Anɔkwa Jamɔ Fee Weku ko Ekome

MARIA eye afii 13, beni etsɛkwɛ̃ ko gba ekɛ enyɛmi yoo fioo ko ni gbɛi ji Lucy lɛ Yehowa he sane, ni egbála Paradeiso shikpɔŋ he hiɛnɔkamɔ lɛ hu mli etsɔɔ amɛ lɛ. Akɛni enɛ tée amɛmiishɛɛ shi hewɔ lɛ, amɛfata ehe kɛtee Yehowa Odasefoi a-Maŋtsɛyeli Asa lɛ nɔ. Maria ná niiamlitsɔɔmɔ ni mli ka shi faŋŋ ni akɛha yɛ jɛmɛ lɛ he miishɛɛ waa. Eyɛ srɔto kwraa yɛ sɔlemɔ lɛ ní amɛfeee nɔ ko nɔ ko fe lala pɛ amɛlaa lɛ he! Etsɛɛɛ ni gbekɛbii lɛ kɛ Yehowa Odasefoi lɛ ateŋ mɔ ko bɔi Biblia lɛ kasemɔ.

Hugo, ni ji amɛnyɛmi nuu onukpa lɛ nyaa jeŋ nilee kɛ sutsakemɔ he. Etsɛɔ ehe akɛ eji mɛi ni heee yeee akɛ Nyɔŋmɔ yɛ lɛ ateŋ mɔ kome. Shi beni etsuɔ asraafoi anitsumɔ lɛ, ekane wolo ni ji Life—How Did It Get Here? By Evolution or by Creation? lɛ. * Ená hetooi eha sanebimɔi ni jamɔ ko kwraa bɛ ni baanyɛ aha lɛ hetooi lɛ. Beni egbe esraafoi anitsumɔ lɛ naa lɛ, ebɔi hemɔkɛyeli hee ni ená yɛ Nyɔŋmɔ mli lɛ wajemɔ kɛtsɔ Biblia lɛ kasemɔ kɛ kpeei ni ekɛ enyɛmimɛi yei lɛ bɔi yaa lɛ nɔ. Abaptisi Maria kɛ Lucy yɛ afi 1992 lɛ mli, yɛ afii enyɔ sɛɛ beni amɛnu anɔkwale lɛ he klɛŋklɛŋ lɛ, ni abaptisi amɛnyɛmi nuu lɛ yɛ no sɛɛ afii enyɔ mli.

Yɛ nakai beaŋ nɔŋŋ lɛ amɛfɔlɔi etuu amɛhe kwraa amɛha Katolik kusum nifeemɔi, ni amɛnyaaa anɔkwale lɛ he tsɔ. Amɛbuɔ Yehowa Odasefoi akɛ mɛi komɛi ni he yɔɔ mlila, eyɛ mli moŋ akɛ amɛhiɛ sɔɔ Odasefoi oblahii kɛ oblayei ni amɛbii lɛ fɔ̃ɔ amɛ nine kɛbaa shia lɛ ajeŋba kpakpa kɛ hesaamɔ ni yɔɔ hiŋmɛi nɔ lɛ. Kɛfata he lɛ, bei komɛi kɛ́ gbekɛbii lɛ miigba nibii ni amɛyakase yɛ kpeei ashishi lɛ he sane lɛ, fɔlɔi lɛ sumɔɔ ni amɛle emli saji jogbaŋŋ.

Kɛlɛ, fɔlɔi enyɔ lɛ fɛɛ ji mɛi komɛi ni nyaa ayɛkpɛmɔ he. Tsɛ lɛ ji dãatɔlɔ ni yiɔ nyɛ lɛ. Weku lɛ mli miihe agbala. No sɛɛ lɛ tsɛ lɛ yaye otsii enyɔ yɛ tsuŋwoohe yɛ jeŋba gbonyo ni ejie lɛ kpo beni etɔ dãa lɛ hewɔ. Beni eyɔɔ tsuŋwoohe lɛ, eje shishi ebɔi Biblia lɛ kanemɔ. Ehiɛ enikanemɔ lɛ mli ni ehiŋmɛi gba Yesu wiemɔi ni kɔɔ naagbee gbii lɛ ahe okadii lɛ ahe lɛ nɔ. Akɛni tsɛ lɛ kɛ nyɛ lɛ fɛɛ ayiŋ etɛ̃ɛɛ amɛ jogbaŋŋ yɛ enɛ he hewɔ lɛ, amɛtee Maŋtsɛyeli Asa lɛ nɔ ni amɛkpɛlɛ koni akɛ amɛ aje shia Biblia mli nikasemɔ shishi. Beni amɛkase anɔkwale lɛ sɛɛ lɛ, amɛfite ayɛkpɛmɔ woji fɛɛ ni amɛyɔɔ lɛ, ni kɛtsɔ Yehowa gbɛi lɛ tsɛmɔ nɔ lɛ, amɛye amɛhe kɛjɛ daimonioi atutuamɔi amli. Amɛbɔi tsakemɔi wuji afeemɔ yɛ amɛjeŋbai kɛ amɛsui amli.

Ani obaanyɛ osusu bɔ ni ebaata Maria kɛ Lucy tsui mli eha beni amɛkwɛɔ ní Hugo miibaptisi amɛfɔlɔi lɛ yɛ kpokpaa wulu nɔ kpee ko ni afee yɛ Bolivia lɛ shishi yɛ afi 1999 lɛ he lɛ? Aaafee afii nɛɛhu nɛ ni enɛ ba beni Maria kɛ Lucy nu Yehowa kɛ eshiwoi ahe sane klɛŋklɛŋ kwraa lɛ sɛɛ. Amrɔ nɛɛ amɛ fɛɛ amɛyɛ be fɛɛ sɔɔmɔ nitsumɔ lɛ mli, ni Hugo hu fata he. Kwɛ bɔ ni amɛmii eshɛ amɛhe amɛha akɛ anɔkwa jamɔ eha amɛweku lɛ efee ekome!

[Shishigbɛ niŋmaa]