Ani ‘Oofã Ŋtia Ooshi Kooloi Akpalamɔtso lɛ Naa Dade Lɛ’?

YƐ BIBLIA beaŋ lɛ, akɛ tsina kpalamɔtso—ni ji tso kakadaŋŋ ko, ni bei pii lɛ akɛ dade ni yɔɔ piɔpiɔ ewo naa—lɛ shwieɔ kooloi ní akɛgbalaa jatsũi, ni akɛkudɔɔ amɛ. Kɛji akɛ kooloo lɛ kɛ kuɛŋtimɔ kpoo kpalamɔtso kɛ enaa dade ni tsurɔɔ mɔ lɛ kɛtsɔ tso lɛ yisɛɛ ni etsiɔ lɛ nɔ lɛ, mɛni jɛɔ mli kɛbaa? Yɛ nɔ najiaŋ ni eeená hejɔlɛ lɛ, ekɛ piŋmɔ moŋ baa lɛ diɛŋtsɛ enɔ.

Yesu Kristo ni átee lɛ shi lɛ wie kooloi akpalamɔtso he beni ejie ehe kpo etsɔɔ nuu ni atsɛɔ lɛ Saul, mɔ ni nyiɛ gbɛ kɛmiiya ni eyamɔmɔ Yesu kaselɔi lɛ ateŋ mɛi komɛi lɛ. Saul nu ni Yesu miiwie kɛmiijɛ la ko ni shwilaa mɔ hiŋmɛi mli akɛ: “Saul, Saul, mɛɛba owaa mi yi? Ewa hao akɛ ooofã ŋtia oshi kooloi akpalamɔtso lɛ naa dade lɛ.” Kɛtsɔ niseniianii ni Saul feɔ Kristofoi lɛ anɔ lɛ, eewu eeshi Nyɔŋmɔ diɛŋtsɛ, eekɔ gbɛ ko ni awui pɛ ebaanyɛ eye lɛ diɛŋtsɛ ehe.—Bɔfoi lɛ Asaji 26:14.

Ani wɔ hu wɔbaanyɛ ni ‘wɔfã ŋtia wɔshi kooloi akpalamɔtso lɛ naa dade lɛ’ ni jeee gbɛ wɔje wɔfee? Biblia lɛ kɛ “nilelɔi awiemɔi” toɔ tsina kpalamɔtsei ni kanyaa mɔ koni eya ehiɛ yɛ jalɛ gbɛ lɛ nɔ lɛ he. (Jajelɔ 12:11) Ŋaawoo ni jɛ mumɔŋ ni yɔɔ Nyɔŋmɔ Wiemɔ lɛ mli lɛ baanyɛ akanya wɔ ni ekudɔ wɔ yɛ gbɛ ni ja nɔ—kɛji wɔŋmɛ gbɛ. (2 Timoteo 3:16) Awui pɛ ji nɔ ni ekanyamɔ ni wɔɔkpoo lɛ baanyɛ aye wɔ.

Saul bo Yesu wiemɔi lɛ atoi, ni etsake egbɛ lɛ, ni ebatsɔ Kristofonyo bɔfo Paulo ni asumɔɔ lɛ. Nakai nɔŋŋ toiboo ni wɔɔfee wɔha Nyɔŋmɔ ŋaawoo lɛ kɛ naanɔ jɔɔmɔi baaha wɔ.—Abɛi 3:1-6.

[He ni Mfoniri ni yɔɔ baafa 32 lɛ Jɛ]

L. Chapons/Illustrirte Familien-Bibel nach der deutschen Uebersetzung Dr. Martin Luthers