“Amɛsaa Amɛhe Amɛhã Nitsumɔ Kpakpa Fɛɛ Nitsumɔ Kpakpa”

“KAIMƆ amɛ ni amɛba amɛhe shi amɛhã onukpai kɛ nɔyelɔi lɛ, amɛbo amɛ toi, amɛsaa amɛhe amɛhã nitsumɔ kpakpa fɛɛ nitsumɔ kpakpa.” (Tito 3:1) Mɛɛ nitsumɔ kpakpa yɔɔ bɔfo Paulo jwɛŋmɔ mli beni eŋmala nakai wiemɔi lɛ kɛyaha enanemɛi heyelilɔi lɛ? Biblia mli nilelɔ E. F. Scott tsɔɔ nitsumɔ kpakpa kome ko mli ni ewie akɛ: “Jeee akɛ esa akɛ Kristofoi abo nɔyelɔi atoi pɛ kɛkɛ, shi moŋ esa akɛ amɛsaa amɛhe amɛhã nitsumɔ kpakpa fɛɛ nitsumɔ kpakpa. . . . Kɛ́ ehe miihia yɛ be ko mli lɛ, esa akɛ Kristofoi afata mɛi ni jieɔ mɔ hesusumɔ kpo klɛŋklɛŋ lɛ ahe. La baaje be fɛɛ be, haomɔ kɛ amanehului srɔtoi baaba be mli ni maŋbii kpakpai fɛɛ baasumɔ ní amɛye amɛbua amɛnanemɛi.”

Kristofoi kɛ amɛhe woɔ nitsumɔi komɛi ni kɔɔ maŋbii ahe lɛ amli bei abɔ ní nitsumɔi lɛ eteee shi ewooo Nyɔŋmɔ mlai lɛ. (Bɔfoi lɛ Asaji 5:29) Akɛ nɔkwɛmɔnɔ lɛ, Yehowa Odasefoi anitsumɔhe nine ni yɔɔ Ebina yɛ Japan lɛ feɔ la gbee kasemɔ he nɔkwɛmɔnɔ daa afi yɛ jɛmɛ la gbee nitsumɔhe lɛ gbɛtsɔɔmɔ lɛ sɛɛnyiɛmɔ naa. Yɛ nɛkɛ bei nɛɛ amli lɛ, Betel weku lɛ mli bii fɛɛ buaa amɛhe naa koni amɛbo tsɔsemɔi ní la gbee nitsumɔhe ni yɔɔ jɛmɛ lɛ mli najiaŋdamɔlɔi lɛ kɛhaa lɛ toi.

Kɛfata he lɛ, nɔ ni fe afii nyɔŋma nɛ ní nitsumɔhe nine lɛ kɛ maŋ nɔyeli ni yɔɔ jɛmɛ lɛ efee ekome yɛ nibii ní ajieɔ atsɔɔ mɛi, ní ato he gbɛjianɔ koni eha ale bɔ ni agbeɔ la ahaa lɛ mli. Yɛ nibii ní ajie atsɔɔ lɛ shishi lɛ, nitsumɔhei ni jɛ maŋ lɛ mli lɛ fee bɔ ni amɛfee klalo kɛha la gbee kɛ la kudɔmɔ lɛ he nɔkwɛmɔnɔ. Afɔɔ nitsumɔhe nine lɛ yijiemɔ yɛ ŋaa kɛ ekomefeemɔ ni emli nitsulɔi lɛ yɔɔ lɛ he. Yɛ afi 2001 lɛ, ahã amɛ klɛŋklɛŋ jweremɔ nɔ̃ yɛ nibii ní ajieɔ atsɔɔ mɛi lɛ mli. Amɛsaa amɛhe koni amɛtsu nitsumɔ kpakpa ni baanyɛ ahere mɛi ayiwala kɛ́ la eje.

Sɔɔmɔ ni He Yɔɔ Sɛɛnamɔ

Shi kɛlɛ, Yehowa Odasefoi yɛ nitsumɔ kpakpa kroko ni he hiaa waa, ní no hu hereɔ mɔ yiwala lɛ he miishɛɛ. Amɛyasaraa amɛkutsoŋbii daa koni amɛgba amɛ Nyɔŋmɔ Maŋtsɛyeli lɛ he sanekpakpa lɛ. (Mateo 24:14) Odasefoi lɛ woɔ mɛi ahewalɛ ni amɛkase Biblia mli shishitoo mlai ni amɛkɛtsu nii yɛ amɛshihilɛ mli koni eha amɛ amrɔ shihilɛ nɛɛ aya hiɛ, ní amɛná naanɔ wala yɛ jeŋ ni anɔkwa toiŋjɔlɛ kɛ shweshweeshwe shihilɛ baahi mli lɛ he hiɛnɔkamɔ.

Ekolɛ mɛi komɛi ahiɛ esɔŋ sɛɛnamɔ ni yɔɔ sɔɔmɔ ni Yehowa Odasefoi lɛ kɛ amɛhe woɔ mli lɛ he, ni amɛbaabu amɛ akɛ mɛi ni gbaa mɛi anaa. Shi kɛlɛ, Kojolɔ Jean Crepeau ni yɔɔ Quebec Kojomɔhe Wulu yɛ Canada lɛ ná susumɔ ni yɔɔ srɔto. Yehowa Odasefoi ni yɔɔ jɛmɛ lɛ bi Blainville ni yɔɔ Quebec lɛ akutsoŋ mla ní biɔ ní amɛná gbɛŋmɛɛ wolo dani amɛshiɛ yɛ shia kɛ shia lɛ he sane. Yɛ kojomɔhe lɛ yiŋkpɛɛ mli lɛ, Kojolɔ Crepeau wie akɛ: “Yehowa Odasefoi ashiɛmɔ nitsumɔ lɛ ji Kristofoi amaŋ sɔɔmɔ ni . . . woji ní Odasefoi lɛ kɛhaa maŋbii ni  yɔɔ he miishɛɛ lɛ ji woji ni he hiaa, ní kɔɔ saji tamɔ jamɔ, Biblia lɛ, tsofai fɔji, dãatɔɔ, oblahii kɛ oblayei atsɔsemɔ, gbalashihilɛ mli naagbai kɛ gbalamlitsemɔ he.” Kojomɔ ni akɛha lɛ tee nɔ ewie akɛ: “Kojomɔhe lɛ baanyɛ amu sane naa pɛ akɛ, eji jɛmɔ, hiɛshishwiemɔ, wiemɔ sha, kɛ heguɔgbee akɛ akɛ Yehowa Odasefoi lɛ aaato nihɔɔlɔi ahe.”

Yehowa Odasefoi haa akutso ní amɛyɔɔ mli lɛ shihilɛ yaa hiɛ kɛtsɔ mɛi ni amɛyeɔ amɛbuaa amɛ koni amɛnyɛ amɛtsu daa gbi shihilɛ mli naagbai ahe nii, ni amɛkɛ wɔsɛɛ shihilɛ he hiɛnɔkamɔ haa amɛ lɛ nɔ. Biblia lɛ saa amɛ koni amɛnyɛ amɛtsu nakai nitsumɔ lɛ. “Ŋmalɛ fɛɛ ŋmalɛ ni jɛ Nyɔŋmɔ Mumɔ lɛŋ lɛ ehi ha nitsɔɔmɔ kɛ hiɛkamɔ kɛ mɔsaamɔ kɛ tsɔsemɔ ni yɔɔ jalɛ mli lɛ, koni Nyɔŋmɔ gbɔmɔ lɛ aye emuu, ni asaa lɛ pɛpɛɛpɛ aha nitsumɔ kpakpa fɛɛ nitsumɔ kpakpa.”—2 Timoteo 3:16, 17.

Ani obaasumɔ ní ole bɔ ni Yehowa Odasefoi lɛ tsɔɔ mɛi ni ‘esaa amɛhe amɛhã nitsumɔ kpakpa fɛɛ nitsumɔ kpakpa’ lɛ? Wɔmiiwo bo hewalɛ koni okpɛlɛ yelikɛbuamɔ ni amɛkɛhaa ní okase Biblia lɛ he saji babaoo lɛ nɔ, koni okɛ ohe aha amɛmaŋ sɔɔmɔ ni amɛtsuɔ yɛ he ni oyɔɔ lɛ kɛ je lɛŋ fɛɛ lɛ.

[Mfonirii ni yɔɔ baafa 30, 31]

Yehowa Odasefoi lɛ taoɔ ni amɛkɛ maŋ nɔyelɔi lɛ afee ekome

[Mfoniri ni yɔɔ baafa 31]

Ale Odasefoi lɛ akɛ amɛyeɔ amɛbuaa amɛkutsoŋbii