Esumɔɔ Mlihilɛ

MILTON G. HENSCHEL, ni ji Yehowa Odasefoi a-Nɔyeli Kuu lɛ mlinyo ni etsɛ waa lɛ, gbe eshikpɔŋ nɔ sɔɔmɔ lɛ naa yɛ Hɔɔ, March 22, afi 2003. Eye afii 82.

Milton Henschel ji oblanyo beni eyafata Yehowa Odasefoi anitsumɔhe yitso lɛ mli nitsulɔi lɛ ahe lɛ, ni ekɛ anɔkwayeli sɔmɔ nɔ ni fe afii 60. Etsɛɛɛ ni abale lɛ akɛ mɔ ni kpɛɔ eyiŋ yɛ nilee mli kɛ mɔ ni náa Maŋtsɛyeli shiɛmɔ nitsumɔ lɛ he miishɛɛ waa. Ebatsɔ̃ N. H. Knorr, ni no mli lɛ eji Yehowa Odasefoi awoji akalamɔ nitsumɔhe ni yɔɔ Brooklyn lɛ nɔkwɛlɔ lɛ woloŋmalɔ yɛ afi 1939 lɛ mli. Beni Nyɛminuu Knorr bɔi Odasefoi ni yɔɔ jeŋ fɛɛ lɛ ahiɛ nyiɛmɔ yɛ afi 1942 lɛ mli lɛ, ekɛ Nyɛminuu Henschel fata ehe akɛ eyelikɛbualɔ. Nyɛminuu Henschel kɛ Lucille Bennett bote gbalashihilɛ mli yɛ afi 1956 mli, ni amɛyi enyɔ lɛ fɛɛ amɛná shihilɛ mli miishɛɛ ni amɛkɛ emli kaai lɛ kpe.

Nyɛminuu Henschel kɛ Nyɛminuu Knorr tsu nii yɛ ekomefeemɔ mli aahu kɛyashi Knorr gbele mli yɛ afi 1977. Nyɛminuu Henschel fata Nyɛminuu Knorr he kɛfã gbɛ kɛtee maji fe 150 nɔ amɛyasara Yehowa Odasefoi ni yɔɔ je lɛŋ hei srɔtoi lɛ fɛɛ, titri lɛ maŋsɛɛ sanekpakpa shiɛlɔi kɛ mɛi ni sɔmɔɔ yɛ nitsumɔhe niji lɛ amli lɛ ni amɛwo amɛ hewalɛ. Gbɛfãai ni tamɔ nɛkɛ wa waa yɛ bei komɛi amli, ni amɛyɛ oshara po. Beni Nyɛminuu Henschel yaa kpee ko yɛ Liberia yɛ afi 1963 mli lɛ, ekɛ yiwaa ni naa wa waa kpe akɛni ekpɛlɛɛɛ nɔ akɛ ekɛ ehe aaawo maŋhedɔɔ nifeemɔi amli lɛ hewɔ. * Akɛni Nyɛminuu Henschel nijiaŋ ejeee wui hewɔ lɛ, eku esɛɛ kɛtee Liberia ekoŋŋ yɛ nyɔji fioo komɛi asɛɛ koni ekɛ maŋ hiɛnyiɛlɔ lɛ ayakpe koni ekɛtao jamɔ mli heyeli babaoo eha Yehowa Odasefoi ni yɔɔ jɛmɛ lɛ.

Ale Nyɛminuu Henschel jogbaŋŋ akɛ mɔ ko ni tsuɔ saji ahe nii jogbaŋŋ, ni yɔɔ tswãa, ni nuɔ sane shishi yɛ be mli ni etsuɔ saji ni mli wawai ni kaa mɔ lɛ ahe nii lɛ. Enanemɛi lɛ buɔ nibii ahe gbɛjianɔ ni etoɔ jogbaŋŋ, ehiɛshikamɔ, kɛ mɔ naaŋmɔlɔ ni ewoɔ lɛ waa diɛŋtsɛ. Akɛni enyɛɔ ekaiɔ nii jogbaŋŋ hewɔ lɛ, ehaa maŋsɛɛ sanekpakpa shiɛlɔi babaoo ni yɔɔ je lɛŋ hei srɔtoi lɛ náa miishɛɛ yɛ bɔ ni ekaiɔ amɛgbɛi, ewieɔ wiemɔ kuku kome ko loo enyɔ ko yɛ maŋ ni amɛyɔɔ mli lɛ wiemɔ mli, kɛ naaŋmɔlɔwoo wiemɔ—ni nyɛɔ ejɛɔ edaaŋ amrɔ nɔŋŋ lɛ hewɔ.

Mika 6:8 (NW) kaiɔ wɔ akɛ Yehowa Nyɔŋmɔ miisumɔ ni “wɔsumɔ mlihilɛ.” Abaakai Milton Henschel yɛ okadi ni eto yɛ enɛ mli lɛ hewɔ. Yɛ egbɛnaa nii ni tsii lɛ fɛɛ sɛɛ lɛ, ehi shi akɛ mɔ ni anyɛɔ abɛŋkɛɔ lɛ, mɔ ni he jɔ, mɔ ni mli hi. Efɔɔ kɛɛmɔ akɛ, “Kɛji akɛ oosusu bɔ ni oookpɛ oyiŋ oha yɛ sane ko he lɛ, kaimɔ akɛ, mlihilɛ gbɛ ji gbɛ ni ja.” Yɛ be mli ni wɔyeɔ awerɛho yɛ nyɛmi nuu ni wɔsumɔɔ lɛ nɛɛ gbele he lɛ, wɔmli filiɔ wɔ akɛ eŋmɛ etsui shi yɛ anɔkwayeli mli kɛyashi naagbee, kɛ nɔmimaa akɛ enine baashɛ enyɔmɔwoo ni ji, “wala akekere lɛ” nɔ.—Kpojiemɔ 2:10.

[Shishigbɛ niŋmaa]

[Mfoniri ni yɔɔ baafa 31]

M. G. Henschel kɛ N. H. Knorr

[Mfoniri ni yɔɔ baafa 31]

Ekɛ eŋa, Lucille