ mli pɛ anaa akɛ eji nifeemɔ ko ni aŋmɛ gbɛ kɛyashi be ko, shi moŋ anaa yɛ nɔ ni bɔfo Paulo jɛ Nyɔŋmɔ mumɔ krɔŋkrɔŋ lɛ tsirɛmɔ mli ni eŋma lɛ hu mli. Ekɛɛ akɛ: “Hã nuu fɛɛ nuu awɛ lɛ diɛŋtsɛ eŋa, ni yoo fɛɛ yoo agbã lɛ diɛŋtsɛ ewu.” (1 Korintobii 7:2) Akɛ mumɔ tsirɛ Paulo ni eŋma hu akɛ, esa akɛ nuu fɛɛ nuu ni abaahala lɛ akɛ nɔkwɛlɔ loo sɔɔlɔ yɛ Kristofoi asafo lɛ mli lɛ afee “mɔ ni yɔɔ ŋa kome.”—1 Timoteo 3:2, 12; Tito 1:6.

No hewɔ lɛ, Kristofoi asafo ni ato shishi aaafee afii 2,000 ni eho lɛ kɛ yei pii kɛ shihilɛ gbɛ ni Yehowa ŋmɛ lɛ ba naagbee. Yɛ nakai be lɛ mli lɛ, gbalashihilɛ he tɛ ni afo afɔ̃ shi lɛ batsɔ tamɔ bɔ ni eji kɛjɛ shishijee beni Nyɔŋmɔ bɔ nuu kɛ yoo lɛ ekoŋŋ: wu kome, ŋa kome. No ji tɛ ni afo afɔ̃ shi ŋmɛnɛ yɛ Nyɔŋmɔ webii lɛ ateŋ yɛ je lɛŋ he fɛɛ he.—Marko 10:11, 12; 1 Korintobii 6:9, 10.