Ná Nikee Mumɔ

AKƐ nikee mumɔ fɔɔɔ mɔ ko mɔ ko. Yɛ adebɔɔ su naa lɛ, abifao sumɔɔ ni ená nibii ni etaoɔ kɛ nibii ni he hiaa lɛ lɛ pɛ, ni esusuuu mɛi ni kwɛɔ lɛ lɛ po ahilɛ-kɛ-hamɔ he. Kɛlɛ, beni be shwieɔ mli lɛ, gbekɛ lɛ kaseɔ akɛ jeee lɛ pɛ ji mɔ ni nibii ahe hiaa yɛ je lɛ mli. Esa akɛ asusu mɛi krokomɛi ahiamɔ nii ahe, ni esa akɛ ekase hu akɛ jeee lɛ pɛ ebaaná nibii kɛjɛ mɛi adɛŋ, shi esa akɛ lɛ hu eke nii ni ekɛ mɛi aja nii ni eyɔɔ. Ehe miihia ni aná nikee mumɔ.

Jeee aŋkroaŋkroi fɛɛ ni keɔ nii—mɛi ni keɔ nii kɛjɛɔ amɛtsui mli lɛ po—yɔɔ nikee mumɔ. Ekolɛ mɛi komɛi kɛ nikee baaha yelikɛbuamɔ nitsumɔhe ko bɔni afee ni amɛkɛtsu amɛ diɛŋtsɛ amɛsɛɛnamɔi ahe nii. Ekolɛ mɛi krokomɛi hu baake nii bɔni afee ni amɛná adesai ahiɛ duromɔ. Shi kɛlɛ, nikee ni anɔkwa Kristofoi tsuɔ he nii lɛ yɛ srɔto. Belɛ, mɛni ji nikee ni awoɔ he hewalɛ yɛ Nyɔŋmɔ Wiemɔ lɛ mli lɛ sui komɛi? Nii ni klɛŋklɛŋ afii 100 lɛ mli Kristofoi lɛ ke ni wɔɔsusu he kuku lɛ baaha nakai sanebimɔ lɛ hetoo.

 Kristofoi Anikee He Nɔkwɛmɔnii

Yɛ bei babaoo mli lɛ, Kristofoi anikee ni atsɔɔ mli yɛ Biblia lɛ mli lɛ kɔɔ ‘nibii ni akɛ mɛi krokomɛi’ ni yɔɔ hiamɔ shihilɛ mli lɛɛlɛŋ lɛ ‘jaa’ lɛ he. (Hebribii 13:16; Romabii 15:26) Akɛfĩii mɔ ko nɔ. Bɔfo Paulo ŋma akɛ: “Mɔ fɛɛ mɔ aha bɔ ni ekpɛ mli momo yɛ etsui mli, ni ekajɛ ŋkɔmɔyeli aloo fimɔ mli: ejaakɛ tsuijurɔnaa halɔ Nyɔŋmɔ sumɔɔ.” (2 Korintobii 9:7) Ehe ehiaaa hu ni ake nii kɛ yiŋtoo ákɛ akɛmiigbala mɛi krokomɛi ajwɛŋmɔ. Anania kɛ Safira kwa amɛfee nɔ ko ni tamɔ nakai ni amɛná he nyɔmɔwoo yɛ gbɛ ni naa wa nɔ.—Bɔfoi lɛ Asaji 5:1-10.

Nikee he bahia waa beni Yudafoi kɛ jeŋmajiaŋbii ni tsake kɛba Yuda jamɔ mli lɛ babaoo jɛ hei ni yɔɔ shɔŋŋ amɛbabua amɛhe naa yɛ Yerusalem kɛha Pentekoste gbijurɔyeli lɛ yɛ afi 33 Ŋ.B. lɛ. Jɛmɛ ji he ni ‘mumɔ krɔŋkrɔŋ bayimɔ’ Yesu sɛɛnyiɛlɔi lɛ ‘amli obɔbɔ, ni amɛbɔi wiemɔi srɔtoisrɔtoi awiemɔ’ yɛ lɛ. Asafo babaoo babɔle amɛhe kɛkpe ni amɛbo Petro wiemɔ ni taa mɔ tsui mli ni kɔɔ Yesu Kristo he lɛ toi. Sɛɛ mli lɛ, gbɔmɛi lɛ na bɔ ni Petro kɛ Yohane tsá obubuafo ko yɛ sɔlemɔwe lɛ shinaa lɛ naa, ni shikome ekoŋŋ lɛ, amɛnu ni Petro miiwie kɛmiikɔ Yesu he kɛ bɔ ni ehe miihia ni atsake tsui lɛ. Mɛi akpei abɔ tsake amɛtsui ni abaptisi amɛ akɛ Kristo sɛɛnyiɛlɔi.—Bɔfoi lɛ Asaji, yitso 2 kɛ 3.

Mɛi heei ni etsake lɛ tao ni amɛya nɔ amɛhi Yerusalem bɔni afee ni amɛnine ashɛ tsɔsemɔi babaoo nɔ kɛjɛ Yesu bɔfoi lɛ adɛŋ. Shi te bɔfoi lɛ aaafee tɛŋŋ ni amɛtsu nakai saralɔi lɛ fɛɛ ahiamɔ nii ahe nii lɛ? Biblia mli sane lɛ kɛɔ wɔ akɛ: “Mɛi abɔ ni yɔɔ shikpɔji aloo shiai lɛ hɔɔhɔi, ni amɛkɛ nii ni ahɔɔ lɛ ayinii lɛ ba, amɛkɛbashwie bɔfoi lɛ anaji anaa, ni ajaa ahaa mɔ fɛɛ mɔ bɔ ni he hiaa lɛ lɛ.” (Bɔfoi lɛ Asaji 4:33-35) Eji anɔkwale akɛ, Yerusalem asafo ni ato shishi ehee lɛ yɛ nikee mumɔ!

Sɛɛ mli lɛ, asafoi krokomɛi hu jie nakai nikee mumɔ lɛ nɔŋŋ kpo. Ákɛ nɔkwɛmɔnɔ lɛ, yɛ ohiafoi ni Makedonia Kristofoi lɛ ji lɛ fɛɛ sɛɛ lɛ, amɛkɛ nibii ni fa fe amɛ diɛŋtsɛ amɛnyɛmɔi lɛ ha kɛha amɛnyɛmimɛi ni yɔɔ Yudea ni ehia amɛ lɛ ayelikɛbuamɔ. (Romabii 15:26; 2 Korintobii 8:1-7) Filipi asafo lɛ bɔ mɔdɛŋ jogbaŋŋ yɛ Paulo shiɛmɔ nitsumɔ lɛ sɛɛfimɔ mli. (Filipibii 4:15, 16) Yerusalem asafo lɛ diɛŋtsɛ hu jara niyenii amɛha okulafoi ni ehia amɛ lɛ daa gbi, ni bɔfoi lɛ fãmɔ hii kpawo ni he esa koni amɛkwɛ ni okulafoi fɛɛ ni yelikɛbuamɔ he miihia amɛ lɛ aná eko.—Bɔfoi lɛ Asaji 6:1-6.

Mra be mli Kristofoi asafoi lɛ ahe fee oya kɛye amɛbua yɛ be mli ni amɛmiikpa shihilɛi ni mli wawai po agbɛ. Ákɛ nɔkwɛmɔnɔ lɛ, beni gbalɔ Agabo gba hɔmɔ kpeteŋkpele ko ni baaba he sane efɔ̃ shi lɛ, kaselɔi ni yɔɔ asafo ni yɔɔ Antiokia yɛ Siria lɛ mli lɛ ‘kpɛ mli akɛ amɛaatsu nɔ ko amɛmaje nyɛmimɛi ni yɔɔ Yudea lɛ ni amɛkɛyafɛne amɛ, mɔ fɛɛ mɔ bɔ ni eeenyɛ.’ (Bɔfoi lɛ Asaji 11:28, 29) Kwɛ mumɔ kpakpa ni amɛjie lɛ kpo yɛ mɛi krokomɛi ahiamɔ nibii ayɔsemɔ kɛ gbɛjianɔ ni amɛto ni amɛkɛtsu he nii lɛ mli enɛ ji nɛkɛ!

Mɛni tsirɛ mra be mli Kristofoi lɛ ni amɛjie mlijɔlɛ kɛ suɔmɔ babaoo kpo nɛkɛ? Yɛ anɔkwale mli lɛ, mɛɛ gbɛ nɔ mɔ ko tsɔɔ enáa nikee mumɔ? Wɔbaanyɛ wɔkase nibii babaoo kɛjɛ Maŋtsɛ David nɔkwɛmɔnɔ lɛ he ni wɔɔsusu kuku lɛ mli.

Mlihilɛ Mli ni David Jɛ Efĩ Anɔkwa Jamɔ Sɛɛ

Aaafee afii 500 sɔŋŋ ní kpaŋmɔ adeka—ni ji adeka krɔŋkrɔŋ ni damɔ shi kɛha Israelbii lɛ ateŋ ni Yehowa yɔɔ lɛ—bɛ he kome ni emaa. Akɛto buu, aloo kpeebuu mli, ni awó kɛtee hei srɔtoi yɛ be ni Israelbii lɛ kpaa shi yɛ ŋa lɛ nɔ lɛ mli kɛyashi amɛkɛtee Shiwoo Shikpɔŋ lɛ nɔ. Maŋtsɛ David ná shwelɛ ni mli wa akɛ ewó kpaŋmɔ adeka lɛ kɛjɛ buu ni akɛto mli lɛ mli koni ema shĩa ni sa jogbaŋŋ eha Yehowa, he ni akɛ adeka krɔŋkrɔŋ lɛ baato. Beni David kɛ gbalɔ Natan wieɔ lɛ, ekɛɛ akɛ: “Naa, mi lɛ tseneduru tsu mli miyɔɔ nɛɛ, shi Yehowa kpaŋmɔ adeka lɛ moŋ yɛ buu shishi!”—1 Kronika 17:1.

 Kɛlɛ, David ji tabilɔ. No hewɔ lɛ, Yehowa wo akpɔ akɛ ebi Salomo ji mɔ ni yɛ toiŋjɔlɛ nɔyeli be mli lɛ, ebaama sɔlemɔtsu ni akɛ kpaŋmɔ adeka lɛ baato mli lɛ. (1 Kronika 22:7-10) Shi kɛlɛ, enɛ etsĩii David nikee mumɔ lɛ naa. Beni eto nitsulɔi akuu ni da he gbɛjianɔ sɛɛ lɛ, etsu koni akɛ tsumaa nibii ni akɛbaatsu sɔlemɔtsu lɛ maa he nii lɛ aba. Sɛɛ mli lɛ ekɛɛ Salomo akɛ: “Misaa shika talentai akpei oha kɛ jwiɛtɛi talentai akpei akpe mito miha Yehowa we lɛ, shi akɔɔble kɛ dade lɛ anyɛɛɛ aŋmɛ tete, ejaakɛ efá babaoo tsɔ; ni misaa tsei kɛ tɛi hu mito.” (1 Kronika 22:14) Akɛni no kɛkɛ faaa haaa David hewɔ lɛ, ejɛ lɛ diɛŋtsɛ eninámɔ babaoo lɛ mli ekɛ jwiɛtɛi kɛ akɔɔble ni jara feɔ ŋmɛnɛŋmɛnɛ dɔlai 1,200,000,000 lɛ ha. Kɛfata he lɛ, lumɛi lɛ hu jɛ mlihilɛ mli amɛkɛ nibii ha. (1 Kronika 29:3-9) Eka shi faŋŋ akɛ, David jie nikee mumɔ ni mlihilɛ yɔɔ mli lɛ kpo!

Mɛni kanya David ni ejɛ mlihilɛ babaoo mli eke nii lɛ? Eyɔse akɛ nibii fɛɛ ni eyɔɔ kɛ nibii ni enyɛ efee lɛ fɛɛ ji Yehowa dɛŋ jɔɔmɔi. Ejaje yɛ sɔlemɔ mli akɛ: “Yehowa, wɔ-Nyɔŋmɔ, nɛkɛ nii babaoo nɛɛ fɛɛ ní wɔsaa wɔto ní wɔkɛbaama shĩa wɔha ogbɛi krɔŋkrɔŋ lɛ  nɛɛ, odɛŋ ejɛ ni onɔ̃ ji fiaa. Mi-Nyɔŋmɔ, mile akɛ bo lɛ okaa tsui okwɛɔ, ni onáa krɔŋŋfeemɔ he miishɛɛ. Ni mi hu mitsui krɔŋŋ mikɛha nibii nɛɛ fɛɛ yɛ suɔmɔ naa, ni agbɛnɛ mina kɛ miishɛɛ akɛ omaŋ ní jwere shi nɛɛ hu miishɛɛ naa amɛhão.” (1 Kronika 29:16, 17) David bu wekukpaa ni kã ekɛ Yehowa teŋ lɛ akɛ nɔ ko ni jara wa. Eyɔse hiamɔ ni yɔɔ Nyɔŋmɔ ni eeesɔmɔ lɛ ‘kɛ etsui muu fɛɛ kɛ esusuma suɔmɔ naa’ lɛ, ni ená miishɛɛ yɛ nakai feemɔ mli. (Kronika 28:9) Sui nɛɛ nɔŋŋ ji nɔ ni tsirɛ mra be mli Kristofoi lɛ ni amɛjie nikee mumɔ kpo lɛ.

Yehowa—Nihalɔ Kpeteŋkpele ni Fe Fɛɛ Lɛ

Yehowa ji nikee he nɔkwɛmɔnɔ ni fe fɛɛ. Eyɛ suɔmɔ ni esusuɔ mɔ he aahu akɛ “ehaa ehulu teɔ shi yɛ mɛi fɔji kɛ mɛi kpakpai anɔ, ni ehaa nugbɔ nɛɔ yɛ jalɔi kɛ mɛi ni bɛ jalɛ lɛ anɔ.” (Mateo 5:45) Lɛ ehaa adesai fɛɛ “wala kɛ mumɔ kɛ nii fɛɛ.” (Bɔfoi lɛ Asaji 17:25) Yɛ anɔkwale mli lɛ, taakɛ kaselɔ Yakobo fee lɛ faŋŋ lɛ, “duromɔ nii kpakpai fɛɛ kɛ nikeenii ni hi kɛwula shi fɛɛ lɛ, ŋwɛi ejɛɔ ekpelekeɔ shi, kɛjɛɔ lai atsɛ lɛ ŋɔɔ.”—Yakobo 1:17.

 Yehowa nikeenii ni fe fɛɛ ni ekɛha wɔ lɛ ji “ebi koome lɛ” ni etsu kɛba, “koni mɔ fɛɛ mɔ ni heɔ enɔ yeɔ lɛ hiɛ akakpata, shi moŋ ená naanɔ wala” lɛ. (Yohane 3:16) Mɔ ko mɔ ko nyɛŋ abu ehe akɛ mɔ ni nikeenii ni tamɔ nɛkɛ lɛ sa lɛ, “ejaakɛ srɔto ko bɛ: ejaakɛ mɛi fɛɛ efee esha, ni Nyɔŋmɔ anunyam lɛ ebɔ amɛ.” (Romabii 3:23, 24; 1 Yohane 4:9, 10) Kristo kpɔmɔnɔ lɛ ji nɔdaamɔnɔ kɛ gbɛ kɛha Nyɔŋmɔ ‘nikeenii ni anyɛŋ agba,’ ni ji ‘Nyɔŋmɔ duromɔ ni teke nɔ lɛ.’ (2 Korintobii 9:14, 15) Akɛni Paulo hiɛ sɔ Nyɔŋmɔ nikeenii lɛ hewɔ lɛ, ekɛfee enitsumɔ titri yɛ ewala shihilɛ mli ‘akɛ ebaaye Nyɔŋmɔ duromɔ sanekpakpa lɛ he odase faŋŋ.’ (Bɔfoi lɛ Asaji 20:24) Eyɔse akɛ eji Nyɔŋmɔ suɔmɔnaa nii akɛ “ehere gbɔmɛi fɛɛ yiwala, koni amɛshɛ anɔkwale lɛ lee mli.”—1 Timoteo 2:4.

Ŋmɛnɛ, aatsɔ shiɛmɔ kɛ nitsɔɔmɔ nitsumɔ kpeteŋkpele ní amrɔ nɛɛ emli elɛɛ kɛyashɛ shikpɔji 234 nɔ yɛ jeŋ fɛɛ lɛ nɔ aatsu enɛ he nii. Yesu gba nɛkɛ nitsumɔ mlilɛɛmɔ nɛɛ he sane efɔ̃ shi beni ekɛɛ akɛ: “Aaashiɛ maŋtsɛyeli lɛ he sanekpakpa nɛɛ atsɔɔ je nɛŋ fɛɛ, ní akɛye jeŋmaji lɛ fɛɛ odase; ni no dani naagbee lɛ aaaba” lɛ. (Mateo 24:14) Hɛɛ, “ja ashiɛ sanekpakpa lɛ atsɔɔ jeŋmaji fɛɛ dã.” (Marko 13:10) Nyɛsɛɛ afi lɛ, sanekpakpa jajelɔi ni fa fe akpekpei ekpaa kɛ ŋmɛlɛtswai ni shɛɔ 1,202,381,302 wo nitsumɔ nɛɛ mli, ni amɛfee Biblia mli nikasemɔi ni fa fe 5,300,000. Akɛni wala he ebaje oshara mli hewɔ lɛ, nɛkɛ fãmɔ nɛɛ he miihia fe nɔ fɛɛ nɔ.—Romabii 10:13-15; 1 Korintobii 1:21.

Bɔni afee ni aye abua mɛi ni Biblia mli anɔkwalei ahe hɔmɔ yeɔ amɛ lɛ, akalaa woji akpekpei abɔ daa afi—ni Bibliai, woji wuji, kɛ woji bibii fata he. Kɛfata he lɛ, akalaa Buu-Mɔɔ kɛ Awake! woji tɛtrɛbii lɛ nɔ ni fa fe akpekpe toi akpe kome. Be mli ni mɛi yaa nɔ amɛboɔ sanekpakpa lɛ toi lɛ, amamɔɔ Yehowa Odasefoi a-Maŋtsɛyeli Asai kɛ Kpee Asai babaoo ni tsuɔ nii akɛ Biblia tsɔsemɔhei. Atoɔ kpokpaa nɔ kpeei kɛ gbi kome kpeei krɛdɛɛi, kɛ agbɛnɛ kpokpaa wulu nɔ kpeei ahe gbɛjianɔ daa afi. Maŋsɛɛ sanekpakpa shiɛlɔi, nɔkwɛlɔi gbɛfalɔi, onukpai, kɛ asafoŋ sɔɔlɔi atsɔsemɔ ji nifeemɔ ko hu ni yaa nɔ be fɛɛ be. Wɔmiida Yehowa shi akɛ etsɔ “tsulɔ anɔkwafo kɛ nilelɔ” lɛ nɔ eto nɛkɛ gbɛjianɔi nɛɛ fɛɛ. (Mateo 24:45-47) Kwɛ bɔ ni wɔsumɔɔ ni wɔjie hiɛsɔɔ kpo wɔtsɔɔ Lɛ!

Hiɛsɔɔ Kpo ni Aaajie Atsɔɔ Yehowa

Taakɛ bɔ ni sɔlemɔtsu lɛ maa kɛ mra be mli Kristofoi ahiamɔ nibii ahe nitsumɔ ji lɛ, nakai nɔŋŋ gbɛjianɔtoi nɛɛ ahe nitsumɔ yɛ shika gbɛfaŋ lɛ jɛɔ onia ni ajɛɔ suɔmɔ mli atsuɔ lɛ mli. Kɛlɛ, esa akɛ akai akɛ, mɔ ko mɔ ko bɛ ni baanyɛ eha Yehowa, ni eji nibii fɛɛ Atsɛ lɛ atsɔ niiatsɛ. (1 Kronika 29:14; Hagai 2:8) Belɛ, onia ni wɔtsuɔ lɛ tsɔɔ suɔmɔ ni wɔyɔɔ kɛha Yehowa kɛ shwelɛ ni wɔyɔɔ akɛ wɔbaaha anɔkwa jamɔ ashwere lɛ he odaseyeli. Paulo kɛɛ akɛ, nɛkɛ mlihilɛ sui nɛɛ ni ajieɔ lɛ kpo lɛ kɛ ‘shidaa bahaa Nyɔŋmɔ.’ (2 Korintobii 9:8-13) Yehowa woɔ nikee ni tamɔ nɛkɛ he hewalɛ ejaakɛ no tsɔɔ akɛ wɔyɛ nikee mumɔ kɛ tsui ni ja yɛ Yehowa he. Yehowa baajɔɔ mɛi ni mli hi ni kɛ amɛhiɛ fɔ̃ɔ enɔ lɛ, ni ebaaha amɛshwere yɛ mumɔŋ. (5 Mose 11:13-15; Abɛi 3:9, 10; 11:25) Yesu ma nɔ mi eha wɔ akɛ no feemɔ baaha wɔná miishɛɛ beni ekɛɛ akɛ: “Nɔ hamɔ mli yɛ [miishɛɛ, NW] fe hemɔ” lɛ.—Bɔfoi lɛ Asaji 20:35.

Kristofoi ni yɔɔ nikee mumɔ lɛ emɛɛɛ kɛyashi bei ni hiamɔ ko eba dã. Yɛ no najiaŋ lɛ, amɛtaoɔ gbɛ̀i ni amɛaatsɔ nɔ ‘amɛkɛfee mɛi fɛɛ ejurɔ, titri lɛ mɛi ni ji hemɔkɛyeli lɛ webii lɛ.’ (Galatabii 6:10) Beni Paulo woɔ mlihilɛ ni Nyɔŋmɔ gbeyeishemɔ yɔɔ mli lɛ he hewalɛ lɛ, eŋma akɛ: “Ejurɔfeemɔ kɛ nikee lɛ, nyɛhiɛ akakpaa nɔ; ejaakɛ nakai afɔlei saa Nyɔŋmɔ hiɛ jogbaŋŋ.” (Hebribii 13:16) Nibii ni wɔyɔɔ—be, hewalɛ, shika—ni wɔkɛaatsu nii kɛye wɔbua mɛi krokomɛi koni wɔkɛha anɔkwa jamɔ ashwere lɛ saa Yehowa Nyɔŋmɔ hiɛ jogbaŋŋ. Yɛ anɔkwale mli lɛ, esumɔɔ nikee mumɔ.

[Akrabatsa/Mfoniri ni yɔɔ baafa 28, 29]

Gbɛ̀i ni Mɛi Komɛi Tsɔɔ Nɔ Amɛkeɔ Nii

ONIATSUMƆ KƐHA JEŊ MUU FƐƐ NITSUMƆ LƐ

Mɛi pii kɛ shika ko fɔ̃ɔ shi, loo amɛtoɔ he gbɛjianɔ ni amɛkɛwoɔ oniatsumɔ adekai ni akadi amɛ akɛ “Oniatsumɔ Kɛha Jeŋ Muu Fɛɛ Nitsumɔ Lɛ—Mateo 24:14” lɛ mli.

Daa nyɔŋ nɔ lɛ, asafoi kɛ shika nɛɛ majeɔ kɛyaa Yehowa Odasefoi anitsumɔhe ni yɔɔ maŋ nɔ he ni amɛyɔɔ lɛ. Abaanyɛ akɛ shika ni ataoɔ akɛke lɛ amaje tɛ̃ɛ kɛyaha Watch Tower Bible and Tract Society of Pennsylvania, c/o Office of the Secretary and Treasurer, 25 Columbia Heights, Brooklyn, New York 11201-2483, aloo abaanyɛ akɛya nitsumɔhe nine ni sɔmɔɔ maŋ ni oyɔɔ mli lɛ. Kɛ́ akɛ tsɛk miiha lɛ, esa akɛ aŋma “Watch Tower” yɛ nɔ akɛ mɛi ni aawo shika lɛ aha. Abaanyɛ akɛ jwetrii aloo ojarawa nibii krokomɛi hu ake. Esa akɛ aŋma wolo fioo ko afata nɛkɛ nikeenii nɛɛ ahe ni akɛtsɔɔ akɛ amɛji nibii ni akɛmiike kwraa.

NIBII NI AKƐHA SHI AKƐKEKO LƐ AHE GBƐJIANƆTOO

Abaanyɛ akɛ shika ake yɛ gbɛjianɔtoo krɛdɛɛ ko naa akɛ, kɛ́ mɔ ni kɛha lɛ miitao lɛ, abaaku sɛɛ akɛ shika ni ekɛha lɛ aha lɛ. Kɛha sane nɛɛ mlitsɔɔmɔ lolo lɛ, ofainɛ ŋmaa kɛyabi yɛ Office of the Secretary and Treasurer kɛtsɔ adrɛs ni atsɔɔ yɛ yiteŋgbɛ lɛ nɔ.

EJURƆFEEMƆ NI AKPƐ YIŊ YƐ HE

Kɛfata shika ni akɛkeɔ kwraa kɛ shika ni akɛhaa shi akɛkeko lɛ ahe lɛ, ayɛ gbɛ̀i krokomɛi hu ni atsɔɔ nɔ akeɔ nii koni ehe aba sɛɛnamɔ kɛha Maŋtsɛyeli nitsumɔ lɛ yɛ jeŋ fɛɛ. Enɛɛmɛi ateŋ ekomɛi ji:

Inshuɔrans: Abaanyɛ aŋma Watch Tower Society lɛ gbɛi akɛ mɛi ni baaná inshuɔrans gbɛjianɔtoo lɛ he sɛɛ yɛ mɔ ni kɛhaa lɛ gbele sɛɛ, aloo mɛi ni baaná enitsumɔ hejɔɔmɔ mli gbɛjianɔtoo lɛ he sɛɛ.

Shika ni Akɛtoɔ Shikatoohe: Abaanyɛ aha shika ni akɛto, shika nɔ woji, aloo nitsumɔ mli hejɔɔmɔ mli shika ahi shi aloo akɛha Watch Tower Society lɛ yɛ mɔ lɛ gbele sɛɛ, yɛ bɔ ni nyɛmaŋ lɛ shikatoohei ŋmɛɔ gbɛ ni afee lɛ naa.

Nitsumɔi Amli Gbɛfaŋnɔ kɛ Shika ni Akɛfaa Shikatoohei kɛ Ehe Kpa: Abaanyɛ akɛ nitsumɔi amli gbɛfaŋnɔ ni ayɔɔ kɛ shika ni akɛfaa shikatoohei kɛ ehe kpa lɛ aha Watch Tower Society lɛ akɛ nibii ni akɛmiike kwraa.

Shikpɔji kɛ Tsũi: Abaanyɛ akɛ shikpɔji kɛ tsũi ni baahi hɔɔmɔ, loo shĩa ko ni mɔ ko yɔɔ mli lɛ aha kɛtsɔ ke kwraa ni akɛaake nɔ, aloo ni abaashi shikpɔŋ loo tsũ lɛ yɛ mɔ ni kɛke lɛ dɛŋ, koni ehi tsũ lɛ mli aloo ekwɛ nɔ aahu kɛyashi be mli ni ebaagbo. Ha nitsumɔhe nine ni yɔɔ maŋ mli he ni oyɔɔ lɛ ale dani okɛ shikpɔŋ loo tsũ ko aha.

Daa Afi Shika ni Anáa yɛ Nikeenii Ahe: Daa afi shika ni anáa yɛ nikeenii ahe ji gbɛjianɔ ko ni atoɔ ni mɔ ko kɛ shika loo nibii ni jara wawai haa koni Watch Tower Society lɛ akwɛ nɔ. Yɛ no najiaŋ lɛ, mɔ ni kɛha lɛ, loo mɔ ko ni mɔ ni kɛha lɛ ehala lɛ lɛ nine shɛɔ shika falɛ pɔtɛɛ ko nɔ daa afi yɛ ewala be fɛɛ mli. Atseɔ too yɛ shika ni mɔ ni kɛha lɛ nine shɛɔ nɔ daa lɛ nɔ kɛjɛ afi nɔ ni daa afi shika ni anáa lɛ jeɔ nitsumɔ shishi lɛ nɔ.

Shamaŋsheo kɛ Nii ni Ahaa Mɔ Kroko Gbɛi Kãa Nɔ: Abaanyɛ akɛ nibii ni ayɔɔ loo shika ake Watch Tower Society lɛ kɛtsɔ shamaŋsheo ni aŋma yɛ mla naa nɔ, aloo abaanyɛ aha Watch Tower Society lɛ gbɛi akã shika ni akɛto lɛ nɔ akɛ mɔ ni baaná he sɛɛ. Bei komɛi lɛ, jamɔ gbɛjianɔtoo ko gbɛi ni kãa shika ko nɔ lɛ haa enáa toowoo mli heyelii komɛi.

Taakɛ gbɛi “charitable planning” (ejurɔfeemɔ ni akpɛ yiŋ yɛ he) tsɔɔ lɛ, nɛkɛ nikeei henɔi nɛɛ biɔ gbɛjianɔtoo yɛ mɔ ni kɛ nii keɔ lɛ gbɛfaŋ. Bɔni afee ni akɛye abua aŋkroaŋkroi ni miisumɔ koni amɛye amɛbua Yehowa Odasefoi ajeŋ muu fɛɛ nitsumɔ lɛ kɛtsɔ nɛkɛ ejurɔfeemɔ ni akpɛ yiŋ yɛ he nɛɛ ateŋ eko nɔ lɛ, afee wolo bibioo ko yɛ Ŋleshi Blɔfo wiemɔ kɛ Spain wiemɔ mli ni yitso ji Charitable Planning to Benefit Kingdom Service Worldwide (Ejurɔfeemɔ ni Akpɛ Yiŋ yɛ He Koni Ehe Aba Sɛɛnamɔ Kɛha Maŋtsɛyeli Nitsumɔ yɛ Jeŋ Fɛɛ). Aŋma wolo bibioo nɛɛ yɛ sanebimɔi babaoo ni nine eshɛ nɔ ni kɔɔ nikeenii, shamaŋsheoi, kɛ nii ni ahaa mɔ kroko gbɛi kãa nɔ lɛ he lɛ ahetoohamɔ naa. Saji krokomɛi ni kɔɔ tsũi, shika gbɛjianɔtoo, kɛ toowoo gbɛjianɔtoo he lɛ hu yɛ mli. Ehaa aŋkroaŋkroi leɔ gbɛ̀i srɔtoi ni abaanyɛ atsɔ nɔ akɛ nikeenii aha amrɔ nɛɛ, loo kɛtsɔ shamaŋsheo nɔ yɛ gbele sɛɛ. Mɛi babaoo enyɛ eye ebua Yehowa Odasefoi yɛ jeŋ fɛɛ, yɛ be mli ni amɛkane wolo bibioo lɛ ni amɛkɛ amɛ diɛŋtsɛ amɛ mla kɛ toowoo he ŋaawolɔi, kɛ Charitable Planning Office (Nitsumɔhe ni Kwɛɔ Ejurɔfeemɔ ni Akpɛ Yiŋ yɛ He lɛ Nɔ) lɛ susu he lɛ sɛɛ, ni yɛ nakai beaŋ nɔŋŋ lɛ, amɛha sɛɛnamɔi ni amɛnáa yɛ toowoo mli yɛ enɛ feemɔ mli lɛ etee hiɛ. Nine baanyɛ ashɛ wolo bibioo nɛɛ nɔ kɛtsɔ eko ni aaashɛ kɛjɛ Charitable Planning Office lɛ dɛŋ tɛ̃ɛ lɛ nɔ.

Kɛha enɛ mli tsɔɔmɔ lolo lɛ, obaanyɛ obi kɛjɛ Charitable Planning Office lɛ, kɛtsɔ woloŋmaa loo tɛlifoŋ tswaa nɔ, kɛtsɔ adrɛs ni atsɔɔ yɛ shishigbɛ lɛ loo Yehowa Odasefoi anitsumɔhe ni sɔmɔɔ maŋ ni oyɔɔ mli lɛ nɔ.

Charitable Planning Office

Watch Tower Bible and Tract Society of Pennsylvania

100 Watchtower Drive, Patterson, New York 12563-9204

Telephone: (845) 306-0707

[Mfoniri ni yɔɔ baafa 26]

Mɛni tsirɛ mra be mli Kristofoi lɛ ni amɛjie mlihilɛ kpo lɛ?