Tɛlivishiŋ nɔ Nifeemɔ Ha Ekɛ Yijiemɔ Ha Nyɔŋmɔ
Maŋtsɛyeli Jajelɔi Bɔ Amaniɛ
Tɛlivishiŋ nɔ Nifeemɔ Ha Ekɛ Yijiemɔ Ha Nyɔŋmɔ
BƆFO Paulo wie akɛ, “Mɛi komɛi lɛ, hetsɛ̃mɔ kɛ mɛi anaa béi taomɔ hewɔ amɛshiɛɔ Kristo lɛ; shi mɛi komɛi hu kɛ jwɛŋmɔ kpakpa shiɛɔ.” (Filipibii 1:15) Yɛ bei komɛi amli lɛ, mɛi po ni bɔɔ mɔdɛŋ ni amɛgbe Yehowa webii ahe guɔ lɛ eha mɛi ni hiɛ tsui ni ja lɛ eba anɔkwale lɛ he ni amɛjeee gbɛ.
Yɛ November 1998 lɛ, ajie nibii ni yaa nɔ yɛ Betel, ni ji Yehowa Odasefoi lɛ anitsumɔhe nine ni yɔɔ Louviers yɛ France lɛ yɛ France maŋ lɛ tɛlivishiŋ nɔ. Yɛ bɔ ni mɛi fee amɛnii yɛ gbɛ̀i srɔtoi anɔ yɛ nifeemɔ lɛ he fɛɛ sɛɛ lɛ, ewo yibii kpakpai ni akpaaa gbɛ.
Mɛi ni kwɛ nifeemɔ lɛ ateŋ mɔ kome ji Anna-Paula, ni eshia kɛ Betel jɛkɛmɔ ji kilomitai 60 pɛ lɛ. Anna-Paula, ni ji nyɛ ni etse gbala ni yɔɔ bii enyɔ lɛ miitao nitsumɔ. No hewɔ lɛ, enɔ jetsɛremɔ leebi lɛ etswa Betel tɛlifoŋ ní ekɛmiitao nitsumɔ. Ewie akɛ: “Minu he akɛ eji he ko kpakpa, ni ákɛ nii ni atsuɔ yɛ jɛmɛ lɛ he yɛ sɛɛnamɔ.” Kwɛ bɔ ni enaa kpɛ ehe ha, beni ená ele akɛ mɛi fɛɛ ni tsuɔ nii yɛ Betel lɛ ji sɔɔlɔi ní kɛ amɛbei eha lɛ! Yɛ sanegbaa kuku ni kɔɔ Yehowa Odasefoi lɛ anitsumɔi lɛ ahe sɛɛ lɛ, ekpɛlɛ ní Odasefonyo ko abasara lɛ.
Beni Léna, ni ji bei fɛɛ sɔɔlɔ yɛ asafo ni yɔɔ jɛmɛ lɛ mli lɛ yasara lɛ lɛ, amɛgba sane kakadaŋŋ, ni Anna-Paula he Nilee Ni Kɛ Mɔ Yaa Naanɔ Wala Mli * wolo lɛ. Beni saramɔ ni nyiɛ sɛɛ lɛ shɛɔ lɛ, Anna-Paula ekane wolo lɛ fɛɛ egbe naa ni eyɛ sanebimɔi babaoo. Ekpɛlɛ Biblia mli nikasemɔ nɔ amrɔ nɔŋŋ. Anna-Paula wie akɛ: “Eji hegbɛ kɛha mi akɛ mana Nyɔŋmɔ Wiemɔ lɛ. Mimɔko Biblia mli dã.”
Yɛ January mli lɛ, Anna-Paula yasara Betel, ni yɛ otsi ni nyiɛ sɛɛ lɛ mli lɛ etee eklɛŋklɛŋ Kristofoi akpee. Yɛ no sɛɛ etsɛɛɛ lɛ, ekɛ ebii lɛ bɔi Biblia lɛ kasemɔ ni ebɔi enanemɛi lɛ odaseyeli. Ewie akɛ: “Minyɛɛɛ matsĩ nɔ ni mikaseɔ lɛ naa. Miisumɔ ni magba mɛi Biblia mli anɔkwalei lɛ ahe sane ni mashɛje amɛmii.” Beni Anna-Paula ebɔ mɔdɛŋ eye lɛ diɛŋtsɛ enaagbai srɔtoi lɛ anɔ lɛ sɛɛ lɛ, ebɔi kpeei yaa daa. Etee ehiɛ oyayaayai ni abaptisi lɛ yɛ May 5, 2002.
Kɛfata he lɛ, yɛ Anna-Paula nɔkwɛmɔnɔ kpakpa kɛ ekãa ni eyɔɔ yɛ shiɛmɔ nitsumɔ lɛ mli hewɔ lɛ, enyɛ bɔi Biblia lɛ kasemɔ ni etsɛɛɛ ni abaptisi lɛ. Anna-Paula wie akɛ: “Minyɛŋ mikɛ wiemɔ atsɔɔ miishɛɛ ni miyɔɔ lɛ mli. Midaa Yehowa shi daa yɛ jɔɔmɔi fɛɛ ni ekɛjɔɔ mi lɛ kɛ le ní eha mile lɛ lɛ hewɔ.”
[Shishigbɛ niŋmaa]
^ kk. 6 Mɛi ni fee ji Yehowa Odasefoi.
[Mfonirii ni yɔɔ baafa 8]
Yiteŋgbɛ: Anna-Paula
Shishigbɛ: Agbó ni atsɔɔ mli kɛboteɔ France nitsumɔhe nine lɛ