Jiemɔ Yehowa yi ‘yɛ Asafo lɛ Teŋ’

KRISTOFOI akpeei ji gbɛjianɔ ni Yehowa eto koni eha ewebii lɛ ahe awa yɛ mumɔŋ. Wɔjieɔ hiɛsɔɔ ni wɔyɔɔ kɛha gbɛjianɔi ni Yehowa eto lɛ kpo kɛtsɔ kpeei ni wɔyaa daa lɛ nɔ. Agbɛnɛ hu, ehaa wɔnáa hegbɛ koni ‘wɔwo wɔnyɛmimɛi lɛ hewalɛ kɛha suɔmɔ kɛ nitsumɔi kpakpai,’ ni ji gbɛ titri ni wɔtsɔɔ nɔ wɔjieɔ suɔmɔ kpo wɔtsɔɔ wɔhe lɛ. (Hebribii 10:24; Yohane 13:35) Shi kɛlɛ, te wɔɔfee tɛŋŋ wɔwo wɔnyɛmimɛi lɛ hewalɛ yɛ kpeei ashishi lɛ?

Jajemɔ yɛ Mɛi Ateŋ

Maŋtsɛ David ŋma kɛkɔ lɛ diɛŋtsɛ ehe akɛ: “Majaje ogbɛi lɛ matsɔɔ minyɛmimɛi lɛ; asafo teŋ makafoo yɛ. Bo jɛ ni mijieɔ oyi yɛ asafo kpele mli [lɛ].” “Madao shi yɛ asafo kpele mli, majie oyi yɛ mɛi pii ateŋ.” “Mijaje jalɛ he sane yɛ asafo kpele lɛ mli; naa, mimuako minaa.”—Lala 22:23, 26; 35:18; 40:10.

Yɛ bɔfo Paulo gbii lɛ amli lɛ, kɛ́ Kristofoi bua amɛhe naa kɛha jamɔ lɛ, nakai nɔŋŋ amɛ hu amɛwieɔ hemɔkɛyeli ni amɛyɔɔ yɛ Yehowa mli lɛ he wiemɔi kɛ wiemɔi ni kɔɔ enunyam lɛ he. Yɛ nɛkɛ gbɛ nɔ lɛ, amɛwowoi amɛhe hewalɛ ni amɛkanyakanyaa amɛhe kɛha suɔmɔ kɛ nitsumɔi kpakpai. Yɛ wɔgbii nɛɛ amli, ni ji afii ohai abɔ yɛ David kɛ Paulo sɛɛ lɛ, ‘wɔmiina akɛ Yehowa gbi lɛ miibɛŋkɛ’ lɛɛlɛŋ. (Hebribii 10:24, 25) Satan nibii agbɛjianɔtoo lɛ miididã kɛmiiya hiɛkpatamɔ mli, ni naagbai kã he eefa. ‘Tsuishitoo ehia wɔ’ fe bei fɛɛ ni eho. (Hebribii 10:36) Kɛ  jeee wɔnyɛmimɛi lɛ ni lɛ, belɛ namɔ aaanyɛ awo wɔ hewalɛ ni wɔto wɔtsui shi?

Ŋmɛnɛ, taakɛ eji yɛ bei ni tsɔ hiɛ lɛ mli lɛ, atoɔ gbɛjianɔi koni aŋkroaŋkroi ni amɛji heyelilɔi ajaje amɛhemɔkɛyeli lɛ ‘yɛ asafo lɛ teŋ.’ Hegbɛ kome ni yɔɔ kɛha mɔ fɛɛ mɔ ji ní abaaha saji ni abiɔ toibolɔi yɛ asafoŋ kpeei ashishi lɛ ahetoo. Nyɛkahaa wɔbua sɛɛnamɔi ni baanyɛ ajɛ saji ahetoohamɔ mli aba lɛ akɛ eji nɔ ko bibioo. Ákɛ nɔkwɛmɔnɔ lɛ, saji ahetoohamɔi ni tsɔɔ bɔ ni afeɔ ayeɔ naagbai anɔ loo akwáa naagbai lɛ woɔ wɔnyɛmimɛi lɛ afaishitswaa akɛ amɛkɛ Biblia mli shishitoo mlai baatsu nii lɛ mli hewalɛ. Saji ahetoohamɔi ni gbálaa Biblia mli ŋmalɛi ni atsɛ yisɛɛ ni aŋmalako amɛmli wiemɔi lɛ amli, loo egbalaa jwɛŋmɔ kɛyaa saji ni nine shɛ nɔ kɛtsɔ mɔ diɛŋtsɛ niiamlitaomɔ nɔ lɛ baanyɛ awo mɛi krokomɛi hewalɛ koni amɛná nikasemɔ sui kpakpai.

Esa akɛ le ni wɔle akɛ wɔkɛ mɛi krokomɛi baaná saji ni wɔhaa hetoo yɛ kpeei ashishi lɛ he sɛɛ lɛ akanya Yehowa Odasefoi fɛɛ koni amɛye gbeyeishemɔ loo tsuifaa nɔ. Ehe miihia waa akɛ onukpai kɛ asafoŋ sɔɔlɔi aha saji ahetoo yɛ kpeei ashishi, akɛni aakpa gbɛ akɛ amɛbaanyiɛ hiɛ yɛ kpeei amli ni akɛ he woɔ kɛ agbɛnɛ hu kpeeiyaa mli lɛ hewɔ. Shi kɛlɛ, te mɔ ko aaafee tɛŋŋ eya ehiɛ kɛji ena akɛ nitsumɔ lɛ fã ni etsuɔ ákɛ Kristofonyo nɛɛ ji naagba kɛha lɛ lɛ?

Ŋaawoi ni Baaha Aná Hiɛyaa

Kaimɔ akɛ saji ahetoo ni wɔhaa lɛ fata jamɔ ni wɔkɛhaa Yehowa lɛ he. Kristofonyo yoo ko ni yɔɔ Germany lɛ tsɔɔ bɔ ni esusuɔ saji ahetoo ni ehaa lɛ he ehaa lɛ mli akɛ: “Eji hetoo ni mi diɛŋtsɛ mikɛhaa Satan yɛ mɔdɛŋ ni ebɔɔ koni etsĩ Nyɔŋmɔ webii anaa ni amɛkajaje amɛhemɔkɛyeli lɛ amɛmiitsɔɔ hewɔ.” Nyɛmi nuu ko ni abaptisi lɛ etsɛko ni yɔɔ nakai asafo lɛ nɔŋŋ mli lɛ kɛɛ akɛ: “Yɛ nɔ ni kɔɔ saji ahetoohamɔ he lɛ, misɔleɔ waa.”

Saamɔ ohe jogbaŋŋ. Kɛ́ otsɔɔɔ hiɛ okaseee saji lɛ, ebaawa kɛha bo akɛ obaaha saji ahetoo, ni osaji ahetooi lɛ mɔŋ shi jogbaŋŋ. Akɛ bɔ ni ahaa saji ahetoo ahaa yɛ kpeei ashishi lɛ he ŋaawoo eha yɛ Ná Teokrase Sɔɔmɔ Tsɔsemɔ lɛ He Sɛɛ wolo lɛ, baafa 70 lɛ mli. *

Okɛfee oti ni ma ohiɛ akɛ kɛ hooo kwraa lɛ obaaha sane kome hetoo yɛ kpee fɛɛ kpee shishi. Enɛ tsɔɔ akɛ esa akɛ okase saji ahetoo babaoo, akɛni onine nɔ ni obaafɔ womɔ lɛ baagbele gbɛ babaoo koni mɔ ni kwɛɔ nikasemɔ lɛ nɔ lɛ atsɛ bo lɛ hewɔ. Ekolɛ obaasumɔ ni otsɔ hiɛ okɛɛ lɛ nɔ̃ sanebimɔ ni osaa ohe akɛ obaaha hetoo lɛ. Enɛ yeɔ ebuaa waa titri lɛ kɛji oji mɔ hee. Akɛni ekolɛ obaashashao shi akɛ ooowo onine nɔ ‘yɛ asafo ni da mli’ hewɔ lɛ, le ni ole akɛ enɛ ji kuku ni bo diɛŋtsɛ osaa ohe akɛ obaaha hetoo, ni ákɛ mɔ ni kwɛɔ nikasemɔ lɛ nɔ lɛ baakwɛ akɛ ebaana onine yɛ ŋwɛi lɛ baawo bo hewalɛ koni oha sane hetoo.

Ha saji ahetoo mra. Nitsumɔ ni wa efeeŋ mlɛo kɛji atsi be ni akɛaatsu he nii lɛ ato. Saji ahetoo ni aaaha mra yɛ kpeei ashishi lɛ baanyɛ aye abua. Kɛji onyɛ okɛ hiɛmiamɔ ha sane hetoo nɔ  ni ji klɛŋklɛŋ kwraa lɛ, onaa baakpɛ ohe yɛ bɔ ni ebaafee mlɛo kɛha bo akɛ oooha saji ahetoo nɔ ni ji shii enyɔ loo shii etɛ nɔ.

Ta he ni hi. Mɛi komɛi naa akɛ efeɔ mlɛo kɛhaa amɛ akɛ amɛaaha saji ahetoo kɛji akɛ amɛta hiɛgbɛ sɛi ni yɔɔ Maŋtsɛyeli Asa lɛ nɔ lɛ nɔ. Nibii ni baagbala amɛjwɛŋmɔ lɛ faaa, ni ewaaa kwraa akɛ mɔ ni kwɛɔ nikasemɔ lɛ nɔ lɛ baana akɛ amɛwo amɛnine nɔ. Kɛ́ oka enɛ okwɛ lɛ, kaimɔ ni owie waa bɔni afee ni mɔ fɛɛ mɔ anu, titri lɛ kɛ́ asafo lɛ bɛ maikrofoŋ ni awieɔ awoɔ mli lɛ eko.

Bo sane toi jogbaŋŋ. Enɛ baaye ebua bo ni okatĩ wiemɔ ni mɔ ko ewie lɛ nɔŋŋ mli ekoŋŋ. Kɛfata he lɛ, ekolɛ saji ahetoo ni mɛi krokomɛi haa lɛ baakai bo ŋmalɛ ko loo sane oti ko ni obaanyɛ owie he kɛfata susumɔ ni awie he etsɛko lɛ he. Bei komɛi lɛ, ekolɛ niiashikpamɔ ko ni yɔɔ kuku baatsɔɔ sane ni asusuɔ he lɛ mli. Saji ahetooi ni tamɔ nɛkɛ lɛ yeɔ ebuaa waa.

Kasemɔ bɔ ni ooofee oha saji ahetoo yɛ bo diɛŋtsɛ owiemɔ mli. Saji ahetoo ni oookane kɛjɛ wolo ni akaseɔ lɛ mli lɛ baanyɛ atsɔɔ akɛ ona hetoo ni ja lɛ, ni ebaanyɛ efee gbɛ ni hi jogbaŋŋ ni akɛaaje saji ahetoohamɔ shishi. Shi, ni oooya ohiɛ ni oha saji ahetoo yɛ bo diɛŋtsɛ owiemɔ mli lɛ tsɔɔ akɛ onu sane oti lɛ shishi. Ehe ehiaaa ni atĩ wiemɔi ni yɔɔ wɔwoji lɛ amli lɛ amli ni awie lɛ nakai pɛpɛɛpɛ. Yehowa Odasefoi etĩii saji ni yɔɔ amɛwoji lɛ amli lɛ amli kɛkɛ amɛtsɔɔɔ.

Ha ohetoo lɛ akɔ sane lɛ he. Saji ahetoo ni kɔɔɔ sane lɛ he loo nɔ ni kɛ sane oti ni asusuɔ he lɛ kpãaa gbee lɛ esaaa. Enɛ tsɔɔ akɛ esa akɛ osaji ahetooi lɛ akɔ sane ni asusuɔ he lɛ he. Kɛ́ eba lɛ nakai lɛ, ehaa saneyitso ni asusuɔ he lɛ tswaa mɔ emaa shi yɛ mumɔŋ.

Okɛfee oti akɛ okɛ hewalɛwoo baaha. Akɛni yiŋtoo titri hewɔ ni ahaa saji ahetoo ji ni akɛwo mɛi krokomɛi hewalɛ hewɔ lɛ, esa akɛ wɔbɔ mɔdɛŋ ni wɔkwa wiemɔi ni baanyɛ aje amɛnijiaŋ wui lɛ. Agbɛnɛ hu, kaawie saji otii ni yɔɔ kuku lɛ mli lɛ fɛɛ he, ní no ha mɛi krokomɛi ná nɔ ko fioo loo amɛnáaa nɔ ko kwraa ni amɛaawie he. Saji ahetooi ni sɛɛ kɛlɛ loo ni bɛ tɛ̃ɛ lɛ haaa shishinumɔ lɛ afee faŋŋ. Saji ahetoo kukuji ni wiemɔi fioo pɛ yɔɔ mli lɛ baanyɛ afee nɔ ni mɔɔ shi jogbaŋŋ, ni ebaawo mɛi heei lɛ hewalɛ koni amɛha hetoo kukuji ni amɛsaa amɛhe yɛ mli lɛ.

Nɔ ni Esa akɛ Mɛi ni Kwɛɔ Nikasemɔi Anɔ lɛ Afee

Kɛ́ eba lɛ akɛ aawie hewalɛwoo he lɛ, sɔ̃ ni tsii kã mɔ ni kwɛɔ nikasemɔ lɛ nɔ lɛ nɔ. Etsɔɔ bɔ ni eyɔɔ hetoo fɛɛ hetoo ni ahaa lɛ he miishɛɛ kɛtsɔ toiboo ni efeɔ jogbaŋŋ beni mɔ ni haa sane lɛ hetoo lɛ wieɔ lɛ nɔ, ni ekɛ mlihilɛ kwɛɔ ehiɛ yɛ nɔ̃ najiaŋ ni eeefee nɔ kroko kɛjie ejwɛŋmɔ kɛjɛ mɔ lɛ nɔ. Kwɛ bɔ ni ebaafee nɔ ni esaaa kwraa kɛji akɛ ebooo hetoo lɛ toi jogbaŋŋ, ní yɛ no hewɔ lɛ esaa etĩ nɔ ni akɛɛ lɛ mli ekoŋŋ loo ebi sane ko ni aha hetoo momo lɛ yɛ gbɛ ni he ehiaaa nɔ lɛ!

Nakai nɔŋŋ hu ebaafee nɔ ni jeɔ mɔ nijiaŋ wui kɛji akɛ be fɛɛ be lɛ mɔ ni kwɛɔ nikasemɔ lɛ nɔ lɛ tsakeɔ saji ni aha hetoo momo lɛ hiɛ fioo ni etĩɔ mli ekoŋŋ lɛ, tamɔ nɔ ni akɛɛ hetoo ni aha lɛ ejaaa yɛ gbɛ ko nɔ lɛ. Nɔ ni tamɔɔɔ nakai lɛ, kwɛ bɔ ni ewoɔ mɔ hewalɛ kɛji akɛ saji ahetoo lɛ ha asaa asusu sane oti ko ni sa kadimɔ ni yɔɔ sane ni asusuɔ he lɛ mli lɛ he lɛ. Sanebimɔi komɛi ni woɔ mɔ hewalɛ koni aha saji ahetoo jogbaŋŋ, ni efee nɔ ni sɛɛnamɔ yɔɔ he lɛ ji, ‘Te  wɔbaafee tɛŋŋ ni wɔkɛ enɛ atsu nii yɛ wɔ asafo lɛ mli lɛ?’ loo ‘Mɛɛ ŋmalɛ ni yɔɔ kuku lɛ mli fiɔ nɔ ni akɛɛ lɛ sɛɛ?’

Eji anɔkwale akɛ esa akɛ ajie mɛi heei loo mɛi ni hiɛ gboɔ lɛ ayi titri kɛji akɛ amɛha sane hetoo. Ekolɛ mɔ ni kwɛɔ nikasemɔ lɛ nɔ lɛ diɛŋtsɛ baanyɛ akɛɛ mɔ lɛ beni akpa nikasemɔ lɛ bɔni afee ni akwa hiɛgbele ni ebaanyɛ ekɛba lɛ koni eha mɔ ni kwɛɔ nikasemɔ lɛ nɔ lɛ aná hegbɛ ni ekɛ ŋaawoi aha kɛ ehe miihia.

Yɛ daa gbi sanegbaa mli lɛ, mɔ ni eŋmɛɛɛ gbɛ ni mɛi krokomɛi awie eko lɛ haaa sanegbaa aya nɔ jogbaŋŋ. Mɛi ni boɔ lɛ toi lɛ nuuu he akɛ esa akɛ amɛwie eko. Amɛboɔ sane lɛ toi fã kɛ fã kɛji akɛ amɛmiibo toi po. Ekolɛ nɔ ko ni tamɔ nakai nɔŋŋ baaba kɛji akɛ mɔ ni kwɛɔ nikasemɔ lɛ nɔ lɛ eŋmɛɛɛ gbɛ ni mɛi krokomɛi awie kɛtsɔ wiemɔ ni efɔɔ wiemɔ tsɔ̃ lɛ nɔ lɛ. Shi kɛlɛ, ekolɛ yɛ be kɛ bei amli lɛ mɔ ni kwɛɔ nikasemɔ lɛ nɔ lɛ baagbala toibolɔi lɛ awo nikasemɔ lɛ mli ni ekanya amɛjwɛŋmɔ yɛ sane ni agbaa lɛ he kɛtsɔ sanebimɔi krokomɛi ni ebaabi kɛfata he lɛ nɔ. Esaaa akɛ afɔɔ sanebimɔi ni tamɔ nɛkɛ lɛ bimɔ tsɔ̃.

Jeee doo akɛ mɔ ni kwɛɔ nikasemɔ lɛ nɔ lɛ baatsɛ mɔ klɛŋklɛŋ ni baawo enine nɔ lɛ. Nakai ni ebaafee lɛ baanyɛ aje mɛi ni ehe baahia ni amɛná be fioo koni amɛkɛsusu nɔ ni amɛbaakɛɛ lɛ he lɛ nijiaŋ wui. Kɛtsɔ mɛ ni eeemɛ fioo lɛ nɔ lɛ, ebaaha mɔ ko ni ewieko kwraa lɛ aná hegbɛ ni ewie. Nakai nɔŋŋ hu ekɛ sɛɛyoomɔ baatsu nii kɛtsɔ tsɛ́ ni etsɛŋ gbekɛbii bibii koni amɛha saji ni nɔ kwɔlɔ fe bɔ ni amɛaanu nikasemɔ lɛ shishi lɛ ahetoo.

Ni kɛ́ hetoo ni aha lɛ ejaaa hu? Esaaa akɛ mɔ ni kwɛɔ nikasemɔ lɛ nɔ lɛ woɔ mɔ ni ha sane lɛ hetoo lɛ hiɛgbele. Be babaoo lɛ, anɔkwalei komɛi yɛ saji ahetoo ni ejaaa lɛ po lɛ mli. Kɛtsɔ hiɛshikamɔ ni mɔ ni kwɛɔ nikasemɔ lɛ nɔ lɛ kɛbaatsu nii ni ekolɛ ehala anɔkwale ko ni je kpo yɛ sane hetoo lɛ mli lɛ nɔ, kɛtsɔ sane lɛ ni eeebi yɛ gbɛ kroko nɔ lɛ nɔ, loo kɛtsɔ sane kroko ni eeebi kɛfata he lɛ nɔ lɛ, ebaajaje hetoo lɛ, ni ewoŋ mɔ ko hiɛgbele yɛ gbɛ ni esaaa nɔ.

Bɔni afee ni mɔ ni kwɛɔ nikasemɔ lɛ nɔ lɛ awo mɛi hewalɛ ni amɛha saji ahetoo lɛ, esa akɛ ekpoo sane ni abiɔ mɔ fɛɛ mɔ tamɔ, ‘Ani mɔ kroko hu yɛ nɔ ko kɛɛmɔ?’ Sanebimɔ ni ji, ‘Namɔ ewieko? Enɛ ji naagbee hegbɛ ni oná!’ lɛ baanyɛ afee nɔ ni abi kɛ jwɛŋmɔ kpakpa, shi ebaawa akɛ eeewo mɔ ko hewalɛ ni ewie yɛ mɛi ateŋ. Esaaa akɛ ahaa nyɛmimɛi nuɔ he akɛ amɛyeɔ fɔ yɛ saji ahetoo ni amɛhaaa mra yɛ nikasemɔ lɛ mli lɛ hewɔ. Yɛ no najiaŋ moŋ lɛ, esa akɛ awo amɛ hewalɛ ni amɛgba mɛi krokomɛi nɔ ni amɛle lɛ he sane ejaakɛ nii ni ahaa mɛi krokomɛi hu leɔ lɛ tsɔɔ suɔmɔ kpojiemɔ. Kɛfata he lɛ, kɛji mɔ ni kwɛɔ nikasemɔ lɛ nɔ lɛ tsɛ́ mɔ ko koni eha sane hetoo lɛ, esaaa akɛ ekɛɔ akɛ, “Yɛ lɛ esɛɛ lɛ, wɔbaabo hetoo ni Nyɛminuu Ashimashi kɛbaaha lɛ toi kɛkɛ lɛ wɔbo hetoo ni Nyɛmiyoo Ashimashi kɛbaaha lɛ toi.” Klɛŋklɛŋ lɛ esa akɛ mɔ ni kwɛɔ nikasemɔ lɛ nɔ lɛ abo hetoo lɛ toi dã, koni agbɛnɛ ekwɛ kɛji ákɛ sane hetoo kroko he baahia.

Eji Hegbɛ ni Aná akɛ Aaaha Saji Ahetoo

Kristofoi akpeei ni aaaya lɛ ji mumɔŋ hiamɔ nii; eji hegbɛ ni aná akɛ aaaha saji ahetoo yɛ kpeei nɛɛ ashishi. Babaoo ni wɔkɛ wɔhe woɔ nɛkɛ gbɛ krɛdɛɛ ni atsɔɔ nɔ ajieɔ Yehowa yi yɛ ‘asafo lɛ teŋ’ nɛɛ mli lɛ, babaoo ni wɔnyiɛɔ David nɔkwɛmɔnɔ lɛ sɛɛ ni wɔboɔ Paulo ŋaawoo lɛ toi ji no. Wɔhe ni wɔkɛaawo kpeei amli lɛ tsɔɔ akɛ wɔsumɔɔ wɔnyɛmimɛi lɛ, ni ákɛ wɔfata Yehowa asafo ni da lɛ he. Nɛgbɛ mɔ obaasumɔ ni ohi akɛni ‘onaa akɛ gbi lɛ miibɛŋkɛ nɛɛ lɛ’?—Hebribii 10:25.

[Shishigbɛ niŋmaa]

[Mfonirii ni yɔɔ baafa 20]

Saji atoiboo kɛ saji ahetoohamɔ fɛɛ he hiaa yɛ Kristofoi akpeei amli

[Mfoniri ni yɔɔ baafa 21]

Mɔ ni kwɛɔ nikasemɔ lɛ nɔ lɛ jieɔ anɔkwa miishɛɛ kpo yɛ hetoo fɛɛ hetoo ni ahaa lɛ he