‘Nyɔŋmɔ Ehiii Sɔlemɔtsui Ni Akɛ Niji Fee Mli’

ŊWANEJEE ko bɛ he akɛ bɔfo Paulo le Athena sɔlemɔtsui lɛ jogbaŋŋ, ejaakɛ abaanyɛ ana enɛɛmɛi yɛ maji babaoo ni etee mli yɛ emaŋsɛɛ sanekpakpa shiɛmɔ gbɛfaai lɛ amli. Taakɛ The Encyclopædia Britannica lɛ tsɔɔ lɛ, jeee akɛ Athena ehe gbɛi akɛ ta kɛ ŋaalee nyɔŋmɔyoo pɛ kɛkɛ, shi moŋ ehe gbɛi hu akɛ nyɔŋmɔyoo ni le “ŋaa nitsumɔi ni he esa titri kɛ toiŋjɔlɛ sɛɛtiumɔ.”

Athena sɔlemɔtsu ni ehe gbɛi fe fɛɛ lɛ ji Parthenon, ni ama yɛ Ateene ni ji maŋtiase ni akɛ nyɔŋmɔyoo lɛ gbɛi ewo lɛ lɛ mli. Akɛ shika kɛ shwuɔwu eshɔ̃ Athena he amaga ko ni kwɔlɛ shɛɔ mitai 12 lɛ ni akɛma Parthenon ni abuɔ lɛ akɛ sɔlemɔtsui ni fe fɛɛ yɛ blema je lɛ mli lɛ ateŋ ekome lɛ mli. Beni Paulo tee Ateene lɛ, no mli lɛ sɔlemɔtsu ni akɛ fɔbitɛ yɛŋ fee nɛɛ ehe gbɛi waa momo yɛ maŋtiase lɛ mli nɔ ni miihe ashɛ afii 500.

Paulo shiɛ ‘Nyɔŋmɔ ni ehiii sɔlemɔtsui ni akɛ niji fee mli’ lɛ he sane etsɔɔ Ateenebii akuu ko yɛ he ko ni bɛŋkɛ Parthenon. (Bɔfoi lɛ Asaji 17:23, 24) Ekolɛ bɔ ni Athena sɔlemɔtsui lɛ yɔɔ fɛo waa loo bɔ ni emagai lɛ je agbo ha lɛ ha ebafee nɔ ni sa jogbaŋŋ kɛha Paulo toibolɔi lɛ ateŋ mɛi komɛi fe Nyɔŋmɔ ko ni amɛnaaa lɛ ni amɛleee lɛ lɛ. Shi taakɛ Paulo tsɔɔ mli lɛ, esaaa akɛ asusuɔ akɛ adesai a-Bɔlɔ lɛ “tamɔ shika loo jwiɛtɛi loo tɛ ko [nɔ ko, NW] ní gbɔmɔ . . . fee.”—Bɔfoi lɛ Asaji 17:29.

Nyɔŋmɔi kɛ nyɔŋmɔyei tamɔ Athena—ni amɛnunyam damɔ sɔlemɔtsui kɛ amagai anɔ lɛ—eba ni amɛtee. Athena he amaga lɛ laaje yɛ Parthenon lɛ mli yɛ klɛŋklɛŋ afii 500 Ŋ.B. lɛ mli, ni esɔlemɔtsui lɛ ahe nibii fioo pɛ ni eshwɛ ji nɔ ni yɔɔ lolo. Namɔ kɛ ehiɛ fɔ̃ɔ Athena nɔ kɛha ŋaalee kɛ gbɛtsɔɔmɔ ŋmɛnɛ?

Kwɛ bɔ ni enɛ yɔɔ srɔto yɛ Yehowa, ni ji “naanɔ Nyɔŋmɔ lɛ” ni adesa ko enako lɛ pɛŋ lɛ gbɛfaŋ. (Romabii 16:26; 1 Yohane 4:12) Kora bihii lɛ ŋma akɛ: “Nɛkɛ Nyɔŋmɔ nɛɛ ji wɔ-Nyɔŋmɔ kɛyaa naanɔ; lɛ nɔŋŋ eeetsɔɔ wɔ gbɛ.” (Lala 48:15) Gbɛ kome ni wɔɔtsɔ nɔ wɔná Yehowa Nyɔŋmɔ gbɛtsɔɔmɔ lɛ he sɛɛ ji, ni wɔkase e-Wiemɔ ni ji Biblia lɛ, ni wɔkɛ emli ŋaawoo lɛ atsu nii yɛ wɔshihilɛ mli.