Maŋtsɛyeli Jajelɔi Bɔ Amaniɛ

“Naakpɛɛ Nɔ ko Nɛ!”

DOROTA, ni ji Yehowa Odasefoi abe fɛɛ sɔɔlɔ ko ni yɔɔ Poland lɛ fata ebinuu ni eye afii 14 lɛ he kɛtee skul lɛ helatsamɔhe lɛ taakɛ efɔɔ feemɔ lɛ kɛha ebinuu lɛ kwɛmɔ. Beni Janina, * ni ji datrɛfonyo lɛ kwɛɔ Dorota binuu lɛ, ebi Dorota nitsumɔi ni ebi lɛ tsuɔ yɛ shia.

Dorota ha lɛ hetoo akɛ: “Kɛ́ minyɛɛɛ mahoo gbɛkɛ niyenii kɛha wɔyi ekpaa lɛ fɛɛ ni yɔɔ weku lɛ mli lɛ, mibinuu lɛ feɔ. Kɛfata he lɛ, esaa shia lɛ mli ni eyeɔ ebuaa ni asaa nibii ni efite yɛ shia lɛ mli. Esumɔɔ nikanemɔ. Eji nikaselɔ ni bɔɔ mɔdɛŋ waa.”

Janina kɛɛ akɛ: “Eyɛ naakpɛɛ waa. Afii 12 nɛ ní mibɔi nitsumɔ yɛ biɛ, shi minuko nɔ ko ni tamɔ enɛ pɛŋ.”

Beni Dorota na akɛ eji hegbɛ ni ená akɛ ebaaye odase lɛ, etsɔɔ mli akɛ: “Fɔlɔi babaoo ni yɔɔ ŋmɛnɛ lɛ kɛ tsɔsemɔ ni sa haaa amɛbii. No hewɔ ni efɔɔ kaa akɛ amɛbii lɛ bɛ bulɛ tsɔ kɛha amɛ diɛŋtsɛ amɛhe lɛ.”

Janina bi akɛ: “Te ofee tɛŋŋ ole enɛɛmɛi fɛɛ lɛ? Fɔlɔi babaoo leee enɛɛmɛi ahe nɔ ko kwraa.”

Dorota jie naa akɛ: “Biblia lɛ ji saji ni tamɔ nɛkɛ lɛ ajɛɛhe ko ni jara wa waa. Ákɛ nɔkwɛmɔnɔ lɛ, taakɛ 5 Mose 6:6-9 lɛ tsɔɔ lɛ, wɔbii lɛ atsɔsemɔ biɔ ni wɔtsɔse wɔ diɛŋtsɛ wɔhe klɛŋklɛŋ. Ani esaaa akɛ wɔkɛ jeŋbai kpakpai ni wɔsumɔɔ ni wɔdu wɔwo wɔbii lɛ amli lɛ woɔ wɔ diɛŋtsɛ wɔtsui kɛ wɔjwɛŋmɔ mli klɛŋklɛŋ?”

Janina kɛɛ akɛ: “Eyɛ naakpɛɛ waa. Eyɛ naakpɛɛ waa!” Kɛkɛ ni ebi Dorota bɔ ni Biblia lɛ ye ebua lɛ yɛ ebii lɛ atsɔsemɔ kɛ nitsɔɔmɔ mli.

Dorota tsɔɔ mli akɛ: “Daa otsi lɛ, wɔkɛ wɔbii lɛ kaseɔ Biblia lɛ. Wɔkaseɔ wolo ko ni gbɛi ji Questions Young People Ask—Answers That Work.” * Kɛkɛ ni etee nɔ etsɔɔ bɔ ni wolo lɛ yɔɔ hã, ni etsĩ saneyitsei ni yɔɔ mli lɛ ekomɛi atã.

Janina jaje akɛ: “Naakpɛɛ nɔ ko nɛ! Ani manyɛ makwɛ bɔ ni nakai wolo lɛ tamɔ hã?”

Ŋmɛlɛtswaa kome sɛɛ lɛ, Dorota ku esɛɛ ekɛ wolo lɛ baha lɛ.

Beni Janina kwɛɔ bɔ ni wolo lɛ yɔɔ hã lɛ, ebi akɛ: “Mɛɛ jamɔ mli oyɔɔ?”

“Yehowa Odasefoi lɛ ateŋ mɔ kome ji mi.”

“Te Yehowa Odasefoi kɛ mɛi krokomɛi ni hiɛ hemɔkɛyeli kroko lɛ yeɔ haa tɛŋŋ?”

Dorota jie naa akɛ: “Tamɔ bɔ pɛ ni mikɛ bo yeɔ nɛɛ—wɔjieɔ bulɛ kpo wɔtsɔɔ amɛ,” ni ekɛfata he akɛ: “Yɛ anɔkwale mli lɛ, wɔmiitao ni amɛle anɔkwale ni yɔɔ Biblia lɛ mli lɛ.”

Janina kpɛlɛ nɔ akɛ: “Miinu he akɛ nibii ehi jogbaŋŋ po momo.”

Beni Dorota kɛ esaramɔ lɛ baa naagbee lɛ, ewo Janina hewalɛ koni ekane Biblia lɛ. “Ebaaha shishinumɔ aba oshihilɛ mli ni ebaaye ebua bo yɛ onitsumɔ mli.”

Janina kpɛlɛ nɔ akɛ: “Ówo mi hewalɛ waa diɛŋtsɛ koni mafee nakai.”

Kɛtsɔ ŋaa gbɛ kɛ faishitswaa nɔ lɛ, Dorota kɛ datrɛfonyo lɛ ŋɔɔ ni amɛtee yɛ be kɛ bei amli lɛ tsu nii ni ekɛye odase jogbaŋŋ kɛmɔ shi.—1 Petro 3:15.

[Shishigbɛ niŋmai]