Nyɔŋmɔ Susumɔ yɛ Gbohii Ahe

SUƆLƆ ko gbele ji nɔ ko ni haoɔ mɔ waa diɛŋtsɛ. Bɔ ni mɔ nuɔ he akɛ enine enyɛ shi, ehe efee shoo, kɛ bɔ ni mɔ nuɔ he akɛ nii eŋmɛɛ lɛ lɛ ji nɔ ko ni naa wa waa. Suɔlɔ ko gbele baanyɛ aha mɔ anu he akɛ ebɛ yelikɛbualɔ ko, ejaakɛ yɛ nii abɔ ni mɔ lɛ yɔɔ lɛ fɛɛ sɛɛ lɛ, hewalɛ ni eyɔɔ, loo hewalɛ ni enáa yɛ mɛi anɔ lɛ, mɔ ko mɔ ko bɛ shikpɔŋ lɛ nɔ ŋmɛnɛ ni baanyɛ etee gbonyo ko shi kɛba wala mli ekoŋŋ.

Shi kɛlɛ, esoro bɔ ni wɔ-Bɔlɔ lɛ susuɔ saji ahe ehaa. Akɛni ebɔ klɛŋklɛŋ adesa lɛ kɛjɛ shikpɔŋ sũ mli hewɔ lɛ, ebaanyɛ esaa ebɔ mɔ ni egbo lɛ hu kɛba wala mli ekoŋŋ. Yɛ enɛ hewɔ lɛ, Nyɔŋmɔ baanyɛ abu gbohii lɛ tamɔ nɔ ni amɛhiɛ kamɔ nɔŋŋ. Beni Yesu wieɔ tsuji anɔkwafoi ni hi shi yɛ blema beaŋ lɛ ahe lɛ, ekɛɛ akɛ: “Yɛ [Nyɔŋmɔ] susumɔ naa lɛ amɛ fɛɛ amɛhiɛ kamɔ.”—Luka 20:38, NW shishigbɛ niŋmaa.

Beni Yesu yɔɔ shikpɔŋ lɛ nɔ lɛ, aha lɛ hewalɛ ní ekɛtee gbohii ashi. (Yohane 5:21) No hewɔ lɛ ehiɛ susumɔ ni e-Tsɛ lɛ yɔɔ yɛ mɛi ni egboi akɛ anɔkwafoi lɛ ahe lɛ nɔŋŋ eko. Ákɛ nɔkwɛmɔnɔ lɛ, beni Yesu naanyo Lazaro gbo lɛ, ekɛɛ ekaselɔi lɛ akɛ: “Miiya ni mayatsĩɛ lɛ yɛ wɔ̀ lɛ mli.” (Yohane 11:11) Yɛ adesai ashishinumɔ naa lɛ, Lazaro egbo, shi yɛ Yehowa kɛ Yesu hiɛ lɛ, Lazaro ewɔ.

Yɛ Yesu Maŋtsɛyeli nɔyeli lɛ mli lɛ, “jalɔi kɛ mɛi ni ejaaa fɛɛ baate shi.” (Bɔfoi lɛ Asaji 24:15) Yɛ naagbee mli lɛ, mɛi ni átee amɛ shi lɛ nine baashɛ ŋwɛi tsɔsemɔ nɔ, ni amɛbaaná gbɛkpamɔ akɛ amɛaahi shi kɛya naanɔ yɛ shikpɔŋ lɛ nɔ.—Yohane 5:28, 29.

Hɛɛ, suɔlɔ ko gbele baanyɛ ekɛ haomɔi ni naa wa kɛ awerɛhoyeli ni ekolɛ ebaahi shi afii babaoo lɛ aba. Ni kɛlɛ, ní wɔɔsusu mɛi ni egboi lɛ ahe yɛ Nyɔŋmɔ susumɔ naa lɛ baanyɛ ashɛje wɔmii waa, ni eha wɔná hiɛnɔkamɔ.—2 Korintobii 1:3, 4.