Yehowa, Anɔkwale Nyɔŋmɔ Lɛ
Yehowa, Anɔkwale Nyɔŋmɔ Lɛ
“Bo ohere mi, Yehowa, bo Nyɔŋmɔ anɔkwafo!”—LALA 31:6.
1. Be mli ni amale ko bɛ lɛ, no mli lɛ te shihilɛ lɛ yɔɔ tɛŋŋ yɛ ŋwɛi kɛ shikpɔŋ nɔ?
BE KO shɛ ni amale bɛ. No mli lɛ, mɛi ni yɔɔ ŋwɛi ní anaaa lɛ ji mumɔŋ bɔɔ nii ni yeɔ emuu, ní miisɔmɔ amɛ-Bɔlɔ ni ji “Nyɔŋmɔ anɔkwafo” lɛ. (Lala 31:6) No mli lɛ amale ko bɛ lɛ, lakamɔ ko hu bɛ. Yehowa kɛ emumɔŋ bii lɛ wie anɔkwale. Efee nakai ejaakɛ esumɔɔ amɛ, ni eyɛ amɛhilɛ-kɛ-hamɔ he miishɛɛ waa diɛŋtsɛ. Shihilɛ ni yɔɔ shikpɔŋ nɔ lɛ tamɔ nakai nɔŋŋ. Yehowa bɔ klɛŋklɛŋ nuu kɛ yoo lɛ, ni be fɛɛ be lɛ etsɔɔ gbɛ ni ehala lɛ nɔ ekɛ amɛ wieɔ yɛ gbɛ ni yɔɔ faŋŋ ni yɔɔ tɛ̃ɛ nɔ, kɛ anɔkwale mli. Kwɛ bɔ ni enɛ baafee naakpɛɛ eha!
2. Namɔ je amale shishi, ni mɛni hewɔ?
2 Shi, naagbee mli lɛ, Nyɔŋmɔ mumɔŋ bi ko jie ehe kpo yɛ ekãa naa akɛ nyɔŋmɔ ko ni yeɔ bienyɛ ni teɔ shi woɔ Yehowa. Nɛkɛ mumɔŋ bɔɔ nɔ, ní abale lɛ akɛ Satan Abonsam nɛɛ miisumɔ ni mɛi krokomɛi aja lɛ. Bɔni afee ni enine ashɛ oti nɛɛ nɔ lɛ, eje amale shishi akɛ gbɛ ni etsɔɔ nɔ ni ekɛgbalaa mɛi kɛbaa ehewalɛ shishi. Kɛtsɔ no feemɔ nɔ lɛ, ebatsɔ “amalelɔ kɛ malemɔ tsɛ.”—Yohane 8:44.
3. Te Adam kɛ Hawa fee amɛnii yɛ Satan amale lɛ he amɛha tɛŋŋ, ni mɛni jɛ mli kɛba?
3 Satan tsɔ onufu nɔ ekɛɛ klɛŋklɛŋ yoo Hawa akɛ, kɛ́ eku ehiɛ eshwie Nyɔŋmɔ mla lɛ nɔ ni eye tso ni agu eyeli lɛ, egboŋ. Eji amale. Etee nɔ ni ekɛɛ lɛ akɛ, kɛ́ eye lɛ ebaatsɔ tamɔ Nyɔŋmɔ, ni ebaale ekpakpa kɛ efɔŋ. Enɛ hu ji amale. Eyɛ mli akɛ amaleko Hawa dã moŋ, shi ekolɛ eyɔse akɛ nɔ ni enu yɛ onufu lɛ naa lɛ kɛ nɔ ni Nyɔŋmɔ ekɛɛ ewu, Adam lɛ kpaaa gbee. Shi kɛlɛ, ehala akɛ eeehe Satan eye, jeee Yehowa. Akɛni alaka lɛ kɛmɔ shi hewɔ lɛ, ehe aduawa lɛ ni eye. Sɛɛ mli lɛ, Adam hu ye aduawa lɛ. (1 Mose 3:1-6) Taakɛ Hawa ji lɛ, Adam nuko amale dã, ni kɛlɛ, alakaaa lɛ. (1 Timoteo 2:14) Etsɔ enifeemɔi anɔ etsɔɔ akɛ ekpoo e-Feelɔ lɛ. Nɔ ni jɛ mli ba kɛbaha adesai aweku lɛ yɛ oshara. Adam toigbele lɛ hewɔ lɛ, esha kɛ gbele—ni fitemɔ kɛ haomɔi babaoo fata he lɛ—gbɛ eshwã eshwiei fɛɛ nɔ.—Romabii 5:12.
4. (a) Te amalei ni amale yɛ Eden lɛ yɔɔ ha tɛŋŋ? (b) Mɛni esa akɛ wɔfee koni wɔkaha Satan miilaka wɔ?
4 Amale hu gbɛ eshwã. Esa akɛ wɔyɔse akɛ nakai amalei ni amale yɛ Eden abɔɔ lɛ mli lɛ ji tutuamɔ ni atutuaa Yehowa diɛŋtsɛ anɔkwayeli. Satan tsɔɔ akɛ Nyɔŋmɔ kɛ lakamɔ miitsĩ klɛŋklɛŋ gbalashihilɛ mli hefatalɔi lɛ anaa yɛ nɔ ko kpakpa he. Shi eji anɔkwale akɛ, enɛ jeee nakai. Adam kɛ Hawa naaa amɛtoigbele lɛ he sɛɛ. Amɛgboi taakɛ bɔ ni Yehowa kɛɛ akɛ ebaaba amɛnɔ lɛ. Ni kɛlɛ, Satan heguɔgbee ni ekɛtutuaa Yehowa lɛ tee nɔ, kɛyashi he ni yɛ afii ohai abɔ komɛi asɛɛ lɛ, ajɛ mumɔŋ atsirɛ bɔfo Yohane ni eŋma akɛ Satan ‘miishishiu jeŋ muu lɛ fɛɛ.’ (Kpojiemɔ 12:9) Bɔni afee ni wɔkaha Satan Abonsam miilaka wɔ lɛ, esa akɛ wɔná hekɛnɔfɔɔ kwraa yɛ anɔkwale ni Yehowa kɛ e-Wiemɔ lɛ ji lɛ mli. Te ooofee tɛŋŋ oná hekɛnɔfɔɔ yɛ Yehowa mli ni owaje hekɛnɔfɔɔ lɛ ni okanya ohe kɛte shi owo lakamɔ kɛ amalei ni e-Henyɛlɔ lɛ kɛbaa lɛ?
Yehowa Le Anɔkwale Lɛ
5, 6. (a) Mɛɛ nilee Yehowa yɔɔ? (b) Mɛɛ gbɛ nɔ akɛ adesai anilee toɔ Yehowa nɔ lɛ he?
5 Biblia lɛ yaa nɔ ewieɔ Yehowa he akɛ mɔ ni “bɔ nii fɛɛ.” (Efesobii 3:9) Lɛ ji ‘Mɔ ni fee ŋwɛi kɛ shikpɔŋ kɛ ŋshɔ kɛ nii fiaa ni yɔɔ amɛmli.’ (Bɔfoi lɛ Asaji 4:24) Akɛni Yehowa ji Bɔlɔ hewɔ lɛ, ele anɔkwale ni kɔɔ nɔ fɛɛ nɔ he. Ákɛ nɔkwɛmɔnɔ lɛ: Susumɔ nuu ni toɔ lɛ diɛŋtsɛ etsu he gbɛjianɔ ni emaa lɛ he okwɛ, etoɔ mplaŋ fɛɛ mplaŋ eshwieɔ shi ni ekɛ plɛkoo káa eko fɛɛ eko mli. Ebaanyɛ ele nɔ fɛɛ nɔ ni yɔɔ shia lɛ mli ni ebaaná shishinumɔ ni da fe nɔ ni mɛi krokomɛi naa. Gbɔmɛi le nibii ni amɛtoɔ he gbɛjianɔ ni amɛfeɔ lɛ. Nakai nɔŋŋ Bɔlɔ lɛ le nɔ fɛɛ nɔ ni esa akɛ ele yɛ nɔ ni ebɔ lɛ he.
6 Gbalɔ Yesaia wie he ni Yehowa nilee lɛ yashɛɔ lɛ he jogbaŋŋ. Wɔkaneɔ akɛ: “Namɔ susuɔ nui lɛ yɛ ekɔkɔŋ, ni ekɛ klakate susuɔ ŋwɛii, ni ekɛ kaa nɔ̃ kaa shikpɔŋ sũ, ni eŋmɛɔ gɔji lɛ yɛ ŋsɛni mli kɛ ŋmeŋmei hu yɛ niŋmɛɛ nii amli? Namɔ kaa Yehowa Mumɔ lɛ ekwɛɔ, ni mɛɛ ŋaawolɔ tsɔɔ lɛ nii? Namɔ ekɛtoɔ ajina, ni etsɔɔ lɛ nii, ni etsɔɔ lɛ kojomɔ gbɛ, ni etsɔɔ lɛ nilee, ni ehaa eleɔ sanesɛɛkɔmɔ gbɛ?” (Yesaia 40:12-14) Eji anɔkwale akɛ, Yehowa ji “Mawu nilelɔ” ni ‘ele nii kɛwula shi.’ (1 Samuel 2:3; Hiob 36:4; 37:16) Kwɛ bɔ ni wɔleee nɔ ko kwraa kɛ́ akɛto he! Yɛ nilee ni mli kwɔ ni adesai ená lɛ fɛɛ sɛɛ lɛ, bɔ ni wɔnuɔ adebɔɔ mli nibii ni wɔnaa lɛ shishi wɔhaa lɛ shɛɛɛ “[Nyɔŋmɔ] egbɛ̀i lɛ anaabunaabui” lɛ ahe. Etamɔ “ablɛbi fioo” kɛ́ akɛto “ehewalɛ shimɔ” lɛ he.—Hiob 26:14.
7. Mɛni David yɔse yɛ Yehowa nilee lɛ he, ni no hewɔ lɛ, mɛni esa akɛ wɔkpɛlɛ nɔ?
7 Akɛni Yehowa bɔ wɔ hewɔ lɛ, shishinumɔ yɛ he akɛ ele wɔ jogbaŋŋ. Maŋtsɛ David yɔse enɛ. Eŋma akɛ: “Yehowa, otao mimli ni ole mi. Ole mishitamɔ kɛ mishitee mli fɛɛ, oyooɔ miyiŋtoo yɛ shɔŋŋ beebe. Otaoɔ minyiɛmɔ kɛ mishikãmɔ fɛɛ mli; ni ole migbɛ̀i fɛɛ. Ejaakɛ wiemɔ ko wiemɔ ko bɛ mililɛi nɔ ní bo, Yehowa oleee fɛɛ.” (Lala 139:1-4) Yɛ anɔkwale mli lɛ, David yɔse akɛ adesai jɛɔ amɛsuɔmɔ mli amɛfeɔ nɔ ni amɛsumɔɔ—Nyɔŋmɔ eha wɔ nyɛmɔ ni wɔkɛboɔ lɛ toi loo wɔkɛgboɔ enɔ toi. (5 Mose 30:19, 20; Yoshua 24:15) Ni kɛlɛ, Yehowa le wɔ babaoo fe bɔ ni wɔ diɛŋtsɛ lɛ wɔle wɔhe. Eesumɔ ni wɔna nɔ ni hi fe fɛɛ, ni ebaanyɛ ekudɔ wɔgbɛ̀i. (Yeremia 10:23) Eji anɔkwale akɛ, tsɔɔlɔ, mɔ ni he esa, loo ŋaawolɔ ko bɛ ni esaa ehe jogbaŋŋ ni ekɛaatsɔɔ wɔ anɔkwale lɛ, ni eha wɔle nii ni wɔná miishɛɛ.
Yehowa Ji Anɔkwafo
8. Te wɔfeɔ tɛŋŋ wɔleɔ akɛ Yehowa ji anɔkwafo lɛ?
8 Eji nɔ kome akɛ aaale anɔkwale lɛ, shi eji nɔ kroko kwraa hu akɛ aaawie anɔkwale be fɛɛ be, ni aye anɔkwa. Ákɛ nɔkwɛmɔnɔ lɛ, Abonsam hala akɛ “edamɔɔɔ anɔkwale lɛ mli.” (Yohane 8:44) Nɔ ni tamɔɔɔ nakai lɛ, Yehowa “anɔkwale fá pii.” (2 Mose 34:6) Ŋmalɛi lɛ ye Yehowa anɔkwayeli lɛ he odase. Bɔfo Paulo ŋma akɛ “Nyɔŋmɔ nyɛŋ emale,” ni akɛ, Nyɔŋmɔ “maleee.” (Hebribii 6:18; Tito 1:2) Anɔkwayeli ji Nyɔŋmɔ su lɛ fã ko ni he hiaa waa diɛŋtsɛ. Wɔbaanyɛ wɔkɛ wɔhe afɔ Yehowa nɔ ejaakɛ anɔkwafo ni; elakaaa enɔkwafoi lɛ kɔkɔɔkɔ.
9. Akɛ Yehowa gbɛi lɛ tsáa anɔkwale yɛ mɛɛ gbɛ nɔ?
9 Yehowa gbɛi lɛ diɛŋtsɛ tsɔɔ akɛ anɔkwafo ji lɛ. Nyɔŋmɔ gbɛi lɛ shishi ji “Ehaa Ebaa Mli.” Enɛ wieɔ Yehowa he akɛ Mɔ ni Haa eshiwoi fɛɛ Baa mli fiofio. Mɔ ko mɔ ko bɛ nakai nyɛmɔ lɛ. Akɛni Yehowa ji Mɔ ni Nɔ Kwɔ Fe Fɛɛ hewɔ lɛ, nɔ ko nɔ ko nyɛŋ atsĩ eyiŋtoi ni eeeha eba mli lɛ naa. Jeee akɛ Yehowa ji anɔkwafo kɛkɛ, shi lɛ pɛ eyɔɔ nyɛmɔ kɛ nilee ni ekɛaaha nɔ fɛɛ nɔ ni ekɛɛ lɛ aba mli anɔkwale.
10. (a) Yoshua na anɔkwafo ni Yehowa ji lɛ yɛ mɛɛ gbɛ nɔ? (b) Mɛɛ Yehowa shiwoi ona akɛ ena emlibaa?
10 Yoshua ji mɛi babaoo ni ye nifeemɔi ni yɔɔ naakpɛɛ ni tsɔɔ akɛ Yehowa ji anɔkwafo lɛ he odase lɛ ateŋ mɔ kome. Beni Yehowa kɛ haomɔi nyɔŋma lɛ ba, ni etsɔ ehiɛ ewie eko fɛɛ eko he lɛ, no mli lɛ Yoshua yɛ Mizraim. Kɛfata nibii krokomɛi ahe lɛ, Yoshua na Yehowa shiwoo akɛ ebaakpɔ̃ Israelbii lɛ kɛjɛ Mizraim ní enyiɛ amɛhiɛ kɛya Shiwoo Shikpɔŋ lɛ nɔ, ni eye Kanaan asraafoi ni he wa ni teɔ shi woɔ lɛ lɛ anɔ kunim lɛ mlibaa. Kɛmiiba Yoshua shihilɛ be lɛ naagbee mli lɛ, ekɛɛ Israel maŋ lɛ mli onukpai lɛ akɛ: “Nyɛle yɛ nyɛtsui mli fɛɛ kɛ nyɛsusuma mli fɛɛ akɛ nibii kpakpai fɛɛ ni Yehowa, nyɛ-Nyɔŋmɔ lɛ, wie yɛ nyɛhewɔ lɛ, emli ekome folo ekaaa shi, fɛɛ eba mli eha nyɛ, emli ekome folo ekaaa shi.” (Yoshua 23:14) Eyɛ mli akɛ okɛ ohiŋmɛii enaaa naakpɛɛ nii ni Yoshua na lɛ moŋ, shi ani ona anɔkwa ni Nyɔŋmɔ shiwoi lɛ ji yɛ oshihilɛ mli lɛ mli niiashikpamɔ?
Yehowa Jieɔ Anɔkwale lɛ Kpo
11. Mɛni tsɔɔ akɛ Yehowa miisumɔ ni ekɛ adesai awie anɔkwale?
11 Feemɔ fɔlɔ ko ni yɔɔ nilee babaoo shi ekɛ ebii lɛ ewieee lɛ he nɔkwɛmɔnɔ okwɛ. Ani odaaa shi akɛ Yehowa tamɔɔɔ nakai? Yehowa jɛɔ esuɔmɔ mli ekɛ adesai wieɔ, ni efeɔ enɛ yɛ mlihilɛ mli. Ŋmalɛi lɛ tsɛɔ lɛ ‘Tsɔɔlɔ Kpeteŋkpele.’ (Yesaia 30:20) Ejɛɔ emlihilɛ lɛ mli ekɛ mɛi ni sumɔɔɔ ni amɛboɔ lɛ toi lɛ po gbaa sane. Ákɛ nɔkwɛmɔnɔ lɛ, akɛ nitsumɔ wo Ezekiel dɛŋ koni eyashiɛ etsɔɔ mɛi ni Yehowa le akɛ amɛboŋ toi lɛ. Yehowa kɛɛ akɛ: “Gbɔmɔ bi, yiŋ ní oya Israel we lɛ ŋɔɔ, ní oyawie miwiemɔi lɛ otsɔɔ amɛ.” Kɛkɛ ni ebɔ kɔkɔ akɛ: ‘Amɛsumɔŋ akɛ amɛaaboo toi, ejaakɛ amɛsumɔɔɔ akɛ amɛboɔ mi toi; ejaakɛ Israel we lɛ fɛɛ ewaje amɛhiɛŋtsei, ni amɛtsui hu wa.’ Eji nitsumɔ ni wa, shi Ezekiel tsu he nii yɛ anɔkwayeli mli, ni yɛ nakai feemɔ mli lɛ ejie Yehowa musuŋtsɔlɛ lɛ kpo. Kɛ́ okɛ shihilɛ ko ni mli wa kpe yɛ shiɛmɔ nitsumɔ lɛ mli ni okɛ ohiɛ fɔ Nyɔŋmɔ nɔ lɛ, no lɛ obaanyɛ oná hekɛnɔfɔɔ akɛ ebaawaje bo taakɛ efee egbalɔ Ezekiel lɛ.—Ezekiel 3:4, 7-9.
12, 13. Mɛɛ gbɛ̀i anɔ Nyɔŋmɔ kɛ adesai ewie yɛ?
12 Yehowa miisumɔ ni “ehere gbɔmɛi fɛɛ yiwala, koni amɛshɛ anɔkwale lɛ lee mli.” (1 Timoteo 2:4) Ewie kɛtsɔ gbalɔi, bɔfoi, kɛ esuɔmɔ Bi, Yesu Kristo po nɔ. (Hebribii 1:1, 2; 2:2) Yesu kɛɛ Pilato akɛ: “Mi lɛ, enɛ hewɔ afɔ́ mi ni enɛ hewɔ nɔŋŋ miba je lɛ mli, koni mibaye anɔkwale lɛ he odase. Mɔ fɛɛ mɔ ni jɛ anɔkwale lɛ mli lɛ nuɔ migbee.” Pilato ná hegbɛ ni jara wa ni ekɛaakase anɔkwale ni kɔɔ Yehowa gbɛjianɔtoo kɛha yiwalaheremɔ he lɛ kɛjɛ Nyɔŋmɔ Bi lɛ ŋɔɔ tɛ̃ɛ. Shi kɛlɛ, Pilato leee anɔkwale lɛ, ni esumɔɔɔ ni ekaseɔ kɛjɛɔ Yesu ŋɔɔ. Yɛ no najiaŋ lɛ, Pilato kɛ jwɛŋmɔ fɔŋ ha hetoo akɛ: “Mɛni ji anɔkwale?” (Yohane 18:37, 38) Mɛɛ mɔbɔ sane nɛ! Ni kɛlɛ, mɛi babaoo bo anɔkwale ni Yesu jaje lɛ toi. Ekɛɛ ekaselɔi lɛ akɛ: “Ajɔɔ nyɛhiŋmɛii lɛ, akɛ amɛmiina nii, kɛ nyɛtoii lɛ, akɛ amɛmiinu nii.”—Mateo 13:16.
13 Kɛtsɔ Biblia lɛ nɔ lɛ, Yehowa ebaa anɔkwale lɛ yi ni eha gbɔmɛi ni yɔɔ he fɛɛ he lɛ anine eshɛ nɔ. Biblia lɛ jieɔ nibii akpo taakɛ amɛji diɛŋtsɛ lɛ. Ewieɔ Nyɔŋmɔ sui, yiŋtoi, kɛ mlai ahe, kɛ agbɛnɛ hu shihilɛ diɛŋtsɛ mli ni adesai yɔɔ mli lɛ he. Yesu kɛɛ Yehowa yɛ sɔlemɔ mli akɛ: “Owiemɔ lɛ anɔkwaleŋ.” (Yohane 17:17) Enɛ hewɔ lɛ, Biblia lɛ ji wolo srɔto ko. No pɛ ji nɔ ni ajɛ Nyɔŋmɔ, ní le nibii fɛɛ lɛ mumɔ mli ni aŋma. (2 Timoteo 3:16) Eji nikeenii ni jara wa kɛha adesai, nɔ ko ni Nyɔŋmɔ tsuji buɔ akɛ ejara wa waa. Nilelɔi ji wɔ kɛji wɔkane lɛ daa gbi.
Hiɛmɔ Anɔkwale lɛ Mli Kpɛŋŋ
14. Mɛni ji nibii komɛi ni Yehowa ekɛɛ akɛ ebaafee, ni mɛni hewɔ esa akɛ wɔhe wɔye?
14 Esa akɛ wɔkɛ hiɛdɔɔ asusu nɔ ni Yehowa kɛɔ wɔ yɛ e-Wiemɔ lɛ mli lɛ he. Eji mɔ ni ekɛɔ akɛ eji lɛ, ni ebaafee nɔ ni ekɛɔ akɛ ebaafee lɛ. Wɔyɛ nɔ fɛɛ nɔ ni wɔɔdamɔ nɔ ni wɔkɛ wɔhe afɔ̃ Nyɔŋmɔ nɔ. Wɔbaanyɛ wɔhe wɔye kɛji Yehowa kɛɛ wɔ akɛ ‘ebaatɔ owele yɛ mɛi ni leee Nyɔŋmɔ kɛ mɛi ni booo wɔ-Nuŋtsɔ Yesu sanekpakpa lɛ toi lɛ anɔ.’ (2 Tesalonikabii 1:8) Wɔbaanyɛ wɔhe Yehowa wiemɔ lɛ hu wɔye beni ekɛɛ akɛ, esumɔɔ mɛi ni tiuɔ jalɛnifeemɔi asɛɛ lɛ, beni ekɛɛ akɛ ebaaha mɛi ni náa emli hemɔkɛyeli lɛ naanɔ wala lɛ, kɛ beni ekɛɛ akɛ ebaajie nɔnaa, bolɔmɔ, kɛ gbele po kɛya lɛ. Yehowa tsɔ gbɛtsɔɔmɔ nɛɛ ni ekɛha bɔfo Yohane lɛ nɔ ema bɔ ni abaanyɛ akɛ he afɔ naagbee shiwoo nɛɛ nɔ lɛ nɔ mi akɛ: “Ŋmaa, ejaakɛ nɛkɛ wiemɔi nɛɛ anɔkwa wiemɔi ni ma shi shiŋŋ ni.”—Kpojiemɔ 21:4, 5; Abɛi 15:9; Yohane 3:36.
15. Mɛni ji amalei komɛi ni Satan woɔ he hewalɛ?
15 Satan tamɔɔɔ Yehowa kwraa. Yɛ nɔ najiaŋ ni eeeha mɛi ale nii lɛ, elakaa amɛ. Bɔni afee ni Satan nine ashɛ oti ni ma ehiɛ akɛ ebaajie gbɔmɛi kɛjɛ anɔkwa jamɔ he lɛ nɔ lɛ, ewoɔ amalei babaoo he hewalɛ. Ákɛ nɔkwɛmɔnɔ lɛ, Satan baaha wɔhé wɔye akɛ Nyɔŋmɔ kɛ wɔteŋ jɛkɛ waa ni enuuu piŋmɔ ni wɔpiŋɔ yɛ shikpɔŋ lɛ nɔ lɛ he. Ni kɛlɛ, Biblia lɛ tsɔɔ akɛ Yehowa susuɔ ebɔɔ nii lɛ ahe waa diɛŋtsɛ ni eyeɔ ŋkɔmɔ yɛ efɔŋ kɛ nɔnaa he. (Bɔfoi lɛ Asaji 17:24-30) Satan sumɔɔ hu ni gbɔmɛi ahé aye akɛ mumɔŋ nibii asɛɛtiumɔ he bɛ sɛɛnamɔ. Nɔ ni tamɔɔɔ nakai lɛ, Ŋmalɛi lɛ maa nɔ mi ehaa wɔ akɛ, “Nyɔŋmɔ jeee mɔ ni yeɔ sane ni ejaaa ni ehiɛ aaakpa nyɛnitsumɔ lɛ nɔ kɛ suɔmɔ deŋme ni nyɛgbo yɛ egbɛi lɛ ahewɔ.” Kɛfata he lɛ, amɛtsɔɔ yɛ faŋŋ mli akɛ, “eji mɛi ni taoɔ esɛɛ gbɛ lɛ anyɔmɔwolɔ.”—Hebribii 6:10; 11:6.
16. Mɛni hewɔ esa akɛ Kristofoi aha amɛhiɛ ahi amɛhe nɔ ni amɛhiɛ anɔkwale lɛ mli kpɛŋŋ lɛ?
16 Bɔfo Paulo ŋma yɛ Satan he akɛ: “Je nɛŋ nyɔŋmɔ lɛ eshwila mɛi ní heee yeee lɛ ajwɛŋmɔi lɛ . . . , koni Kristo, ni ji Nyɔŋmɔ subaŋ lɛ, anunyam sanekpakpa lɛ la ní tsoɔ lɛ akakpɛ́ miiha amɛ.” (2 Korintobii 4:4) Taakɛ Hawa ji lɛ, Satan Abonsam nyɛɔ elakaa mɛi komɛi kwraa kɛmɔɔ shi. Mɛi krokomɛi hu nyiɛɔ Adam, mɔ ni alakaaa lɛ shi moŋ eje gbɛ ehala toigbele gbɛ lɛ sɛɛ. (Yuda 5, 11) No hewɔ lɛ, ehe miihia ni Kristofoi afi shi shiŋŋ ni amɛhiɛ anɔkwale lɛ mli kpɛŋŋ.
Yehowa Biɔ “Hemɔkɛyeli ni Apasa ko Bɛ Mli”
17. Mɛni esa akɛ wɔfee koni wɔná Yehowa nɔkpɛlɛmɔ?
17 Akɛni Yehowa yeɔ anɔkwa yɛ egbɛ̀i fɛɛ mli hewɔ lɛ, ekpáa gbɛ akɛ mɛi ni jáa lɛ lɛ hu baaye anɔkwa. Lalatsɛ lɛ ŋma akɛ: “Yehowa, namɔ aaato obuu lɛŋ? Namɔ aaahi ogɔŋ krɔŋkrɔŋ lɛ nɔ? Mɔ ni nyiɛɔ pɛpɛɛpɛ ni etsuɔ jalɛ nii, ni ejɛɔ etsui mli ewieɔ anɔkwale.” (Lala 15:1, 2) Ŋwanejee ko bɛ he akɛ kɛha Yudafoi ni kɛ nakai wiemɔi lɛ lá lala lɛ, Yehowa gɔŋ krɔŋkrɔŋ ni atsĩ tã lɛ kaiɔ amɛ Zion Gɔŋ lɛ, he ni Maŋtsɛ David kɛ kpaŋmɔ adeka lɛ ba buu ni eshi yɛ jɛmɛ lɛ mli lɛ. (2 Samuel 6:12, 17) Gɔŋ lɛ kɛ buu lɛ haa akaiɔ he ni Yehowa hi yɛ mfonirifeemɔŋ lɛ. Jɛmɛ ji he ni gbɔmɛi lɛ baanyɛ abɛŋkɛ Nyɔŋmɔ bɔni afee ni amɛbi enɔkpɛlɛmɔ.
18. (a) Mɛni naanyo ni akɛ Nyɔŋmɔ bɔɔ lɛ biɔ? (b) Mɛni abaasusu he yɛ nikasemɔ ni nyiɛ sɛɛ lɛ mli?
18 Esa akɛ mɔ fɛɛ mɔ ni sumɔɔ Yehowa naanyobɔɔ lɛ awie anɔkwale lɛ ‘kɛjɛ etsui mli,’ jeee kɛ enaabu kɛkɛ. Esa akɛ Nyɔŋmɔ anɔkwa nanemɛi lɛ afee mɛi ni hiɛ anɔkwa tsui, ni amɛtsɔɔ akɛ amɛyɛ “hemɔkɛyeli ni apasa ko bɛ mli,” ejaakɛ anɔkwayeli nifeemɔi jɛɔ tsui lɛ mli. (1 Timoteo 1:5; Mateo 12:34, 35) Nyɔŋmɔ naanyo lɛ efeee kɔ̃dɔ̃mɔ loo lakamɔ nii, ejaakɛ “mɛi ní maleɔ lɛ . . . Yehowa miihi amɛ.” (Lala 5:7) Yehowa Odasefoi ni yɔɔ jeŋ fɛɛ lɛ bɔɔ mɔdɛŋ waa koni amɛwie anɔkwale yɛ amɛ-Nyɔŋmɔ lɛ kasemɔ mli. Nikasemɔ ni nyiɛ sɛɛ lɛ baapɛi sane nɛɛ mli.
Te Obaaha Hetoo Oha Tɛŋŋ?
• Mɛni hewɔ Yehowa le anɔkwale ni kɔɔ nɔ fɛɛ nɔ he lɛ?
• Mɛni tsɔɔ akɛ Yehowa ji anɔkwafo?
• Yehowa ejie anɔkwale lɛ kpo yɛ mɛɛ gbɛ nɔ?
• Yɛ nɔ ni kɔɔ anɔkwale lɛ he lɛ, mɛni abiɔ yɛ wɔdɛŋ?
[Nikasemɔ lɛ he Sanebimɔi]
[Mfonirii ni yɔɔ baafa 10]
Nyɔŋmɔ anɔkwafo lɛ le nɔ fɛɛ nɔ ni kɔɔ nɔ ni ebɔ lɛ he
[Mfonirii ni yɔɔ baafa 12, 13]
Yehowa shiwoi lɛ baaba mli anɔkwale