Bui ni Etooo Nu

YƐ Biblia beaŋ lɛ, atsaa bui titri lɛ koni akɛto nu. Yɛ bei komɛi amli lɛ, nomɛi pɛ ji gbɛ̀i ni atsɔɔ nɔ akɛbáa nu ni he hiaa lɛ yi yɛ Shiwoo Shikpɔŋ lɛ nɔ.

Beni gbalɔ Yeremia ŋmalaa Nyɔŋmɔ sanejajemɔ ko lɛ, ekɛ bui tsu nii yɛ mfonirifeemɔŋ shishinumɔ naa ni ewie akɛ: “Mimaŋ lɛ efee nifɔji enyɔ: amɛshi mi ní ji wala nubu lɛ, ni amɛyakpɛkpɛɛ bui ní ejwara ní nyɛɛɛ nu ato amɛha amɛhe.”—Yeremia 2:13.

Akɛni Israelbii lɛ ekpoo Yehowa, amɛ-Nyɔŋmɔ—ni ji “wala nubu lɛ”—hewɔ lɛ, amɛkɛ wɔŋjalɔi amaji yafee kpaŋmɔi kɛha tawuu mli yelikɛbuamɔ ní anyɛɛɛ akɛ he afɔ̃ nɔ, ni amɛjá apasa nyɔŋmɔi ni nyɛɛɛ nɔ ko afee lɛ. Taakɛ bɔ ni Yeremia kɛto he lɛ, nɛkɛ abobaahei ni amɛhiɛ kã nɔ nɛɛ batsɔ bui ni miidu ni bɛ hebuu loo yibaamɔ hewalɛ ko kwraa.—5 Mose 28:20

Ani wɔbaanyɛ wɔkase nii kɛjɛ nɛkɛ yinɔsane mli nɔkwɛmɔnɔ nɛɛ mli? Taakɛ eji yɛ Yeremia gbii lɛ amli lɛ, Yehowa, ni ji naanɔ Nyɔŋmɔ lɛ kã he eji nu Jɛɛhe kome pɛ ni haa wala. (Lala 36:10; Kpojiemɔ 4:11) Adesai baanyɛ aná naanɔ wala kɛjɛ lɛ pɛ eŋɔɔ kɛtsɔ e-Bi, Yesu Kristo nɔ. (Yohane 4:14; 17:3) Shi kɛlɛ, taakɛ Yeremia yinɔbii lɛ ji lɛ, ŋmɛnɛ, adesai babaoo sumɔɔ koni amɛkpoo Nyɔŋmɔ wiemɔ lɛ ni yɔɔ Biblia lɛ mli lɛ, ni amɛbaa lɛ shi po. Yɛ no najiaŋ lɛ, amɛkɛ amɛhiɛ fɔ̃ɔ maŋkwramɔŋ tsabaai, adesai ayaka susumɔi, kɛ jeŋ nileei kɛ susumɔi ní sɛɛnamɔ bɛ he ni gbeɔ Nyɔŋmɔ he guɔ lɛ anɔ. (1 Korintobii 3:18-20; Kolosebii 2:8) Nihalamɔ lɛ yɛ faŋŋ. Mɛni nɔ okɛ ohiɛ baafɔ̃? Ani okɛ ohiɛ baafɔ̃ Yehowa, ni ji “wala nubu lɛ” nɔ aloo okɛ ohiɛ baafɔ̃ “bui ní ejwara ní nyɛɛɛ nu ato amɛha amɛhe” lɛ anɔ?

[Mfoniri ni yɔɔ baafa 32]

Nyɔŋmɔyoo nyɛ ko he amaga ni akɛ nishɔ̃ɔ sũ ni wa waa fee ní ana yɛ Israelnyo ko gbonyobu mli

[He ni Sane lɛ Jɛ]

Photograph taken by courtesy of the British Museum