Sanebimɔi ni Jɛ Kanelɔi Adɛŋ

Yɛ je lɛŋ hei babaoo lɛ, efɔɔ kaa akɛ akeɔ nii yɛ yookpeemɔ shishi. Mɛɛ Ŋmalɛ mli shishitoo mlai esa akɛ wɔsusu he kɛji wɔkɛ nii ni tamɔ nakai miike loo akɛmiike wɔ lɛ?

Biblia lɛ kpɛlɛɔ nikee nɔ kɛji akɛke yɛ yiŋtoo kpakpa hewɔ kɛ agbɛnɛ kɛji akɛke yɛ be ni sa mli. Yɛ sane ni kɔɔ nihamɔ he lɛ, Biblia lɛ woɔ anɔkwa Kristofoi hewalɛ ni amɛkase Yehowa, amɛ-Nihalɔ ni mli jɔ lɛ. (Yakobo 1:17) Bɔfo Paulo wo nanemɛi Kristofoi lɛ hewalɛ akɛ: “Ejurɔfeemɔ kɛ nikee lɛ, nyɛhiɛ akakpaa nɔ; ejaakɛ nakai afɔlei saa Nyɔŋmɔ hiɛ jogbaŋŋ.” No hewɔ lɛ, awoɔ Kristofoi hewalɛ koni amɛjie nihamɔ su kpo.—Hebribii 13:16; Luka 6:38.

Ni nikee nibii ni asumɔɔ ni aŋmalaa ashwieɔ shi, ni afɔɔ feemɔ yɛ United States lɛ kɛ nitsumɔ hu? Yɛ England lɛ, atsɛɔ lɛ akɛ yookpeemɔ nibii ni aŋmala ashwie shi. Yɛ maji komɛi anɔ lɛ, efɔɔ kaa akɛ mɛi enyɔ ni miiba ni amɛbakpee amɛhe lɛ ŋmalaa amɛgbɛi yɛ shwapo ko mli kɛtsɔ guɔyeli nibii ni yɔɔ shwapo lɛ mli lɛ ni amɛkwɛɔ ni amɛŋmalaa nibii fɛɛ ni amɛbaasumɔ ni amɛnine ashɛ nɔ akɛ nikeenii lɛ nɔ. Atsɔɔ mɛi ni miitao amɛbote gbalashihilɛ mli lɛ awekumɛi kɛ nanemɛi he ni nakai shwapo lɛ yɔɔ, ni amɛyakwɛɔ nibii ni mɛi enyɔ lɛ eŋmala eshwie shi lɛ nɔ ni amɛheɔ emli eko. Kɛ́ aakwɛ yɛ gbɛ ni ja nɔ lɛ, nikee nibii ni aŋmala ashwie shi lɛ haa mɔ ni keɔ nii lɛ yeɔ ehe kɛjɛɔ ŋmɛlɛtswai babaoo ni ebaafite ni ekɛmiitao nɔ ni ebaahe ni ekɛyake, ni ehaa mɛi ni akɛ nikeenii lɛ yakeɔ lɛ hu yeɔ amɛhe kɛjɛɔ nikeenii ni amɛsumɔɔɔ ni amɛkɛaaku amɛsɛɛ kɛya shwapo lɛ mli ekoŋŋ lɛ he naagbai lɛ he.

Kɛji akɛ mɛi enyɔ ni baabote gbalashihilɛ mli lɛ baasumɔ ni amɛkɛ nikee nibii ni aŋmalaa ashwieɔ shi atsu nii loo amɛfeŋ nakai lɛ, eji sane ni mɔ aŋkro lɛ diɛŋtsɛ baakpɛ eyiŋ yɛ he. Shi kɛlɛ, Kristofonyo lɛ baasumɔ ni ekwɛ ehe nɔ jogbaŋŋ koni ekpoo nifeemɔi ni baanyɛ aku Biblia mli shishitoo mlai amli lɛ. Ákɛ nɔkwɛmɔnɔ lɛ, kɛ́ nibii ni mɛi ni ewo amɛhe shi akɛ amɛbaabote gbalashihilɛ mli lɛ hala ni amɛŋmala amɛshwie shi lɛ ajara wa waa hu? Kɛ́ eba lɛ nakai lɛ, mɛi ni shika fioo pɛ amɛyɔɔ lɛ nyɛŋ ni amɛkɛ nii ayake, loo ekolɛ, amɛbaanu he akɛ ebaahi akɛ amɛkaya yookpeemɔ lɛ shishi bɔni afee ni ekafee hiɛshishwiemɔ kɛha amɛ akɛ amɛkɛ nikeenii ni jara waaa aaaha. Kristofonyo yoo ko ŋma akɛ: “Enɛ miitsɔ jatsu. Mibɔ mɔdɛŋ koni majie nihamɔ su kpo, shi sɛɛkpee nɛɛ, miishɛɛ ni mináa tsutsu ko yɛ nɔhamɔ mli lɛ sɛɛ efo.” Kwɛ mɔbɔ sane ni eeeji kɛji yookpeemɔ ko aaatsɔ nɔ ni jeɔ mɔ nijiaŋ wui!

Yɛ anɔkwale mli lɛ, esaaa akɛ ahaa mɛi ni keɔ nii lɛ nuɔ he akɛ bɔni afee ni akpɛlɛ amɛnikeenii lɛ anɔ lɛ, esa akɛ amɛhe yɛ shwapo pɔtɛɛ ko mli loo amɛbɔ he nyɔmɔ pɔtɛɛ ko dã. Yɛ fɛɛ sɛɛ lɛ, Yesu Kristo tsɔɔ mli akɛ nɔ ni jara wa fe fɛɛ yɛ Nyɔŋmɔ hiɛ ji nihalɔ lɛ tsuiŋ su, shi jeee bɔ ni enikeenii lɛ jara wa ha. (Luka 21:1-4) Nakai nɔŋŋ yɛ nɔ ni kɔɔ mlihilɛ mli ni ajɛɔ akeɔ mɛi ni ehia amɛ lɛ nii lɛ he lɛ, bɔfo Paulo ŋma akɛ: “Mɔ fɛɛ mɔ aha bɔ ni ekpɛ mli momo yɛ etsui mli, ni ekajɛ ŋkɔmɔyeli aloo fimɔ mli: ejaakɛ tsuijurɔnaa halɔ Nyɔŋmɔ sumɔɔ.”—2 Korintobii 9:7.

Kɛ́ wɔɔwie he yɛ Biblia shishinumɔ naa lɛ, tɔmɔ bɛ he akɛ mɔ ko aaaha ale lɛ akɛ mɔ ni kɛ nii miike, ekolɛ kɛtsɔ wolo bibioo ni eeeŋma efata nikeenii lɛ he lɛ nɔ. Shi kɛlɛ, yɛ heei komɛi lɛ, eji kusum ni yɔɔ jɛmɛ akɛ aaatsɛ mɔ ni kɛ nikeenii lɛ haa lɛ gbɛi atsɔɔ mɛi fɛɛ ni eba nifeemɔ lɛ shishi lɛ. Nɛkɛ kusum nɛɛ baanyɛ ekɛ naagbai aba. Ekolɛ mɛi ni kɛ nikeenii haa lɛ baasumɔ ni akale amɛ bɔni afee ni amɛkagbala mɛi ajwɛŋmɔ bɔ ni esaaa kɛmiiba amɛnɔ. Nakai aŋkroaŋkroi lɛ feɔ amɛnii yɛ shishitoo mla ni anaa yɛ Mateo 6:3 lɛ kɛ gbeekpamɔ naa, he ni Yesu kɛɛ yɛ akɛ: “Shi bo lɛ, kɛ oofee ejurɔ lɛ, kaaha onine abɛku le nɔ ni oninejurɔ feɔ.” Mɛi krokomɛi hu baanyɛ anu he akɛ nii ni akeɔ lɛ ji mɔ diɛŋtsɛ sane, ni esa akɛ efee teemɔŋ sane kɛha lɛ kɛ mɔ ni akeɔ lɛ nii lɛ. Kɛfata he lɛ, mɛi ni kɛ nikeenii haa lɛ ní aaatsɛ amɛgbɛi lɛ baanyɛ aha akɛ nikeenii lɛ atotoo amɛhe, ni ‘ebaatee akaŋshii ashi.’ (Galatabii 5:26) Eka shi faŋŋ akɛ esa akɛ Kristofoi atsi amɛhe kɛjɛ hiɛgbele ni amɛaaawo mɔ ko kɛtsɔ mɛi ni kɛ nikeenii haa lɛ agbɛi ni amɛaatsɛ yɛ maŋ lɛ nɔ.—1 Petro 3:8.

Hɛɛ, kɛ́ wɔfee nii yɛ shishitoo mlai ni anaa yɛ Nyɔŋmɔ Wiemɔ lɛ mli lɛ kɛ gbeekpamɔ naa lɛ, nii ni akeɔ lɛ baaya nɔ afee nɔ ni kɛ miishɛɛ baa.—Bɔfoi lɛ Asaji 20:35.