Sanebimɔi ni Jɛ Kanelɔi Adɛŋ

Te esa akɛ Kristofoi akwɛ ojarawatɛi ni kɔɔ nyɔŋ ni afɔ mɔ ko yɛ nɔ lɛ he lɛ kɛ nitsumɔ amɛha tɛŋŋ?

Yɛ kusumii komɛi amli lɛ, ojarawatɛi kɔɔ nyɔŋ ni afɔ mɔ ko yɛ nɔ lɛ he. Kɛji akɛ Kristofonyo ko miisumɔ ni ewo ga ni ojarawatɛ ko yɔɔ nɔ lɛ, no lɛ eji lɛ diɛŋtsɛ eyiŋkpɛɛ. (Galatabii 6:5) Yɛ yiŋkpɛɛ ni tamɔ nɛkɛ feemɔ mli lɛ, nibii titrii komɛi yɛ ni ehe miihia akɛ asusu he.

Encyclopaedia Britannica lɛ tsɔɔ akɛ, ojarawatɛ ni kɔɔ mɔ ko fɔmɔ he lɛ ji “ojarawatɛ ko ni kɛ gbi ni afɔ mɔ ko yɛ nɔ lɛ yɔɔ tsakpaa, ni bei pii lɛ asusuɔ akɛ ojarawatɛ nɛɛ ni aaawo lɛ kɛ shade kpakpa loo gbɔmɔtsoŋ hewalɛnamɔ kpakpa baa.” Wolo ni akɛtao saji amli nɛɛ kɛfata he akɛ: “Ŋulamiiaŋkwɛlɔi ejɛ jeeŋmɔ beebe amɛbu ojarawatɛi komɛi akɛ amɛyɛ hewalɛi ni nɔ kwɔ fe adesai anɔ̃.”

Titri lɛ, yɛ blema beaŋ lɛ, mɛi babaoo heɔ yeɔ akɛ ojarawatɛ ni kɔɔ mɔ ko fɔmɔ he, ní mɔ lɛ aaawo lɛ kɛ shade kpakpa bahaa lɛ. Ani anɔkwa Kristofonyo heɔ enɛ eyeɔ? Dabi, ejaakɛ ele akɛ Yehowa bu mɛi ni kwa lɛ ni amɛkɛ amɛhe yafɔ̃ “shade wɔŋ” nɔ lɛ fɔ.—Yesaia 65:11.

Yɛ Teŋgbɛ Afii lɛ amli lɛ, klamɔi hala ojarawatɛ ko kɛha nyɔŋ fɛɛ nyɔŋ yɛ afi lɛ mli. Amɛwo mɛi hewalɛ koni amɛwo nyɔŋ ni afɔ amɛ lɛ nɔ ojarawatɛ lɛ, kɛ yiŋtoo akɛ ebaabu mɔ ni woɔ lɛ he kɛjɛ oshara mli. Shi ebaafee nɔ ni ejaaa yɛ Ŋmalɛ naa kɛha Kristofoi akɛ amɛaanyiɛ klamɔi ni gbaa nibii ni baaba lɛ agbɛtsɔɔmɔi asɛɛ, ejaakɛ Biblia lɛ buɔ amɛ fɔ.—5 Mose 18:9-12.

Ebaafee nɔ ni ejaaa gbɛ hu akɛ Kristofoi aaaná shishinumɔ krɛdɛɛ ko kɛha ga ko yɛ anɔkwale ni eji akɛ ojarawatɛ ko kpɛtɛ nɔ lɛ hewɔ. Yehowa Odasefoi yeee fɔmɔ gbii juji. Nɔ̃ hewɔ lɛ ji akɛ, gbijurɔyelii ni tamɔ nɛkɛ lɛ gbalaa jwɛŋmɔ babaoo kɛyaa mɔ aŋkro lɛ nɔ, ni fɔmɔ gbi he gbijurɔyelii pɛ ni atsĩ tã yɛ Biblia lɛ mli lɛ fɛɛ kɔɔ nɔyelɔi ni sɔmɔɔɔ Nyɔŋmɔ lɛ ahe.—1 Mose 40:20; Mateo 14:6-10.

Mɛi komɛi susuɔ akɛ gai ni akɛ ojarawatɛ ni kɔɔ nyɔŋ ni afɔ mɔ ko yɛ nɔ lɛ ekpɛtɛ nɔ ni aaawo lɛ náa mɔ ni wo lɛ subaŋ nɔ hewalɛ kpakpa. Shi, anɔkwa Kristofoi heee enɛ amɛyeee, ejaakɛ amɛle akɛ awoɔ “gbɔmɔ hee lɛ” yɛ Nyɔŋmɔ mumɔ krɔŋkrɔŋ lɛ hewalɛ naa, kɛ agbɛnɛ kɛtsɔ Ŋmalɛ naa shishitoo mlai kɛ amɛ kɛ nitsumɔi anɔ.—Efesobii 4:22-24.

Nɔ kome ni he hiaa waa ji jwɛŋmɔ ni hɔ sɛɛ. Kristofonyo ko baanyɛ abi ehe beni ekpɛɔ eyiŋ akɛ eeewo ga ko ni ojarawatɛ ni kɛ nyɔŋ nɔ ni afɔ mɔ ko yɛ nɔ lɛ yɔɔ tsakpaa lɛ akɛ, ‘Ani miisumɔ ni mawo nɛkɛ ga nɛɛ akɛni ojarawatɛ lɛ feɔ mi fɛo lɛ kɛkɛ hewɔ, eyɛ mli moŋ akɛ eji nɔ ni kɛ nyɔŋ nɔ ni afɔ mi lɛ yɔɔ tsakpaa? Aloo yɛ gbɛ ko nɔ lɛ apasa hemɔkɛyeli susumɔi ni mɛi komɛi hiɛ yɛ nɛkɛ ojarawatɛi nɛɛ ahe lɛ ená minɔ hewalɛ?’

Esa akɛ Kristofonyo apɛi etsui mli ekwɛ bɔni afee ni enyɛ ena nɔ̃ jwɛŋmɔ ni ehiɛ yɛ sɛɛ. Ŋmalɛi lɛ kɛɔ akɛ: “Ohiɛ akã otsui he fe nii fɛɛ ejaakɛ no mli wala jɛɔ.” (Abɛi 4:23) Ebaafee nɔ ni sa jogbaŋŋ akɛ beni Kristofonyo fɛɛ Kristofonyo kpɛɔ eyiŋ yɛ ojarawatɛi ni kɔɔ nyɔŋ ni afɔ mɔ ko yɛ nɔ lɛ he lɛ, eeesusu jwɛŋmɔ ni ehiɛ yɛ he, kɛ bɔ ni gbɛ ni ekɔ lɛ baasa lɛ diɛŋtsɛ kɛ mɛi krokomɛi ahe aha lɛ he.—Romabii 14:13.