Yesu Weku—Namɛi Ni?

BEI pii lɛ, nɔ ni onaa yɛ je lɛŋ hei babaoo yɛ December mli ji mfonirii ni tsɔɔ Yesu fɔmɔ ákɛ abifao ni enyɛ Maria hiɛ lɛ yɛ suɔmɔ mli, kɛ Yosef mɔ ni batsɔ̃ etsɛ lɛ. Nɛkɛ weku he mfonirii nɛɛ baanyɛ agbala mɛi ni tsɛɛɛ amɛhe Kristofoi lɛ po ajwɛŋmɔ. Akɛni Yesu ji mɔ ni agbalaa jwɛŋmɔ kɛyaa enɔ titri hewɔ lɛ, mɛni ji nɔ ni Ŋmalɛi lɛ kɛɔ wɔ yɛ adesai aweku ni Yesu jɛ mli lɛ he?

Saji ni kɔɔ weku ni afɔ́ Yesu awo mli lɛ he lɛ yɛ miishɛɛ waa. Oblayoo fro ko ni atsɛɔ lɛ Maria lɛ fɔ́ lɛ, ni no hewɔ lɛ ebatsɔ adesai aweku lɛ mlinyo. Taakɛ Biblia lɛ tsɔɔ lɛ, atsɔ mumɔ krɔŋkrɔŋ lɛ nɔ ni ajie ewala kɛjɛ ŋwɛi kɛbawo Maria fɔmɔ kotoku lɛ mli. (Luka 1:30-35) Dani aaatswa naakpɛɛ gbɛ ni aaatsɔ nɔ aŋɔ Yesu hɔ́ lɛ he adafi lɛ, no mli lɛ átsɛ Maria he baa momo aha nuu ko ni atsɛɔ lɛ Yosef, mɔ ni agbɛnɛ lɛ ebaatsɔ Yesu tsɛ lɛ.

Yɛ Yesu fɔmɔ sɛɛ lɛ, Yosef kɛ Maria fɔ́ bii krokomɛi, ni ji Yesu nyɛ bihii kɛ biyei. Enɛ jeɔ kpo faŋŋ yɛ sane ni maŋbii ni yɔɔ Nazaret lɛ bi yɛ sɛɛ mli yɛ Yesu he lɛ mli akɛ: “Ani jeee ŋaalɔ lɛ bi lɛ nɛ? Ani jeee enyɛ atsɛɔ Maria, kɛ enyɛmimɛi hii Yakobo kɛ Yose kɛ Simon kɛ Yuda lɛ? Ni enyɛmimɛi yei lɛ, ani jeee amɛ fɛɛ amɛkɛ wɔ yɔɔ?” (Mateo 1:25; 13:55, 56; Marko 6:3) Wɔbaanyɛ wɔmu sane naa yɛ enɛ he akɛ, mɛi ni bafeɔ Yesu weku kɔkrɔɔ lɛ mli bii lɛ ji efɔlɔi, enyɛmimɛi hii ejwɛ kɛ kɛ́ hooo lɛ enyɛmimɛi yei enyɔ.

Shi kɛlɛ, mɛi komɛi yɛ ŋmɛnɛ ni amɛheee amɛyeee akɛ Yesu nyɛmimɛi hii kɛ yei lɛ ji Yosef kɛ Maria bii. Mɛni hewɔ? New Catholic Encyclopedia lɛ kɛɔ akɛ: “Sɔlemɔ lɛ etsɔɔ kɛjɛ eshishijee gbii lɛ amli tɔ̃ɔ akɛ Maria ji oblayoo fro daa. Belɛ, yɛ nɔ ni ekɛɔ nɛɛ hewɔ lɛ, ŋwanejee ko bɛ he akɛ Maria bɛ bii krokomɛi.” Nɛkɛ wolo ni akɛtaoɔ saji amli nɛɛ nɔŋŋ tsɔɔ akɛ wiemɔ “nyɛmi nuu” kɛ “nyɛmi yoo” lɛ baanyɛ adamɔ shi kɛha “mɔ ko aloo mɛi komɛi ni jamɔ loo nɔ kroko efee amɛ ekome,” loo ebaanyɛ edamɔ shi kɛha wekumɛi, ekolɛ nyɛkwɛ̃ bii loo tsɛkwɛ̃ bii.

Ani nakai ji bɔ ni sane lɛ yɔɔ diɛŋtsɛ? Katolik Nyɔŋmɔ jamɔ he nilelɔi komɛi ni kɛ blema tsɔɔmɔ nɛɛ kpãaa gbee lɛ po fiɔ susumɔ akɛ Yesu yɛ heloonaa nyɛmimɛi hii kɛ nyɛmimɛi yei lɛ sɛɛ. John P. Meier, ni ji Catholic Bible Association of America lɛ tsutsu sɛinɔtalɔ lɛ ŋma akɛ: “Yɛ Kpaŋmɔ Hee lɛ mli lɛ, kɛ́ akɛ adelphos [nyɛmi] lɛ tsu nii ni jeee yɛ mfonirifeemɔ diɛŋtsɛ naa, shi moŋ akɛtsu nii ni akɛtsɔɔ heloonaa tsakpaa loo mla naa tsakpaa ko mli lɛ, no lɛ etsɔɔ nyɛmimɛi ni ji nyɛ kɛ tsɛ kome bii aloo nyɛ bii loo tsɛ bii, ni ehiɛɛɛ shishinumɔ kroko yɛ sɛɛ dɔŋŋ.” * Hɛɛ, Ŋmalɛi lɛ tsɔɔ akɛ Yesu yɛ nyɛmimɛi hii kɛ yei ni Yosef kɛ Maria fɔ́ amɛ.

Sanekpakpai lɛ tsĩɔ Yesu wekumɛi krokomɛi atã, shi agbɛnɛ lɛ, nyɛhaa wɔgbalaa wɔjwɛŋmɔ kɛbaa Yesu weku kɔkrɔɔ lɛ nɔ, ni wɔkwɛ nɔ ni wɔbaanyɛ wɔkase kɛjɛ amɛdɛŋ.

[Shishigbɛ niŋmaa]