Wala Shihilɛ He Sane

Yehowa Gbalaa Heshibalɔi Kɛbaa Anɔkwale lɛ He

TAAKƐ ASANO KOSHINO GBA

Yɛ afi 1949 mli, beni Jeŋ Ta II lɛ eba naagbee afii fioo komɛi asɛɛ lɛ, nuu ko ni kwɔ, ni jɛ maŋsɛɛ ni hiɛ naanyobɔɔ su lɛ basara weku ni mitsuɔ nii mihaa amɛ lɛ yɛ Kobe City. Lɛ ji klɛŋklɛŋ Yehowa Odasefonyo maŋsɛɛ sanekpakpa shiɛlɔ ni ba Japan. Esaramɔ lɛ ha miná hegbɛ ni mikɛnu Biblia mli anɔkwale lɛ. Shi klɛŋklɛŋ lɛ, ha magba bo mishihilɛ mli sane.

AFƆ mi yɛ afi 1926 mli, yɛ akrowa bibioo ko ni yɔɔ Okayama Prefecture kooyigbɛ lɛ. Miji gbekɛbii kpaanyɔ lɛ ateŋ mɔ ni ji enumɔ nɔ. Ataa ji mɔ ko ni etuu ehe kwraa eha Shinto nyɔŋmɔ ni egbatsu yɔɔ jɛmɛ lɛ jamɔ. No hewɔ lɛ, ákɛ gbekɛbii lɛ, wɔná gbii juji kɛ weku ekomefeemɔi yɛ jamɔ gbijurɔyelii amli yɛ afi muu lɛ fɛɛ mli lɛ mli ŋɔɔmɔ.

Beni midaa lɛ, mibi saji babaoo yɛ shihilɛ he, shi misusu gbele he fe fɛɛ. Taakɛ kusum ji lɛ, ehe miihia waa ni gbɔmɛi agboi yɛ shia, ní gbekɛbii lɛ ahi weku mli bii lɛ agbonyo saa lɛ he. Miwerɛ ho mihe waa diɛŋtsɛ beni minaa gbo kɛ beni minyɛmi nuu fioo ni yeko afi po lɛ gbo lɛ. Mifɔlɔi lɛ agbele hesusumɔ ha mitsui kumɔ waa diɛŋtsɛ. ‘Ani nɔ ni esa akɛ akpa gbɛ yɛ shihilɛ mli lɛ fɛɛ nɛ? Ani shishinumɔ babaoo yɛ shihilɛ sɛɛ fe enɛ?’ Miishwe waa ni male.

Yɛ afi 1937 mli, beni miyɔɔ shishijee skul klas ni ji ekpaa lɛ, Sino-Japan Ta lɛ je shishi. Agbala hii awo ta lɛ mli ni akɛ amɛ tee ta lɛ nɔ yɛ China. Skul gbekɛbii kɛ amɛtsɛmɛi loo nyɛmimɛi hii ye shɛɛ, ni amɛbolɔ akɛ, “banzai!” maŋtsɛ lɛ (ahi shi daa). Gbɔmɛi lɛ ná nɔmimaa akɛ Japan, ni ji maŋ ni nyɔŋmɔ yeɔ nɔ, kɛ emaŋtsɛ, ni ji nyɔŋmɔ hiɛkãlɔ lɛ baaye kunim.

 Etsɛɛɛ kwraa ni wekumɛi anine bɔi gbohii ahe saji anɔ shɛɛ kɛjɛ he ni awuɔ ta lɛ yɛ lɛ. Miishɛjemɔ ni akɛhaa wekui ni agboi yɛ amɛnɔ lɛ nyɛɛɛ nɔ ko afee. Hetsɛ̃ miifa yɛ amɛtsuii amli, ni amɛnáa miishɛɛ kɛji agbe amɛhenyɛlɔi lɛ babaoo loo aye amɛ awui. Shi nakai be kome too lɛ nɔŋŋ mli lɛ, misusu akɛ, ‘Ŋwanejee ko bɛ he akɛ, wɔhenyɛlɔi ni yɔɔ afã kroko lɛ hu piŋɔ tamɔ bɔ ni wɔpiŋɔ lɛ nɔŋŋ beni amɛsuɔlɔi egboi lɛ.’ Beni migbe shishijee skul naa lɛ, no mli lɛ ta lɛ miilɛɛ kɛmiibote China tɔŋŋ.

Mikɛ Maŋsɛɛnyo ko Kpe

Akɛni okwaafoi ji wɔ hewɔ lɛ, be fɛɛ be lɛ, wɔweku lɛ miiye ohia, shi mitsɛ ŋmɛ mi gbɛ koni mitiu wolokasemɔ sɛɛ shii abɔ ni ekɔɔɔ shika he lɛ. No hewɔ lɛ, yɛ afi 1941 mli lɛ, mitee yei askul ko yɛ Okayama City, aaafee kilomitai 100 jɛkɛmɔ. Ato skul lɛ he gbɛjianɔ koni etsɔse gbekɛbii yei ni amɛbatsɔmɔ ŋamɛi kɛ nyɛmɛi kpakpai, ni ekɛ nitsumɔ woɔ skulbii lɛ adɛŋ koni amɛkɛ wekui ni yɔɔ nii yɛ maŋtiasei lɛ amli lɛ ayahi shi akɛ mɛi ni miikase shia nifeemɔ. Yɛ leebi mli lɛ, skulbii lɛ kaseɔ nii kɛtsɔ nii ni amɛtsuɔ yɛ nɛkɛ shiai nɛɛ amli lɛ nɔ, ni yɛ shwane mli lɛ, amɛyaa skul lɛ.

Beni nifeemɔ ni akɛhereɔ mɛi lɛ eba naagbee sɛɛ lɛ, mitsɔɔlɔ lɛ, ni ekɛ kimono ewula ehe lɛ ŋɔ mi kɛtee shia wulu ko mli. Shi yɛ yiŋtoo ko hewɔ lɛ, awula ni yɔɔ shia lɛ eŋɔɔɔ mi. Tsɔɔlɔ lɛ bi mi akɛ: “Belɛ, ani wɔya Awula Koda shia?” Ekɛ mi tee shia ko ni áma lɛ tamɔ Anaigbɛbii anɔ̃ mli ni etswa shinaa naa ŋmɛlɛ lɛ. Yɛ be fioo ko sɛɛ lɛ, yoo ko ni kwɔ kɛ eyiteŋ waŋ je kpo. Minaa kpɛ mihe waa diɛŋtsɛ! Jeee Japannyo ni, ni minako Anaigbɛnyo ko yɛ mishihilɛ mli dã. Tsɔɔlɔ lɛ kɛ mi tsɔɔ Awula Maud Koda, ni eshi amrɔ nɔŋŋ. Migbala mibaagii lɛ kɛnyiɛ misɛɛ yɛ be mli ni mikɛ hekpokpomɔ boteɔ shia lɛ mli lɛ. Sɛɛ mli lɛ mibaná mile akɛ Awula Maud Koda ji Amerikanyo ni kɛ Japannyo ko ni bakase nii yɛ United States lɛ ebote gbalashihilɛ mli. Etsɔɔ Blɔfo wiemɔ yɛ skul ko ni akaseɔ nitsumɔ mli hesaai yɛ lɛ mli.

Shihilɛ ni dekã bɛ mli kwraa lɛ je shishi amrɔ nɔŋŋ enɔ jetsɛremɔ leebi. Awula Koda wu miiye gbiligbili hela, ni esa akɛ maye mabua kɛkwɛ lɛ. Akɛni minuuu Blɔfo kwraa hewɔ lɛ, enɛ gba minaa fioo. Miná miishɛɛ beni Awula Koda kɛ mi wie yɛ Japan wiemɔ mli lɛ. Gbi fɛɛ gbi lɛ, minuɔ ni amɛkɛ amɛhe miiwie Blɔfo, ni fiofio lɛ, minu wiemɔ lɛ. Miná shihilɛ kpakpa ni yɔɔ shia lɛ mli lɛ he miishɛɛ.

Miná bɔ ni Maud etuu ehe eha ewu ni he yeɔ lɛ he miishɛɛ waa diɛŋtsɛ. Esumɔɔ Biblia lɛ kanemɔ. Mibaná mile sɛɛ mli akɛ, gbalashihilɛ mli hefatalɔi lɛ anine shɛ The Divine Plan of the Ages wolo lɛ eko nɔ yɛ Japan wiemɔ mli yɛ woji ashwapo ko ni ahɔ̃ɔ nibii memeji yɛ mli lɛ mli, ni amɛkɛ afii babaoo eshɛ Buu-Mɔɔ yɛ Blɔfo wiemɔ mli.

Gbi ko lɛ, ake mi Biblia. Miná miishɛɛ ejaakɛ no ji klɛŋklɛŋ be yɛ mishihilɛ mli ni miná mi diɛŋtsɛ mi-Biblia. Mikaneɔ beni minyiɛ gbɛ kɛyaa skul kɛ beni mijɛɔ jɛmɛ kɛbaa lɛ, shi minuuu shishi jogbaŋŋ. Akɛni atsɔse mi yɛ Japan Shinto jamɔ mli hewɔ lɛ, etamɔ nɔ ni mileee nɔ ko kwraa yɛ Yesu Kristo he. Mileee akɛ enɛ ji nifeemɔi ni naagbee lɛ ebaanyiɛ mihiɛ koni mikɛhere Biblia mli anɔkwale lɛ nɔ lɛ shishijee, nɔ ni baaha misanebimɔi ni kɔɔ shihilɛ kɛ gbele he lɛ hetoo lɛ.

 Mɔbɔ Saji Etɛ

Etsɛɛɛ ni afii enyɔ nikasemɔ lɛ ba naagbee, ni ehe bahia ni mikɛ weku lɛ aye shɛɛ. Beni migbe skul naa lɛ, miyafata yei akuu ni kɛ amɛhe eha ni tsuɔ nitsumɔ krɛdɛɛ ko lɛ he, ni mifata he ni akpɛɔ asraafoi atadei. Okplɛmii tutuamɔi ni Amerika B-29 kɔɔyɔŋ lɛji kɛba lɛ je shishi, ni yɛ August 6, 1945 mli lɛ, aŋmɛɛ atɔm okplɛm he afɔ̃ Hiroshima. Gbii fioo komɛi asɛɛ lɛ, minine shɛ tɛligram nɔ, ni mibaná mile akɛ Awo bɛ hewalɛ kwraa. Miyata klɛŋklɛŋ oketeke mli kɛtee shia. Beni miyiɔ shi kɛjɛɔ oketeke lɛ mli lɛ, wekunyo ko kɛ mi bakpe, ni ekɛɛ mi akɛ Awo eje mli. Egbo yɛ August 11. Nɔ ni mikɛ afii babaoo eshe he gbeyei lɛ ená eba mli! Ekɛ mi egbaŋ sane dɔŋŋ loo ni ekɛ mi aaaŋmɔ dɔŋŋ.

Yɛ August 15 mli lɛ, ebafee faŋŋ akɛ aye Japan nɔ kunim. No hewɔ lɛ, ehe bahia ni mikpee saji etɛ ni yɔɔ mɔbɔ lɛ naa, fɛɛ yɛ be kukuoo, ni ji gbii nyɔŋma mli: klɛŋklɛŋ atɔm okplɛm lɛ fɛmɔ, Awo gbele lɛ, kɛ Japan nɔ kunimyeli ni bafee yinɔsane lɛ. Kɛ hooo lɛ, eyɛ miishɛɛ akɛ aaale akɛ gbɔmɛi gboiŋ dɔŋŋ yɛ ta lɛ mli. Akɛni miwerɛ eho mihe waa hewɔ lɛ, mishi nitsumɔ lɛ, ni miku misɛɛ kɛtee mimaŋ.

Agbala Mi Kɛba Anɔkwale lɛ He

Gbi ko lɛ, minine shɛ wolo ko ni mikpaaa gbɛ nɔ kɛjɛ Maud Koda ŋɔɔ yɛ Okayama. Ebi mi kɛji akɛ manyɛ maba ni mibaye mabua lɛ kɛ shia nifeemɔ akɛni eeba ni ebagbele Blɔfo wiemɔ skul lɛ hewɔ. Misusu nɔ ni esa akɛ mafee he, shi mikpɛlɛ enibimɔ lɛ nɔ. Afii fioo komɛi asɛɛ lɛ, mi kɛ Koda weku lɛ shi kɛtee Kobe.

Yɛ afi 1949 latsa be lɛ shishijee mli lɛ, owula ko ni kwɔ ni hiɛ naanyobɔɔ su basara Koda weku lɛ. Egbɛi ji Donald Haslett, ni ejɛ Tokyo eba Kobe koni ebatao tsũ kɛha maŋsɛɛ sanekpakpa shiɛlɔi yɛ Kobe. Lɛ ji klɛŋklɛŋ Yehowa Odasefonyo maŋsɛɛ sanekpakpa shiɛlɔ ni ba Japan. Ená shia lɛ eko, ni yɛ November 1949 mli lɛ, maŋsɛɛ sanekpakpa shiɛlɔi babaoo ba Kobe. Gbi ko lɛ, amɛteŋ mɛi enumɔ ba ni amɛbasara Koda weku lɛ. Amɛteŋ mɛi enyɔ ni ji Lloyd Barry kɛ Percy Iszlaub, kɛ mɛi ni ebabua amɛhe naa yɛ shia lɛ mli lɛ wie yɛ Blɔfo wiemɔ mli, amɛteŋ mɔ fɛɛ mɔ kɛ aaafee minitii nyɔŋma wie. Ale Maud akɛ eji maŋsɛɛ sanekpakpa shiɛlɔi lɛ a-Kristofonyo nyɛmi yoo, ni eka shi faŋŋ akɛ naanyobɔɔ lɛ wo lɛ hewalɛ waa. Nɛkɛ be nɛɛ mli miná kanyamɔ ni mikase Blɔfo wiemɔ.

Kɛtsɔ maŋsɛɛ sanekpakpa shiɛlɔi ni yɔɔ ekãa lɛ ayelikɛbuamɔ nɔ lɛ, mibanu Biblia mli shishijee anɔkwalei lɛ ashishi fiofio. Minine shɛ saji ni mibi kɛjɛ migbekɛbiiashi lɛ hetooi anɔ. Hɛɛ, Biblia lɛ kɛ naanɔ shihilɛ yɛ paradeiso shikpɔŋ nɔ lɛ he hiɛnɔkamɔ, kɛ gbohiiashitee kɛha “mɛi fɛɛ ni yɔɔ gbohiiabui lɛ amli lɛ” he shiwoo haa. (Yohane 5:28, 29; Kpojiemɔ 21:1, 4) Mida Yehowa shi akɛ etsɔ e-Bi, Yesu Kristo kpɔmɔ afɔleshaa lɛ nɔ eha wɔná hiɛnɔkamɔ ni tamɔ nɛkɛ.

Teokrase Nitsumɔi ni Yɔɔ Miishɛɛ

Yɛ December 30, 1949 kɛyashi January 1, 1950 mli lɛ, afee klɛŋklɛŋ teokrase kpee yɛ Japan yɛ Kobe maŋsɛɛ sanekpakpa shiɛlɔi lɛ ashia. Mikɛ Maud tee. Tsutsu lɛ, Nazibii lɛ yɔɔ shia agbo nɛɛ mli, ni eha Inland Sea kɛ Awaji Island lɛ anɔ fee fɛo waa diɛŋtsɛ. Akɛni nilee fioo ko pɛ miyɔɔ yɛ Biblia lɛ he hewɔ lɛ, nɔ ko bibioo pɛ shishi minu yɛ nɔ ni akɛɛ lɛ he. Ni kɛlɛ, bɔ ni maŋsɛɛ sanekpakpa shiɛlɔi lɛ kɛ Japanbii lɛ bɔɔ lɛ ná minɔ hewalɛ waa diɛŋtsɛ. Mɛi 101 ba ni amɛbabo maŋshiɛmɔ lɛ toi yɛ nɛkɛ kpee nɛɛ shishi.

No sɛɛ lɛ, etsɛɛɛ ni mikpɛ miyiŋ akɛ mikɛ mihe baawo shiɛmɔ nitsumɔ lɛ mli. Ebi ekãafeemɔ yɛ migbɛfaŋ koni miya shia kɛ shia, ejaakɛ yɛ adebɔɔ naa lɛ, mihiɛ gboɔ. Gbi ko leebi lɛ, Nyɛminuu Lloyd Barry ba wɔshia lɛ koni ekɛ mi aya shiɛmɔ. Eje shishi yɛ shia tuuntu ni tsa Nyɛmiyoo Koda nɔ̃ lɛ nɔ lɛ mli. Etamɔ nɔ ni mikɛ mihe tee kwraa yɛ esɛɛ yɛ be mli ni miboɔ eshiɛmɔ wiemɔ lɛ toi lɛ. Beni mitee shiɛmɔ be kroko lɛ, mikɛ maŋsɛɛ sanekpakpa shiɛlɔi krokomɛi enyɔ tsu nii. Japannyo yoo onukpa ko here wɔ, ni ebo toi, ni sɛɛ mli lɛ eha wɔ mliki glase kɔɔpoo komekome. Ekpɛlɛ ni akɛ lɛ afee shia Biblia mli nikasemɔ ni naagbee mli lɛ, ebatsɔ Kristofonyo ni abaptisi lɛ. Eji hewalɛwoo akɛ aaana ni eeya ehiɛ.

Yɛ April 1951 mli lɛ, Nyɛminuu Nathan H. Knorr, ni jɛ Brooklyn nitsumɔhe yitso lɛ basara  Japan klɛŋklɛŋ kwraa. Aaafee mɛi 700 babo maŋshiɛmɔ ni eha yɛ Kyoritsu Auditorium ni yɔɔ Kanda, Tokyo lɛ toi. Yɛ nɛkɛ kpee krɛdɛɛ nɛɛ shishi lɛ, mɛi fɛɛ ni yɔɔ toibolɔi lɛ ateŋ lɛ ná miishɛɛ beni ajie Buu-Mɔɔ kpo yɛ Japan wiemɔ mli lɛ. Yɛ nyɔŋ ni nyiɛ sɛɛ lɛ mli lɛ, Nyɛminuu Knorr yasara Kobe, ni yɛ kpee krɛdɛɛ ko ni afee yɛ jɛmɛ lɛ mli lɛ, mikɛ baptisimɔ fee mihenɔjɔɔmɔ kɛha Yehowa lɛ he okadi.

Aaafee afi sɛɛ lɛ, awo mi hewalɛ koni mikɛ mihe awo be-fɛɛ sɔɔmɔ, ni ji gbɛgbamɔ nitsumɔ lɛ mli. No be lɛ mli lɛ, gbɛgbalɔi fioo pɛ yɔɔ Japan, ni misusu bɔ ni mafee ni makwɛ mihe. Misusu bɔ ni migbɛkpamɔi kɛha gbalashihilɛ mlibotemɔ lɛ hu baaji aha he. Shi kɛlɛ, miyɔse akɛ esa akɛ Yehowa sɔɔmɔ lɛ abaye klɛŋklɛŋ gbɛhe yɛ mishihilɛ mli, no hewɔ lɛ, mibatsɔ gbɛgbalɔ yɛ afi 1952 mli. Miishɛɛ sane ji akɛ, minyɛ mikɛ be-fã tsu nii miha Nyɛmiyoo Koda yɛ be mli ni mitsuɔ gbɛgbamɔ nitsumɔ lɛ.

Yɛ nakai be lɛ nɔŋŋ mli lɛ, minyɛmi nuu ni misusu akɛ agbe lɛ yɛ ta lɛ mli lɛ kɛ eweku jɛ Taiwan kɛba shia. Miweku lɛ ejieko miishɛɛ kpo yɛ Kristojamɔ he pɛŋ, shi yɛ ekãa ni ale yɛ gbɛgbalɔi ahe lɛ hewɔ lɛ, mije shishi mikɛ wɔwoji tɛtrɛbii lɛ kɛ woji bibii lɛ maje amɛ. Sɛɛ mli lɛ, minyɛmi nuu lɛ kɛ eweku lɛ shi kɛba Kobe yɛ enitsumɔ hewɔ. Mibi minyɛmi nuu lɛ ŋa lɛ akɛ: “Ani okane woji tɛtrɛbii lɛ?” Nɔ ni fee mi naakpɛɛ ji akɛ, eha hetoo akɛ, “Amɛji woji tɛtrɛbii ni yɔɔ miishɛɛ waa.” Eje shishi ekɛ maŋsɛɛ sanekpakpa shiɛlɔi lɛ ateŋ mɔ kome kase Biblia lɛ, ni minyɛmi yoo fioo ni kɛ amɛ yɔɔ lɛ yafata ehe yɛ enikasemɔ lɛ mli. Yɛ be ni sa mli lɛ, amɛyi enyɔ lɛ fɛɛ amɛbatsɔmɔ Kristofoi ni abaptisi amɛ.

Majimaji Ateŋ Nyɛmifeemɔ Ná Minɔ Hewalɛ

No sɛɛ etsɛɛɛ kwraa lɛ, minaa kpɛ mihe beni afɔ̃ mi nine koni miba Buu-Mɔɔ Biblia Gilead Skul klas ni ji 22 lɛ. Mi kɛ Nyɛminuu Tsutomu Fukase ji klɛŋklɛŋ mɛi ni jɛ Japan ni afɔ̃ wɔ nine kɛtee skul lɛ. Yɛ afi 1953 mli, dani skul lɛ baaje shishi lɛ, wɔnyɛ wɔtee Jeŋ Hee Asafo Kpee ni afee yɛ Yankee Stadium yɛ New York lɛ. Majimaji ateŋ nyɛmifeemɔ ni yɔɔ Yehowa webii ateŋ lɛ ná minɔ hewalɛ waa diɛŋtsɛ.

Yɛ kpee lɛ nɔ gbi ni ji enumɔ lɛ, Japanbii ni ba kpee lɛ, titri lɛ maŋsɛɛ sanekpakpa shiɛlɔi lɛ baawo kimono. Akɛni kimono ni mikɛɛ ni akɛmaje mi kɛtsɔ hiɛ lɛ ebashɛɛɛ shi yɛ be naa hewɔ lɛ, mihe eko ni Nyɛmiyoo Knorr yɔɔ lɛ. Beni nifeemɔ lɛ yaa nɔ lɛ, nugbɔ bɔi nɛmɔ, ni mihao akɛ ekolɛ kimono lɛ baafɔ. Nakai be lɛ mli nɔŋŋ lɛ, mɔ ko jɛ misɛɛ ekɛ atade ni nu nyɛɛɛ atsɔ mli hà minɔ blɛoo. Nyɛmi yoo ko ni damɔ mimasɛi lɛ bi mi akɛ: “Ani ole mɔ ni ji?” Sɛɛ mli lɛ, miná mile akɛ Nyɛminuu Frederick W. Franz, ni ji Nɔyeli Kuu lɛ mlinyo lɛ ni. Kwɛ bɔ ni minu hedɔɔ ni yɔɔ Yehowa gbɛjianɔtoo lɛ mli lɛ he ha!

Gilead klas ni ji 22 lɛ ji majimaji ateŋ nɔ̃ diɛŋtsɛ, ní nikaselɔi 120 ni jɛ maji 37 mli lɛ yɔɔ mli. Eyɛ mli akɛ wiemɔ mli husu yɛ moŋ, shi wɔná majimaji ateŋ nyɛmifeemɔ lɛ he miishɛɛ kɛmɔ shi. Yɛ gbi ko nɔ ni snoo nɛ yɛ February 1954 mli lɛ, migbe skul lɛ naa, ni akɛ nitsumɔ wo midɛŋ koni miyatsu nii yɛ Japan, he ni mijɛ kɛba lɛ. Klasnyo ko ni ji Inger Brandt, ni ji Swedennyo nyɛmi yoo ko ji mɔ ni baafee mihefatalɔ kɛtsu nii yɛ Nagoya City. Wɔyafata maŋsɛɛ sanekpakpa shiɛlɔi akuu ko ni eshi Korea yɛ ta lɛ hewɔ lɛ he yɛ jɛmɛ. Afii fioo ni mikɛhi maŋsɛɛ sanekpakpa shiɛmɔ nitsumɔ lɛ mli lɛ jara wa waa diɛŋtsɛ kɛha mi.

 Miishɛɛ Sɔɔmɔ akɛ Gbalashihilɛ Mli Hefatalɔi

Yɛ September 1957 mli lɛ, afɔ̃ mi nine koni miyasɔmɔ yɛ Tokyo Betel. Akɛ tsũ nsɔdoi enyɔ ni akɛ tso fee lɛ tsu nii akɛ Japan nitsumɔhe nine. No mli lɛ, mɛi ejwɛ pɛ yɔɔ nitsumɔhe nine lɛ, ni Nyɛminuu Barry, ni ji nitsumɔhe nine lɛ nɔkwɛlɔ lɛ fata he. Weku lɛ mli bii ni eshwɛ lɛ ji maŋsɛɛ sanekpakpa shiɛlɔi. Akɛ nitsumɔ ha mi koni mitsɔɔ woji ashishi, mikane nii ni mijaje tɔmɔi, kɛ agbɛnɛ hu jɛmɛ kwramɔ, niiahefɔmɔ, nihoomɔ, kɛ ekrokomɛi.

Japan nitsumɔ lɛ miilɛɛ, ni afɔ̃ nyɛmimɛi babaoo nine kɛba Betel. Amɛteŋ mɔ kome batsɔ nɔkwɛlɔ yɛ asafo ni miyɔɔ mli yɛ nakai beaŋ lɛ mli. Yɛ afi 1966 mli lɛ, mi kɛ nakai nyɛmi nuu lɛ, ni ji Junji Koshino bote gbalashihilɛ mli. Beni wɔbote gbalashihilɛ mli sɛɛ lɛ, aha Junji tee kpokpaa nɔkwɛmɔ nitsumɔ lɛ mli. Eyɛ miishɛɛ akɛ wɔɔná wɔle nyɛmimɛi hii kɛ yei babaoo yɛ be mli ni wɔfãa gbɛ kɛyaa asafoi srɔtoi amli lɛ. Akɛni akɛ nitsumɔ wo midɛŋ koni mitsɔɔ woji ashishi hewɔ lɛ, mifeɔ yɛ shia ni wɔhiɔ mli nakai otsi lɛ mli. Beni wɔfãa gbɛ lɛ, ehe bahia ni wɔtere wiemɔi komekomei ashishitsɔɔmɔ woji ni tsii, kɛfata wɔgbɛfãa baagii kɛ baagii krokomɛi lɛ he.

Wɔkɛ nɔ ni fe afii ejwɛ ná kpokpaa nɔkwɛmɔ nitsumɔ lɛ he miishɛɛ ni wɔna bɔ ni gbɛjianɔtoo lɛ tee nɔ emli lɛɛ. Ajie nitsumɔhe nine lɛ kɛtee Numazu, ni afii komɛi asɛɛ lɛ, akɛtee Ebina, he ni ŋmɛnɛŋmɛnɛ nitsumɔhe nine lɛ tsũi lɛ yɔɔ lɛ. Mi kɛ Junji ená Betel sɔɔmɔ be kakadaŋŋ mli ŋɔɔmɔ, ni amrɔ nɛɛ wɔkɛ weku ko kɛ emli bii aaafee 600 miitsu nii. Yɛ May 2002 mli lɛ, nanemɛi ni yɔɔ Betel lɛ jɛ mlihilɛ mli amɛye afii 50 ni mikɛhi be-fɛɛ sɔɔmɔ nitsumɔ lɛ mli lɛ he gbi jurɔ.

Miná Miishɛɛ akɛ Miina Shweremɔ

Beni mije shishi mibɔi Yehowa sɔɔmɔ yɛ afi 1950 mli lɛ, no mli lɛ, shiɛlɔi fioo pɛ yɔɔ Japan. Amrɔ nɛɛ, Maŋtsɛyeli shiɛlɔi ni fa fe 210,000 yɔɔ. Eji anɔkwale akɛ, agbala gbɔmɛi akpei abɔ ni tamɔ gwantɛŋi lɛ kɛba Yehowa ŋɔɔ, taakɛ eba lɛ yɛ migbɛfaŋ lɛ.

Nyɛmimɛi hii kɛ yei maŋsɛɛ sanekpakpa shiɛlɔi ejwɛ ni ba wɔŋɔɔ yɛ Nyɛmiyoo Koda shia lɛ mli yɛ afi 1949 lɛ mli, kɛ agbɛnɛ hu Nyɛmiyoo Maud Koda, fɛɛ gbe amɛwala shihilɛ gbɛ lɛ naa yɛ anɔkwayeli mli. Nakai nɔŋŋ ji minyɛmi nuu, ni no mli lɛ esɔmɔ akɛ asafoŋ sɔɔlɔ, kɛ minyɛmi nuu ŋa, ni kɛ aaafee afii 15 tsu gbɛgbamɔ nitsumɔ lɛ. Mɛni ji wɔsɛɛ be gbɛkpamɔi kɛha mifɔlɔi, mɛi ni mishe amɛgbele he gbeyei yɛ migbekɛbiiashi lɛ? Biblia mli shiwoo ni kɔɔ gbohiiashitee he lɛ haa mináa hiɛnɔkamɔ kɛ miishɛjemɔ.—Bɔfoi lɛ Asaji 24:15.

Kɛ́ mifo misɛɛ mikwɛ lɛ, minuɔ he akɛ mikɛ Maud sharamɔ yɛ afi 1941 mli lɛ ji tsakemɔ be yɛ mishihilɛ mli. Eji mikɛ lɛ ekpeee yɛ nakai beaŋ ni mikpɛlɛɛɛ ninefɔɔ akɛ miba ni mikɛ lɛ abatsu nii ekoŋŋ yɛ ta lɛ sɛɛ lɛ kulɛ, ekolɛ maya ni miyahi shi yɛ wɔŋmɔ ni yɔɔ akrowa ko ni etse ehe banee lɛ mli, ni mikɛ maŋsɛɛ sanekpakpa shiɛlɔi ni mikɛkpe yɛ mra mli lɛ ekpeŋ. Kwɛ bɔ ni midaa Yehowa shi waa akɛ egbala mi kɛbɛŋkɛ anɔkwale lɛ he kɛtsɔ Maud kɛ mra be mli maŋsɛɛ sanekpakpa shiɛlɔi lɛ anɔ!

[Mfoniri ni yɔɔ baafa 25]

Mi kɛ Nyɛmiyoo Maud Koda kɛ ewu. Midamɔ hiɛ yɛ abɛkugbɛ

[Mfoniri ni yɔɔ baafa 27]

Mi kɛ maŋsɛɛ sanekpakpa shiɛlɔi ni jɛ Japan yɛ Yankee Stadium yɛ afi 1953 mli. Midamɔ abɛkugbɛ kwraa

[Mfonirii ni yɔɔ baafa 28]

Mi kɛ miwu Junji yɛ Betel