“Nyɛtsia Nyɛbɛŋkɛa Nyɔŋmɔ, ni Eeetsi Eeebɛŋkɛ Nyɛ”

Be ni Tsɔ Hiɛ kɛ No Sɛɛ—Biblia Mli Shishitoo Mlai Kɛ Tsakemɔ Ba

ÁKƐ oblanyo lɛ, Adrian mli woɔ la ni emli fuɔ waa. Emli ni woɔ la oyayaayai lɛ haa ejieɔ mlifu ni ehiii kpo. Enuɔ dãa, eshɛreɔ tawa, ni ekɛ ehe woɔ jeŋba shara mli. Ale Adrian akɛ mɔ ni sumɔɔ rɔk lala, ni ekadi ehewolo nɔ kɛ wiemɔ ni jieɔ ehiɛ ni ekɛfɔ̃ɔ basabasafeemɔ nɔ waa lɛ kpo. Beni etsɔɔ nakai afii lɛ amli lɛ, ewie akɛ: “Miku miyitsɔi tamɔ rɔk lalɔi anɔ̃, mikɛ gluu ni naa wa wo mli, ni bei komɛi lɛ mitsakeɔ esu mifeɔ lɛ etsuru loo su kroko.” Adrian gbu egugɔ hu.

Adrian kɛ oblahii atuatselɔi komɛi fã kɛtee tsũko ko mli. Jɛmɛ ji he ni amɛnuɔ dãa ni amɛkɔlɔɔ tsofai fɔji yɛ. Adrian kaiɔ akɛ: “Mikɔ tsofa ni kanyaa mɔ ni mikɛ tsofa ni jɔɔ jwɛŋmɔŋ henumɔi ahe kɛ nɔ fɛɛ nɔ ni minine shɛɔ nɔ lɛ fataa he kɛgbuɔ. Kɛ́ mináaa tsofai fɔji loo gluu ni mafũ lɛ, migbalaa pɛtro kɛjɛɔ mɛi alɔlei amli ni no haa mifeɔ tamɔ nɔ ni mitɔ dãa.” Adrian hi shi akɛ gbɛjegbɛ nɔ awuiyelɔ ni ebatsɔ mɔ ni woɔ mɔ he gbeyei ni yi wa waa. Mɛi babaoo sumɔɔɔ akɛ amɛkɛ lɛ feɔ nɔ ko kwraa. Yɛ nakai beaŋ nɔŋŋ lɛ, ejeŋba ha ená nanemɛi gbohii.

Fiofio lɛ, Adrian yɔse akɛ “enanemɛi” lɛ kɛ lɛ bɔɔ yɛ ehe sɛɛ ni amɛnáa lɛ hewɔ. Agbɛnɛ hu emu sane naa akɛ, “mlifu kɛ yiwalɛ lɛ fɛɛ nyɛko nɔ ko atsu.” Akɛni enu he akɛ efee shwɛm ni enijiaŋ eje wui hewɔ lɛ, eshi enanemɛi lɛ. Beni ena Buu-Mɔɔ lɛ eko yɛ tsumaahe ko lɛ, ená emli shɛɛ sane ni damɔ Biblia lɛ nɔ lɛ he miishɛɛ, ni enɛ ha ekɛ Yehowa Odasefoi bɔi Biblia lɛ kasemɔ. Adrian kɛ hehiamɔ here ninefɔɔ akɛ: “Nyɛtsia nyɛbɛŋkɛa Nyɔŋmɔ, ni eeetsi eeebɛŋkɛ nyɛ” lɛ nɔ. (Yakobo 4:8) Enɛ hewɔ lɛ, etsɛɛɛ ni Adrian na bɔ ni ehe hiaa ni ekɛ shishitoo mlai ni yɔɔ Ŋmalɛ Krɔŋkrɔŋ lɛ mli lɛ abɔi nitsumɔ.

Biblia mli nilee ni Adrian tee nɔ ená lɛ ná hewalɛ kpakpa yɛ ehenilee nɔ ni etsake eshihilɛ gbɛ. Aye abua lɛ ni eba emli ni fuɔ oyayaayai lɛ shi ni ená henɔyeli. Yɛ hewalɛ ni Nyɔŋmɔ Wiemɔ lɛ yɔɔ naa lɛ, Adrian subaŋ bafee srɔto kwraa.—Hebribii 4:12.

Shi, te fee tɛŋŋ ni Biblia lɛ nyɛ ená enɔ hewalɛ ni tamɔ nɛkɛ? Ŋmalɛi lɛ ahe nilee yeɔ ebuaa wɔ koni ‘wɔwo gbɔmɔ hee’ lɛ. (Efesobii 4:24) Hɛɛ, wɔsu kɛ baŋ tsakeɔ kɛtsɔɔ anɔkwa nilee ni anaa yɛ Biblia lɛ mli lɛ kɛ nitsumɔ nɔ. Shi mɛɛ gbɛ nɔ nilee ni tamɔ nɛkɛ tsakeɔ gbɔmɛi yɛ?

Klɛŋklɛŋ lɛ, Biblia lɛ tsɔɔ sui gbohii ni esa akɛ wɔshɛrɛ wɔshwie. (Abɛi 6:16-19) Nɔ ni ji enyɔ lɛ, Ŋmalɛi lɛ woɔ wɔ hewalɛ ni wɔjie sui kpakpai ni Nyɔŋmɔ mumɔ krɔŋkrɔŋ lɛ woɔ lɛ kpo. Nɔ ni fata enɛɛmɛi ahe ji ‘suɔmɔ, miishɛɛ, hejɔlɛ, tsuishitoo, mlihilɛ, ejurɔfeemɔ, hemɔkɛyeli, mlijɔlɛ, henɔyeli.’—Galatabii 5:22, 23.

Nyɔŋmɔ taomɔ nii ahe shishinumɔ ni mli kwɔ ye ebua Adrian koni epɛi lɛ diɛŋtsɛ emli ni ekwɛ sui ni ehe hiaa ni ená kɛ nɔ ni esa akɛ ejie yɛ  ehe. (Yakobo 1:22-25) Shi no ji shishijee kɛkɛ. Kɛfata nilee he lɛ, kanyamɔ he miihia—nɔ ko ni baatsirɛ Adrian ni esumɔ akɛ etsake.

Adrian kase akɛ ashɔ̃ɔ gbɔmɔ hee ni ataoɔ lɛ ‘yɛ Mɔ ni bɔ lɛ lɛ subaŋ lɛ naa.’ (Kolosebii 3:10) Ebayɔse akɛ esa akɛ Kristofonyo su kɛ baŋ atamɔ Nyɔŋmɔ diɛŋtsɛ su kɛ baŋ. (Efesobii 5:1) Kɛtsɔ Biblia lɛ kasemɔ nɔ lɛ, Adrian na ele bɔ ni Yehowa kɛ adesai yeɔ haa, ni ekadi Nyɔŋmɔ sui kpakpai tamɔ esuɔmɔ, mlihilɛ, ejurɔfeemɔ, mɔbɔnalɛ, kɛ ejalɛ lɛ. Nilee ni tamɔ nɛkɛ tsirɛ Adrian koni esumɔ Nyɔŋmɔ ní ebɔ mɔdɛŋ efee mɔ ni Yehowa kpɛlɛɔ enɔ.—Mateo 22:37.

Yɛ be ko sɛɛ lɛ, Adrian nyɛ eba emlifu ni naa wa lɛ shi yɛ Nyɔŋmɔ mumɔ krɔŋkrɔŋ lɛ yelikɛbuamɔ naa. Amrɔ nɛɛ, ekɛ eŋa bɛ dekã kwraa ni amɛkɛ Biblia mli nilee lɛ miiye kɛmiibua mɛi krokomɛi koni amɛkɛsaa amɛshihilɛ. Adrian wie akɛ: “Ákɛ mɔ ni tamɔɔɔ mitsutsu nanemɛi ni amrɔ nɛɛ amɛgboi lɛ, miyɛ wala mli ni miiná weku shihilɛ ni yɔɔ miishɛɛ mli ŋɔɔmɔ.” Adrian ji odaseyeli ni anaa ni tsɔɔ hewalɛ ni Biblia lɛ yɔɔ ni ekɛtsakeɔ shihilɛ koni eya hiɛ.

[Wiemɔ ni akɔ ni akɛmiitsu nii ni yɔɔ baafa 25]

“Mlifu kɛ yiwalɛ lɛ fɛɛ nyɛko nɔ ko atsu”

[Akrabatsa ni yɔɔ baafa 25]

Biblia Mli Shishitoo Mlai Miitsu Nii

Biblia mli shishitoo mlai ni nyiɛ sɛɛ nɛɛ ji nɔ ni eye ebua mɛi babaoo ni mli fuɔ ni amɛfeɔ yiwalɛ nii lɛ ni amɛhe ejɔ:

“Nyɛkɛ gbɔmɛi fɛɛ ahia shi yɛ hejɔlɛ mli. Suɔlɔi, nyɛkatɔa nyɛ diɛŋtsɛ nyɛhe owele, shi moŋ nyɛŋmɛa mlifu lɛ gbɛ.” (Romabii 12:18, 19) Ha Nyɔŋmɔ atsɔɔ be kɛ mɛi ni esa akɛ akɛ oweletɔɔ aba amɛnɔ. Ebaanyɛ efee nakai akɛni eyɛ saji lɛ fɛɛ ahe nilee, ni toigbalamɔ fɛɛ toigbalamɔ ni jɛɔ eŋɔɔ lɛ baajie ejalɛsaneyeli ni eye emuu lɛ kpo lɛ hewɔ.

“Nyɛmli afũa, shi nyɛkafea esha; hulu akanyɔ shi yɛ nyɛmlila lɛ nɔ, ni asaŋ nyɛkɛ nyɛhe akafɔ̃a shi nyɛhaa abonsam.” (Efesobii 4:26, 27) Yɛ bei komɛi amli lɛ mɔ ko mli baanyɛ afu yɛ gbɛ ni ja nɔ. Kɛ eba lɛ nɛkɛ lɛ, esaaa akɛ ehiɔ shi ‘yɛ emlila lɛ mli.’ Mɛni hewɔ? Ejaakɛ enɛ baatsirɛ lɛ ni efee efɔŋ, ni no baaha ‘ekɛ ehe afɔ̃ shi aha Abonsam,’ ni no haŋ ená Yehowa Nyɔŋmɔ nɔkpɛlɛmɔ.

“Ha mlifu sɛɛ afo ni oshɛ mlila ofɔ̃; kaawo otsui la hu, efɔŋfeemɔ mli kɛkɛ ekɛ mɔ yaa.” (Lala 37:8) Henumɔi ni anyɛɛɛ nɔ aye lɛ kɛ nifeemɔi ni anyɛɛɛ akudɔ baa. Kɛ mɔ ko ŋmɛ mlifu gbɛ lɛ, ekolɛ ebaawie loo ebaafee nibii ni baaye mɔ fɛɛ mɔ ni sane lɛ kɔɔ ehe lɛ awui.