Ani Obuɔ Nanemɛi Heyelilɔi ni Amɛgbɔlɔ lɛ akɛ Amɛjara Wa?

BENI blema Israelbii lɛ kɛ Nyɔŋmɔ yɔɔ wekukpaa kpaŋmɔ mli lɛ, afã amɛ akɛ: “Tee shi yɛ yiteŋwajiatsɛ hiɛ, ni owo nuumo hiɛ nyam, ni oshe o-Nyɔŋmɔ lɛ.” (3 Mose 19:32) No hewɔ lɛ, mɛi ni egbɔlɔ lɛ ni aaajie bulɛ kpo atsɔɔ amɛ lɛ ji gbɛnaa nii ni yɔɔ krɔŋkrɔŋ, ni ekɛ he shi ni abaa ahaa Nyɔŋmɔ lɛ yɛ tsakpaa. Eyɛ mli akɛ Kristofoi ni yɔɔ ŋmɛnɛ lɛ bɛ Mose Mla lɛ shishi dɔŋŋ moŋ, shi ekaiɔ wɔ akɛ Yehowa buɔ mɛi ni egbɔlɔ ni sɔmɔɔ lɛ lɛ ákɛ mɛi ni amɛhe hiaa ni amɛjara wa. (Abɛi 16:31; Hebribii 7:18) Ani wɔjieɔ Yehowa susumɔ lɛ kpo? Ani wɔbuɔ wɔ Kristofoi nyɛmimɛi hii kɛ yei ni egbɔlɔ lɛ akɛ amɛjara wa?

Ebu Enaanyo ni Egbɔ lɛ akɛ Ejara Wa Waa

Anaa Biblia mli sane ko ni maa bulɛ ni ajieɔ lɛ kpo atsɔɔ mɛi ni egbɔlɔ lɛ nɔ mi lɛ yɛ Maŋtsɛmɛi Awolo ni Ji Enyɔ lɛ mli. Ekɛ bɔ ni fee ni gbalɔ Elisha baye gbalɔ Elia ni ye gbalɔ Elisha onukpa lɛ najiaŋ lɛ mlitsɔɔmɔ haa. Susumɔ nɔ ni ba yɛ Elia naagbee gbi akɛ gbalɔ yɛ Israel maŋtsɛyeli akutsei nyɔŋma lɛ mli lɛ he okwɛ.

Nakai gbi lɛ, Yehowa fã gbalɔ ni egbɔ lɛ koni efã gbɛ kɛjɛ Gilgal kɛya Betel, kɛjɛ Betel kɛya Yeriko, kɛ agbɛnɛ kɛjɛ Yeriko kɛya Yordan Faa lɛ naa. (2 Maŋtsɛmɛi 2:1, 2, 4, 6) Yɛ nakai gbɛfãa ni miihe ashɛ kilomitai 50 lɛ mli lɛ, Elia wo Elisha hewalɛ shii etɛ koni efɔ̃ɔ esɛɛ nyiɛmɔ. Shi kɛlɛ, taakɛ bɔ ni oblayoo Rut ekpɛlɛɛɛ akɛ eeeshi Naomi yɛ afii ohai abɔ ni tsɔ hiɛ lɛ mli lɛ, nakai nɔŋŋ Elisha ekpɛlɛɛɛ akɛ eeeshi gbalɔ nuumo lɛ. (Rut 1:16, 17) Elisha wie shii etɛ akɛ: “Akɛ nɔ̃ kɛ̃ ni Yehowa hiɛ kã ni osusuma hu hiɛ kã nɛɛ, mishiiio!” (2 Maŋtsɛmɛi 2:2, 4, 6) Nakai be lɛ mli lɛ, Elisha kɛ aaafee afii ekpaa eye ebua Elia momo. Ni kɛlɛ, eesumɔ ni ekɛ Elia asɔmɔ be saŋŋ bɔ ni eeenyɛ. Yɛ anɔkwale mli lɛ, sane lɛ kɛfata he akɛ: “Eba mli akɛ, beni amɛnyiɛ kɛyaa ni amɛwie lolo lɛ, naa . . . Elia tsɔ . . . mli kɛtee ŋwɛi.” (Kuku 11) Elia kɛ Elisha hiɛ sanegbaa kɛyashi Elia sɔɔmɔ nitsumɔ lɛ ba naagbee kwraa yɛ Israel. Eka shi faŋŋ akɛ, gbalɔ oblanyo lɛ miishwe ni ená gbɛtsɔɔmɔ kɛ hewalɛwoo babaoo bɔ ni eeenyɛ kɛjɛ gbalɔ nuumo ni yɔɔ niiashikpamɔ babaoo lɛ ŋɔɔ. Eyɛ faŋŋ akɛ, ebu enaanyo ni egbɔ lɛ akɛ ejara wa waa.

‘Ákɛ Tsɛmɛi kɛ Nyɛmɛi’

Ewaaa akɛ wɔɔna nɔ hewɔ ni Elisha sumɔɔ gbalɔ nuumo lɛ akɛ enaanyo lɛ—akɛ emumɔŋ  tsɛ po. (2 Maŋtsɛmɛi 2:12) Beni eshwɛ fioo ni Elia nitsumɔ yɛ Israel lɛ baaba naagbee lɛ, ekɛɛ Elisha akɛ: “Bi mi nɔ ni mifee mihao, dani aŋɔ mi kɛjɛ oŋɔɔ kɛya!” (Kuku 9) No hewɔ lɛ, Elia susu mɔ ni baaye esɛɛ lɛ mumɔŋ hilɛ-kɛhamɔ kɛ Nyɔŋmɔ nitsumɔ lɛ nɔtsamɔ lɛ he kɛyashi naagbee kwraa.

Ŋmɛnɛ, eji nɔ ni haa mɔ tsui nyaa akɛ wɔɔna ni wɔ Kristofoi hii kɛ yei ni egbɔlɔ lɛ miijie mɔ hesusumɔ ni tsɛmɛi kɛ nyɛmɛi jieɔ lɛ kpo lɛ nɔŋŋ kpo yɛ be mli ni amɛjɛɔ mlihilɛ mli amɛkɛ amɛnilee kɛ ŋaa ni amɛyɔɔ lɛ eko haa oblahii kɛ oblayei lɛ. Ákɛ nɔkwɛmɔnɔ lɛ, mɛi ni kɛ be babaoo ehi shi akɛ mɛi ni kɛ amɛhe eha ni sɔmɔɔ yɛ Yehowa Odasefoi anitsumɔhe niji lɛ amli lɛ jɛɔ amɛsuɔmɔ mli amɛyeɔ amɛbuaa Betel weku lɛ mli bii heei lɛ koni amɛná hesaai ni he hiaa amɛ koni amɛkɛtsu amɛsɔɔmɔ lɛ he nii lɛ. Nakai nɔŋŋ nɔkwɛlɔi gbɛfalɔi kɛ amɛŋamɛi ní kɛ afii babaoo esara asafoi lɛ náa he miishɛɛ akɛ amɛaagba mɛi ni atsɔseɔ amɛ akɛ sɔɔlɔi gbɛfalɔi lɛ niiashikpamɔi babaoo ni amɛyɔɔ lɛ. Kɛfata he lɛ, ayɛ nyɛmimɛi hii kɛ yei ni egbɔlɔ ní kɛ afii nyɔŋmai abɔ esɔmɔ Yehowa yɛ anɔkwayeli mli ni kɛ miishɛɛ woɔ asafo lɛ mli bii heei lɛ ŋaa kpakpa ní amɛgbaa amɛ niiashikpamɔi kpakpai yɛ Yehowa Odasefoi asafoi srɔtoi ni yɔɔ jeŋ fɛɛ lɛ mli.—Abɛi 2:7; Filipibii 3:17; Tito 2:3-5.

Kristofoi ni asumɔɔ ni egbɔlɔ nɛɛ ni jɛɔ amɛtsui mli amɛsusuɔ mɛi ahe lɛ haa mɛi ni egbɔlɔ ni tamɔ nɛkɛ ni aaajie bulɛ kpo atsɔɔ amɛ lɛ bafeɔ miishɛɛ nɔ̃ diɛŋtsɛ. No hewɔ lɛ, wɔmiisumɔ ni wɔkase Elisha nɔkwɛmɔnɔ lɛ yɛ wɔnanemɛi heyelilɔi ni egbɔlɔ lɛ ni wɔɔjie bulɛ ni mli kwɔ kpo wɔtsɔɔ amɛ lɛ mli. Taakɛ bɔfo Paulo kaiɔ wɔ lɛ, nyɛhaa wɔyaa nɔ wɔbua ‘nuu onukpa akɛ tsɛ’ kɛ “yei onukpai lɛ akɛ nyɛmɛi.” (1 Timoteo 5:1, 2) Kɛ́ wɔfee nakai lɛ, wɔbaaye wɔbua koni Kristofoi asafo ni yɔɔ jeŋ fɛɛ lɛ atsu nii jogbaŋŋ ni eshwere.

[Mfoniri ni yɔɔ baafa 30]

Elisha miisumɔ ni ekɛ Elia asɔmɔ be saŋŋ bɔ ni eeenyɛ

[Mfonirii ni yɔɔ baafa 31]

Kristofoi ni egbɔlɔ lɛ ahe yɛ sɛɛnamɔ waa kɛha oblahii kɛ oblayei