“Miná Naanyobɔɔ,Suɔmɔ, kɛ Mɔ He Susumɔ”

“KƐJI nyɛsumɔɔ nyɛhe lɛ, no mɛi fɛɛ kɛaale akɛ mikaselɔi ji nyɛ.” (Yohane 13:35) Yɛ Yesu wiemɔi lɛ anaa lɛ, suɔmɔ bafee mra be mli Kristofoi anyɛmifeemɔ lɛ kadimɔ nii. Beni Tertullian ŋmaa wolo yɛ Kristo gbele lɛ sɛɛ nɔ ni fe afii 100 lɛ, etsɛ́ mɛi ni yɔse enɛ faŋŋ lɛ awiemɔi asɛɛ ni ekɛɛ akɛ: ‘Nyɛkwɛa bɔ ni amɛsumɔɔ amɛhe kɛ bɔ ni amɛsumɔɔ ni amɛgboi po amɛha amɛhe.’

Ani abaanyɛ ana suɔmɔ ni tamɔ nɛkɛ yɛ je lɛ mli lolo? Hɛɛ. Ákɛ nɔkwɛmɔnɔ lɛ, susumɔ wolo ko ni Yehowa Odasefoi anitsumɔhe nine ni yɔɔ Brazil lɛ nine shɛ nɔ lɛ he okwɛ. Marília, ni ji yoo ni ŋma wolo lɛ ŋma akɛ:

“Beni minyɛ, ni eji Yehowa Odasefoi ateŋ mɔ kome lɛ yɔɔ Villa Mercedes, yɛ Argentina lɛ, ebaye talɔi amli hela, ni no ha egbɔmɔtso lɛ gbo, kɛjɛ ehɛ kɛbashi enajiashi. Yɛ ehela lɛ klɛŋklɛŋ nyɔji kpaanyɔ be lɛ mli lɛ, Odasefoi ni yɔɔ Villa Mercedes lɛ ji mɛi ni jɛ suɔmɔ kɛ mɔ he susumɔ mli amɛkwɛ lɛ. Amɛfee nɔ fɛɛ nɔ, amɛfee eshĩa lɛ mli falefale ni amɛhoo nii amɛha lɛ. Yɛ be mli ni Awo kã helatsamɔhe lɛ diɛŋtsɛ po lɛ, mɔ ko yɛ ni táa ehe be fɛɛ be, nyɔɔŋ kɛ shwane.

“Kɛjɛ nakai be lɛ sɛɛ nɛɛ, mi kɛ Awo eku wɔsɛɛ kɛtee Brazil, he ni eená hewalɛ fiofio yɛ lɛ. Odasefoi ni yɔɔ he ni wɔyɔɔ amrɔ nɛɛ miifee nɔ fɛɛ nɔ ni amɛaanyɛ koni amɛkɛye amɛbua kɛha Awo hewalɛnamɔ.”

Marília mu wolo ni eŋma lɛ naa akɛ: “Miijaje akɛ, mi diɛŋtsɛ lɛ mijeee Odasefonyo, shi miná naanyobɔɔ, suɔmɔ, kɛ mɔ he susumɔ yɛ Odasefoi lɛ ateŋ.”

Hɛɛ, mɛi yɛ lolo ni feɔ amɛnii yɛ anɔkwa Kristofoi asuɔmɔ mli. Kɛtsɔ nakai feemɔ nɔ lɛ, amɛjieɔ hewalɛ ni Yesu nitsɔɔmɔi lɛ baanyɛ aná yɛ wɔshihilɛi anɔ lɛ kpo amɛtsɔɔ.