Be Mli ni Shiwoi Baaba Mli Anɔkwale

YINƆSANE mli eyi obɔ kɛ shiwoi ni ayeee nɔ. Bei pii lɛ jeŋmaji yeee toiŋjɔlɛ he kpaŋmɔ ni akɛ waonaa gbɛi ewo shishi kɛ nɔmimaa akɛ atutuaŋ maŋ kroko lɛ mli anɔkwa, no hewɔ lɛ enɛ haa amɛnyiɛɔ amɛwebii lɛ ahiɛ kɛyaa tai ni yɔɔ gbeyei amli. Napoleon wie be ko akɛ: “Be mli ni nɔyelii yeɔ amɛshiwoi anɔ pɛ ji beni ányɛ amɛnɔ koni amɛfee nakai, loo beni ebaaha amɛná he sɛɛ.”

Ni shiwoi ni aŋkroaŋkroi kɛhaa lɛ hu? Kwɛ bɔ ni eji nijiaŋwujee kɛ́ mɔ ko yeee ewiemɔ nɔ! Enɛ baa lɛ nakai, titri lɛ, kɛji mɔ lɛ ji mɔ ko ni ole ni okɛ ohe fɔ̃ɔ enɔ. Eji anɔkwale akɛ, ekolɛ mɛi nyɛɛɛ amɛye amɛshiwoi anɔ loo amɛsumɔɔɔ ni amɛtsuɔ he nii.

Kwɛ srɔtofeemɔ ni yɔɔ adesai ashiwoi kɛ Nyɔŋmɔ nɔ̃ lɛ teŋ! Anyɛɔ akɛ he fɔ̃ɔ Nyɔŋmɔ shiwoi lɛ anɔ kwraa ni ebaa mli anɔkwale. Shiwoo fɛɛ shiwoo ni Yehowa Nyɔŋmɔ kɛhaa lɛ baa mli anɔkwale. Ebaaba mli anɔkwale lɛɛlɛŋ. Beni Yesaia 55:11 lɛ wieɔ Nyɔŋmɔ wiemɔ ni efeee efolo lɛ he lɛ, ekɛɛ akɛ: “Nakai miwiemɔi ni jɛɔ midaaŋ lɛ hu aaafee: ekuŋ esɛɛ kɛbaŋ miŋɔɔ efolo, shi moŋ eeefee nɔ ni sa mihiɛ lɛ, ni eeeha nɔ ni mitsu lɛ yɛ hewɔ lɛ aya nɔ!”

No hewɔ lɛ, te esa akɛ wɔbu Nyɔŋmɔ shiwoi ni aŋmala yɛ Biblia lɛ mli lɛ wɔha tɛŋŋ? Eka shi faŋŋ akɛ wɔbaanyɛ wɔkɛ wɔhe afɔ̃ amɛnɔ. Ákɛ nɔkwɛmɔnɔ lɛ, bɔfo Yohane ŋma akɛ: “Naa, Nyɔŋmɔ buu lɛ yɛ gbɔmɛi ateŋ, ni eeeshi ebuu lɛ yɛ amɛteŋ, ni amɛaatsɔmɔ emaŋ, ni Nyɔŋmɔ diɛŋtsɛ kɛ amɛ aaahi shi, ni eeetsɔ amɛ-Nyɔŋmɔ. Ni Nyɔŋmɔ aaatsumɔ amɛhiɛaŋ yaafonui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ; ejaakɛ tsutsu nii lɛ eho etee.” (Kpojiemɔ 21:3, 4) Obaanyɛ oná jɔɔmɔi nɛɛ amli ŋɔɔmɔ kɛji ofee onii yɛ Yesu wiemɔi nɛɛ kɛ gbeekpamɔ naa akɛ: “Shi enɛ ji naanɔ wala lɛ, ákɛ amɛle bo, anɔkwa Nyɔŋmɔ kome lɛ, kɛ Yesu Kristo, mɔ ni otsu lɛ.”—Yohane 17:3.