Jeŋ ko ni Efɔŋfeemɔ Bɛ Mli Kã Wɔhiɛ

KƐJI akɛ obaanyɛ lɛ, feemɔ jeŋ ko ni awuiyelɔi bɛ mli lɛ he mfoniri okwɛ! Polisifoi, tsuŋwoohei, loo jalɛsaneyeli he gbɛjianɔtoi ni yɔɔ hwanyaŋŋ ni afiteɔ shika babaoo yɛ he lɛ he ebahiaŋ. Ebaafee jeŋ ko ni mɔ aŋkro fɛɛ mɔ aŋkro kɛ bulɛ baaha mɛi krokomɛi awala kɛ nibii ni amɛyɔɔ. Ani etamɔ nɔ ko ni nyɛŋ aba mli? Ekolɛ obaasusu nakai, shi nɛkɛ tsakemɔ ni yɔɔ naakpɛɛ kɛha shihilɛ kpakpa nɛɛ pɛpɛɛpɛ ji nɔ ni Biblia lɛ ewo he shi lɛ. Mɛni hewɔ osusuuu nɔ ni Ŋmalɛi lɛ egba efɔ̃ shi yɛ awuiyeli kɛ efɔŋfeemɔi krokomɛi ahe yɛ shikpɔŋ nɛɛ nɔ lɛ he okwɛɛɛ?

Wɔkaneɔ yɛ Lalai awolo lɛ mli akɛ: “Kaawo otsui la yɛ efɔŋfeelɔi ahe, asaŋ ohiɛ akakɔ̃ mɛi ni tsuɔ nii ni ejaaa lɛ anɔ. Shi eyeŋ be ko ni aaafolɔ amɛ ashwie tamɔ jwɛi, ni amɛaaŋala tamɔ baa fɔ. Shi mɛi ni he jɔ lɛ, shikpɔŋ lɛ aaatsɔ̃ amɛnɔ̃, ni amɛmii aaashɛ amɛhe yɛ hejɔlɛ babaoo mli.” (Lala 37:1, 2, 11) Eji anɔkwale akɛ, mɔ ko mɔ ko bɛ ni baanyɛ atsĩ Nyɔŋmɔ naa koni ekaha nɛkɛ shiwoo nɛɛ kɛ eshiwoi krokomɛi ni woɔ mɔ hewalɛ lɛ miiba mli.

Yehowa baatsɔ e-Maŋtsɛyeli lɛ nɔ ekɛ nɛkɛ jɔɔmɔi nɛɛ aba. Yesu Kristo tsɔɔ esɛɛnyiɛlɔi lɛ yɛ Nuŋtsɔ lɛ Sɔlemɔ lɛ mli ni amɛsɔle koni Maŋtsɛyeli nɛɛ aba, ni afee Nyɔŋmɔ suɔmɔnaa nii “yɛ shikpɔŋ lɛ nɔ, taakɛ afeɔ yɛ ŋwɛi lɛ.” (Mateo 6:9, 10) Etsɛŋ kwraa ni yɛ nakai Maŋtsɛyeli lɛ shishi lɛ, awoŋ mɔ ko mɔ ko hewalɛ koni eye awui yɛ ohia, nɔnyɛɛ, loo pɛsɛmkunya hewɔ. Yɛ no najiaŋ lɛ, Nyɔŋmɔ Wiemɔ lɛ kɛɔ akɛ: “Shikpɔŋ lɛ nɔ aaaba abele babaoo kɛyashwie gɔji lɛ ayiteaŋ; eyibii lɛ aaahoso tamɔ Lebanon, ni amɛaafrɔke yɛ maŋ lɛŋ tamɔ shikpɔŋ nɔ baai.” (Lala 72:16) Yɛ anɔkwale mli lɛ, Yehowa Nyɔŋmɔ baaha mɔ fɛɛ mɔ ni yɔɔ shikpɔŋ nɔ lɛ nibii kpakpai ni sɛɛ efooo gbi ko gbi ko. Nɔ ni fe fɛɛ lɛ, suɔmɔ kɛha Nyɔŋmɔ kɛ naanyo ji nɔ ni baakanya adesai aweku lɛ ni efɔŋfeemɔ gbaŋ je lɛ naa dɔŋŋ gbi ko gbi ko.