Sanebimɔi ni Jɛ Kanelɔi Adɛŋ

Mɛɛ shishinumɔ naa Ezekiel ‘tɔ mu’ loo ‘enyɛɛɛ ewie’ yɛ Yerusalem hekawoo kɛ hiɛkpatamɔ lɛ bei lɛ amli?

Klɛŋklɛŋ lɛ, akɛni ebɛ nɔ ko ní ekɛbaafata Yehowa gbalɛ shɛɛ sane ní etsɔ hiɛ ejaje momo lɛ he lɛ hewɔ.

Gbalɔ Ezekiel je esɔɔmɔ akɛ anɔkwa bulɔ kɛha Israelbii ni yɔɔ nomŋɔɔ mli yɛ Babilon lɛ shishi yɛ “maŋtsɛ Yehoiakin nomŋɔɔ afi ni ji enumɔ lɛ nɔ,” yɛ afi 613 D.Ŋ.B. (Ezekiel 1:2, 3) Yɛ afi 609 D.Ŋ.B. lɛ nyɔɔŋtsere nyɔŋ ni ji nyɔŋma lɛ nɔ gbi ni ji nyɔŋma lɛ, Nyɔŋmɔ ha ele Yerusalem he ka ni Babilonbii lɛ baawo lɛ shishijee. (Ezekiel 24:1, 2) Mɛni baajɛ hekawoo lɛ mli aba? Ani Yerusalem kɛ emli bii ni bɛ hemɔkɛyeli lɛ baaje mli? Ákɛ bulɔ lɛ, Ezekiel etsɔ hiɛ ejaje Yehowa hiɛkpatamɔ shɛɛ sane ni tɔmɔ ko bɛ he lɛ momo, ni ehe ehiaaa ni Ezekiel kɛ nɔ ko afata he ní ehã nakai shɛɛ sane lɛ afee tamɔ nɔ ni kɔneɔ mɔ yiŋ waa. Ezekiel tɔ mu yɛ nɔ kroko ni ebaawie kɛfata Yerusalem he kawoo sane lɛ he.—Ezekiel 24:25-27.

Aaafee nyɔji ekpaa yɛ Yerusalem hiɛkpatamɔ yɛ afi 607 D.Ŋ.B. lɛ sɛɛ lɛ, mɔ ko ni je mli lɛ kɛ maŋ krɔŋkrɔŋ lɛ amaŋfɔfeemɔ lɛ he adafitswaa baha Ezekiel yɛ Babilon. Gbɛkɛ dani mɔ ní je mli lɛ aaashɛ shi lɛ, Yehowa ‘gbele Ezekiel daaŋ, ni etɔɔɔ mu dɔŋŋ.’ (Ezekiel 33:22) No kɛ nyɛ ni Ezekiel nyɛɛɛ ewie lɛ ba naagbee.

Ani Ezekiel tɔ mu diɛŋtsɛ yɛ nakai beaŋ? Eka shi faŋŋ akɛ jeee nakai, ejaakɛ be ni ‘etɔ mu’ lɛ sɛɛ po lɛ, egba gbalɛi ni kɔɔ titri lɛ maji ni ebɔle Yerusalem he ni nya yɛ eshigbeemɔ lɛ he lɛ he. (Ezekiel, yitso 25-32) Yɛ Ezekiel nitsumɔ ákɛ gbalɔ kɛ bulɔ lɛ shishijee mli lɛ, Yehowa kɛɛ lɛ akɛ: “Maha olilɛi akpɛtɛ odaa yiteŋ, ni oootɔ mu, ni otsɔŋ kãlɔ ohaŋ amɛ; ejaakɛ weku toigbolɔi ji amɛ. Shi kɛji mikɛo bawie lɛ, magbele odaaŋ.” (Ezekiel 3:26, 27) Kɛ́ Yehowa bɛ shɛɛ sane ko kɛha Israel lɛ, esaaa akɛ Ezekiel wieɔ nɔ ko yɛ nakai maŋ lɛ he. Esa akɛ Ezekiel awie nɔ ni Yehowa taoɔ ni ewie lɛ yɛ bei ni Yehowa taoɔ ni efee nakai lɛ mli. Mu ni Ezekiel tɔ lɛ tsɔɔ akɛ ewieee wiemɔi ni hiɛ gbalɛ he shishinumɔ kɛha Israelbii lɛ.

Ŋmɛnɛŋmɛnɛ beaŋ bulɔ kuu lɛ, ni ji Kristofoi ni afɔ amɛ mu lɛ miibɔ kɔkɔ yɛ Kristendom ni feɔ Yerusalem he mfoniri lɛ hiɛkpatamɔ lɛ he. Kɛ́ ‘amanehulu kpeteŋkpele’ lɛ fɛ́ ní ekpata “Babilon kpeteŋkpele” lɛ, ni ji jeŋ apasa jamɔ maŋtsɛyeli lɛ hiɛ lɛ, Ezekiel kuu ní afɔ amɛ mu lɛ ewieŋ nɔ ko dɔŋŋ yɛ Kristendom ni feɔ nakai maŋtsɛyeli lɛ fã titri lɛ hiɛkpatamɔ lɛ he.—Mateo 24:21; Kpojiemɔ 17:1, 2, 5.

Hɛɛ, gbi ko baaba ni shwɛɛnii ní afɔ amɛ mu lɛ kɛ amɛnanemɛi lɛ baatɔ mu, ní amɛbɛ Kristendom nɔ ko kɛɛmɔ dɔŋŋ. No baafee be ní “akolontoi nyɔŋma” lɛ kɛ “kooloo lɛ” kɛaafee Babilon Kpeteŋkpele lɛ amaŋfɔ ni amɛŋmɛ lɛ yayai. (Kpojiemɔ 17:16) Yɛ anɔkwale mli lɛ, enɛ etsɔɔɔ akɛ Kristofoi baatɔ mu diɛŋtsɛ. Taakɛ amɛfeɔ amrɔ nɛɛ po lɛ, amɛbaajie Yehowa yi ní amɛtsi etã daa gbi “yɛ yinɔi fɛɛ nɔ.”—Lala 45:18; 145:2.