Sanebimɔi ni Jɛ Kanelɔi Adɛŋ

Namɔ he Yehowa wieɔ yɛ 1 Mose 3:22 lɛ akɛ, “wɔteŋ mɔ kome” lɛ?

Beni Yehowa Nyɔŋmɔ kɛɛ akɛ: “Adam etsɔ̃ tamɔ wɔteŋ mɔ kome, ni ele ekpakpa kɛ efɔŋ” lɛ, no mli lɛ etamɔ nɔ ni eewie kɛmiikɔ lɛ diɛŋtsɛ kɛ e-Bi koome lɛ he. (1 Mose 3:22) Nyɛhaa wɔkwɛa nɔ hewɔ.

Yehowa wie wiemɔi nɛɛ beni ekɛ fɔbuu kojomɔ eba klɛŋklɛŋ gbalashihilɛ mli hefatalɔi lɛ anɔ lɛ sɛɛ. Mɛi komɛi enu wiemɔ ni ji “wɔteŋ mɔ kome” lɛ shishi akɛ eji wiemɔ ni tsɔɔ nii ni fa fe nɔ̃ kome ni awieɔ he kɛkɔɔ agbojee he, taakɛ bɔ pɛ ni adesai amaŋtsɛ ko baanyɛ akɛɛ akɛ “esaaa wɔhiɛ,” be mli ni ewieɔ lɛ pɛ ehe lɛ. Shi kɛlɛ, Biblia he nilelɔ Donald E. Gowan wie 1 Mose 1:26 kɛ 3:22 lɛ he akɛ: “Nɔdaamɔnɔ ko kwraa bɛ Kpaŋmɔ Momo lɛ mli ni fiɔ mlitsɔɔmɔi ni akɛha lɛ ateŋ babaoo sɛɛ: agbojee wiemɔ ni ji ‘wɔ,’ wiemɔ ni akɛsusuɔ nibii ahe ni ji ‘wɔ,’ nɔ ko in yeɔ emuu ni fa fe ekome, aloo wiemɔ ko ni tsɔɔ mɛi ni fa fe mɔ kome ni yɔɔ Nyɔŋmɔyeli lɛ mli lɛ. . . . Nilee bɛ mlitsɔɔmɔi nɛɛ ni kɔɔ yitso 3:22 lɛ he, he ni awie ‘wɔteŋ mɔ kome’ he yɛ lɛ ateŋ eko kwraa mli.”

Ani eeenyɛ efee akɛ Satan Abonsam, mɔ ni lɛ diɛŋtsɛ ekpɛ eyiŋ yɛ nɔ ni “ekpakpa kɛ efɔŋ” ji lɛ he, ni ekɔne klɛŋklɛŋ adesai lɛ ayiŋ koni amɛfee nakai nɔŋŋ lɛ ji mɔ ni Yehowa kɛwieɔ lɛ? Nilee bɛ enɛ mli. Yɛ biɛ lɛ, Yehowa kɛ wiemɔ “[wɔ]teŋ mɔ kome” lɛ tsu nii. Satan fataaa Yehowa bɔfoi anɔkwafoi babaoo lɛ ahe dɔŋŋ, no hewɔ lɛ enyɛŋ eba ákɛ akɛ lɛ baafata mɛi ni yɔɔ Yehowa gbɛfaŋ lɛ ahe.

Ani bɔfoi anɔkwafoi lɛ ji mɛi ni Nyɔŋmɔ kɛwieɔ lɛ? Wɔnyɛŋ wɔkɛɛ kɛ nɔmimaa. Kɛlɛ, bɔ ni wiemɔi ni yɔɔ 1 Mose 1:26 kɛ yitso 3:22 lɛ je amɛhe ha lɛ yeɔ ebuaa wɔ kɛha eshishinumɔ. Wɔkaneɔ yɛ 1 Mose 1:26 (NW) lɛ akɛ Yehowa kɛɛ akɛ: “Ha wɔfee gbɔmɔ yɛ wɔsubaŋ lɛ nɔ.” Namɔ ekɛwieɔ lɛ? Beni bɔfo Paulo wieɔ mumɔŋ bɔɔ nɔ̃ ni batsɔ adesa ni eye emuu, ni ji Yesu lɛ he lɛ, ekɛɛ akɛ: “Mɔ nɔŋŋ ni ji Nyɔŋmɔ ni anaaa lɛ subaŋ, bɔɔ nii fɛɛ ateŋ kromɔbi lɛ. Ejaakɛ emli abɔ nii fiaa yɛ, nii ni yɔɔ ŋwɛi kɛ nii ni yɔɔ shikpɔŋ lɛ nɔ.” (Kolosebii 1:15, 16) Hɛɛ, etamɔ nɔ ni nilee yɛ mli akɛ Yehowa Bi koome, “ŋaalɔ” ni yɔɔ emasɛi beni ebɔɔ ŋwɛi kɛ shikpɔŋ lɛ ji mɔ ni ekɛwieɔ yɛ 1 Mose 1:26 lɛ. (Abɛi 8:22-31) Wiemɔ ni je enɛ ni yɔɔ 1 Mose 3:22 lɛ haa anaa akɛ, shikome ekoŋŋ lɛ, Yehowa kɛ mɔ ni bɛŋkɛ lɛ kpaakpa, e-Bi koome lɛ miiwie.

Eyɛ faŋŋ akɛ, Nyɔŋmɔ Bi koome lɛ le “ekpakpa kɛ efɔŋ.” Yɛ naanyobɔɔ gbagbalii ni sɛɛ etsɛ ni kã ekɛ Yehowa teŋ lɛ hewɔ lɛ, eka shi faŋŋ akɛ ekase e-Tsɛ susumɔi, eshishitoo mlai, kɛ tɛi ni efolɔ eshwie shi lɛ jogbaŋŋ. Ekolɛ le ni Yehowa le akɛ e-Bi lɛ le enɛɛmɛi jogbaŋŋ ni ekɛ anɔkwayeli tsuɔ amɛhe nii lɛ ha eha lɛ hegbɛ yɛ saji komɛi ahe nitsumɔ mli ní ehe ehiaaa akɛ ebi Lɛ esusumɔ yɛ saji lɛ eko fɛɛ eko mli dã. No hewɔ lɛ yɛ enɛ naa lɛ, Bi lɛ baanyɛ ale, ni aha lɛ hegbɛ koni ele nɔ ni ji ekpakpa kɛ efɔŋ. Shi kɛlɛ, ákɛ mɔ ni tamɔɔɔ Satan, Adam, kɛ Hawa lɛ, Yesu etooo shishitoo tɛ ko ni teɔ shi ewoɔ Yehowa nɔ̃ lɛ efɔ̃ɔɔ shi.